کیا کبھی‌کبھی آپ اُداس ہو جاتے ہیں؟‏ .‏.‏.‏.‏.‏.‏ کیا آپ کو ایسا لگتا ہے کہ کوئی آپ سے پیار نہیں کرتا؟‏ .‏.‏.‏.‏.‏.‏ کئی بچوں کو ایسا لگتا ہے۔‏ لیکن خدا نے ہم سے وعدہ کِیا ہے کہ ”‏مَیں تمہیں کبھی نہیں بھولوں گا۔‏“‏ (‏یسعیاہ ۴۹:‏۱۵‏)‏ خدا کے اِس وعدے سے ہمیں بڑی تسلی ملتی ہے،‏ ہے نا؟‏ .‏.‏.‏.‏.‏.‏ اِس سے ہمیں پتہ چلتا ہے کہ یہوواہ خدا ہم سے بہت پیار کرتا ہے۔‏

بائبل میں لکھا ہے:‏ ”‏اگر میرا باپ اور میری ماں مجھے چھوڑ بھی دیں تو یہوواہ خدا مجھے سنبھالے گا۔‏“‏ (‏زبور ۲۷:‏۱۰‏)‏ یہ جان کر ہمیں بڑا حوصلہ ملتا ہے،‏ ہے نا؟‏ .‏.‏.‏.‏.‏.‏ یہوواہ خدا ہم سے وعدہ کرتا ہے کہ ”‏تُم ڈرو مت کیونکہ مَیں تمہارے ساتھ ہوں۔‏ مَیں ضرور تمہاری مدد کروں گا۔‏“‏—‏یسعیاہ ۴۱:‏۱۰‏۔‏

لیکن کبھی‌کبھی ایسا ہوتا ہے کہ جب شیطان ہمارے لئے مصیبتیں کھڑی کرتا ہے تو یہوواہ خدا اُسے روکتا نہیں ہے۔‏ یہوواہ خدا اُسے کیوں نہیں روکتا ہے؟‏ کیونکہ خدا یہ دیکھنا چاہتا ہے کہ ہم اُس کے وفادار رہیں گے یا نہیں۔‏ ایک بار شیطان نے یسوع مسیح کو بہت زیادہ تکلیف پہنچائی۔‏ اِس پر یسوع مسیح نے چلّا کر یہوواہ خدا سے کہا:‏ ”‏اَے میرے خدا!‏ اَے میرے خدا!‏ تُو نے مجھے کیوں چھوڑ دیا ہے؟‏“‏ (‏متی ۲۷:‏۴۶‏)‏ حالانکہ یسوع مسیح بہت زیادہ تکلیف میں تھے لیکن اُنہیں پورا یقین تھا کہ یہوواہ خدا اُن سے پیار کرتا ہے۔‏ (‏یوحنا ۱۰:‏۱۷‏)‏ یسوع مسیح جانتے تھے کہ شیطان اکثر خدا کے خادموں کے لئے مصیبتیں کھڑی کرتا ہے۔‏ اور کبھی‌کبھی خدا اُسے روکتا نہیں۔‏ اِس کتاب کے ایک اَور باب میں ہم دیکھیں گے کہ خدا،‏ شیطان کو کیوں نہیں روکتا۔‏

ہم سب کو کبھی‌کبھار ڈر لگتا ہے۔‏ کیا کبھی ایسا ہوا ہے کہ آپ راستہ بھول گئے تھے اور آپ کو سمجھ نہیں آ رہا تھا کہ کدھر کو جاؤں؟‏ .‏.‏.‏.‏.‏.‏ اُس وقت آپ کو بہت ڈر لگا تھا،‏ ہے نا؟‏ .‏.‏.‏.‏.‏.‏ بہت سے بچوں کو ایسی صورت میں ڈر لگتا ہے۔‏ عظیم اُستاد یسوع مسیح نے ایک بھیڑ کی کہانی سنائی جو راستہ بھول گئی تھی۔‏

ایک لحاظ سے آپ بھی چھوٹی سی بھیڑ کی طرح ہیں۔‏ وہ کیسے؟‏ بھیڑوں میں زیادہ طاقت نہیں ہوتی اور  وہ اپنی حفاظت نہیں کر سکتیں۔‏ اُنہیں کسی ایسے شخص کی ضرورت ہوتی ہے جو اُن کا خیال رکھے۔‏ جو آدمی بھیڑوں کا خیال رکھتا ہے،‏ اُسے چوپان یا چرواہا کہتے ہیں۔‏

