GINASUBUAN ka bala kon kaisa?— Nagapalibog ka bala kon kaisa kon bala may nagapalangga sa imo?— Amo sini ang iban nga kabataan. Apang nagsaad ang Dios: ‘Indi ako malipat sa imo.’ (Isaias 49:15) Indi bala makalilipay nga hunahunaon ini?— Huo, ginahigugma gid kita ni Jehova nga Dios!

Ang isa ka manunulat sang Biblia nagsiling: “Kon magbiya sa akon ang akon amay kag akon iloy, nian si Jehova magasapopo sa akon.” (Salmo 27:10) Makalulugpay gid nga mahibaluan ini, indi bala?— Huo, ginasilingan kita ni Jehova: “Dili ka mahadlok, kay ako nagaupod sa imo. . . . Buligan ko gid ikaw.”—Isaias 41:10.

Apang, kon kaisa ginatugutan ni Jehova si Satanas nga pabudlayan kita. Ginatugutan pa gani ni Jehova si Satanas nga tilawan ang Iya mga alagad. Isa ka bes, ginpaantos gid sing tama sang Yawa si Jesus amo nga nagsinggit si Jesus kay Jehova: ‘Dios ko, Dios ko, ngaa ginbayaan mo ako?’ (Mateo 27:46) Bisan pa nagaantos si Jesus, nahibaluan gihapon niya nga ginahigugma sia ni Jehova. (Juan 10:17) Apang nahibaluan man ni Jesus nga ginatugutan sang Dios si Satanas nga tilawan ang Iya mga alagad kag paantuson sila. Ipaathag sa lain nga kapitulo kon ngaa ginatugutan sang Dios si Satanas nga himuon ini.

Kon bata pa kita, madali kita mahadlok kon kaisa. Halimbawa, naagihan mo na bala nga nagtalang ka?— Hinadlukan ka bala?— Madamo nga kabataan ang mahadlok. Ang Daku nga Manunudlo nagsugid anay sing isa ka sugilanon tuhoy sa isa nga nadula. Apang indi bata ang nadula. Isa yadto ka karnero.

Sa pila ka paagi kaangay ikaw sang karnero. Ngaa? Bueno, ang mga karnero indi tuman kadaku ukon makusog. Kag nagakinahanglan sila sing manug-atipan kag manug-amlig. Ang tawo nga nagaatipan  sa mga karnero ginatawag nga manugbantay.

Sa iya sugilanon, ginsambit ni Jesus ang isa ka manugbantay nga may isa ka gatos ka karnero. Apang nadula ang isa sang mga karnero. Mahimo nga luyag sini makita kon ano ang yara sa pihak sang pukatod. Apang wala madugay, malayo na ini nga karnero gikan sa iban pa. Mahanduraw mo bala kon ano ang ginbatyag sini nga karnero sang manghulonghulong sia sa palibot kag nakita niya nga nagaisahanon na lang sia?—

Ano ang himuon sang manugbantay sang matalupangdan niya nga wala ang isa ka karnero? Magasiling bala sia nga sala ini sang karnero gani indi sia dapat magpalibog? Ukon biyaan bala niya ang 99 ka karnero sa isa ka walay peligro nga duog kag pangitaon ang isa nga nadula? Takus bala ang isa ka karnero sa sini nga pagpakabudlay?— Kon ikaw yadtong nadula nga karnero, luyag mo bala nga pangitaon ka sang manugbantay?—

Palangga gid sang manugbantay ang tanan niya nga mga karnero, bisan ang isa nga nadula. Gani ginpangita niya ini. Hunahunaa kon daw ano ang kalipay sining nadula nga karnero sang nakita niya nga nagapadulong ang manugbantay! Kag nagsiling si Jesus nga nalipay gid ang manugbantay sang nakita niya ang iya karnero. Kapin ang iya kalipay sa sini sangsa 99 ka karnero nga wala  madula. Karon, sin-o ang kaangay sang manugbantay sa sugilanon ni Jesus? Sin-o ang nagaulikid sa aton sing subong sa pag-ulikid sadtong manugbantay sa iya mga karnero?— Si Jesus nagsiling nga subong sini ang iya Amay sa langit. Kag ang iya Amay amo si Jehova.

