KUKE KWENTEKE yini utive udvumatekile nobe unesitunge?— Uke watibuta yini kutsi ukhona umuntfu lokutsandzako?— Labanye bantfwana bayatibuta lombuto. Kodvwa Nkulunkulu uyetsembisa: “Mine ngingeke ngikukhohlwe wena.” (Isaya 49:15) Akukujabulisi yini kucabanga ngaloko?— Jehova Nkulunkulu usitsandza sibili.

Lomunye umbhali weliBhayibheli watsi: ‘Nakungenteka bobabe namake bangishiye, kodvwa wena, Simakadze, utangemukela ungigcine.’ (Tihlabelelo 27:10) Awucabangi yini kutsi kwati loko kungasidvudvuta kakhulu?— Jehova utsi kitsi: ‘Ungesabi, ngobe mine nginawe. . . . Ngitakusita.’​—Isaya 41:10.

Nanobe kunjalo, ngaletinye tikhatsi Jehova uyamvumela Sathane kutsi asibangele tinkinga. Jehova uyamvumela Sathane kutsi alinge netinceku taKhe. Develi wavisa Jesu buhlungu kangangekutsi Jesu wakhala kuJehova watsi: “Nkulunkulu wami, Nkulunkulu wami, ungishiyeleni?” (Matewu 27:46) Nanobe Jesu abeva buhlungu, bekati kutsi Jehova uyamtsandza. (Johane 10:17) Jesu bekati nekutsi Nkulunkulu uvumela Sathane kutsi avivinye tinceku taKhe aphindze ativise buhlungu. Kulesinye sehluko sitawufundza ngekutsi kungani Nkulunkulu avumele Sathane kutsi ente loko.

Nasisebancane, ngaletinye tikhatsi siyesaba. Nasi sibonelo: Uke walahleka yini?— Wativa wesaba yini?— Bantfwana labanyenti bangesaba. Umfundzisi Lomuhle Kakhulu wake wacoca ngendzaba lemayelana nekulahleka. Kodvwa bekangacoci ngemntfwana lolahlekile. Lendzaba beyimayelana nemvu lelahlekile.

 Ngaletinye tindlela, wena ufanana nemvu. Kungani sisho njalo? Phela timvu atisitinkhulu futsi tite emandla. Tidzinga umuntfu lotatinakekela aphindze ativikele. Umuntfu lonakekela timvu ubitwa ngekutsi ngumelusi.

Kulendzaba yakhe, Jesu wacoca ngemelusi lobekanetimvu letingu-100. Kodvwa lenye yaletimvu yalahleka. Kungenteka beyifuna kubona kutsi kunani ngale kwaleligcuma. Kodvwa ngesikhashana nje, lemvu bese yilahlekelene naleti letinye timvu. Ucabanga kutsi yativa njani lemvu naseyibona kutsi seyiyodvwana?—

Lomelusi bekatawenta njani nakabona kutsi lena lenye imvu ilahlekile? Abetawusho yini kutsi liphutsa lalemvu kutsi ilahleke futsi angakhatsateki ngekuyoyifuna? Nobe abetawushiya letimvu letingu-99, endzaweni lephephile bese uyahamba ayofuna lena lelahlekile? Ucabanga kutsi kufanele yini atihluphe ngekuyofuna imvu yinye?— Kube lemvu lelahlekile bekunguwe, bowungatsandza yini kutsi lomelusi ahambe ayokufuna?—

Lomelusi abetitsandza kakhulu tonkhe timvu takhe, ngisho nalena lebeyilahlekile. Ngako wahamba wayofuna lena lelahlekile. Ase ucabange kutsi yajabula kangakanani lemvu lelahlekile  nayibona umelusi achamuka. Jesu watsi nalomelusi wajabula ngekutsi abeyitfolile imvu yakhe. Wayijabulela kakhulu kwendlula leti letingu-99 lebetingakalahleki. Ngako-ke, ucabanga kutsi ngubani lofanana nalomelusi losendzabeni yaJesu? Ngubani losikhatsalela kakhulu njengalomelusi lowakhatsalela imvu yakhe?— Jesu watsi Babe wakhe losezulwini uyasikhatsalela. Babe wakhe nguJehova.

Jehova Nkulunkulu unguMelusi Lomkhulu webantfu bakhe. Uyabatsandza bonkhe labamkhontako, lokufaka ekhatsi nebantfwana labancane labanjengawe. Akafuni kutsi namunye kitsi alimale nobe abhujiswe. Ngako kuyajabulisa kwati kutsi Nkulunkulu usikhatsalela kakhulu.​—Matewu 18:12-14.

Ukholwa mbamba yini kutsi Jehova Nkulunkulu ukhona?— Ucabanga kutsi ungumuntfu sibili yini?— Kuliciniso kutsi angeke simbone Jehova. Kungenca yekutsi unguMoya. Unemtimba lesingeke siwubone ngemehlo. Nanobe kunjalo, ungumuntfu sibili futsi angakhona kusibona. Uyati nasidzinga lusito. Futsi singakhona kukhuluma  naye ngemthantazo, njengobe sikhona kukhuluma nalabanye bantfu lapha emhlabeni. Jehova ufuna kutsi sikwente loko.

Ngako nakwenteka utiva udvumatekile nobe unesitunge, yini lokufanele uyente?— Kufanele ukhulume naJehova. Sondzela kuye futsi utakudvudvuta aphindze akusite. Khumbula kutsi Jehova uyakutsandza, ngisho nobe utiva shengatsi unesitunge. Asitsatse emaBhayibheli etfu. Kulombhalo weTihlabelelo 23, kusukela evesini lekucala sitjelwa kutsi, “Simakadze ngumelusi wami, ngeke ngeswele lutfo. Ungilalisa emadlelweni laluhlata, angiholele nasemantini ekuphumula.”

Evesini 4 lombhali uchubeka utsi: ‘Nome ngihamba esigodzini lesinelitfunti lekufa, angesabi lutfo lolubi, ngobe wena unami; intfonga yakho neludvondvolo lwakho kuyangidvudvuta.’ Bantfu Nkulunkulu wabo longuJehova bativa ngaleyo ndlela. Batfola indvudvuto nabasenkingeni. Utiva ngaleyo ndlela yini nawe?—

Njengobe nemelusi lonelutsandvo anakekela timvu takhe, naJehova uyabanakekela bantfu bakhe. Ubakhombisa indlela lokufanele bahambe ngayo futsi nabo bayakujabulela kuhamba kuyo. Ngisho nobe kunetinkinga, abesabi. Umelusi usebentisa indvuku yakhe kute avikele timvu etilwaneni letingase titilimate. LiBhayibheli likhuluma ngendlela umelusi lomncane Davide lativikela ngayo timvu takubo  ebhubesini kanye nasebheleni. (1 Samuweli 17:34-36) Nebantfu baNkulunkulu bayati kutsi Jehova utabavikela. Bangativa bavikelekile ngobe Nkulunkulu unabo.

Jehova uyatitsandza timvu takhe futsi utinakekela ngesineke. LiBhayibheli litsi: ‘Welusa timvu takhe njengemelusi: Ugona emazinyane akhe ngemikhono yakhe.’​—Isaya 40:11.

Akukujabulisi yini kwati kutsi Jehova unjalo?— Uyafuna yini kuba ngulenye yetimvu takhe?— Timvu tiyalilalela livi lemelusi wato. Tihlale tidvutane naye. Uyamlalela yini Jehova?— Uhlale udvutane naye yini?— Nangabe kunjalo, akukafaneli wesabe. Jehova utawuba nawe.