ANI be shɛɔ ni owerɛ hoɔ ohe ni onuɔ he akɛ eshwɛ okome too?— Ani be shɛɔ ni osusuɔ he kɛji akɛ mɔ ko sumɔɔ bo po?— Nakai ebaalɛ yɛ gbekɛbii komɛi agbɛfaŋ. Shi Nyɔŋmɔ woɔ shi akɛ: “Mi lɛ mihiɛ kpaŋ onɔ.” (Yesaia 49:15) Ani enɛ jeee miishɛɛ sane ni esa akɛ ajwɛŋ he?— Hɛɛ, Yehowa Nyɔŋmɔ sumɔɔ wɔ waa diɛŋtsɛ!

Biblia ŋmalɔ ko kɛɛ akɛ: “Shi mitsɛ kɛ minyɛ eshi mi moŋ, shi Yehowa hereɔ mi atuu.” (Lala 27:10) Enɛ ni wɔle lɛ baanyɛ ashɛje wɔmii waa diɛŋtsɛ, aloo jeee nakai?— Nakai, Yehowa kɛɔ wɔ akɛ: “Kaashe gbeyei, shi mi, mikɛo yɔɔ! . . . Ni maye mabuao.”—Yesaia 41:10, wɔma efã ko nɔ mi.

Shi yɛ bei komɛi amli lɛ, Yehowa ŋmɛɔ gbɛ koni Satan kɛ naagbai aba wɔnɔ. Yehowa ŋmɛɔ gbɛ po koni Satan aka E-tsuji lɛ. Be ko lɛ Abonsam ha Yesu piŋ aahu akɛ Yesu bolɔ etsɛ́ Yehowa akɛ: ‘Mi-Nyɔŋmɔ, Mi-Nyɔŋmɔ, mɛɛba okwa mi?’ (Mateo 27:46) Eyɛ mli akɛ Yesu miipiŋ moŋ, shi ele akɛ Yehowa sumɔɔ lɛ lolo. (Yohane 10:17) Shi, Yesu le hu akɛ, Nyɔŋmɔ hãa Satan kaa E-tsuji, ni eŋmɛɔ Satan gbɛ koni eha amɛpiŋ. Wɔbaatsɔɔ nɔ hewɔ ni Nyɔŋmɔ ŋmɛɔ Satan gbɛ koni efee nakai lɛ mli yɛ saneyitso kroko mli.

Kɛ wɔdarako lɛ, wɔfeɔ tamɔ mɛi ni sheɔ gbeyei yɛ bei komɛi amli. Ákɛ nɔkwɛmɔnɔ lɛ, ani ólaaje pɛŋ?— Ani oshe gbeyei?— Gbekɛbii pii baashe gbeyei. Be ko lɛ Tsɔɔlɔ Kpele lɛ gba sane ko ni kɔɔ nɔ ko ni laaje he. Shi jeee gbekɛ ko ni elaaje he sane ni. Too ni elaaje moŋ he sane ni.

 Yɛ gbɛ̀i komɛi anɔ lɛ otamɔ too. Mɛni hewɔ? No ji akɛ, tooi daraaa tsɔ ni amɛhe waaa hu. Ni ehe miihia ni amɛná mɔ ko ni baakwɛ amɛ ni ebu amɛhe. Atsɛɔ mɔ ni kwɛɔ tooi lɛ akɛ tookwɛlɔ.

Yesu gba sane ko ni kɔɔ tookwɛlɔ ko ni yɔɔ tooi 100 lɛ he. Shi nɔ ni ba ji akɛ, tooi lɛ ekome laaje. Ekolɛ too lɛ miitao ni ele nɔ ni yɔɔ gɔŋ lɛ afãgbɛ lɛ. Shi etsɛɛɛ ni too lɛ yaje shɔŋŋ yɛ he ni ekɛ ekrokomɛi lɛ ateŋ ejɛkɛ. Ani obaanyɛ osusu bɔ ni nakai too lɛ nu he eha beni ekwɛ ehe kɛkpe ni ena akɛ eshwɛ lɛ ekome too pɛ lɛ?—

Mɛni tookwɛlɔ lɛ baafee beni ena akɛ tooi lɛ ekome elaaje lɛ? Ani ebaakɛɛ akɛ too lɛ tɔmɔ ji enɛɛmɛi fɛɛ, ní yɛ no hewɔ lɛ egbaŋ ehe naa yɛ ehe? Aloo ebaashi tooi 99 lɛ yɛ he ko ni yɔɔ shweshweeshwe koni eya eyatao ekome ni elaaje lɛ? Ani haomɔ sɔŋŋ ni ehaoɔ ehe yɛ too kome lɛ he lɛ sa nakai?— Eji bo ji nakai too ni elaaje lɛ kulɛ, ani obaasumɔ ni tookwɛlɔ lɛ atao bo?—

Tookwɛlɔ lɛ sumɔɔ etooi lɛ fɛɛ waa diɛŋtsɛ kɛ ekome lɛ po ni laaje lɛ. No hewɔ lɛ, etee koni eyatao nɔ ni elaaje lɛ. Susumɔ bɔ ni nakai too ni laaje lɛ mii shɛ ehe eha beni ena tookwɛlɔ lɛ ni miiba lɛ he okwɛ! Ni Yesu kɛɛ akɛ tookwɛlɔ lɛ ná  miishɛɛ waa akɛ ena etoo ni laaje lɛ. Emii shɛ ehe waa yɛ no he fe tooi 99 ni efee shweshweeshwe lɛ. Agbɛnɛ, namɔ tamɔ tookwɛlɔ lɛ ni yɔɔ Yesu sane lɛ mli lɛ? Namɔ kwɛɔ wɔnɔ babaoo tamɔ bɔ ni nakai tookwɛlɔ lɛ fee kɛha etoo lɛ?— Yesu kɛɛ akɛ e-Tsɛ ni yɔɔ ŋwɛi lɛ feɔ nakai. Ni e-Tsɛ ji Yehowa.

