Mekene 31

Drei La Ka Troa Akeukawanyi Së?

HAPEU, hna traqa fe hë koi eö la luelu ke eö a mekune ka hape, eö casi hi nge pëkö ka hnimi eö?— Nyimutre la itre nekönatre ka mekune tune lai. Ngo ame la hna thingehnaeane hnei Akötresie, tre öni Nyidrë: “Tha tro jë kö ni a thëthëhmi ’ö.” (Isaia 49:15) Hapeu, tha ka nyipi lolo jë kö la hna thingehnaeane celë?— Eje hi, ka nyipi ihnimi Iehova Akötresie!

Hna qaja fe hnene la ketre atre cinyihane la Tusi Hmitrötr, ka hape: “Hna nue tiji ni hnei kakati me nenë, ngo tro Iehova a wepengë nie.” (Salamo 27:10) Hapeu, tha itre trengewekë kö lai ka akeukawanyi së, tune kaa fe la mekuna i eö?— Nyipici, Iehova a qaja koi së, ka hape: “The qou kö, ke ce ini me eö. . . . Tro ni a xatua eö.”—Isaia 41:10.

Ame pe tha tro kö sa mekune ka hape, tro pala hi Iehova a nyi petre së e tupathi së pi hnei Satana. Hnei Nyidrëti hna nue angeice troa tupathe la itre hlue i Nyidrë ngöne la itre xa ijin. Ame ju hi la ketre drai, catrehnine catre la aqane tupathi Iesu hnei Diabolo, nge tru la hna akötrë nyidrë, ene pe Iesu a hë jë draië koi Iehova, me hape: ‘Akötresingö, Akötresingö, hnauë cilieti a nue triji ni?’ (Mataio 27:46) Atre hnyawa hi Iesu laka, tru la ihnim i Iehova koi nyidrë. (Ioane 10:17) Ngo ame pe e itre xa ijin, Iehova a nue Satana troa tupath me akötrëne la itre hlue i Nyidrë ka mele nyipici. Tro pë hë sa ce wange ngöne la ketre mekene tus, la kepine matre Iehova a nue Satana troa ujë tune lai.

Ame lo easa nekönatr, traqa pi koi së la xou e itre xa ijin. Drei la ketre ceitun, hapeu ase fë hë eö hane patr?— Hna traqa kö koi eö la xou?— Hetre itre nekönatre ka tune lai. Ame ngöne la ketre drai, hnene la Atre Hamë Ini Ka Sisitria hna edromën, la pengöne la ketre ka patr, a tha nekönatre kö, ngo ketre mamoe pe.

 Maine jë ceitui eö memine la ketre mamoe. Atre hi eö la kepin? Ame la neköi mamoe, tre, tha ka tru kö, nge tha ka tru trengecatrene kö. Haawe, nyipi ewekë troa nyihnyawane me thupëne hnyawane la neköi mamoe. Nge ame la hnëqa cili, tre, hnëqane hi la atre thupë mamoe.

Ame ngöne la edromë i Iesu, nyidrëti a qaja la ketre atr ka thupë mamoe, nge ca hadredr la etrune la itre mamoe i angeic. Ngo patre pi hi la ketre e nyudren. Maine jë ej a ajane troa hane tu e koilo ngöne ketre götrane la wetr. Ngo pine laka qea pala ha la hnene eje hna tro, haawe nanyi catrë hë qa ngöne lo hna axö mamoe. Ame koi eö, ke nemene jë la hnene ej hna mekune ngöne la ej a öhne laka eje casi pë hë?—

Nemene la hna kuca hnene la atre thupë mamoe, ngöne la angeice a öhne laka, patre pë hë la ketre mamoe i angeic? Tro kö angeic a qaja ka hape, nue pi matre ketre tro menu jë, ke sipu hnene eje kö hna tro menu? Maine tro angeic a pane nue lo ala 99 ngöne la ketre götrane ga xetietë, matre tro troa thele lo lai mamoe ka patr? Tune kaa, tro kö angeic a nue asë la trengecatre i angeice kowe hi la ca mamoe?— Maine eö ju lai mamoe cili, aja i eö kö tro la atre thupë mamoe a thele eö?—

Atraqatre la ihnimi ne la atre thupë mamoe kowe la itre mamoe i angeic, me kowe mina fe lo lai mamoe ka patr. Celë hi matre angeic a tro ju troa thele nyën. Pane mekune jë fe la madrinen la mamoe ka patr, la nyëne a öhne la atre thupë nyën. Ketre, Iesu mina fe  a qaja ka hape, madri catre la atre thupë mamoe, ke öhne hmaca ha angeice lo mamoe ka patr. Sisitria catre kö la madrine i angeice kowe la mamoe cili, hune lo 99 ka lapa pë hë. Ngo hna aceitunëne me drei la atre thupë mamoe cili? Drei la atre hnehengazo së tune lo lai atre thupë mamoe ka hnehengazone la itre mamoe i angeic?— Hnei Iesu hna qaja ka hape, Tretretro i nyidrë e koho hnengödrai, Iehova la ëje i Nyidrë.

