YU DƆN ɛva fil bad ɛn tink se na yu wangren de?— Yu tink se nɔbɔdi nɔ lɛk yu?— Na so sɔm pikin dɛn kin fil. Bɔt Gɔd prɔmis se: “Mi, nɔ go fɔgɛt yu.” (Na wi mek am Italiks; Ayzaya 49:15) Yu nɔ tink se na fayn tin dat?— Yɛs, fɔ tru Jiova Gɔd rili lɛk wi!

Wan pan di man dɛn we rayt di Baybul se: ‘Ivin if mi papa ɛn mi mama tɔn dɛn bak pan mi, Jiova go tek mi lɛk in yon pikin.’ (Sam 27:10) Dat kin rili fayn fɔ no, nɔto so?— Yɛs, Jiova tɛl wi se: “Nɔ fred bikɔs a de wit yu . . . A go ɛp yu.”—Na wi mek am Italiks; Ayzaya 41:10.

Bɔt sɔntɛnde, Jiova kin alaw Setan fɔ mek wi gɛt prɔblɛm dɛn. Jiova kin ivin alaw Setan fɔ tɛst In pipul dɛn. Wan tɛm Setan bin mek Jizɔs sɔfa sote i bɔs kray to Jiova se: “Mi Gɔd, mi Gɔd, wetin du yu fɔsek mi?” (Matyu 27:46) Pan ɔl we Jizɔs bin de sɔfa, i bin stil no se Jiova lɛk am. (Jɔn 10:17) Bɔt Jizɔs bin no bak se Gɔd de alaw Setan fɔ tɛst In savant dɛn ɛn I de alaw Setan fɔ mek dɛn sɔfa. Insay wan ɔda chapta, wi go ɛksplen wetin mek Gɔd de alaw Setan fɔ du dis.

We wi smɔl, i izi fɔ mek wi fred. Fɔ ɛgzampul, yu dɔn ɛva lɔs?— Dat bin mek yu fred, nɔto so?— Bɔku pikin dɛn kin fred. Wan tɛm di Gret Ticha bin pul stori bɔt wan ship we bin lɔs.

Wi tan lɛk da ship de. Wetin mek wi se so? Wɛl, na bikɔs ship dɛn nɔ tu big ɛn dɛn nɔ gɛt bɛtɛ trɛnk. Ɛn dɛn kin nid  pɔsin fɔ mɛn dɛn ɛn mek bad tin nɔ apin to dɛn. Dɛn kɔl pɔsin we de mɛn ship, shɛpad.

Insay Jizɔs in stori, i tɔk bɔt wan shɛpad we gɛt ɔndrɛd ship dɛn. Bɔt wan pan di ship dɛn bin lɔs. I go bi se da wan ship de we lɔs bin want fɔ go si wetin de na di ɔda say na di il. Bɔt i nɔ tu te, di ship go fa frɔm in kɔmpin dɛn. Aw yu tink se da ship de bin fil we i luk rawnd ɛn si se na in wangren de?—

Wetin di shɛpad go du we i nɔ si di wan ship? Yu tink se i go se na di ship in fɔlt so i nɔ go wɔri bɔt am? Ɔ i go lɛf di 99 ship dɛn na say we sef ɛn go fɛn di wan we dɔn lɔs? Yu tink se nid de fɔ wɔri pasmak fɔ wangren ship?— If yu na bin da ship de we bin dɔn lɔs, yu go want mek yu shɛpad luk fɔ yu, nɔto so?—

Di shɛpad rili lɛk ɔl in ship dɛn, ivin di wan sɛf we lɔs. So i go luk fɔ di wan we lɔs. Tink bɔt aw da ship go dɔn fil we i si in shɛpad de kam fɔ am! Ɛn Jizɔs bin se di shɛpad bin gladi we i fɛn in ship. I gladi fɔ di wan ship we bin lɔs pas di 99 ship dɛn we nɔ bin lɔs.  Naw, udat tan lɛk da shɛpad na Jizɔs in stori? Udat rili bisin bɔt wi pas aw da shɛpad bisin bɔt in ship?— Jizɔs se na in Papa we de na ɛvin. Ɛn in Papa na Jiova.

