ESKI parler ou santi ou tris e santi ou tousel?— Ou’n deza demann ou lekor si lezot i kontan ou?— I annan zanfan ki demann zot lekor sa. Me Bondye li, i promet: “Mwan mon pa pou oubliy ou.” (Izai 49:15) En zoli promes, pa i vre?— Zeova i vreman kontan nou!

En ekriven Labib ti dir: “Si mon prop papa e mon prop manman i kit mwan, Zeova i a pran mwan.” (Psonm 27:10) Ler nou konn sa, i vreman rekonfort nou, pa i vre?— Wi, Zeova i dir nou: “Pa per akoz mon avek ou. . . . Mon pou vreman ed ou.”—Izai 41:10.

Me parfwa Zeova i les Satan anmenn problenm lo nou. Zeova i menm les Satan teste Son bann serviter. En fwa, Satan ti fer Zezi telman soufer ki Zezi ti kriy avek Zeova: ‘Mon Bondye, mon Bondye, akoz ou’n kit mwan?’ (Matye 27:46) Kantmenm Zezi ti pe soufer, i ti konnen ki Zeova i kontan li. (Zan 10:17) Me i ti osi konnen ki Bondye i les Satan teste Son bann serviter e fer zot soufer. Dan en lot sapit, nou pou vwar akoz Bondye i les Satan fer sa.

Ler nou ankor pti, nou per fasilman. Annou pran en legzanp. Eski ou’n deza perdi?— Ou ti per?— Bokou zanfan ti pou per. En fwa, sa Gran Ansennyan ti rakont en zistwar en pe koumsa. Selman pa en zanfan ki ti perdi. En mouton.

Me ou parey en mouton dan serten fason. Ki mannyer sa? Premyerman, en mouton pa tro gran, i pa ni for. I bezwen en  dimoun pour pran swen avek li e protez li. Bann dimoun ki pran swen avek mouton i apel en berze.

Dan son zistwar, Zezi ti koz lo en berze ki ti annan san mouton. Me en mouton ladan ti perdi. Petet i ti anvi vwar ki i annan lo lot kote montanny. Me en pti moman, sa mouton ti’n ariv lwen avek lezot mouton. Ou kapab mazinen ki mannyer sa mouton ti santi letan i ti get otour li e pa vwar personn?—

Ki sa berze ti fer ler i vwar enn son mouton manke? Eski i ti dir sa i lafot sa mouton, i pa pou fatig li pour al rod li? Oubyen eski i ti kit sa 99 mouton dan en landrwa e al rod sa enn ki’n perdi? Eski i vo lapenn fer tou sa zefor pour rod zis en mouton?— Si ou ti sa mouton perdi, eski ou ti pou anvi sa berze vin rod ou?—

Sa berze ti kontan tou son mouton en kantite, menm sa enn ki ti’n perdi. Alors i ti al rod sa enn ki ti manke. Mazinen ki mannyer sa mouton ti kontan ler i ti vwar sa berze pe vini! E Zezi ti dir sa berze osi ti byen kontan pour vwar son mouton. I ti pli kontan pour vwar li ki sa 99 mouton ki pa ti’n perdi. Be lekel ki parey sa  berze dan zistwar Zezi? Lekel ki trakas bokou pour nou zis parey sa berze ti trakas pour son mouton?— Zezi ti dir son Papa dan lesyel i trakas bokou pour nou. E son Papa i Zeova.

Zeova i en Gran Berze pour son pep. I kontan tou bann ki servi li, enkli bann manrmay parey ou. I pa anvi personn ganny blese oubyen detrir. Pa nou kontan pour konnen ki Bondye i kontan nou sitan bokou koumsa!—Matye 18:12-14.

Eski ou vreman krwar dan Zeova?— Eski ou krwar i egziste?— I vre nou pa kapab vwar Zeova. Sa i akoz i en Lespri. I annan en lekor ki nou pa kapab vwar avek nou lizye. Me i vreman egziste e i kapab vwar nou. I konnen kan nou bezwen led. E nou kapab koz avek li dan lapriyer, zis parey nou koz avek en lot dimoun lo later. Zeova i anvi nou koz avek li.

 Alors, si ou santi ou tris e tousel, ki ou devret fer?— Koz avek Zeova. Apros pli pre avek li, e i a rekonfort ou, i a ed ou. Pa bliye ki Zeova i kontan ou, menm kan ou krwar ou tousel. Annou pran nou Labib dan Psonm 23. Nou konmans lir depi verse 1: “Zeova i mon Berze. Mon pa pou mank nanryen. I fer mwan dormi dan bann landrwa kouver avek lerb; i anmenn mwan dan bann landrwa repo kot i annan delo.”

Gete ki i dir dan verse 4: ‘Kantmenm mon mars dan en vale fernwanr, mon pa per okenn keksoz mal, parski ou avek mwan. Ou baget ek ou baton i bann keksoz ki rekonfort mwan.’ Bann dimoun ki zot Bondye i Zeova i santi koumsa. Zot trouv rekonfor kan zot dan problenm. Ou santi koumsa ou?—

Zeova i pran byen swen avek son pep zis parey en bon berze i pran swen avek son bann mouton. I montre zot sa bon semen ki zot devret marse, e zot kontan pour swiv li. Kantmenm i annan problenm otour zot, zot pa per. En berze i servi son baton pour anpes lezot zannimo atak son mouton. Labib i rakonte ki mannyer David ti protez son mouton kont en lyon ek en lours  ler i ti en berze. (1 Samyel 17:34-36) E pep Bondye i konnen ki Zeova pou protez zot osi. Zot santi zot an sekirite akoz Bondye i avek zot.

Zeova i vreman kontan son mouton. I okip zot avek bokou lafeksyon. Labib i dir: ‘Parey en berze i pou gid son mouton. Avek son lebra, i pou rasanble bann pti mouton ansanm.’—Izai 40:11.

Pa ou kontan ki Zeova i koumsa?— Ou ti a kontan vin enn son mouton?— En mouton i ekout son berze. I reste pros avek son berze. Ou ekout Zeova ou?— Ou reste pros avek li?— Alors napa nanryen pour ou per. Zeova pou avek ou.