ABO ta haña ku ta fásil pa sirbi Yehova?— E Gran Maestro no a bisa ku ta fásil. E anochi promé ku nan a mata Hesus, el a bisa su apòstelnan: “Si mundu odia boso, sa anto ku el a odia ami promé ku boso.”—Juan 15:18.

Pedro a broma ku nunka é lo no bai laga Hesus, pero Hesus a bisa ku riba e mesun anochi ei Pedro tabata bai nenga tres biaha ku e konos’é. I esei ta presis loke Pedro a hasi! (Mateo 26:31-35, 69-75) Kon un kos asina por a pasa?— El a pasa dor ku Pedro a haña miedu, i e mesun kos a pasa ku e otro apòstelnan tambe.

Bo sa dikon e apòstelnan a haña miedu?— Dor ku nan a keda sin hasi un kos hopi importante. Ora nos siña tokante e kos ei, esei lo yuda nos keda sirbi Yehova maske kiko hende bisa nos òf hasi ku nos. Pero pa kuminsá nos mester wak atrobe ta kiko a sosodé riba e último anochi ku Hesus a pasa huntu ku su apòstelnan.

Promé nan a selebrá Pasku Hudiu huntu. Pasku Hudiu ta un komementu spesial ku nan tabata pone tur aña pa e pueblo di Dios kòrda e dia ku Dios a libra nan for di sklabitut na Egipto. Ora nan a kaba, Hesus a siña nan tene un otro komementu spesial. Den un otro kapítulo nos ta bai papia mas tokante e komementu aki, i nos lo mira kon e ta yuda nos keda kòrda Hesus. Despues di e komementu ei Hesus a bisa su apòstelnan un par di palabra di animashon, anto ora nan a kaba el a hiba nan e hòfi di Getsemané. Nan tabata bai e hòfi ei kada bes.

Den e hòfi Hesus a kita bai for di nan pa hasi orashon. El a bisa  Pedro, Santiago ku Juan pa nan tambe hasi orashon. Pero nan a pega soño. Tres biaha Hesus a bai su so pa resa, i tur tres biaha ora el a bini bèk el a haña Pedro ku e otronan na soño! (Mateo 26:36-47) Bo sa pakiko nan mester a keda lantá pa hasi orashon?— Laga nos papia riba e kos aki.

Mas trempan riba e anochi ei, Hudas Iskariot tabata huntu ku Hesus i e otro apòstelnan n’e komementu di Pasku Hudiu. Hudas a bira ladron, bo ta kòrda? Anto awor el a bira un traidor tambe. Dor ku Hudas tabata sa ku Hesus tabata reuní kada bes ku su apòstelnan den e hòfi di Getsemané, el a hiba e sòldánan einan pa nan kohe Hesus prezu. Ora nan a yega, Hesus a puntra nan: “Ta ken boso ta buska?”

E sòldánan a respondé: “Hesus.” Hesus no tabatin miedu. El a kontestá nan: “Ta ami.” E sòldánan a spanta asina tantu di mira kuantu kurashi Hesus tabatin, ku nan a hala atras i kai abou na suela. E ora ei Hesus a bisa nan: ‘Si ta ami boso ta buska, laga mi apòstelnan bai.’—Juan 18:1-9.

Ora e sòldánan a kohe Hesus tene i a mara su man, e apòstelnan a haña miedu i nan a kore bai. Pero Pedro ku Juan a keda kana un poko mas leu nan tras, pasobra nan kier a sa kiko ta bai pasa. Mas lat e anochi ei nan a hiba Hesus kas di Kaifas, e sumo saserdote. Dor ku Juan tabata konosé e sumo saserdote, e mucha muhé ku tabata kuida porta a laga é ku Pedro drenta riba e plenchi den kurá.

E saserdotenan a reuní kaba na kas di Kaifas pa tene un huisio. Nan a trese testigu pa gaña riba Hesus, pasobra nan kier a laga mat’é. Anto e hendenan a dal Hesus moketa i pas’é bòftá. Pedro tabata djis eibanda ora ku tur e kosnan ei tabata sosodé.

