¿YAAN wa baʼax tsʼoʼok u beetik u yaatal a wóol wa a wuʼuyikaba chéen ta juunal?... ¿Ka máansik wa ta tuukul wa yaan máax yaabiltmilech?... Yaan mejen paalaleʼ bey u yuʼubikubaʼoboʼ, baʼaleʼ Dioseʼ ku yaʼalik: «Teneʼ maʼ bíin in tuʼubsechiʼ» (Isaías 49:15). ¿Máasaʼ ku líiʼsik k-óol le baʼax ku yaʼalikaʼ?... Jach beyoʼ, Jéeoba Dioseʼ u yaabiltmoʼon tu jaajil.

² Juntúul máax tsʼíibt le Bibliaoʼ tu yaʼalaj: ‹Kex in taata yéetel in maama ka u xúumpʼattenoʼobeʼ, Yuumtsileʼ maʼ ken u pʼaten› (Salmo 27:10). ¿Máasaʼ k-ojéeltik lelaʼ ku líiʼsik k-óol?... Jéeobaeʼ ku yaʼalik: ‹Maʼ a chʼaʼik saajkil, tumen tiʼ yanen ta wéeteleʼ, teen áantkech› (Isaías 41:10).

³ Baʼaleʼ yaan kʼiineʼ Jéeobaeʼ ku chaʼik u túuntaʼal u yóol le máaxoʼob meyajtik tumen Satanasoʼ. Juntéenjeakileʼ le Kʼaasilbaʼaloʼ jach tu beetaj u muʼyaj Jesús, le oʼolal tu yaʼalaj: «In Dios, in Dios, ¿baʼaxten tsʼoʼok a pʼatken?» (Mateo 27:46). Kex táan u muʼyajeʼ, u yojel yaabiltaʼan tumen Jéeoba (Juan 10:17). Baʼaleʼ u yojel xan kaʼacheʼ, Dioseʼ ku chaʼik tiʼ Satanás u beetik u muʼyaj yéetel u túuntik yóol le máaxoʼob meyajtikoʼ. Tuláakʼ xookileʼ yaan k-kanik baʼaxten ku chaʼik Dios u muʼyaj máak.

⁴ Tu chichnil máakeʼ, maas séeb u sajaktal. ¿Yaan kʼiin wa tsʼoʼok a saʼatal?... ¿Sajakchajech wa?... Yaʼab mejen paalaleʼ ku sajaktaloʼob ken saʼatkoʼob. Juntéenjeakileʼ Jesús, le Maʼalob j-Kaʼansajoʼ, tu tsikbaltaj bix úuchik u saʼatal juntúul chan taman, maʼ juntúul chan paaliʼ.

⁵ Jeʼel u páajtal u yaʼalaʼaleʼ, techeʼ beyech jeʼex juntúul chan tamaneʼ. ¿Baʼaxten? Tumen le tamanoʼoboʼ maʼ nuuktakoʼobiʼ yéetel  minaʼan u muukʼoʼob, le oʼolal kʼaʼabéet máax kanáantkoʼob, jeʼex techeʼ. Le j-kanan tamanoʼoboʼ ku yilkoʼob maʼ u yúuchul mix baʼal tiʼ u yaalakʼoʼob.

⁶ Ichil le tsikbal tu beetoʼ, Jesuseʼ tʼaanaj tiʼ juntúul j-kanan taman yaan cien u túulul u yaalakʼ. Junpʼéel kʼiineʼ saʼat juntúuliʼ. Maʼ xaaneʼ chéen taakchaj u yilik baʼax yaan tuláakʼ juntséelil le witsoʼ, baʼaleʼ náachchaj tiʼ u maasil. ¿Bix a tuklik tu yuʼubiluba le chan taman le ka tu tsʼáaj cuenta chéen tu juunaloʼ?...

⁷ ¿Baʼax tu beetaj le j-kanan taman le ka tu tsʼáaj cuenta yaan juntúul u yaalakʼ ku bineltikoʼ? ¿Tu tuklaj wa mix baʼal unaj u beetik tumen chéen u yóoliliʼ le chan taman úuchik u náachtaloʼ? ¿Wa yaan u kʼalik le noventinueve u túulul utiaʼal ka xiʼik u kaxt le juntúul saʼatoʼ? ¿Maʼ wa chéen kunel ka xiʼik u kaxt chéen juntúul tamaniʼ?... Wa teech le chan tamanoʼ, ¿maʼ wa tu kiʼimaktal a wóol ka xiʼik le j-kanan taman kaxtikechoʼ?...

⁸ Le j-kanan tamanoʼ u yaabiltmaj tuláakal u yaalakʼoʼob, tak le saʼatoʼ, le oʼolal bin u kaxte. Chéen tukult bukaʼaj úuchik u kiʼimaktal u yóol le chan taman le ka kʼuch u yuumil kaxtikoʼ. Jesuseʼ tu yaʼaleʼ tak le j-kanan taman  kiʼimakchaj u yóol úuchik u kaxtikoʼ. Maas kiʼimakchaj u yóol tu yoʼolal, ke tu yoʼolal le noventinueve maʼ saʼatoʼoboʼ. ¿Máax a tuklik ku chíikbesik le j-kanan taman tu tsikbaltaj Jesusoʼ? ¿Máax ku yilik u kanáantkoʼon mantatsʼ jeʼex úuchik u beetik le j-kanan tamanoʼ?... Jesuseʼ tu yaʼaleʼ, Jéeoba, u Taata yaan teʼ kaʼan beetik beyoʼ.

