UTUKU ukadi mudiumvue mubungame ne muikale nkayebe anyi?​— Utuku ukadi mudiebeje bua kumanya ni kudiku muntu kampanda udi mukunange anyi?​— Bana nebe bakuabu batu badiebeja nanku. Kadi Nzambi udi ulaya ne: ‘Meme tshiena nkupua wewe muoyo.’ (Yeshaya 49:15) Kabienaku bimpe bua wewe kuelela meji pa mêyi aa anyi?​— Eyowa, Yehowa Nzambi mmutunange bushuwa!

Mufundi kampanda wa Bible wakamba ne: “Nansha biandekela tatu wanyi ne mamu wanyi, Yehowa neangambule.” (Musambu 27:10) Kumanya bualu ebu kudi mua kutusamba kutusambilamu, ki mmuomu anyi?​— Eyowa, Yehowa udi utuambila ne: ‘Kutshinyi, bualu bua ndi nebe; bulelela, nenkukuatshishe.’​—Yeshaya 41:10.

Nansha nanku, misangu mikuabu Yehowa utu ulekela Satana utukebela ntatu. Yehowa utu ulekela Satana uteta nansha basadidi Bende. Musangu mukuabu Diabolo wakakengesha Yezu bikole ne Yezu kudilaye kudi Yehowa ne: ‘Nzambi wanyi, Nzambi wanyi, wandekedi tshinyi?’ (Matayo 27:46) Nansha muvua Yezu ukenga nanku, uvua anu mumanye ne: Yehowa uvua mumunange. (Yone 10:17) Kadi Yezu uvua kabidi mumanye ne: Nzambi utu ulekela bua Satana atete basadidi Bende ne kabidi utu umulekela ubakengesha. Mu nshapita mukuabu netumvuije bua tshinyi Nzambi utu ulekela bua Satana kuenza nunku.

Patudi bana batekete, tutu misangu ya bungi tumvua buôwa. Tshilejilu, utuku ukadi mujimine anyi?​— Uvua mumvue buôwa anyi?​— Bana ba bungi bavua mua kumvua buôwa. Dikuabu dituku, Mulongeshi Munene wakela muanu uvua wakula bua dijimina. Kadi ki mmuana uvua mujimine to. Mukoko ke uvua mujimine.

 Mu mushindu kampanda peshi kansanga, wewe udi anu bu mukoko. Mmushindu kayi? Mmu mushindu wa se: mikoko kayitu minene menemene ne kayitu ne bukole bua bungi to. Bitu bikengela muntu kampanda bua kuyilama ne kuyikuba. Badi babikila muntu udi ne mudimu au ne: mulami wa mikoko.

Mu muanu wende, Yezu wakakula bua mulami wa mikoko uvua ne mikoko lukama. Kadi umue wa ku mikoko eyi wakajimina. Mukoko eu uvua mua kuikala musue kumona tshivua ku luseke lukuabu lua kakunakuna. Kadi mutantshi kaunengi, mukoko au ukavua kule ne mikoko mikuabu. Udi mua kuela meji muvua mukoko au mudiumvue pavuawu mukenzakane e kudimonawu ukadi nkayawu anyi?​—

Mulami wa mikoko uvua mua kuenza tshinyi pavuaye ulua kumona ne: mukoko umue kauvuaku to? Uvuaku mua kuamba ne: tshilema tshivua tshia mukoko nkayawu, nanku yeye kavua ne bua kuditatshisha bua bualu abu anyi? Peshi uvua mua kushiya mikoko 99 mikuabu ayi muaba uvua kauyi njiwu ne kuya kukeba umuepele uvua mujime au? Bivua bimpe bua kuditatshisha bua mukoko anu umuepele au anyi?​— Bu wewe muikale mukoko au uvua mujimine, uvuaku mua kujinga bua mulami wa mikoko alue kukukeba anyi?​—

Mulami wa mikoko uvua munange bikole mikoko yende yonso, uvua munange kabidi nansha ne eu uvua mujimine. Ke bualu  kayi wakaya kukeba mukoko umue uvua mujimine. Ela meji disanka divua nadi mukoko uvua mujimine au pakumonawu mulami wa mikoko ulua! Nenku Yezu wakamba ne: mulami wakasanka bualu uvua mupete mukoko wende. Wakasanka bikole bua bualu buawu kupita bua mikoko 99 ivua kayiyi mijimine. Kadi mpindieu nnganyi udi bu mulami wa mikoko au uvua Yezu metele mu muanu wende? Nnganyi udi utulama bimpe anu bu muvua mulami wa mikoko muenze bua mikoko yende?​— Yezu wakamba ne: Tatuende wa mu diulu utu wenza nanku. Tatuende au n’Yehowa.

