KAI maua aka eiloa ne koe se lagonaga fanoanoa mo te sē sologa i te nofo tokotasi?— Kai mafaufau aka eiloa koe me e isi se tino e alofa ki a koe?— E fai eiloa penā a nisi tama‵liki. Kae e tauto mai a te Atua: “Ka ko au e se mafai o fakapuli ne au koutou.” (Isaia 49:15) E mata, e sē se mea gali a te mea tenā?— Ao, e alofa tonu mai eiloa a Ieova te Atua ki a tatou!

Ne fai mai se tino tusitala e tokotasi: “E mafai ne toku tamana mo toku matua o tiakina au, ka ko te Aliki ka tausi ne ia a au.” (Salamo 27:10) A te iloaga o te mea tenā e mafai o fakamafanafana tonu mai ki a tatou, ne?— Ao, e fai mai a Ieova ki a tatou: “Sa mataku au e fakatasi mo koe! Ka fesoasoani atu au ki a koe.”—Isaia 41:10.

Kae i nisi taimi, e talia ne Ieova ke fakaoko mai ne Satani a fakalavelave ki a tatou. Ne talia foki ne Ieova ke tofotofo ne Satani Ana tavini. E fakalogo‵mae malosi foki ne te Tiapolo a Iesu i te taimi e tasi telā ne tagi atu ei a Iesu ki a Ieova: ‘Toku Atua, toku Atua, kaia ko tiakina mai ei au ne koe?’ (Mataio 27:46) E tiga eiloa ne logo‵mae a Iesu, ne iloa ‵lei eiloa ne ia me ne alofa a Ieova ki a ia. (Ioane 10:17) Kae ne iloa foki ne Iesu me e talia ne te Atua ke tofotofo ne Satani Ana tavini kae fai foki latou ke logo‵mae. I te suā mataupu, ka fakamatala mai i ei a te pogai e talia ei ne te Atua ke fai ne Satani te mea tenei.

Kafai koi fo‵liki tatou, e faigofie ke ma‵taku tatou i nisi taimi. E pelā me se fakaakoakoga, kai galo aka eiloa koe i se koga?— Koe ne mataku?— E ma‵taku eiloa a tama‵liki e tokouke. Ne fai mai ne te Faiakoga Sili se tala i te taimi e tasi e uiga ki se mea telā ne galo. E sē se tamaliki telā ne galo. Kae se mamoe.

E fai eiloa koe pelā me se mamoe i nisi auala. E pefea la? Ia, a mamoe  e se ‵lasi io me ma‵losi ‵ki. Kae e manakogina se tino ke tausi kae puipui atu ki a latou. A te tagata telā e tausi ne ia a mamoe e fakaigoa ki se tausi mamoe.

Ne fai mai a Iesu i tena tala e uiga ki se tausi mamoe telā e isi ne ana mamoe e selau. Kae ne galo a te mamoe e tasi. Kāti ne fia lavea ne ia a te suā feitu o te mauga. Kae e se leva ko ‵mao atu te mamoe tenā mai i nisi mamoe. E a, e mafai o fakaataata ne koe i tou mafaufau a lagonaga o te mamoe tenā i te taimi ne kilo aka ei kae lavea ne ia me ko ia fua tokotasi?—

Ne a mea ka fai ne te tausi mamoe i te taimi ne iloa aka ei ne ia me e tasi te mamoe e galo? E mata, ka fai atu a ia me ko te ‵se eiloa o te mamoe, tela la, ka se manavase a ia ki ei? Io me ka tiakina ne ia a mamoe e 99 i se koga ‵lei kae fanatu o ‵sala ki ei? E mata, e tāua eiloa te mamoe e tasi tenā ke fakamāumāu ki ei a taimi e uke?— Kafai koe ko te mamoe telā ne galo, e mata, e manako koe ke fanatu te tausi mamoe o ‵sala koe?—

Ne alofa malosi a te tausi mamoe ki ana mamoe katoa, ke oko ki te mamoe telā ne galo. Tela la, ne fanatu a ia o ‵sala ki te mamoe telā ne galo. Mafaufau ki te fiafia o te mamoe i te taimi ne lavea ei ne ia a te tausi mamoe ko fanatu! Kae ne fai mai a Iesu me ne fiafia malosi atu a te tausi mamoe me ne maua ne ia tena mamoe. Ne sili atu tena fiafia ki tena mamoe ne galo i lō nisi mamoe e  99. Nei la, ko oi e fai pelā mo te tausi mamoe i te tala a Iesu? Ko oi e atafai malosi mai e pelā mo te tausi mamoe ki tena mamoe?— Ne fai mai a Iesu me ko tena Tamana i te lagi. Kae ko tena Tamana ko Ieova.

