Ibuot 31

Ebiet Emi Ẹkemede Ndibọ Ndọn̄esịt

NTE akanam afo omokop mfụhọ onyụn̄ okop ndobo?— Ndi akanam afo emekere m̀mê owo ndomokiet ama fi?— Ndusụk nditọwọn̄ ẹsikere. Edi Abasi ọn̄wọn̄ọ ete: “Ami ndifreke fi.” (Isaiah 49:15) Nte oro idịghe inem inem n̄kpọ ndikere mban̄a?— Ih, Jehovah Abasi enen̄ede ama nnyịn!

Andiwet Bible kiet ọkọdọhọ ete: ‘Edieke ete mi ye eka mi ẹkpọn̄de mi, Jehovah ke idemesie eyemen mi akama.’ (Psalm 27:10) Ndifiọk oro ekeme ndinọ nnyịn ata ndọn̄esịt, nte ikemeke?— Ih, Jehovah ọdọhọ nnyịn ete: ‘Ẹkûdịghe, koro ami ndude ye mbufo: . . . nditreke ndinyan̄a mbufo.’—Isaiah 41:10.

Nte ededi, ndusụk ini Jehovah esiyak Satan afịna nnyịn. Jehovah esikam ayak Satan odomo mme asan̄autom Esie. Ini kiet Devil ama anam Jesus ọbọ ọkpọsọn̄ ndutụhọ tutu Jesus eseme ọnọ Jehovah ete: “Abasi Mi, Abasi Mi, nsinam Afo ọkpọn̄de Mi?” (Matthew 27:46) Idem okposụkedi Jesus ọkọbọde ndutụhọ, enye ama osụk ọfiọk ete ke Jehovah ama imọ. (John 10:17) Edi Jesus n̄ko ama ọfiọk ete ke Abasi esiyak Satan odomo mme asan̄autom Esie onyụn̄ ayak Satan otụhọde mmọ. Ke ibuot efen nnyịn iyanam an̄wan̄a ntak emi Abasi esiyakde Satan anam emi.

Ke ini nnyịn idide n̄kpri nditọwọn̄, nnyịn imesisọp ikop ndịk ndusụk ini. Ke uwụtn̄kpọ, ndi akanam afo omosop usụn̄?— Nte ndịk ama anam fi?— Ediwak nditọwọn̄ ẹkpekop ndịk. Ini kiet Akwa Andikpep ama obụk mbụk kiet aban̄a n̄kpọ emi okosopde. Edi ikedịghe eyenọwọn̄ okosop. Ekedi erọn̄.

 Afo etie nte erọn̄ ke ndusụk usụn̄. Didie ke edi ntre? Ọfọn, erọn̄ isinen̄ekede ikpon isinyụn̄ inen̄ekede isọn̄ idem. Ndien mmọ ẹsiyom owo ese aban̄a onyụn̄ ekpeme mmimọ. Ẹkot owo emi esede n̄kpọ aban̄a erọn̄ ekpemerọn̄.

Jesus okobụk mbụk esie aban̄a ekpemerọn̄ emi ekenyenede erọn̄ ikie. Ekem kiet ke otu erọn̄ oro ama osop usụn̄. Ekeme ndidi enye okoyom ndikụt se ikodude ke n̄kan̄ obot eken. Edi ikebịghike, erọn̄ oro ama odu oyom usụn̄ ọkpọn̄ mbon eken. Nte afo emekeme ndikere nte eketiede erọn̄ oro ke idem ke ini enye ekesede akanade onyụn̄ okụtde ke imọ ikodu ikpọn̄?—

Nso ke ekpemerọn̄ oro akanam ke ini enye ọkọfiọkde ete ke erọn̄ kiet ama osop? Ndi enye ọkọdọhọ ke erọn̄ oro akanam ndudue ndien ke ntre ke imọ idifịnake idem imọ? Mîdịghe nte enye ama ọkpọn̄ erọn̄ 99 ke eti itie onyụn̄ aka okoyom erọn̄ kiet oro? Ndi erọn̄ kiet okpodot se ẹsịnde ọkpọsọn̄ ukeme ntre ẹyom?— Edieke afo ekpedide erọn̄ oro okosopde, nte afo akpama ekpemerọn̄ oro oyom fi?—

Ekpemerọn̄ ama enen̄ede ama kpukpru erọn̄ esie, idem enye emi okosopde. Ntre enye ama aka okoyom enye emi okosopde. Kere nte erọn̄ emi okosopde do akadatde esịt ke ini enye okokụtde nte ekpemerọn̄ edide! Ndien Jesus ọkọdọhọ ete ke  ekpemerọn̄ oro ama adat esịt ete ke imọ ima ikụt erọn̄ imọ. Enye ama adat esịt aban̄a enye akan nte akadatde aban̄a erọn̄ 99 oro mîkosopke. Idahaemi, anie etie nte ekpemerọn̄ oro ke mbụk Jesus? Anie ese n̄kpọ aban̄a nnyịn ukem nte ekpemerọn̄ oro ekesede aban̄a mme erọn̄ esie?— Jesus ọkọdọhọ ke edi Ete imọ eke heaven. Ndien Ete esie edi Jehovah.