Si Jehova nga Dios amo ang Daku nga Manugbantay sang iya katawhan. Ginahigugma niya ang tanan nga nagaalagad sa iya, lakip ang mga bata kaangay mo. Indi niya luyag nga mahalitan ukon malaglag ang bisan sin-o sa aton. Sa pagkamatuod makalulugpay nga mahibaluan nga subong gid sini kadaku ang pag-ulikid sa aton sang Dios!—Mateo 18:12-14.

Nagatuo gid bala ikaw kay Jehova nga Dios?— Sia bala isa gid ka matuod nga persona sa imo?— Matuod indi naton makita si Jehova. Amo sini bangod Espiritu sia. May lawas sia nga indi naton makita. Apang isa sia ka matuod nga persona, kag makita niya kita. Nahibaluan niya kon nagakinahanglan kita sing bulig. Kag makapakighambal kita sa iya paagi sa pangamuyo, subong sang pagpakighambal naton sa isa ka tawo sa duta. Luyag ni Jehova nga himuon naton ini.

 Gani kon mabatyagan mo nga masubo ka ukon nagaisahanon ka lang, ano ang dapat mo himuon?— Makighambal kay Jehova. Palapiti sia, kag lipayon ka niya kag buligan. Tandai nga ginahigugma ka ni Jehova, bisan pa kon ginabatyag mo nga daw nagaisahanon ka lang. Kuhaon naton ang aton Biblia. Diri sa Salmo 23, sugod sa bersikulo 1, ginasugiran kita: “Si Jehova amo ang akon Manugbantay. Wala sing makulang sa akon. Sa madabong nga mga halalban ginapahigda niya ako; sa luyo sang tubigon nga mga palahuwayan ginatuytuyan niya ako.”

Talupangda kon ano pa ang gindugang sang manunulat, sa bersikulo 4: “Bisan pa nagalakat ako sa nalupyakan sang pitipit nga kadulom, wala ako sing nahadlukan nga malaut, kay ikaw kaupod nakon; ang imo sungkod kag ang imo baston amo ang nagalipay sa akon.” Amo sini ang ginabatyag sang mga tawo kon ang ila Dios amo si Jehova. Makasapo sila sing lugpay kon may problema sila. Amo bala sini ang ginabatyag mo?—

Subong sang pag-atipan sang isa ka mahigugmaon nga manugbantay sa iya panong, ginaatipan sing maayo ni Jehova ang iya katawhan. Ginatuytuyan niya sila sa husto nga dalanon nga dapat nila laktan, kag malipayon nga nagasunod sila sa iya. Bisan pa may kagamo sa palibot nila, indi sila dapat mahadlok. Ginagamit sang manugbantay ang iya sungkod ukon baston agod amligan ang mga karnero gikan sa mga sapat nga mahimo maghalit sa ila. Ang Biblia nagasugid kon paano gin-amligan sang pamatan-on nga manugbantay nga si David ang iya mga karnero gikan sa isa ka  leon kag isa ka oso. (1 Samuel 17:34-36) Kag nakahibalo ang katawhan sang Dios nga amligan man sila ni Jehova. Nagabatyag sila sing kasiguruhan bangod kaupod nila ang Dios.

Ginahigugma gid ni Jehova ang iya mga karnero, kag mapinalanggaon nga ginaatipan niya sila. Ang Biblia nagasiling: ‘Kaangay sang manugbantay tuytuyan niya ang iya mga karnero. Paagi sa iya butkon tipunon niya ang mga magamay.’—Isaias 40:11.

Wala ka bala nalipay sa paghibalo nga subong sini si Jehova?— Luyag mo bala nga mangin isa sang iya mga karnero?— Ang mga karnero nagapamati sa tingog sang ila manugbantay. Wala sila nagapalayo sa iya. Nagapamati ka bala kay Jehova?— Nagapabilin ka bala nga suod sa iya?— Kon amo indi gid ikaw dapat mahadlok. Si Jehova magaupod sa imo.