31 تاراۋ
جۇبانىشتى قايدان تابامىز؟
سەنىڭ مۇڭايعان نە جالعىزسىراعان كەزىڭ بولعان با؟ ~ ٶزىڭدى ەشكىم جاقسى كورمەيتىندەي سەزىنگەنسىڭ بە؟ ~ كەيبىر بالالاردا وسىنداي سەزىم بولادى. ٴبىراق قۇداي: «مەن سەنى ەشقاشان ۇمىتپايمىن»،— دەپ ۋادە بەرەدى (يشايا 49:15). بۇل كەرەمەت ۋادە ەمەس پە؟ ~ ٴيا، ەحوبا قۇداي ٴبىزدى شىنىمەن جاقسى كورەدى!
اداسىپ قالعان مىنا قوشاقان قانداي كۇيدە تۇر ەكەن؟
كيەلى كىتاپتىڭ ٴبىر جازۋشىسى: «اكە-شەشەم مەنى تاستاپ كەتسە دە، ەحوبا مەنى ەشقاشان تاستامايدى»،— دەگەن (زابۋر 26:10). ەحوبانىڭ ٴبىزدى تاستامايتىنىن ٴبىلۋ ناعىز جۇبانىش ەمەس پە؟ ~ شىنىندا دا، ەحوبا بىزگە: «قورىقپا، مەن سەنىڭ جانىڭدامىن... مەن ساعان كومەكتەسەمىن»،— دەيدى (يشايا 41:10).
الايدا كەيدە ەحوبا شايتاننىڭ بىزگە قيىندىق تۋدىرۋىنا جول بەرەدى. ٴتىپتى ول قىزمەتشىلەرىنىڭ سىنالۋىنا دا جول بەرەدى. بىردە ٸبىلىس يسانى قاتتى ازاپتاعاندا، يسا ەحوباعا: «قۇدايىم، قۇدايىم! نەگە مەنى جالعىز قالدىردىڭ؟»— دەپ جالبارىنا ايعايلاعان (ماتاي 27:46). ٴبىراق ازاپ شەگىپ تۇرسا دا، يسا ٶزىن ەحوبانىڭ جاقسى كورەتىنىن بىلگەن (جوحان 10:17). سونداي-اق ول قۇدايدىڭ شايتانعا ٶز قىزمەتشىلەرىن سىناۋعا جانە قيىندىقتار تۋعىزۋعا جول بەرەتىنىن بىلگەن. مۇنىڭ سەبەبىن ٴبىز الداعى تاراۋلاردىڭ بىرىندە قاراستىراتىن بولامىز.
كىشكەنتايلار ٴجيى قورقادى، مىسالى، اداسىپ قالعاندا. سەنىڭ اداسىپ قالعان كەزىڭ بولعان با؟ ~ سوندا قاتتى قورىقتىڭ با؟ ~ بىردە يسا اداسىپ قالعان بىرەۋ تۋرالى وقيعا ايتىپ بەردى. بۇل وقيعا بالا تۋرالى ەمەس، قوشاقان تۋرالى ەدى.
سەن دە قوشاقان سياقتىسىڭ. نەگە؟ ويتكەنى قوشاقان دا، قويلار دا وزدەرىن قورعاي المايدى. ولاردى بىرەۋ ٵردايىم قامقورلاپ، ٵرى قورعاپ ٴجۇرۋ كەرەك. قويلاردى قورعاپ، باعىپ جۇرەتىن ادامدى قويشى دەپ اتايدى.