Yehowa Nzambi udi Mulami Munene wa bantu bende. Mmunange aba bonso badi bamuenzela mudimu, kusangisha ne bana bu wewe. Ki mmusue bua muntu nansha umue wa kutudi apete njiwu anyi abutudibue to. Bulelela, bidi bikolesha ku muoyo patudi tumanya ne: Nzambi udi wenza muende muonso bua kutulama bilenga!​—Matayo 18:12-14.

Udi witabuja menemene Yehowa Nzambi anyi?​— Wewe udi umumona ne: mmuntu mulelela anyi?​— Bushuwa katuena mua kumona Yehowa to. Bidi nunku bualu Yehowa udi Nyuma. Udi ne mubidi udi mêsu etu a bantu kaayi mua kumona  to. Kadi Yehowa mmuntu mulelela ne udi mua kutumona. Mmumanye dîba ditudi tujinga ne: batuambuluishe. Ne tudi mua kuyikila nende mu disambila, anu bu mutudi mua kuyikila ne muntu mukuabu wa pa buloba. Yehowa mmusue bua tuikale tuyikila nende mu disambila.

Nunku wewe mumvue dibungama dikukuata anyi mudiumvua mudishadile nkayebe, ntshinyi tshiudi mua kuenza?​— Ambila Yehowa bualu ebu. Semena pabuipi nende ne yeye neakusambe ne kabidi neakuambuluishe. Vuluka ne: Yehowa mmukunange, nansha paudi udiumvua muikale nkayebe. Anji angata Bible webe. Badi batuambila mu Musambu wa 23, kutuadija ku mvese wa kumpala ne: ‘Yehowa udi mulami wanyi, tshiena nkengela tshintu; Yeye udi undadika mu mashinde. Udi undombola pepi ne mâyi adi talala.’

Tangila tshidi mufundi wa Misambu wamba kabidi mu mvese 4: ‘Nansha bingenda mupitshile mu lupongo lua mundidimbi wa lufu, tshiena ntshina bualu bubi; bualu bua wewe udi nanyi; tshibonga tshiebe ne tshibangu tshiebe bidi binsamba.’ Ke mudi bantu badi Yehowa muikale Nzambi wabu badiumvua nunku. Badi babasamba padibu mu lutatu. Ke muutu udiumvua pebe anyi?​—

Anu bu mudi mulami wa dinanga ulama tshisumbu tshiende tshia mikoko, ke mudi Yehowa ulama bimpe bantu bende. Udi ubaleja njila muimpe ne badi bamulonda ne disanka ku muoyo. Nansha buobu basombele muaba udi bimvundu, kabena ne bua kutshina to. Mulami utu ne  tshibonga tshiende anyi mutshi (tshibangu) bua kulama mikoko yende bua nyama mikuabu kayipetshi mushindu wa kuyenzela bibi. Bible udi utuambila mushindu uvua nsonga Davidi mukube mikoko ivuaye ulama ku nyama wa ntambue ne wa ours. (1 Samuele 17:34-36) Bantu ba Nzambi mbamanye ne: Yehowa neabalame pabu. Badi mua kudiumvua bakubibue bualu Nzambi udi nabu.

Yehowa mmunange bushuwa mikoko yende ne udi uyilama bimpe. Bible udi wamba ne: ‘Neadishe tshisumbu tshiende tshia mikoko bu mudi mulami wa mikoko uyidisha.’​—Yeshaya 40:11.

Kabienaku bikuenza disanka bua kumanya ne: ke mudi Yehowa nanku au anyi?​— Udiku musue kuikala umue wa ku mikoko yende anyi?​— Mikoko itu iteleja dîyi dia muntu udi uyilama. Idi ishala pabuipi nende. Utu uteleja Yehowa anyi?​— Utu ushala pabuipi nende anyi?​— Nanku kabiena bikengela utshine to. Yehowa neikale nebe.