یسوع مسیح نے جو کہانی سنائی تھی،‏ اُس میں ایک چرواہے کی ۱۰۰ بھیڑیں تھیں۔‏ اِن میں سے ایک بھیڑ دوسری بھیڑوں سے بچھڑ گئی تھی۔‏ شاید اِس بھیڑ نے سوچا ہو کہ ”‏جا کر دیکھوں کہ پہاڑ کی دوسری طرف کیا ہے۔‏“‏ چلتےچلتے وہ دوسری بھیڑوں سے دُور نکل آئی۔‏ ایک دم سے اُسے احساس ہوا کہ وہ بالکل اکیلی ہے۔‏ جب بھیڑ نے دیکھا کہ اُس کے پاس کوئی بھی نہیں ہے تو اُس نے کیسا محسوس کِیا ہوگا؟‏ آپ کا کیا خیال ہے؟‏ .‏.‏.‏.‏.‏.‏

جب چرواہے کو پتہ چلا کہ اُس کی ایک بھیڑ کھو گئی ہے تو اُس نے کیا کِیا؟‏ کیا اُس نے سوچا کہ ”‏بھیڑ کی اپنی غلطی ہے،‏ مَیں کیوں اُسے ڈھونڈنے جاؤں؟‏“‏ یا پھر کیا اُس نے اپنی باقی بھیڑوں کو ایک محفوظ جگہ پر چھوڑا اور اُس بھیڑ کو ڈھونڈنے گیا؟‏ آپ کے خیال میں کیا چرواہے کو ایک بھیڑ کی اِتنی فکر ہونی چاہئے کہ وہ اُسے ڈھونڈنے جائے؟‏ .‏.‏.‏.‏.‏.‏ اگر آپ اُس بھیڑ کی جگہ ہوتے تو آپ کیا چاہتے؟‏ کیا آپ چاہتے کہ چرواہا آپ کو ڈھونڈنے کے لئے نکلے؟‏ .‏.‏.‏.‏.‏.‏

چرواہے کو اپنی ساری بھیڑوں سے بہت پیار تھا۔‏ اُسے اُس بھیڑ سے بھی پیار تھا جو راستہ بھول گئی تھی۔‏ اِس لئے وہ بھیڑ کو ڈھونڈنے کے لئے نکلا۔‏ ذرا سوچیں کہ جب بھیڑ نے دیکھا کہ چرواہا اُسے لینے آ رہا ہے تو وہ کتنی خوش ہوئی ہوگی؟‏ یسوع مسیح نے کہا کہ چرواہا بھی اپنی بھیڑ کو دیکھ کر بہت خوش ہوا۔‏ حالانکہ چرواہے کے پاس ۹۹ بھیڑیں تھیں لیکن جب اُسے اپنی کھوئی ہوئی بھیڑ  مل گئی تو وہ بہت زیادہ خوش ہوا۔‏ اب ذرا سوچیں کہ کون اُس چرواہے کی طرح ہے؟‏ کون ہم سے اِتنا پیار کرتا ہے جتنا چرواہا اپنی بھیڑوں سے کرتا ہے؟‏ .‏.‏.‏.‏.‏.‏ یسوع مسیح نے کہا کہ اُن کا آسمانی باپ اُس چرواہے کی طرح ہے۔‏ اور یسوع مسیح کا باپ یہوواہ خدا ہے۔‏

یہوواہ خدا اپنے لوگوں کا چرواہا ہے۔‏ وہ اُن لوگوں سے بہت محبت کرتا ہے جو اُس کی خدمت کرتے ہیں۔‏ وہ بچوں سے بھی بہت پیار کرتا ہے۔‏ وہ یہ نہیں چاہتا کہ اُس کی بھیڑوں کو کوئی تکلیف ہو یا اُن میں سے کوئی مر جائے۔‏ یہ کتنی خوشی کی بات ہے کہ یہوواہ خدا ہم سے اِتنا پیار کرتا ہے۔‏—‏متی ۱۸:‏۱۲-‏۱۴‏۔‏

کیا آپ یہوواہ خدا پر ایمان رکھتے ہیں؟‏ .‏.‏.‏.‏.‏.‏ کیا آپ کو یقین ہے کہ وہ موجود ہے؟‏ .‏.‏.‏.‏.‏.‏ یہوواہ خدا روح ہے اور روحانی جسم رکھتا ہے۔‏ اِس لئے ہم اُسے دیکھ نہیں سکتے۔‏ لیکن وہ ہمیں دیکھ سکتا ہے۔‏ جب ہم کسی مشکل میں ہوتے ہیں تو یہوواہ خدا کو پتہ ہوتا ہے کہ ہمیں مدد کی ضرورت ہے۔‏ یہوواہ خدا چاہتا ہے کہ ہم اُس سے دُعا کریں۔‏ جب ہم دُعا کرتے ہیں تو ہم خدا سے بالکل اُسی طرح بات کر سکتے ہیں جیسے ہم اپنے امی‌ابو سے بات کرتے ہیں۔‏