يسانىڭ اڭگىمەسىندەگى قويشىنىڭ ٴجۇز قويى بار ەدى. كۇندەردىڭ كۇنىندە وتارداعى ٴبىر قوشاقان اداسىپ كەتەدى. مۇمكىن، ول قىردىڭ ار جاعىندا نە بار ەكەنىن كورگىسى كەلگەن بولار. ٴسۇيتىپ ٴجۇرىپ باسقا قويلاردان قالىپ قويادى. ەندى سول قوشاقاننىڭ جاعدايىن ەلەستەتىپ كورشى: ايدالادا جالعىز ٶزى، كومەكتەسەتىن ەشكىم جوق. سوندا ول نە سەزىندى ەكەن؟ ~
قويشى كىشكەنتاي قويىنىڭ وتاردا جوق ەكەنىن كورگەندە، نە ىستەيدى؟ ٶزى كىنالى، ونى ىزدەپ قايتەم دەي مە؟ الدە 99 قويىن قاۋىپسىز جەرگە قالدىرىپ، ٴبىر قويدى ىزدەۋگە شىعا ما؟ جالعىز قوي وسىنشاما كۇش سالىپ ىزدەۋگە تۇرا ما، قالاي ويلايسىڭ؟ ~ سەن سول قوشاقاننىڭ ورنىندا بولساڭ، قويشىنىڭ ٶزىڭدى ىزدەگەنىن قالار ما ەدىڭ؟ ~
قوشاقانىن تاپقان قويشى كىمگە ۇقسايدى؟
قويشى بارلىق قويىن، ٴتىپتى اداسىپ قالعان قوشاقاندى دا وتە جاقسى كورەدى. سوندىقتان ونى ىزدەۋگە شىعادى. قامقور باعۋشىنىڭ كەلە جاتقانىن كورگەندە، قوشاقان قالاي قۋاندى دەسەڭشى! قويشى دا ونىڭ تابىلعانىنا ٴماز بولدى. ول اداسپاعان 99 قويىنان گورى تابىلعان بىرەۋى ٷشىن قاتتى قۋاندى. ەندى، ويلاپ كورشى، يسانىڭ اڭگىمەسىندەگى وسى قوي باعۋشىسى كىمگە ۇقسايدى؟ قوشاقانعا قامقورلىق كورسەتكەن باعۋشى سياقتى، ٴبىزدىڭ قامىمىزدى كىم ويلايدى؟ ~ يسانىڭ ايتۋىنشا، ونىڭ كوكتەگى اكەسى. ال ونىڭ اكەسى — ەحوبا.
ەحوبا قۇداي — ٶز حالقىنىڭ ۇلى باعۋشىسى. ول وزىنە قىزمەت ەتەتىن ادامداردىڭ ٴبارىن، سەن سياقتى كىشكەنتايلاردى دا، جاقسى كورەدى. ول ەشكىمنىڭ جاراقات العانىن نەمەسە ولگەنىن قالامايدى. قۇدايدىڭ بىزگە وتە قامقور ەكەنىن ٴبىلۋ ناعىز جۇبانىش بەرمەي مە؟! (ماتاي 18:12—14).
اكەڭنىڭ قامقورلىعىن سەزىنگەندەي، ەحوبانىڭ دا قامقورلىعىن سەزىنەسىڭ بە؟
سەن ەحوبا قۇدايعا شىنىمەن سەنەسىڭ بە؟ ~ ونىڭ بار ەكەنىنە سەنىمدىسىڭ بە؟ ~ ەحوبانى كورە المايتىنىمىز راس. ويتكەنى ول — رۋح. سوندىقتان ونىڭ دەنەسى بىزگە كورىنبەيدى. ٴبىراق ول بار، ٵرى ٴبىزدى كورە الادى. سونداي-اق ٴبىز ونىڭ كومەگىنە مۇقتاج ەكەنىمىزدى بىلەدى. ٴبىز ادامدارمەن سويلەسەتىنىمىزدەي، قۇدايمەن دە دۇعادا سويلەسە الامىز. ەحوبا ٴبىزدىڭ دۇعا ەتكەنىمىزدى قالايدى.