 Un mucha muhé esklabo, esun ku a laga Pedro ku Juan drenta, a rekonosé Pedro. El a bis’é: “Abo tambe tabata huntu ku Hesus!” Pero Pedro a bis’é ku e no konosé Hesus mes. Un ratu despues un otro mucha muhé tambe a rekonosé Pedro. El a bisa e hendenan ku tabatin eibanda: “E hòmber aki tabata huntu ku Hesus.” Pedro a bolbe nenga ku e konosé Hesus. Un ratu despues, un grupo di hende a mira Pedro i a bis’é: “Siguramente abo tambe ta un di nan.” Pa di tres bes, Pedro a nenga ku e konos’é Hesus. El a bisa nan: “Mi no konosé e hòmber!” Pedro a asta hura ku e no ta gaña. E ora ei Hesus a bira wak e.—Mateo 26:57-75; Lukas 22:54-62; Juan 18:15-27.

Bo sa dikon Pedro a gaña?— Sí, ta pasobra e tabatin miedu. Pero pakiko el a haña miedu? Tabatin un kos ku Pedro por a hasi p’é haña mas kurashi, pero e no a hasié. Ta kiko e kos ei ta? Pensa un ratu. Kiko Hesus mes a hasi p’e haña mas kurashi?— Sí, el a resa na Dios, anto Dios a yud’é haña kurashi. I kòrda ku Hesus a bisa Pedro tres biaha pa e tambe resa, i p’e keda lantá i keda vigilá. Pero kiko a sosodé?—

 Tur tres biaha Pedro a pega soño. E sí no a resa, ni e no a keda vigilá. P’esei, ora nan a bin kohe Hesus prezu, Pedro no tabata prepará. P’esei mas lat, durante e huisio, ora nan tabata dal Hesus i traha plan pa laga mat’é, Pedro a haña miedu. Ma djis un par di ora promé, ta kiko Hesus a bisa su apòstelnan ku nan por a spera?— Hesus a bisa nan ku meskos ku mundu a odia é, mundu lo odia nan tambe.

Awor, pensa un ratu. Abo por haña bo den un kos manera loke Pedro a pasa aden? Imaginá bo ku bo ta den klas, anto e otro muchanan ta  kuminsá papia kos malu tokante hende ku no ta saludá bandera òf ku no ta selebrá Pasku. Awor, kiko bo ta hasi si un hende bini riba bo i puntra bo: “Ta bèrdat ku boso no ta saludá bandera?” Òf kisas otro muchanan ta bisa: “Nos a tende ku boso no ta ni selebrá Pasku!” Lo bo tin miedu di bisa nan e bèrdat?— Lo bo haña gana di gaña, meskos ku Pedro?—

Despues Pedro a sinti masha duele mes ku el a nenga ku e konosé Hesus. Ora el a realisá kiko el a hasi, el a sali pafó i kuminsá yora. Sí, el a bolbe na Hesus. (Lukas 22:32) Awor, pensa riba e kos aki. Kiko por yuda nos pa nos no haña asina hopi miedu i hasi meskos ku Pedro?— Kòrda ku Pedro no a hasi orashon, ni e no a keda vigilá. P’esei, segun bo, kiko nos mester hasi pa nos ta un siguidó di e Gran Maestro?—

Nos tin ku resa pidi Yehova yuda nos. Ora Hesus a resa, bo sa kiko Dios a hasi p’e?— El a manda un angel pa dun’é kurashi. (Lukas 22:43) Dios su angelnan por yuda nos tambe?— Beibel ta bisa: “E angel di Señor ta kampa rònt di esnan ku ta tem’é, i ta reskatá nan.” (Salmo 34:7) Pero pa Dios yuda nos, nos no mester resa pidi yudansa so. Nos mester hasi un kos mas. Bo sa kiko mas?— Hesus a bisa su siguidónan pa nan keda lantá i keda vigilá. Kon bo ta kere ku nos por hasi e kos ei?—

Nos mester skucha bon kiko nan ta bisa na nos reunionnan kristian, i paga tinu na loke nos ta lesa den Beibel. Pero nos tin ku resa na Yehova regularmente tambe, i pidié p’e yuda nos sirbié. Si nos hasi asina, nos lo haña yudansa pa vense miedu. E ora ei nos lo sinti nos kontentu ora nos haña un chèns pa papia ku hende tokante e Gran Maestro i su Tata.