Cibalo 31

Nkonga Wajana Luumbulizyo

SENA kuli ziindi nonyema alimwi akulendelelwa?— Sena kuli nodooneka kuti bantu balakuyanda?— Ibana bamwi baladooneka. Pele Leza usyomezya kuti: ‘Mebo nsikakulubi yebo pe.’ (Isaya 49:15) Sena eeco tacili cintu cikkomanisya kuciyeeyela?— Inzya, mmasimpe Jehova Leza ulatuyanda ncobeni!

Imulembi wa Bbaibbele umwi wakati: ‘Nikuba kuti bataata abaama bandisiya, Jehova lwakwe uyoonditambula.’ (Intembauzyo 27:10) Ikuzyiba makani aaya ncintu cituumbulizya kapati, tee kayi?— Aboobo Jehova utwaambila kuti: “Utayoowi, nkaambo ndili ayebo. . . . Njookugwasya.”—Isaya 41:10.

Pele zimwi ziindi Jehova ulamuzumizya Saatani kutuletela mapenzi. Alimwi mane Jehova ulamuzumizya Saatani ikusunka babelesi Bakwe. Cimwi ciindi, Diabolosi wakamupenzya kapati Jesu cakuti wakamulilila Jehova ategwa: “Leza wangu, Leza wangu, wandisiilanzi?” (Matayo 27:46) Nokuba kuti Jesu wakapenga, wakalizyi kuti Jehova wakali kumuyanda. (Johane 10:17) Pele awalo Jesu wakalizyi kuti Leza ulamuzumizya Saatani ikusunka babelesi Bakwe alimwi akubapenzya. Mu cibalo cimbi, tulapandulula Leza ncamuzumizya Saatani ikucita zintu eezi.

Notucili bana-bana, tulayoowa kapati zimwi ziindi. Mucikozyanyo, sena kuli nowakasweekede?— Sena wakayoowa?— Ibana banji balayoowa. Cimwi ciindi Mwiiyi Mupati wakaana kaano kajatikizya kusweeka. Pele cakasweekede tanaakali mwana pe. Yakali mbelele.

Munzila zimwi yebo uli mbuli mbelele. Ino inga waba buti oobo? Nkaambo imbelele tazili zipati kapati alimwi tazijisi nguzu zinji pe.  Alimwi ziyandika muntu wakuzilanganya akuzikwabilila. Imuntu uulanganya mbelele wiitwa kuti mweembeli.

Mukaano kakwe, Jesu wakaluula zyamweembeli wakajisi mbelele zili mwaanda. Pele yomwe akati kazyo yakasweeka. Ambweni yakali kuyanda kubona cakali kunze aamulundu. Pele ndilyonya, imbelele eeyo yakasakana kuzyeenzinyina. Sena inga waciyeeyela mboyakalimvwa mbelele eeyo eelyo noyakalanga ooku akooku akujana kuti yakali buyo yelikke?—

Ino ncinzi ncaakali kunga wacita mweembeli naakazyiba kuti imbelele yomwe yasweeka? Sena wakali kunga waamba kuti nciindi cayo nkaambo yakaliyandila, aboobo teelede kulikatazya kwiiyandaula? Naa sena wakali kuyoozisiya mbelele zili 99 mubusena buli kabotu akuyooyandaula mbelele eeyo yomwe buyo yakasweekede? Sena mbelele yomwe buyo yakali kuyandika kwiibikkila maanu boobo?— Ikuti nowakali mbelele eeyo yakasweeka, sena inga wayanda kuti mweembeli akuyandaule?—

Imweembeli wakali kuziyanda kapati mbelele zyakwe zyoonse, kubikkilizya ayeeyo yakasweeka. Aboobo wakatalika kwiiyandaula eeyo mbelele yakasweeka. Kociyeeyela buyo mboyakakkomana mbelele eeyo yakasweekede noyakabona mweembeli kaboola! Alimwi Jesu wakaamba kuti imweembeli  wakakkomana kapati kuti wakaijana mbelele yakwe. Wakaikkomanina kwiinda zeezyo zili 99 zyatakasweekede. Pele ino nguni uuli mbuli mweembeli ooyo wamukaano ka Jesu? Ino nguni uutulanganya mbubwenya bwakacita mweembeli kujatikizya mbelele zyakwe?— Jesu wakaamba kuti Bausyi bakujulu balatulanganya. Alimwi Bausyi ngu Jehova.