A Ieova te Atua ko te Tausi Mamoe Sili o ana tino. E alofa a ia ki tino katoa kolā e tavini atu ki a ia, e aofia i ei a tamaliki e pelā mo koe. E se manako a ia ke logo‵mae io me ke fakaseai atu so se tino i a tatou. E mautinoa eiloa me se mea gali ‵ki ke iloa atu me e atafai malosi mai te Atua ki a tatou!—Mataio 18:12-14.

E mata, e talitonu eiloa koe ki a Ieova te Atua?— E mata, e fai eiloa a ia e pelā me se tino tonu ki a koe?— Se mea tonu me e se mafai o lavea ne tatou a Ieova. E se lavea ne tatou me i a ia se Agaga. E maua ne ia se foitino telā e se lavea ki ‵tou mata. Kae se tino tonu eiloa a ia, kae mafai o lavea ne ia a tatou. E iloa ne ia māfai e ma‵nako tatou ki tena fesoasoani. Kae e mafai o fai‵pati atu tatou ki a ia i se ‵talo, e pelā eiloa mo te ‵tou fai‵pati atu ki se isi tino. E manako eiloa a Ieova ke fai‵pati atu tatou penā ki a ia i se ‵talo.

Tela la, kafai e lagona ne koe te fanoanoa  mo te sē sologa i te nofo tokotasi, se a te mea e ‵tau o fai ne koe?— Faipati atu ki a Ieova. Fakapilipili atu ki a ia, kae ka fakamafanafana kae fesoasoani atu a ia ki a koe. Masaua me e alofa a Ieova ki a koe, ke oko foki eiloa ki taimi e nofo tokotasi ei koe. Ke puke mai ‵tou Tusi Tapu. I te Salamo 23 tenei, ne fai mai ki a tatou, i te kamataga o te fuaiupu e 1: “[Ieova] ko toku tausi mamoe; e seai se mea e mativa ei au. E tuku mai ne ia au ke takato i vao mouku lausiusi, kae takitaki ne ia au i tafatafa o vai e tafetafe malie.”

Mafaufau la ki pati ne fakaopoopo mai ne te tino tusitala, i te fuaiupu e 4: “Te Aliki, e ui eiloa e sasale au i loto i se koga pouli tagataga, kae ka se mataku au i a koe e fakatasi mai faeloa ki a au. Ko tou tokotoko mo tau lakau e puipui ei au.” Konā a lagonaga e maua ne tino kolā e fai ne latou a Ieova mo fai te lotou Atua. E maua ne latou a fakamafanafanaga i taimi e oko atu ei a fakalavelave ki a latou. E a, e penā eiloa ou lagonaga?—

E pelā me se tausi mamoe alofa telā e tausi faka‵lei ki ana mamoe, e penā foki loa te tausi faka‵lei ne Ieova o ana tino. E fakaasi atu ne ia ki a latou a te auala tonu, kae e tau‵tali atu latou mo te fiafia ki a ia. Kafai foki loa e sikomia latou ne fakalavelave, e se manakogina ke ma‵taku latou. E fakaaoga ne se tausi mamoe tena lakau io me se tokotoko ke puipui ei ana mamoe mai manu kolā e mafai o fakapa‵kia atu ki a latou. E fai mai te Tusi Tapu e uiga ki te auala ne puipui ei ne te tausi mamoe talavou ko Tavita ana mamoe mai i se leona mo se pea. (1 Samuelu 17: 34-36) Kae e iloa ne tino o te Atua me ka puipui foki ne Ieova a latou. E mafai o tokagamalie o olotou lagonaga me e fakatasi atu te Atua ki a latou.

E alofa tonu eiloa a Ieova ki ana mamoe, kae e tausi atu mo te atafai ki a latou. E fai mai te Tusi Tapu: ‘E pelā me se tausi mamoe, ka takitaki atu ne ia ana mamoe. Ka fakamaopoopo mai ne ia ana tamā mamoe ki ana lima.’—Isaia 40:11.

E a, e se fiafia koe ke iloa atu me e penā eiloa a Ieova?— E a, e manako koe ke fai mo fai sena mamoe e tokotasi?— E faka‵logo a mamoe ki te leo o te lotou tausi mamoe. E fakapili‵pili atu latou ki a ia. E mata, e fakalogo koe ki a Ieova?— E a, e fakapilipili atu koe ki a ia?— Kafai e penā loa, e se manakogina eiloa ke mataku koe. Ka fakatasi atu eiloa a Ieova ki a koe.