KAPU 31

Kisika ya Kubakila Kikesa

KETI nge mekudiwaka dezia nde nge ke na mawa mpi nde muntu ya kusadisa nge kele ve?— Keti nge mekudiyulaka dezia kana kele ti muntu kezolaka nge?— Bana mingi kekudiyulaka mutindu yina. Kansi Nzambi kesila nde: “Mono ta vila beno ve ata fioti!” (Yezaya 49:15) Keti yo kele mbote ve na kuyindula dyambu yai?— Ee, Yehowa Nzambi kezolaka beto mpenza!

Nsoniki mosi ya Biblia kutubaka nde: “Tata na mono ti mama na mono bo lenda buya mono, kansi nge Mfumu Nzambi, nge ta baka mono.” (Nkunga 27:10) Kuzaba dyambu yai le pesa beto kikesa ya kyeleka, mpidina ve?— Ee, Yehowa ketubila beto nde: “Kuwa boma ve sambu mono kele ti nge; . . . Mono ke sadisa nge.”—Yezaya 41:10.

Kansi, bantangu yankaka, Yehowa kebikisaka nde Satana kuyangisa beto. Nkutu Yehowa kebikisaka nde Satana kumeka bansadi na Yandi. Kilumbu mosi, Dyabulu kumonisaka Yezu mpasi mingi mpenza na mpila nde Yezu kutubilaka Yehowa na ndinga ya ngolo nde: “Nzambi na mono, Nzambi na mono, sambu na nki nge me bikisa mono?” (Matayo 27:46) Ata Yezu vandaka kumona mpasi, yandi vandaka kuzaba kaka nde Yehowa kezolaka yandi. (Yoane 10:17) Kansi, Yezu kuzabaka mpi nde Nzambi kebikisaka nde Satana kumeka bansadi na Yandi mpi Nzambi kepesaka yandi nzila nde yandi kumonisa bo mpasi. Na kapu yankaka, beto tatendula sambu na nki Nzambi kebikisaka nde Satana kusala mpidina.

Na ntangu beto kevandaka bana ya fyoti, bantangu yankaka yo kevandaka mpasi nde beto konda kuwa boma. Mu mbandu, keti nge mevilaka dezia nzila?— Keti nge waka boma mingi?— Bana mingi le wa boma. Kilumbu mosi, Longi ya Nene kutaka disolo mosi ya metala kuvila. Kansi yo vandaka ve nde mwana mosi kuvilaka. Kima ya kuvilaka kuvandaka dimeme.

 Kana beto tala mbote, nge kele bonso dimeme. Sambu na inki? Sambu mameme kevandaka ve nene mingi to ngolo mingi. Mpi bo kevandaka na mfunu nde muntu kukeba bo mpi kutanina bo. Muntu yina kekebaka mameme bo kebingaka yandi ngungudi.

Na disolo na yandi, Yezu kutubilaka ngungudi mosi ya kuvandaka ti mameme nkama. Kansi na nima dimeme mosi kuvilaka. Ziku yo zolaka kwenda kutala kana nki kuvandaka na simu yina yankaka ya ngumba. Kansi ntama mingi ve, dimeme yango kukumaka ntama kibeni ti mameme yina yankaka. Keti nge le yindula nki mutindu dimeme yina kudiwaka ntangu yo talaka penepene mpi yo monaka nde yo vandaka kaka yo mosi?—

Inki ngungudi zolaka kusala ntangu yandi bakisaka nde dimeme mosi kuvandaka ve? Keti yandi zolaka kutuba nde foti yonso kuvandaka ya dimeme, ebuna mfunu ya kuwila yo mawa kuvandaka ve? To keti yandi zolaka kubikisa mameme 99 yina yankaka na kisika mosi ya mbote sambu na kwenda kusosa dimeme mosi yina kuvilaka? Keti dimeme yina mosi kufwanaka mpenza nde yandi tudila yo susi?— Kana nge vandaka dimeme yango yina kuvilaka, keti nge zolaka kusepela nde ngungudi yina kusosa nge?—

Ngungudi vandaka kuzola mameme na yandi yonso mingi mpenza, ata mosi yina kuvilaka. Yo yina, yandi kwendaka kusosa yina kuvilaka. Yindula kyese yina dimeme yango kuwaka ntangu yo  monaka ngungudi kekwisa! Yezu kutubaka mpi nde ngungudi kusepelaka na ntangu yandi monaka dimeme na yandi. Yandi sepelaka na yo mingi kuluta mameme 99 yina kuvilaka ve. Nani kele bonso ngungudi ya Yezu kutubilaka na disolo na yandi? Nani kekebaka beto mingi mutindu ngungudi yina vandaka kukeba mameme na yandi?— Yezu kutubaka nde Tata na yandi yina ke na zulu muntu kekebaka beto. Tata na yandi yango kele Yehowa.

