VUNDU asala mo awe na mo bâ so mo yeke gi mo oko?— Mo hunda tele ti mo awe wala azo aye mo?— Ye tongaso asi na ambeni molenge awe. Me Nzapa amû zendo so: ‘Mbi yeke girisa mo lâ oko pëpe.’ (Esaïe 49:15). A yeke nzoni ti bi bê na ndo ni, ni la ape?— Biani, Jéhovah Nzapa aye e mingi!

Mbeni wasalango Bible atene: ‘Tongana babâ na mama ti mbi azia mbi, fade Jéhovah akamata mbi.’ (Psaume 27:10). Hingango ye so alingbi biani ti dë bê ti e, ni la ape?— Tâ tënë, Jéhovah atene na e: ‘Zia mbito asala mo pëpe teti Mbi yeke na mo; Mbi yeke mû biani maboko na mo.’​—Esaïe 41:10.

Me ngoi na ngoi Jéhovah ayeke zia si Satan aga na kpale na e. Jéhovah azia même lege na Satan ti tara awakua ti Lo. Mbeni lâ, Zabolo asala pasi na Jésus mingi si Jésus adekongo na Jéhovah, lo tene: ‘Nzapa ti mbi, Nzapa ti mbi, ngbanga ti nyen mo zia mbi?’ (Matthieu 27:46). Me atâa so Jésus ayeke bâ lani pasi, lo hinga lakue so Jéhovah angbâ ti ye lo (Jean 10:17). Jésus ahinga nga so Nzapa azia lege na Satan ti handa awakua ti Lo na ti sala pasi na ala. Na yâ mbeni chapitre ti peko, e yeke fa ande ngbanga ti nyen Nzapa azia lege na Satan ti sala ye so.

Tongana e yeke kete, a yeke si so e sala mbito ngoi na ngoi. Na tapande, mo girisa ndo mbeni lâ awe?— Mbito asala mo?— Amolenge mingi ayeke sala mbito. Mbeni lâ, Kota Wafango ye atene mbeni mbaï na ndo mara ti ye tongaso. A yeke molenge pëpe si agirisa, me mbeni taba wala ngasangbaga.

 E lingbi ti tene so mo yeke tongana mbeni taba. Tongana nyen? Ataba ayeke anyama so akono mingi pëpe wala so ayeke na ngangu mingi pëpe. A hunda ti tene zo si abata ala. A hiri zo ni so berger.

Na yâ mbaï ti lo ni, Jésus asala tënë ti mbeni berger so ayeke na ataba ngbangbo oko. Me mbeni oko ti ataba ni agirisa. Peut-être taba ni aye fade ti bâ ye so ayeke na peko ti hoto. Me a ninga pëpe, taba ni ahon yongoro na atanga ni. Na ngoi so taba ni abâ ndo na tele lo, lo ye ti bâ, lo yeke gi lo oko. Bê ti lo ayeke duti ande tongana nyen?—

Tongana berger ni abâ so mbeni taba ti lo agirsa, lo yeke sala nyen? Lo yeke tene so a yeke faute ti taba ni, na a lingbi lo gi nga lo ape? Wala lo yeke zia ataba 99 ni na mbeni nzoni ndo na lo gue lo gi lo so agirisa so? Tâ gi ndali ti taba oko si a sala ye mingi tongaso?— Tongana mo la fade mo yeke taba so agirisa, mo ye si berger ni agi mo?—

Berger ni aye tënë ti ataba ti lo kue mingi, même lo so agirisa so. Tongaso, lo gue lo gi peko ti lo. So tâ ngia si taba ni ayeke na ni ti bâ berger ti lo na gango ni! Jésus atene so ngia asi bê ti berger ni so lo wara taba ti lo. Ngia ti lo ndali  ti taba so ahon même ti ataba 99 so angbâ. Fadeso, zo wa la ayeke tongana berger so na yâ mbaï ti Jésus? Zo wa la ayeke bâ lege ti e mingi tongana berger so abâ lege ti ataba ti lo?— Jésus atene so a yeke Babâ ti lo ti yayu. Na Babâ ti lo ayeke Jéhovah.

