HIHI rĩmwe nĩ ũiguaga ihooru?— Hihi nĩ ũrigagwo kana nĩ kũrĩ mũndũ ũkwendete?— Ciana imwe nĩ ciiguaga ũguo. No Ngai atwĩraga ũũ: ‘Niĩ ndingĩriganĩrũo nĩwe.’ (Isaia 49:15) Na githĩ kũmenya ũguo ti ũndũ mwega?— Jehova Ngai nĩ atwendete mũno!

Mwandĩki ũmwe wa Bibilia oigire ũũ: ‘Nĩ ndiganĩirio nĩ baba o na mami, no Jehova nĩwe ũnjoete.’ (Thaburi 27:10) Kũmenya ũndũ ũcio no gũtũũmĩrĩrie mũno, githĩ tiguo?— Jehova atwĩraga ũũ: ‘Tiga gwĩtigĩra, nĩ gũkorũo ndĩ hamwe nawe. Ti-itherũ nĩ ndĩĩgũteithagia.’—Isaia 41:10.

O na kũrĩ ũguo, rĩmwe Jehova nĩ arekaga Shaitani atũrehere mathĩna. Jehova o na nĩ arekaga Shaitani agerie ndungata Ciake. Hĩndĩ ĩmwe, Mũcukani nĩ aatũmire Jesu anyamarĩke mũno nginya agĩkaĩra Jehova akĩmũũria ũũ: “Ngai wakwa, Ngai wakwa, ũndiganĩirie nĩkĩ?” (Mathayo 27:46) O na hĩndĩ ĩyo Jesu aanyamarĩkaga, no aamenyaga atĩ Jehova nĩ aamwendete. (Johana 10:17) Jesu nĩ aamenyaga atĩ Ngai nĩ arekaga ndungata ciake igerio nĩ Shaitani na akamwĩtĩkĩria acirehere mĩnyamaro. Thĩinĩ wa gĩcunjĩ kĩngĩ, nĩ tũkona kĩrĩa gĩtũmaga Ngai areke Shaitani eke ũguo.

Ciana nini kaingĩ nĩ imakagio nĩ maũndũ maingĩ. Kwa ngerekano-rĩ, hihi nĩ ũrĩ wora njĩra?— Hihi nĩ waamakire?— Ciana nyingĩ no imake. Kũrĩ hĩndĩ Jesu aaheanire rũgano rwa ng’ondu ĩmwe yorĩte.

 Wee no ũringithanio na ng’ondu. Nĩ kĩĩ kĩngĩtũma tuuge ũguo? Nĩ tondũ ng’ondu itirĩ hinya mũingĩ. Na nĩ ibataraga mũndũ wa gũcirĩithia na gũcigitĩra. Mũndũ ũrĩa ũrĩithagia ng’ondu etagwo mũrĩithi.

Rũgano-inĩ rũu, Jesu aaririe ũhoro wa mũrĩithi warĩ na ng’ondu igana rĩmwe. No ng’ondu ĩmwe ĩkĩũra. No gũkorũo yorire ĩkĩenda kuona mwena ũcio ũngĩ wa kĩrĩma. Thutha wa kahinda kanini, ng’ondu ĩyo yarĩ kũraihu mũno na iria ingĩ. Ũgwĩciria ng’ondu ĩyo yaiguire atĩa rĩrĩa yonire atĩ ndĩrĩ hamwe na iria ingĩ?—

Mũrĩithi ũcio angĩekire atĩa aamenya atĩ ng’ondu ĩmwe nĩ yũrire? Hihi angĩatiganire nayo na oige atĩ o na nĩyo ĩĩtwarire na kũu? Kana hihi angĩatigire ng’ondu icio ingĩ 99 handũ harĩ na ũgitĩri nĩguo agacarie ng’ondu ĩyo yorĩte? Hihi ng’ondu ĩmwe tu no ĩbatare gũcario ũguo wothe?— Korũo warĩ ng’ondu ĩyo yorĩte-rĩ, nĩ ũngĩendire mũrĩithi ũcio agũcarie?—

Mũrĩithi ũcio eendete ng’ondu ciake ciothe, nginya ĩrĩa yorĩte. Nĩ ũndũ ũcio agĩthiĩ kũmĩcaria. Ta wĩcirie ũrĩa ng’ondu ĩyo yakenire rĩrĩa yoonire mũrĩithi ũcio agĩũka! Jesu oigire atĩ mũrĩithi ũcio nĩ aakenire mũno rĩrĩa onire ng’ondu  ĩyo yake. Aakenire nĩ ũndũ wa ng’ondu ĩyo gũkĩra ng’ondu icio ingĩ 99 itoorĩte. Hihi nũũ ũhaana ta mũrĩithi ũcio wagwetirũo nĩ Jesu rũgano-inĩ rũu? Nũũ ũtwendete o ta ũrĩa mũrĩithi ũcio eendete ng’ondu ciake?— Jesu oigire atĩ Ithe ũrĩa ũrĩ igũrũ nĩwe ũtwendete ũguo. Na Ithe nĩ Jehova.