Jehovah Abasi edi Akwa Andikpeme ikọt esie. Enye ama kpukpru mbon oro ẹnamde n̄kpọ ẹnọ enye, esịnede n̄kpri owo nte afo. Enye iyomke baba owo nnyịn kiet ida unan inyụn̄ iyomke nnyịn itak. Ke akpanikọ edi n̄kpọ ndọn̄esịt ndifiọk nte ke Abasi ese aban̄a nnyịn ntre!—Matthew 18:12-14.

Nte afo emenen̄ede enịm ke akpanikọ nte ke Jehovah Abasi odu?— Ndi enye edi ata owo ọnọ fi?— Edi akpanikọ nte ke nnyịn ikemeke ndikụt Jehovah. Emi edi koro enye edi Spirit. Enye enyene idem oro nnyịn mîkemeke ndikụt. Edi enye edi ata owo, ndien enye ekeme ndikụt nnyịn. Enye ọfiọk ini emi nnyịn iyomde  un̄wam. Ndien nnyịn imekeme nditịn̄ ikọ nnọ enye ke akam, kpa nte nnyịn isitịn̄de ikọ inọ owo efen ke isọn̄. Jehovah oyom nnyịn inam emi.

Ntre nso ke afo akpanam edieke afo okopde mfụhọ m̀mê okopde ndobo?— Tịn̄ nọ Jehovah. San̄a kpere enye, ndien enye ọyọdọn̄ fi esịt onyụn̄ an̄wam fi. Ti nte ke Jehovah ama fi, idem ke ini afo okopde ndobo. Yak imen Bible nnyịn idi. Ẹsian nnyịn mi ke Psalm 23, ọtọn̄ọde ke Ps 23 ufan̄ikọ 1 ẹte: “Jehovah edi andibọk mi, ndinanake n̄kpọ. Enye ayanam mi nsụhọde nna ke awawa mbiet: ayada mi aka ke mmọn̄ nduọk-odudu.”

Tịm fiọk se andiwet Psalm oro adiande ke Ps 23 ufan̄ikọ 4 ete: “Ndien n̄ko ke ini ndisan̄ade ke itịghede mfụt n̄kpa, ndifeheke idiọk: koro afo odude ye ami; edi eto fo ye esan̄ fo ẹdidọn̄ mi esịt.” Oro edi nte esitiede mme owo ke idem edieke Jehovah edide Abasi mmọ. Mmọ ẹsibọ ndọn̄esịt ke ini mmọ ẹdude ke mfịna. Nte esitie fi ke idem ntre?—

Nte ima ima ekpemerọn̄ esede aban̄a otuerọn̄ esie, ntre ke Jehovah etịm ese aban̄a ikọt esie. Enye owụt mmọ nnennen usụn̄ ndisan̄a, ndien mmọ ẹtiene enye ke idatesịt. Iyomke mmọ ẹkop ndịk idem ke ini mfịna akande mmọ okụk. Ekpemerọn̄ esikama esan̄ m̀mê ọkọeto esie ndikpeme mme erọn̄ nsio ke inua ndiọi unam oro ẹkemede  ndinọ mmọ unan. Bible etịn̄ nte David, ekpri ekpemerọn̄, ekekpemede mme erọn̄ esie osio ke inua lion ye bear. (1 Samuel 17:34-36) Ndien ikọt Abasi ẹfiọk ẹte ke Jehovah eyekpeme mmimọ n̄ko. Mmọ ẹkeme ndidu ke ifụre koro Abasi odude ye mmọ.

Jehovah enen̄ede ama mme erọn̄ esie, ndien enye ese aban̄a mmọ ke ima. Bible ọdọhọ ete: ‘Enye ọyọbọk ikọt esiemmọ nte ọbọkerọn̄. Ayatan̄ nditọ erọn̄ ke ubọk esie.’—Isaiah 40:11.

Ndi esịt inemke fi ndifiọk nte ke Jehovah etie ntre?— Ndi afo omoyom ndidi kiet ke otu erọn̄ esie?— Mme erọn̄ ẹsikpan̄ utọn̄ ẹnọ andikpeme mmọ. Mmọ ẹsidu ẹkpere enye. Nte afo emesikpan̄ utọn̄ ọnọ Jehovah?— Nte afo emesisan̄a ekpere enye?— Do inaha afo okop ndịk. Jehovah oyodu ye afo.

Jehovah ese aban̄a mbon oro ẹnamde n̄kpọ esie ke ima. Yak ikot ọtọkiet se Bible etịn̄de aban̄a emi, ke Psalm 37:25; 55:22; ye Luke 12:29-31.

[Ndise ke page 163]

Afo ekere ke etie eyenerọn̄ emi osopde usụn̄ mi didie ke idem?

[Ndise ke page 164]

Anie etie nte ekpemerọn̄ emi anyan̄ade erọn̄ esie?

[Ndise ke page 165]

Ndi Jehovah edi ata owo ọnọ fi ukem nte ete fo m̀mê owo efen edide?

[Ndise ke page 166]

Kpa nte ekpemerọn̄ ekpemede erọn̄ esie, anie ekeme ndin̄wam nnyịn ke ini nnyịn inyenede mfịna?