Jéhovah Nzapa ayeke Kota Berger ti azo ti lo. Lo ye tënë ti azo kue so ayeke sala kusala ti lo, même akete molenge tongana mo. Lo ye si e wara sioni wala a fâ e pëpe. A yeke tâ ye ti dengo bê ti hinga so Nzapa ayeke bâ lege ti e mingi!​—Matthieu 18:12-14.

Mo mä na bê biani na Jéhovah Nzapa?— Lo yeke tâ zo na lê ti mo?— Tâ tënë, e lingbi ti bâ Jéhovah pëpe, ngbanga ti so lo yeke Yingo. Lo yeke na mbeni tele so lê ti e alingbi ti bâ pëpe. Me lo yeke tâ zo, lo yeke bâ e. Lo hinga na ngoi wa a lingbi a mû maboko na e. E lingbi nga ti sala tënë na lo na yâ ti sambela, tongana ti so e yeke sala tënë na mbeni zo na ndo ti sese ge. Jéhovah aye si e sala tongaso.

Ni la, tongana mo bâ so vundu ahon ndo ti mo wala so mo yeke gi  mo oko, a yeke nzoni mo sala nyen?— Sala tënë na Jéhovah. Ga ndulu na lo, lo yeke dë bê ti mo na lo yeke mû maboko na mo. Girisa pëpe, Jéhovah aye mo, même tongana mo bâ so mo yeke gi mo oko. Zia e mû Bible ti e. Na Psaume 23, a komanse na versê 1, e diko: ‘Jéhovah ayeke Berger ti mbi; ye alingbi manke mbi pëpe. Lo sala si mbi hu tele na benyama so fini pele ayeke dä; lo fa lege na mbi na tele ti ngu so asua na ngangu pëpe.’

Bâ tënë so wasungo psaume ni atene na versê 4 ni: “Biani, même tongana mbi hon na popo-hoto ti bingo ti kui, mbito ti sioye asala mbi pëpe, teti Mo yeke na mbi; keke na bâton ti Mo alungula vundu ti mbi.” Bâ, azo so Nzapa ti ala ayeke Jéhovah ayeke bâ ye ni tongaso. Tongana kpale asi na ala, ala wara dengo bê. A yeke tongaso si mo yeke bâ na ye ni?—

Tongana mbeni nzoni berger so ayeke bata anyama ti lo, Jéhovah ayeke bata nga azo ti lo nzoni. Lo yeke fa na ala mbilimbili lege so a lingbi ala tambela dä, na ala yeke na ngia ti mû peko ti lo. Même tongana akpale angoro ala kue, mbito ayeke sala ala pëpe. Na lege ti keke ti lo, berger ni ayeke bata ataba ti lo yongoro na anyama so alingbi ti sala sioni na ala. Bible afa tongana nyen maseka David abata lani ataba ti lo yongoro na mbeni bamara nga na ours  (1 Samuel 17:34-36). Azo ti Nzapa ahinga so Jéhovah ayeke bata ala ande nga. Mbito asala ala pëpe ngbanga ti so ala hinga so Nzapa ayeke na ala.

Jéhovah aye tënë ti angasangbaga wala ataba ti lo biani, na lo yeke bata ala nzoni. Bible atene: ‘Fade lo fa lege na ataba ti lo tongana mbeni berger. Lo yeke mû akete taba na maboko ti lo.’​—Esaïe 40:11.

Ti hinga so Jéhovah ayeke tongaso anzere na bê ti mo, ni la ape?— Mo ye ti ga mbeni oko ti ataba ti lo?— Ataba ayeke mä ka go ti zo so ayeke bata ala. Ala yeke ngbâ ndulu na tele ti lo. Mo yeke mä Jéhovah?— Mo yeke ngbâ ndulu na tele ti lo?— Tongaso, zia mbito asala mo lâ oko pëpe. Jéhovah ayeke duti ande na mo.