⁹ Jéeoba Dioseʼ letiʼe Nojoch j-Kanan tamanoʼ. Letiʼeʼ u yaabiltmaj tuláakal le máaxoʼob meyajtikoʼ, tak le mejen paalaloʼob jeʼexechoʼ. Maʼ u kʼáat ka muʼyajnak mix ka xuʼulsaʼak mix juntúul tiʼ toʼoniʼ. Jach ku kiʼimaktal k-óol k-ojéeltik Dioseʼ táan u yilik u kanáantkoʼon (Mateo 18:12-14).

¹⁰ ¿Ka creertik wa jach tu jaajil Jéeoba Dios?... ¿Ka creertik wa jach tu jaajil yaan?... U jaajileʼ maʼ tu páajtal k-ilik Jéeoba, tumen letiʼeʼ juntúul espíritu. Baʼaleʼ jach tu jaajil yaan yéetel ku yilkoʼon. U yojel baʼax súutukil kʼaʼabéettoʼon áantaj. Tsʼoʼoleʼ jeʼex k-tʼaan yéetel u maasil máakoʼobeʼ, jeʼel xan u páajtal k-tʼaan yéetel Jéeoba ich oracioneʼ. Letiʼeʼ u kʼáat ka k-beet beyoʼ.

 ¹¹ Le oʼolal wa yaan kʼiin ka wuʼuyik lubaʼan a wóol yéetel chéen ta juunaleʼ, ¿baʼax unaj a beetik?... Tʼaanen yéetel Jéeoba. Natsʼaba tu yiknal, tumen letiʼeʼ jeʼel u líiʼsik a wóoleʼ yéetel jeʼel u yáantkecheʼ. Maʼ u tuʼubultecheʼ, Jéeobaeʼ u yaabiltmech tak teʼ súutukiloʼob ka wuʼuyikaba chéen ta juunaloʼ. Koʼox xokik le Bibliaoʼ. Teʼ Salmo 23, versículo 1, ku yaʼalik: «Yuumtsileʼ in j-kanan, mix baʼal ku bineltik ten. Tu kúuchiloʼob kiʼikiʼ janal ku beetik in jeʼelel, tu yiknal u sayabil jeetsʼel jaʼob ku bisken».

¹² Le versículo 4, ku yaʼalik xan: «Kex ka máanken ichil u sen éeʼjochʼeʼenil u taamil áaktuneʼ, maʼ bíin in chʼaʼ saajkil tiʼ mix junpʼéel loobiʼ, tumen techeʼ Yuumtsil, tiʼ yanech tin wéeteleʼ; u yaakʼil a jaatsʼ yéetel a xóolteʼeʼ ku luʼsik in saajkil». Bey u yuʼubikuba le máaxoʼob adorartik Jéeoba Diosoʼ. Ku líiʼsaʼal u yóoloʼob ken u muʼyajtoʼob talamiloʼob. ¿Bey wa xan a wuʼuyikaba techoʼ?...

¹³ Jéeobaeʼ ku kanáantik le máaxoʼob meyajtik jeʼex u beetik juntúul j-kanan tamanoʼ. Ku yeʼesiktiʼob le bej unaj u biskoʼoboʼ, letiʼobeʼ ku binoʼob yéetel kiʼimak óolaliʼ. Maʼatech u sajaktaloʼob, kex yaʼab talamiloʼob yaan tuʼux yanoʼob. Juntúul j-kanan tamaneʼ ku meyaj u yaakʼil u jaatsʼ yéetel u xóolteʼ utiaʼal u kanáantik u yaalakʼoʼob tiʼ le tsʼíitsʼik baʼalcheʼoboʼ. Le Bibliaoʼ ku tsolik bix úuchik u kanáantik u taamanoʼob David tiʼ juntúul león yéetel tiʼ juntúul oso (1 Samuel 17:34-36). Le máaxoʼob  meyajtik Jéeobaoʼ, u yojloʼob yaan u kanáantaʼaloʼob xan bey tumen Diosoʼ. Letiʼobeʼ maʼ saajkoʼobiʼ, tumen táan u kanáantaʼaloʼob tumen Dios.

¹⁴ Jéeobaeʼ jach tu jaajil u yaabiltmaj u taamanoʼob, le oʼolal jach ku kanáantkoʼob. Le Bibliaoʼ ku yaʼalik: ‹Bey juntúul j-kanan taman ku kanáantik u yaalakʼoʼobeʼ; ku méekʼik le mejen tamanoʼoboʼ› (Isaías 40:11).

¹⁵ ¿Maʼ wa tu kiʼimaktal a wóol ken a wil bey u kanáantkoʼon Jéeobaoʼ?... ¿A kʼáat wa a beetaba juntúul tiʼ u taamanoʼob?... Le tamanoʼoboʼ ku yuʼubikoʼob u tʼaan le máax kanáantkoʼoboʼ yéetel maʼ tu náachtaloʼob tiʼ letiʼ. ¿Ka wuʼuyik wa u tʼaan Jéeoba?... ¿Ka pʼáatal wa naatsʼ tiʼ letiʼ?... Wa ka beetkeʼ, mix bikʼin ken a chʼaʼ saajkil. Jéeobaeʼ yaan u kanáantkech.