Jiova Gɔd na di Shɛpad we pas ɔl ɔda shɛpad fɔ in pipul dɛn. I lɛk ɔl di wan dɛn we de wɔship am, ivin di wan dɛn we yɔŋ lɛk yu. I nɔ want lɛ bad tin apin to wi, ɛn i nɔ want lɛ wi day. Fɔ tru, i fayn fɔ no se Gɔd rili bisin bɔt wi!—Matyu 18:12-14.

Yu rili biliv Jiova Gɔd?— Yu de si am lɛk rial pɔsin?— Na tru se wi nɔ de si Jiova. Dis na bikɔs in na Spirit. I gɛt bɔdi we wi nɔ de si wit wi yay. Bɔt in na rial pɔsin ɛn i de si wi. I no we wi nid ɛp. Ɛn wi kin tɔk to am bay we wi de pre, jɔs lɛk aw wi de tɔk to ɛni ɔda pɔsin we de na dis wɔl. Jiova want lɛ wi tɔk to am.

 So if yu de fil se na yu wangren de, wetin yu fɔ du?— Tɔk to Jiova. Go nia am, ɛn i go kɔrej yu ɛn ɛp yu. Mɛmba se Jiova lɛk yu, ilɛksɛf yu de fil lɛk se na yu wangren de. Tek yu Baybul ɛn tɔn to Sam 23. Insay de, di Baybul tɛl wi se: ‘Jiova na lɛk man we de mɛn ship. Natin nɔ de we a nid, we a nɔ go gɛt. I de kɛr mi go usay a nɔ go yagba fɔ natin, i de gi mi kol at.’

Notis wetin di man we rayt dis Sam tɔk na vas 4. I se: ‘Pan ɔl we sɔntɛnde a kin de pan trɔbul we kin mek a skyad, i kin yuz in pawa fɔ mek a no se i de wit mi. A nɔ go fred wans a no se yu de wit mi. Na yu de kɔba mi frɔm ɔl kayn bad tin.’ Na so pipul dɛn kin fil if Jiova na dɛn Gɔd. Dɛn kin tek kɔrej we dɛn gɛt prɔblɛm. Na so yusɛf de fil?—

Jɔs lɛk aw shɛpad we lɛk in ship dɛn kin kia fɔ dɛn, na so Jiova sɛf de kia fɔ in pipul dɛn. I de sho dɛn aw fɔ waka ɛn dɛn kin gladi fɔ fala am. Ilɛksɛf prɔblɛm dɛn kin de, dɛn nɔ nid fɔ fred. Shɛpad kin yuz stik fɔ mek ɔda animal dɛn nɔ du bad tin to in ship dɛn. Di Baybul tɛl wi bɔt aw Devid we na bin shɛpad frɔm we i yɔŋ mek layɔn ɛn bia nɔ it in  ship dɛn. (Fɔs Samiɛl 17:34-36) Ɛn Jiova in pipul dɛn no se i go mek bad tin nɔ apin to dɛnsɛf. Dɛn kin fil sef bikɔs Gɔd de wit dɛn.

Jiova rili lɛk in ship dɛn ɛn i de kia fɔ dɛn. Di Baybul se: “I go fid in ship dɛm lɛk shɛpad, i go gɛda di ship pikin dɛn nain an.”—Ayzaya 40:11.

Yu kin fil fayn we yu no se Jiova tan lɛk shɛpad, nɔto?— Yu want fɔ bi wan pan Jiova in ship dɛn?— Ship de lisin to in shɛpad in vɔys. Dɛn kin de nia am. Yu de lisin to Jiova?— Yu de nia am?— If na so i bi, yu nɔ fɔ ɛva fred. Jiova go de wit yu.