Iehova Akötresie la Atre Thupëne Aloine la nöje i Nyidrë. Nyidrëti a hnime ceitune asë la nöjei atr uti hë la itre ka co, tui eö. Tha ajane kö Nyidrëti troa eatre maine patre pena la ketre e easë. Drei la kola akeukawanyi së troa atre ka hape, atraqatre la hnei Akötresieti hna hnehengazo së!—Mataio 18:12-14.

Hapeu, eö fe kö a hane lapaune koi Iehova Akötresie?— Eö kö a goeë Nyidrë ceitu me ketre atr?— Nyipici, thatreine kö tro sa goeë Iehova hnene la lue meke së, ke Ua Nyidrë. Ngo ka mele Nyidrë nge öhnyi së fe hi hnei Nyidrë. Atre hnyawa hi Nyidrë laka, easa aja ixatua. Ketre, ijije mina fe hi tro sa ithanata koi Nyidrë jëne la thith, tune la aqane ithanata së memine la ketre atr e celë fen. Aja i Iehova tro sa ujë tune lai.

 Maine troa traqa koi eö elanyi la luelu me hleuhleu, nemene la nyine tro eö a kuca?— Ithanata jë koi Iehova. Catre jë troa easenyi koi Nyidrë, nge eje hi lai laka tro hë Nyidrëti a akeukawanyi eö me xatua eö. The thëthëhmine kö laka, Nyidrëti a hnimi eö ngöne la itre ijine eö a lapa cas me luelu. Tro sa ce xome la tusi Salamo 23 me nyiqane e qa ngöne la xötre 1, kola hape: “Iehova la ate thupë mamoeë ni, tha tro kö ni a pë ewekë. Nyidëti a ameköle ni ju ngöne la hnënge haö ka cia loi ; nyidëti a e ni jë ngöne la ite timi ka tha enij.”

Goeëne ju la hna qaja hnene la atre cinyihan ngöne la xötre 4, kola hape: “Nge maine tro ni a trongëne la hnathupe ne la ahnuene la mec, tha tro kö ni a qouene la ngazo ; ke ce cilie me ini ; hna akeukawa ni hnene la jia me sine tö i cilie.” Celë hi lai aqane mekune hna xome hnene la atr ka nyi hlue i Iehova Akötresie. Iehova a akeukawanyi angeic, ngöne la ijine angeic a cile kowe la itre jol. Hapeu, celë fe hi la hnei eö hna mekun?—

Tune la atre thupë mamoe ka lolo, Iehova a thupëne hnyawa la itre hlue i Nyidrë. Nyidrëti a amamane hnyawa koi angatre la gojenyi nyine troa xötrën, nge tru la madrine i angatre troa xötrethenge Nyidrë. Ngacama tro angatre a cile kowe la itre akötre ka hetre ethanyin, ngo pë pi kö tro angatr a xou. Hetre tö hna xometrongëne hnene la atre thupë mamoe nyine jia ne thupëne la itre mamoe i angeic, wanga heji nyudreni jë hnene la itre öni. Kola qaja hnei Tusi Hmitrötr la aqane thapa Davita la itre mamoe i angeic qa ngöne la qe i liona me bea. (1 Samuela 17:34-36) Ame la itre atr ka nyi hlue i Akötresie, atre hnyawa hi angatre laka tro fe  Nyidrëti a thupë angatr. Angatr a lapa xetietë, pine laka ce Akötresieti me angatr.

Ka tru la ihnim i Iehova kowe la itre mamoe i Nyidrë, nge Nyidrëti a thupëne me kuca hnyawa nyudren. Tusi Hmitrötre a qaja ka hape: ‘Tro Nyidrëti a hiane la hnënge mamoe i Nyidrë tune la atre thupë mamoe. Tro Nyidrëti a xome acone la itre nekö i mamoe ngöne la lue ime i Nyidrë.—Isaia 40:11.

Hapeu, keukawa fe kö la hni eö, la eö a atre la pengö i Iehova?— Ajane kö eö troa hane sine la hna axö mamoe i Nyidrë?— Ame la itre mamoe, nyudreni a drenge la nine aqane ewekë ne la atre thupë nyudren. Tha ka isa tro kö nyudreni memine la atre thupën. Hapeu, eö fe kö a hane drei Iehova?— Eö mina fe kö a catre easenyi Nyidrë?— Maine tro eö a ujë tune lai, haawe, pë pi kö tro eö a xou, ke, tro pala hi Iehova a ce me eö.

Iehova a thupëne hnyawa la itre hlue i Nyidrë. E jë la aqane acatrene Tusi Hmitrötr la mekune cili ngöne Salamo 37:25; 55:22; me Luka 12:29-31.

[Iatr ne la götran 163]

Ame koi eö, nemene la hna mekune hnene la nekö i mamoe celë ka tro menu?

[Iatr ne la götran 164]

Hna aceitunëne me drei enehila la atre thupë mamoe ka tro matre troa thele la mamoe i angeic?

[Iatr ne la götran 165]

Eö kö a goeë Iehova ceitu me keme i eö maine ketre atr pena?

[Iatr ne la götran 166]

Tune la ketre atre thupë mamoe ka thupëne hnyawane la itre mamoe i angeic, drei la ka atreine troa xatua së ngöne la itre ijine jol?