 تو پھر جب آپ اُداس ہوتے ہیں یا آپ کو لگتا ہے کہ کسی کو آپ کی فکر نہیں ہے تو آپ کو کیا کرنا چاہئے؟‏ .‏.‏.‏.‏.‏.‏ آپ کو یہوواہ خدا سے دُعا کرنی چاہئے۔‏ دُعا کے ذریعے آپ خدا کے قریب ہو جائیں گے اور وہ آپ کو تسلی دے گا اور آپ کی مدد کرے گا۔‏ یاد رکھیں کہ یہوواہ خدا اُس وقت بھی آپ سے پیار کرتا ہے جب آپ کو لگتا ہے کہ آپ بالکل اکیلے ہیں۔‏ آئیں،‏ بائبل کھول کر زبور ۲۳ کو پڑھتے ہیں۔‏ اِس کی پہلی آیت میں لکھا ہے:‏ ”‏یہوواہ میرا چوپان ہے۔‏ مجھے کمی نہ ہوگی۔‏ وہ مجھے ہری‌ہری چراگاہوں میں بٹھاتا ہے۔‏ وہ مجھے راحت کے چشموں کے پاس لے جاتا ہے۔‏“‏

اِس زبور کی چوتھی آیت میں لکھا ہے:‏ ”‏خواہ موت کے سایہ کی وادی میں سے میرا گذر ہو مَیں کسی بلا سے نہیں ڈروں گا کیونکہ تُو میرے ساتھ ہے۔‏ تیرے عصا اور تیری لاٹھی سے مجھے تسلی ہے۔‏“‏ جو لوگ یہوواہ خدا کی عبادت کرتے ہیں،‏ اُنہیں کسی چیز سے ڈرنے کی ضرورت نہیں ہے۔‏ جب وہ کسی مشکل میں ہوتے ہیں تو یہوواہ خدا اُن کو حوصلہ دیتا ہے۔‏ کیا آپ کو پورا یقین ہے کہ یہوواہ خدا آپ کی بھی مدد کرے گا؟‏ .‏.‏.‏.‏.‏.‏

جیسے چرواہا اپنی بھیڑوں کا خیال رکھتا ہے ایسے ہی یہوواہ خدا اپنے لوگوں کی ہر ضرورت پوری کرتا ہے۔‏ وہ اپنی بھیڑوں کو سیدھے راستے پر لے جاتا ہے اور بھیڑیں خوشی سے اُس کے پیچھےپیچھے جاتی ہیں۔‏ چرواہے کے پاس لاٹھی ہوتی ہے اور جب کوئی خطرناک جانور بھیڑوں پر حملہ کرتا ہے تو چرواہا اپنی لاٹھی سے اُس کو بھگا دیتا ہے۔‏ اِس لئے بھیڑوں کو ڈرنے کی ضرورت نہیں ہوتی۔‏ بائبل میں بتایا گیا ہے کہ جب داؤد نوجوان تھے تو اُنہوں نے اپنی بھیڑوں کو ایک شیر اور ایک ریچھ سے بچایا تھا۔‏ (‏۱-‏سموئیل ۱۷:‏۳۴-‏۳۶‏)‏ خدا کے خادم جانتے ہیں  کہ یہوواہ خدا ایک چرواہے کی طرح اُن کو بچائے گا۔‏ اُن کو پتہ ہے کہ خدا ہمیشہ اُن کے ساتھ ہے۔‏ اِس لئے اُن کو ڈرنے کی ضرورت نہیں ہے۔‏

یہوواہ خدا کو اپنی بھیڑوں سے بہت محبت ہے اور وہ بڑے پیار سے اُن کی دیکھ‌بھال کرتا ہے۔‏ بائبل میں یہوواہ خدا کے بارے میں لکھا ہے کہ ”‏وہ چرواہے کی طرح اپنی بھیڑوں کی دیکھ‌بھال کرے گا۔‏ وہ بھیڑ کے بچوں کو اپنے بازوؤں میں اُٹھائے گا۔‏“‏—‏یسعیاہ ۴۰:‏۱۱‏۔‏

یہ جان کر کہ یہوواہ خدا ہم سے اِتنی محبت کرتا ہے،‏ ہمیں بہت خوشی ہوتی ہے،‏ ہے نا؟‏ .‏.‏.‏.‏.‏.‏ کیا آپ بھی اُس کی بھیڑ بننا چاہتے ہیں؟‏ .‏.‏.‏.‏.‏.‏ بھیڑیں اپنے چرواہے کی سنتی ہیں۔‏ وہ اُس سے دُور نہیں جاتی ہیں۔‏ کیا آپ یہوواہ خدا کی سنتے ہیں؟‏ .‏.‏.‏.‏.‏.‏ کیا آپ اُس کے قریب رہتے ہیں؟‏ .‏.‏.‏.‏.‏.‏ پھر آپ کو کبھی بھی ڈرنے کی ضرورت نہیں ہوگی کیونکہ یہوواہ خدا آپ کے ساتھ ہوگا۔‏