Yehowa Nyɔŋmɔ ji ewebii lɛ a-Kwɛlɔ Kpeteŋkpele. Esumɔɔ mɛi fɛɛ ni sɔmɔɔ lɛ lɛ, ni gbekɛbii ni tamɔ bo fata he. Esumɔɔɔ ni wɔteŋ mɔ ko apila loo ehiɛ akpata. Yɛ anɔkwale mli lɛ, eji miishɛɛ sane akɛ wɔɔle akɛ Nyɔŋmɔ kwɛɔ wɔnɔ babaoo nakai!—Mateo 18:12-14.

Ani oheɔ Yehowa Nyɔŋmɔ nɔ oyeɔ waa diɛŋtsɛ?— Ani eji mɔ ni yɔɔ diɛŋtsɛ kɛha bo?— Eji anɔkwale akɛ wɔnaaa Yehowa. Ejaakɛ Mumɔ ni. Eyɛ gbɔmɔtso ko ni wɔhiŋmɛii enaaa. Shi eji mɔ ni yɔɔ diɛŋtsɛ, ni ebaanyɛ ena wɔ. Ele be mli ni ehe hiaa ni aye abua wɔ. Ni wɔbaanyɛ ni wɔkɛ lɛ awie yɛ sɔlemɔ mli, tamɔ bɔ ni  wɔkɛ mɔ kroko wieɔ yɛ shikpɔŋ nɔ lɛ. Yehowa miisumɔ ni wɔfee enɛ.

No hewɔ lɛ, kɛ́ onu he akɛ ooye awerɛho loo eshwɛ okome too lɛ, mɛni esa akɛ ofee?— Okɛ Yehowa awie yɛ sɔlemɔ mli. Tsi obɛŋkɛ lɛ kpaakpa, ni ebaashɛje omii ni ebaaye ebua bo. Kaimɔ akɛ Yehowa sumɔɔ bo, kɛji akɛ onuɔ he po akɛ okome too pɛ oyɔɔ. Ha wɔkɔlɔ wɔ-Biblia lɛ. Akɛɔ wɔ yɛ Lala 23, kɛjɛ kuku 1 lɛ kɛyaa akɛ: “Yehowa ji mikwɛlɔ, nɔ ko nɔ ko ehiaŋ mi. Ehãa mibuɔ shi yɛ lɛɛhei ni yɔɔ frɔ̃frɔ̃, ewaa mi kɛyaa nui ni he jɔ lɛ ahe.”

Kadimɔ nɔ ni mɔ ni ŋma nii lɛ kɛfata he lɛ, yɛ kuku 4: “Ni asaŋ kɛ́ minyiɛ gbele hɔɔŋ jɔɔ lɛŋ lɛ, misheŋ efɔŋ ko gbeyei; ejaakɛ okɛ mi yɛ: otso kɛ odɛhiɛmɔtso lɛ, nomɛi shɛjeɔ mimii.” Nɛkɛ ji bɔ ni mɛi nuɔ he kɛ́ amɛ-Nyɔŋmɔ ji Yehowa. Amɛmii shɛɔ amɛhe kɛ́ amɛyɛ haomɔ mli. Ani nakai onuɔ he?—

Bɔ ni tookwɛlɔ ni yɔɔ suɔmɔ kwɛɔ etooku nɔ lɛ, nakai Yehowa kwɛɔ ewebii lɛ anɔ jogbaŋŋ. Etsɔɔ amɛ gbɛ ni ja ni esa akɛ amɛtsɔ nɔ, ni amɛkɛ miishɛɛ nyiɛɔ esɛɛ. Kɛji akɛ haomɔ ebɔle amɛhe kɛkpe po lɛ, ehe ehiaaa ni amɛshe gbeyei. Tookwɛlɔ kɛ etso loo edɛhiɛmɔtso tsuɔ nii koni ekɛbu tooi lɛ ahe kɛjɛ kooloi ni baaye amɛ awui lɛ ahe. Biblia lɛ kɛɔ wɔ  bɔ ni fee ni David, oblanyo fioo ni ji tookwɛlɔ lɛ bu etooi lɛ ahe kɛjɛ jata kɛ oshishibrishi he. (1 Samuel 17:34-36) Ni Nyɔŋmɔ webii lɛ hu le akɛ Yehowa baabu amɛhe. Amɛbaanyɛ amɛnu he akɛ amɛyɛ shweshweeshwe, ejaakɛ Nyɔŋmɔ kɛ amɛ yɛ.

Yehowa sumɔɔ etooi lɛ waa diɛŋtsɛ, ni ekɛ mlijɔlɛ kwɛɔ amɛ. Biblia lɛ kɛɔ akɛ: ‘Ebaakwɛ lɛ diɛŋtsɛ etooi lɛ tamɔ tookwɛlɔ. Ekɛ eniji baahole bibii lɛ anɔ kutuu.’—Yesaia 40:11.

Ani enɛ haaa oná miishɛɛ akɛ ooole akɛ Yehowa tamɔ nakai?— Ani oosumɔ ni ofee etooi lɛ ateŋ mɔ ko?— Tooi boɔ amɛkwɛlɔ lɛ gbee toi. Amɛhiɔ emasɛi kpaakpa. Ani oboɔ Yehowa toi?— Ani ohiɔ shi kɛbɛŋkɛɔ lɛ kpaakpa?— Belɛ ehe ehiaaa ni oshe gbeyei. Yehowa kɛ bo baahi shi.