OITI yu firi sari, èn oiti yu firi leki yu de yu wawan?— Oiti yu aksi yusrefi efu sma lobi yu?— Son pikin abi den firi dati. Ma Gado e pramisi: „Misrefi no sa frigiti yu” (Yesaya 49:15). A no wan moi sani fu prakseri?— Iya, Yehovah Gado lobi wi trutru!

Wan Bijbel skrifiman ben taki: „Efu mi eigi papa nanga mi eigi mama ben o gowe libi mi, dan Yehovah srefi ben sa teki mi” (Psalm 27:10). A kan de wan bigi trowstu gi wi fu di wi sabi dati, a no so?— Iya, Yehovah e taigi wi: „No frede, bika mi de nanga yu. . . . Mi sa yepi yu trutru.”​—Yesaya 41:10.

Ma son leisi, Yehovah e gi pasi taki Satan e gi wi problema. Iya, Yehovah e gi pasi taki Satan e tesi den futuboi fu En. Wan leisi, Didibri pina Yesus so te taki Yesus bari krei gi Yehovah: ’Mi Gado, mi Gado, fu san ede yu gowe libi mi?’ (Mateyus 27:46) Aladi Yesus ben e pina, toku a ben sabi taki Yehovah ben lobi en (Yohanes 10:17). Ma Yesus ben sabi tu taki Gado e gi pasi taki Satan e tesi den futuboi fu En èn taki a e meki den pina. Na ini wan tra kapitel wi sa fruteri fu san ede Gado e gi pasi taki Satan e du disi.

Te wi de pikin, dan son leisi a muilek fu no frede. Fu gi wan eksempre, oiti yu lasi pasi?— Yu ben frede?— Furu pikin ben o frede. Wan leisi, a Bigi Leriman fruteri wan tori di e taki fu a sani disi. Ma a no ben de wan pikin di ben lasi pasi. A ben de wan skapu.

Na wan tu fasi yu de leki wan skapu. Fa so? We, skapu no bigi tumusi, èn den no tranga tu. Boiti dati, den abi wan sma fanowdu  fu sorgu gi den èn fu kibri den. A sma di e sorgu den skapu na wan skapuman.

A tori di Yesus ben fruteri, ben abi fu du nanga wan skapuman di ben abi wán hondro skapu. Ma wan dei, wan fu den skapu lasi. Kande a ben wani si san ben de na a tra sei fu a bergi. Ma fosi yu denki, a skapu dati ben de farawe fu den trawan. Fa yu denki a skapu ben firi di a drai luku èn a si taki a ben de en wawan?—

San a skapuman ben o du te a ben si taki a skapu dati ben lasi? A ben o taki dati a no sa broko en ede nanga a skapu fu di a skapu srefi suku a problema? Noso, a ben o libi den 99 skapu na wan presi pe ogri no ben kan miti den, so taki a ben kan go suku a wan-enkri skapu dati? A ben warti fu meki someni muiti gi a wan skapu dati nomo?— Efu yu ben de a lasi skapu dati, dan yu ben o wani a skapuman fu kon suku yu?—

A skapuman ben lobi ala den skapu fu en srefisrefi, a ben lobi srefi a wan di ben lasi. Fu dati ede a go suku a skapu di ben misi. Prakseri fa a lasi skapu dati ben breiti di a si a skapuman e kon! Èn Yesus ben taki dati a skapuman ben e prisiri fu di a ben feni a skapu fu en. A ben e prisiri  moro nanga a wan skapu disi, leki nanga den 99 trawan di no ben lasi. We, suma de leki a skapuman na ini a tori fu Yesus? Suma e sorgu gi wi na a srefi fasi leki fa a skapuman ben e sorgu gi den skapu fu en?— Yesus ben taki dati en Tata na ini hemel e du dati. Èn en Tata na Yehovah.

Yehovah Gado na a Bigi Skapuman fu en pipel. A lobi ala den sma di e dini en, sosrefi yonguwan leki yu. A no wani nowan enkriwan fu wi fu kisi mankeri noso fu lasi den libi. Trutru, a bun fu sabi taki Gado lobi wi so!​—Mateyus 18:12-14.

Yu e bribi trutru na ini Yehovah Gado?— A de wan trutru sma gi yu?— A tru taki wi no kan si Yehovah. Dati na fu di a de wan Yeye. A abi wan skin di wi no man si nanga wi ai. Ma a de wan trutru sma, èn a kan si wi. A sabi o ten wi abi yepi fanowdu. Èn wi kan taki nanga en na ini begi, neleki fa wi e taki nanga wan tra sma na grontapu. Yehovah wani wi fu du disi.

 Sobun, efu oiti yu e firi sari, noso yu e firi leki yu de yu wawan, dan san yu musu du?— Taki nanga Yehovah. Kon krosibei na en, èn a sa trowstu èn yepi yu. No frigiti taki Yehovah lobi yu, srefi te yu e firi leki yu de yu wawan. Meki wi teki wi Bijbel. Dyaso na ini Psalm 23, bigin nanga vers 1, wi e leisi: ’Yehovah na mi Skapuman. Mi no sa mankeri noti. Na ini weigron di lai nanga grasi, a e meki mi didon; a e tyari mi go na presi pe furu watra de, so taki mi kan rostu.’

Luku san a skrifiman e taki moro fara na ini vers 4: „Awansi mi e waka na ini a lagi presi pe furu dungru de, toku mi no e frede nowan ogri, bika yu de nanga mi; yu tiki nanga yu tiritiki na den sani di e trowstu mi.” Na so sma e firi te Yehovah de a Gado fu den. Den e feni trowstu te den de na ini problema. Na so yu e firi tu?—

Neleki fa wan lobi-ati skapuman e sorgu den skapu fu en, na so Yehovah e sorgu en pipel bun tu. A e sori den a yoisti pasi fu waka, èn den e prisiri fu waka na en baka. Srefi te problema de na den lontu, toku den no abi fu frede. Wan skapuman e gebroiki a tiki fu yagi den meti gowe di ben kan du den skapu ogri. Bijbel e fruteri fa a yongu skapuman David ben feti nanga wan lew en nanga wan beer fu kibri den skapu fu en (1 Samuel 17:34-36). Èn a pipel fu Gado sabi taki  Yehovah sa kibri den tu. Den kan abi a dyaranti taki noti no o pasa nanga den, bika Gado de nanga den.

Yehovah lobi den skapu fu en trutru, èn a e sorgu den nanga switifasi. Bijbel e taki: ’Leki wan skapuman a sa wei en eigi skapu.’​—Yesaya 40:11.

A no e gi yu prisiri fu sabi taki Yehovah de so wan Gado?— Yu wani de wan fu den skapu fu en?— Skapu e arki a sten fu a skapuman fu den. Den e tan krosibei fu en. Yu e arki Yehovah?— Yu e tan krosibei fu en?— Dan yu no abi fu frede noiti. Yehovah sa de nanga yu.