Yehowa Nzambi kele Ngungudi ya Nene ya bantu na yandi. Yandi kezolaka bayina yonso kesadilaka yandi, ti bana ya fyoti bonso nge. Yandi kezolaka ve nde ata muntu mosi na kati na beto kumona mpasi to kufwa. Ya kyeleka, yo kele kyese mpenza na kuzaba nde Nzambi kekebaka beto mingi mpenza!—Matayo 18:12-14.

Keti nge kekwikilaka mpenza na Yehowa Nzambi?— Keti nge kemonaka yandi nde yandi kele mpenza muntu ya kyeleka?— Yo kele ya kyeleka nde beto le mona ve Yehowa. Beto le mona yandi ve sambu yandi kele Mpeve. Yandi kele ti nitu yina meso na beto le mona ve. Kansi yandi kele muntu ya kyeleka, mpi yandi kemonaka beto. Yandi kezabaka ntangu ya beto kevandaka  na mfunu ya lusadisu. Beto le solula ti yandi na kisambu, kaka mutindu beto kesolulaka ti bantu yankaka yina kele na zulu ya ntoto. Yehowa kezolaka nde beto sala mpidina.

Yo yina, kana nge kewa mawa to nge kewa nde muntu ya kusadisa nge kele ve, inki nge fwete sala?— Songa Yehowa. Kwenda penepene na yandi, yandi tapesa nge kikesa mpi yandi tasadisa nge. Kuvila ve nde Yehowa kezolaka nge, ata na ntangu yina ya nge kewaka bonso nde nge kele kaka nge mosi. Beto baka Biblia na beto. Na Nkunga 23, yantika na verse 1, Biblia ketubila beto nde: “Mfumu Nzambi, nge kele ngungudi na mono, mono lenda konda kima ve. Nge ke bikaka mono mono pema na kisika ya mbote yina ke na matiti ya mubisu; nge ke nataka mono na lweka ya mwa-masa yina kele pima ti madidi.”

Tala mambu yina nsoniki keyika na verse 4: “Mfumu, mono lenda wa boma ve ata mono kwenda na nzila ya mpimpa mingi bonso lufwa, sambu nge kele ti mono; nge ke nataka mono ti nti na nge, nge ke taninaka mono; yo ke pesaka mono kikesa.” Bantu yina Nzambi na bo kele Yehowa kewaka mpi mutindu mosi. Bo kebakaka kikesa ntangu bo kevandaka na mpasi. Keti nge mpi kewaka mutindu yina?—

Mutindu ngungudi ya zola kekebaka mameme na yandi, Yehowa mpi kekebaka bantu na yandi mbote. Yandi kesongaka bo nzila ya mbote ya kulanda, mpi bo kelandaka yandi ti kyese yonso. Ata bampasi kele mingi na bisika yonso ya bo kevandaka, mfunu ya kuvanda na boma kevandaka  ve. Ngungudi kesadilaka fimbu to nti na yandi sambu na kutanina mameme na bambisi yina le sosa kukota yo nsoki. Biblia ketubila mutindu toko Davidi, yina kuvandaka ngungudi, kutaninaka mameme na yandi na ntambu mosi ti urse mosi. (1 Samuele 17:34-36) Bantu ya Nzambi mezaba nde Yehowa tatanina bo mpi. Bo fwete kudiwa na lutaninu sambu Nzambi kele ti bo.

Yehowa kezolaka mpenza mameme na yandi, mpi yandi kekebaka bo ti zola yonso. Biblia ketuba nde: ‘Yandi ke talaka bantu na yandi bonso ngungudi ke talaka mameme na yandi. Yandi ke tulaka bana-mameme kisika mosi na maboko na yandi.’—Yezaya 40:11.

Keti nge ke na kyese ve na kuzaba nde Yehowa kele Nzambi ya mutindu yina?— Keti nge kezola kuvanda dimeme na yandi?— Mameme kewaka ndinga ya ngungudi na bo. Bo kevandaka penepene na yandi. Keti nge kewilaka Yehowa?— Keti nge kevandaka penepene ti yandi?— Kana mpidina nge fwe vandaka ve na boma ata fyoti. Yehowa tavandaka ti nge.

Yehowa ketaninaka na zola yonso bantu yina kesadilaka yandi. Beto tanga kumosi mambu yina Biblia ketuba sambu na dyambu yango, na Nkunga 37:25; 55:23; mpi Luka 12:29-31.

[Kifwanisu ya kele na lutiti 163]

Nge keyindula nde dimeme yai ya fyoti ya mevila kekudiwa nki mutindu?

[Kifwanisu ya kele na lutiti 164]

Nani kele bonso ngungudi yai ya kugulusaka dimeme na yandi?

[Kifwanisu ya kele na lutiti 165]

Keti nge kemonaka nde Yehowa kele mpenza muntu ya kyeleka bonso tata na nge to muntu yankaka?

[Kifwanisu ya kele na lutiti 166]

Mutindu ngungudi ketaninaka mameme na yandi, nani le sadisa beto na ntangu beto ke na mpasi?