Jehova nĩwe Mũrĩithi Ũrĩa Mũnene wa andũ ake. Nĩ endete arĩa othe mamũtungatagĩra, nginya twana tũnini tawe. Ndendaga mũndũ o na ũmwe ore kana one ũũru. Kũmenya atĩ Ngai atwendete ũguo wothe nĩ gũtũũmagĩrĩria mũno.—Mathayo 18:12-14.

Hihi nĩ wĩtĩkĩtie Jehova Ngai?— Hihi nĩ wonaga ta akwendete o ta ũrĩa baba wanyu kana mũndũ ũngĩ akwendete?— Nĩ ma tũtingĩhota kuona Jehova, tondũ we nĩ roho. Akoragwo na mwĩrĩ tũtangĩhota kuona na maitho maitũ. No nĩ akoragwo kuo na nĩ atuonaga. O na nĩ amenyaga rĩrĩa tũrabatara ũteithio. Ningĩ o ta ũrĩa twaragia na andũ arĩa angĩ gũkũ thĩ, no twarie na Jehova kũgerera mahoya. Na Jehova nĩ endaga twĩke ũguo.

 Kwoguo rĩrĩa waigua ihooru-rĩ, wagĩrĩirũo gwĩka atĩa?— Wagĩrĩirũo kwaria na Jehova. Kuhĩrĩria Jehova, na nĩ arĩkũũmagĩrĩria na agagũteithia. Ririkanaga atĩ Jehova nĩ akwendete, nginya rĩrĩa ũrona ta ũtiganĩirio. Ta reke tuoe Bibilia tũthome Thaburi 23. Rĩandĩko rĩu riugaga ũũ kwambĩrĩria mũhari wa mbere: ‘Jehova nĩwe mũrĩithi wakwa. Ndirĩ kĩndũ ingĩaga. Atũmaga hurũke kũndũ kũrĩ nyeki nduru. Andĩithagia ngurumo ya maĩ marĩa me na ũhurũko.’

Ta rora wone ũrĩa mwandĩki wa Thaburi ĩyo oigire mũhari-inĩ wa 4: ‘O na ingĩtuĩka ndĩragerera mũkuru wa nduma ndumanu, ndirĩ ũgwati ingĩĩtigĩra, nĩ gũkorũo twĩ hamwe nawe; njũgũma yaku na rũthanju rwaku, nĩcio itũmaga njage kũmaka.’ Ũguo nĩguo andũ arĩa matungatagĩra Jehova maiguaga. Nĩ momagĩrĩrio rĩrĩa marĩ thĩna-inĩ. Hihi ũguo nĩguo wee ũiguaga rĩrĩa ũrĩ thĩna-inĩ?—

O ta ũrĩa mũrĩithi ũrĩ na wendo arĩithagia ng’ondu ciake wega, noguo Jehova arĩithagia andũ ake arĩ na wendo. Amatongoragia, nao makamũrũmĩrĩra. O na rĩrĩa marĩ thĩna-inĩ, matimakaga. Mũrĩithi ahũthagĩra njũgũma kana rũthanju kũgitĩra ng’ondu itikarĩo nĩ nyamũ iria njũru. Bibilia nĩ ĩtwĩraga ũrĩa Daudi arĩ kamwana kanini aagitagĩra ng’ondu iria aarĩithagia itikarĩo nĩ mũrũthi na nduba. (1 Samueli 17:34-36)  Nao andũ a Ngai nĩ moĩ atĩ Jehova nĩ amagitagĩra. Maiguaga marĩ na ũgitĩri tondũ Ngai arĩ hamwe nao.

Jehova nĩ endete ng’ondu ciake mũno na acirĩithagia na wendo. Bibilia yugaga ũũ: ‘Ng’ondu cia rũũru rwake agaacirĩithagia o ta mũrĩithi. Natuo tũgondu atuoyage na moko make.’—Isaia 40:11.

Hihi nĩ wakena nĩ kũmenya atĩ Jehova nĩ mũrĩithi mwega?— Hihi no wende gũtuĩka ng’ondu yake?— Ririkana atĩ ng’ondu nĩ ithikagĩrĩria mũrĩithi wacio. Cikaraga hakuhĩ nake. Hihi wee nĩ ũthikagĩrĩria Jehova?— Hihi nĩ ũikaraga hakuhĩ nake?— Angĩkorũo nĩ wĩkaga ũguo ndwagĩrĩirũo nĩ gwĩtigĩra, tondũ Jehova arĩkoragwo hamwe nawe.