KARE mogo tika cwinyi cwer ma miyo ibedo kic kic?— Kare mogo tika ipenye kekeni ka ce ngat mo tye ma mar-ri?— Lutino mukene gipenye kumeno. Ento Lubanga ocikke ni: “An wiya pe biwil i komwu.” (Icaya 49:15) Mono pe ber mada me tam i kom lok meno?— Lubanga Jehovah kara ada marowa!

Dano mo acel ma ocoyo Baibul owacci: ‘Ka wora ki maa dok gubwota woko, ento Jehovah gire bigwoka.’ (Jabuli 27:10) Ngeyo ni Jehovah paro piwa kweyo cwinywa adada, pe kumeno?— Jehovah wacciwa ni: ‘Pe ilwor, an atye kwedi, abikonyi.’—Icaya 41:10.

I kine mukene, Jehovah weko Catan kelo peko i komwa. Jehovah bene weko Catan temo Luticce. Larac-ci oketo can malit i kom Yecu, ma oweko Yecu okok bot Jehovah ni: “Lubangana, Lubangana, itenya woko pingo?” (Matayo 27:46) Kadi bed Yecu olimo can, ento en onongo ngeyo ni Jehovah mare mada. (Jon 10:17) Yecu bene ongeyo ni Lubanga omiyo kare ki Catan ni kong otem Luticce kun weko Catan miyo gideno can. I dul mukene wabitito gin mumiyo Lubanga pud omiyo kare ki Catan me timo man.

Ka pud itidi, cawa mo keken lworo romo maki. Me laporre, tika nino mo dong irweny?— Tika lworo omaki?— Lutino mapol lworo makogi. I nino mo acel, Lapwony Madit omiyo lapor i kom  gin mo acel ma onongo orweny. Pe latin aye onongo orweny. Ento romo aye.

In bene ibedo calo romo i yo mapat. Meno cakke nining? Romo pe dit tutwal nyo tek tutwal. Dok gimito ni ngat mo ogwokgi. Ngat ma gwoko romi kilwongo ni lakwat.

I laporre-ni, Yecu oloko i kom lakwat mo ma onongo tye ki romi miya acel. Ento acel i kingi orweny woko. Romo-ni onongo gwok mito neno gin ma tye loka cere tungcel. Ento i nge kare manok, romo-ni onongo dong tye ka mabor ki luwote. Tika itwero tamo kit ma romo meno owinyo kwede i cawa ma ongiyo ka ngete ci oneno ni etye kene?—

Ngo ma lakwat-ti otimo i kare ma en oniang ni romo acel orweny woko? Tika en oweko romo ca ni olim can kunnu pien en aye omito? Nyo en oweko romi 99 ca ka maber ci odok cen ka yenyo ma orweny ca? Tika pore me balo cawa me yenyo romo acel keken ma orweny?— Ka in onongo ibedo romo ma orweny ca kono, onongo ibimito ni lakwat-ti oyenyi?—

Lakwat-ti onongo maro romine ducu kadi wa ma orweny ca. Pi meno, en ocito ka yenyo romo ma orweny ca. Go kong  yomcwiny ma romo man obedo kwede i kare ma oneno lakwat-ti tye ka bino! Yecu owacci lakwat-ti obedo ki yomcwiny madit pi nongo romone ma onongo orweny-nyi. Cwinye obedo yom pi romo man ma kato pi romi 99 ma onongo gitye-ni. I lapor pa Yecu-ni, anga ma obedo calo lakwat-ti? Nga ma marowa tutwal macalo lakwat ma maro romine?— Yecu owacci Wonne ma i polo marowa. Dok Wonne aye Jehovah.

Lubanga Jehovah aye Lakwat Madit pa jone. En maro jo ducu ma gitiyo pire, man kwako wa jo matino calo in. En pe mito ni ngat mo keken i kinwa owanne nyo oto woko. Man cuko cwinywa me ngeyo ni Lubanga pud dong marowa ya!—Matayo 18:12-14.

In mono ada itye ki niye i kom Lubanga Jehovah?— Itamo ni en tye calo babani nyo ngat mo ma mari?— Ada gire wan pe watwero neno Jehovah. Pe watwero neno en pien en obedo  Cwiny. En tye ki kom ma wangwa pe twero nenone. Ento en ada tye dok bene twero nenowa. En ngeyo awene ma wamito iye kony. Dok waromo lok bote i lega, kit macalo waloko ki dano mukene i lobo kany. Jehovah mito ni watim meno.

Dong ka iwinyo ni cwinyi cwer nyo itye keni, ngo ma myero itim?— Lok bot Jehovah. Nyik cok bote, ci en bikweyo cwinyi dok bikonyi. Wi myero opo ni Jehovah mari mada kadi bed iwinyo ni itye keni. Kong wayab Baibulwa. I Jabuli 23, cakke i tyeng 1 wacciwa ni: “Rwot [Jehovah] aye lakwat ma kwayo an; pe tye gin mo ma birem bota. En miya abuto i olet maber; en tera i wang pii mangic.”

Nen gin ma lacoc man omedo i tyeng me 4: “Kadi bed awoto i nota me tipo to, pe abilworo gin marac mo; pien in itye kweda; tongi ki odooni me kwat gimiyo cwinya bedo tek.” Man aye kit ma dano giwinyo kwede ka Lubangagi aye Jehovah. Ginongo kwe cwiny ka gitye i peko. In bene mono iwinyo kit meno?—

Kit macalo lakwat ma lamar gwoko romine-ni, Jehovah bene miyo gwok maber bot jone. En nyutigi yo matir ma myero guwot iye, dok gin ginongo yomcwiny i lubo yone. Kadi bed peko orumogi i dyere, gin pe myero gubed ki lworo. Lakwat tiyo ki odoo  kwat-te nyo tonge me gwoko lee ma gibino ka wano romine. Baibul tito kit ma Daudi ogwoko kwede romine i kare ma labwor ki orudi gubino ka makogi. (1 Camuel 17:34-36) Dong jo pa Lubanga gingeyo ni Lubanga Jehovah bigwokogi bene. Gin gitwero bedo agonya pien gingeyo ni Lubanga tye kwedgi.

Jehovah maro romine adada, dok gwokogi maber. Baibul waco ni: “En bikwayo romine calo lakwat, bitingo litino romine i bade.”—Icaya 40:11.

Man mono pe miyo ibedo ki yomcwiny me ngeyo ni Jehovah tye kumeno?— Tika imito bedo i kin romine?— Romi giwinyo dwan lakwat. Gibedo cok bote. In mono iwinyo Jehovah?— Tika ibedo cok kwede?— Ci, myero pe ibed ki lworo. Jehovah bibedo kwedi.