Jehova Leza Mmweembeli Mupati wabantu bakwe. Ulabayanda boonse ibamubelekela kubikkilizyaa bana basyoonto mbuli nduwe. Kunyina nayanda kuti umwi wesu abe mumapenzi naa kunyonyoonwa. Mmasimpe, ncintu cikkomanisya kapati kuzyiba kuti Leza ulatulanganya kapati munzila iili boobu!—Matayo 18:12-14.

Sena ulamusyoma ncobeni Jehova Leza?— Sena mmuntu mwini-mwini kulinduwe?— Ee, tatukonzyi kumubona Jehova. Cili boobo akaambo kakuti Mmuuya. Ujisi mubili uutakonzyi kubonwa ameso eesu. Nokuba boobo, mmuntu mwini-mwini alimwi ulakonzya kutubona. Ulizyi eelyo notuyandika lugwasyo. Alimwi tulakonzya kubandika anguwe  mumupailo mbubwenya mbotubandika abeenzuma anyika. Jehova uyanda kuti tubandike anguwe mumupailo.

Aboobo ino ncinzi ncoyelede kucita eelyo nonyemede naa nolendeledwe?— Bandika a Jehova. Yumya cilongwe cako anguwe, eelyo uyookuumbulizya akukugwasya. Koyeeya kuti Jehova ulakuyanda, neliba leelyo nolimvwa mbuli kuti uli buyo olikke. Atubweze Bbaibbele lyesu. Ookuno mubbuku lya Intembauzyo 23, kutalikila mukapango ka 1 twaambilwa kuti: “Jehova ngumweembeli wangu, nsikabuli cintu. Ulandooneka mumacelelo aamwemvwe, ulandeenzya kumbali lyamaanzi aacilyokezezyo.”

Kolanga ncayungizya mulembi mukapango ka 4 nati: ‘Nenjenda mumumpata walufu uusia mbi, nsiyoowi bubi, nkaambo uli andime, musako wako ankoli yako zilandiyumya.’ Oobo mbobalimvwa bantu eelyo Jehova nali Leza wabo. Balaumbulizyigwa nobali mumapenzi. Sena oobo mbolimvwa ayebo?—

Mbubwenya mweembeli siluyando mbwalanganya butanga bwakwe, awalo Jehova ulabalanganya kabotu bantu bakwe. Ulabatondezya nzila njobeelede kutozya, alimwi balamutobela kabakkomene. Neliba leelyo nokuli manyongwe koonse-koonse, tabeelede kuyoowa pe. Imweembeli ubelesya musako naa nkoli yakwe ikukwabilila mbelele kubanyama babutambo. Ibbaibbele lilaamba kujatikizya mweembeli wakacili mwana-mwana Davida mbwaakakwabilila mbelele zyakwe kuli syuumbwa alimwi a suntwe.  (1 Samuele 17:34-36) Alimwi bantu ba Leza balizyi kuti Jehova uyoobakwabilila abalo. Balakonzya kuliiba akaambo kakuti Leza uli ambabo.

Mmasimpe, Jehova ulaziyanda kapati mbelele zyakwe alimwi ulazilanganya kabotu. Ibbaibbele lyaamba kuti: ‘Uyoolela mbelele zyakwe mbuli mweembeli. Uyoobunganya twana amaboko aakwe.’—Isaya 40:11.

Sena tacikukkomanisyi ikuzyiba kuti Jehova mbwabede oobo?— Sena ulayanda kuba umwi wambelele zyakwe?— Imbelele zilalitobela ijwi lyamweembeli wazyo. Zilamusyoma akukkala munsi lyakwe. Sena yebo ulamuswiilila Jehova?— Sena ulaacilongwe anguwe?— Ikuti kocita oobo, toyelede kuyoowa cili coonse pe. Jehova unooli anduwe lyoonse.

Caluyando Jehova ulabalanganya aabo ibamubelekela. Atubale antoomwe ncolyaamba Bbaibbele kujatikizya makani aaya ku Intembauzyo 37:25; 55:22; alimwi a Luka 12:29-31.

[Cifwanikiso icili apeeji 163]

Ino uyeeya kuti eeyi mbelele iisweekede ilimvwide buti?

[Cifwanikiso icili apeeji 164]

Ino nguni uuli mbuli mweembeli ooyu wavwuna mbelele yakwe?

[Cifwanikiso icili apeeji 165]

Sena Jehova mmwini-mwini kulinduwe mbubwenya mbuli bauso naa muntu uumbi?

[Cifwanikiso icili apeeji 166]

Ino nguni uunga watugwasya notuli mumapenzi mbubwenya mbuli mweembeli uukwabilila mbelele zyakwe?