سوندىقتان سەن مۇڭايعاندا نەمەسە ٶزىڭدى جالعىز سەزىنگەندە نە ىستەۋىڭ كەرەك؟ ~ وسى جايلى ەحوباعا ايت، ونىمەن تىعىز قارىم-قاتىناستا بول. سوندا ول سەنى جۇباتادى جانە كومەكتەسەدى. ٶزىڭدى جالعىز سەزىنگەندە دە، ەحوبا سەنى جاقسى كورەتىنىن ۇمىتپا. قازىر كيەلى كىتاپتى اشىپ، زابۋردىڭ 22-جىرىن وقىپ كورەيىكشى. ول بىلاي دەپ باستالادى: «جاراتقان يەم — مەنىڭ باعۋشىم، مەن ەش نارسەدەن دە تارىقپايمىن. ول مەنى جاسىل جايلاۋعا جايادى، تۇنىق سۋعا جەتەلەپ اپارادى».
ال ٴتورتىنشى تارماعىندا بىلاي دەلىنگەن: «قاپ-قاراڭعى شاتقالدا جۇرسەم دە مەن، قورىقپايمىن ەشبىر قاۋىپ-قاتەردەن، سەبەبى ٶزىڭ مەنىڭ قاسىمداسىڭ، جىگەر بەرەدى قامشىڭ مەن تاياعىڭ». ەگەر ادامدار ەحوبانى قۇدايىم دەپ قابىلداسا، وزدەرىن قالاي سەزىنەتىنىن كوردىڭ بە؟! ولار قيىنشىلىق كەزىندە جۇبانىش تابادى ەكەن. سەندە دە ەحوباعا دەگەن وسىنداي سەزىم بار ما؟ ~
قامقور باعۋشى ٶز وتارىنىڭ قامىن قالاي ويلاسا، ەحوبا دا ٶز حالقىنىڭ قامىن سولاي ويلايدى. قويشى وتارىن دۇرىس جولمەن الىپ جۇرەدى، ال قويلار الاڭسىز سوڭىنان ەرەدى. جان-جاقتان قاۋىپ تونسە دە، ولارعا قورقۋدىڭ قاجەتى جوق. قويشى قويلارىن قورعاۋ ٷشىن، جىرتقىشتاردى قامشىسىمەن نە تاياعىمەن قۋىپ جىبەرەدى. كيەلى كىتاپتا جاس ٴداۋىت ٶز قويلارىن ارىستان مەن ايۋدان قورعاعانى تۋرالى جازىلعان (پاتشالىقتار 1-جازبا 17:34—36). ەحوبانىڭ ٴبىزدى، ياعني ٶز حالقىن، قورعايتىنىن بىلەمىز. قۇداي ٴبىزدىڭ جانىمىزدا بولعاندىقتان، ٶزىمىزدى قاۋىپسىز سەزىنەمىز.
قويلارىن قورعايتىن باعۋشى سياقتى، قيىن كەزدە كىم بىزگە كومەكتەسە الادى؟
ەحوبا ٶز قويلارىن شىنىمەن جاقسى كورەدى، ٵرى ولاردى مەيىرىمدىلىكپەن قامقورلايدى. كيەلى كىتاپتا وسى جايلى بىلاي جازىلعان: «ولاردى ىزگى باعۋشىداي جەتەلەيدى. قوزىلارىن قولىنا الىپ، كەۋدەسىنە باسىپ كوتەرەدى» (يشايا 40:11).
ەحوبانىڭ وسىنداي قامقور ەكەنىن بىلگەنىڭە سەن قۋانىشتىسىڭ با؟ ~ ونىڭ قوشاقانى بولعىڭ كەلە مە؟ ~ قويلار باعۋشىسىنىڭ داۋىسىن تىڭدايدى، ٵرى ونىڭ جانىندا جۇرەدى. ال سەن ەحوبانى تىڭدايسىڭ با؟ ~ ونىڭ جانىندا جۇرەسىڭ بە؟ ~ ەندەشە، ساعان قورقۋدىڭ قاجەتى جوق. ەحوبا ٵردايىم سەنىڭ جانىڭدا بولادى.
ەحوبا وزىنە قىزمەت ەتەتىندەردى مەيىرىمدىلىكپەن قامقورلايدى. كەل، وسى جايلى كيەلى كىتاپتان وقىپ كورەيىك: زابۋر 36:25؛ 54:23 جانە لۇقا 12:29—31.
