ÑEE riuuluʼ triste o runi sentirluʼ stúbiluʼ nuu tiru la?... Rinabadiidxaluʼ pa nuu tuuxa nadxii lii la?... Nuu hombrehuiiniʼ ne dxaapahuiiniʼ riuu zacá, peru Dios na: «Naa qué zusiaandadiáʼ lii» (Isaías 49:15). Cadi guizáʼ sicarú nga guiníʼ íquenu ni guníʼ Dios riʼ la?... Ya, Jiobá Dios dxandíʼ nadxii laanu.

Tobi de ca hombre bicaa Biblia guníʼ: Pa bixhozeʼ ne jñaa gusaana naa la? Jiobá zacaa naa (Salmo 27:10). Cadi dxandíʼ ratadxí ladxidoʼno gánnanu ndiʼ la?... Jiobá cayabi laanu: Cadi guidxíbiluʼ, purtiʼ naa nuaaniáʼ lii. Dxandipeʼ zacaniáʼ lii (Isaías 41:10).

Peru nuu tiru Jiobá rudii lugar guniná Binidxabaʼ ca Xpínnibe ne dede uguube laacaʼ lu guendanagana. Ti dxi, Binidxabaʼ guizáʼ bininabe Jesús, de bicaa yuubaʼ que laabe guni orarbe Jiobá sicaríʼ: «Dios stinneʼ, Dios stinneʼ, xiñee ma bisaanu naa» pue (Mateo 27:46). Neca gucaná Jesús, peru gúnnabe nadxii Jiobá laabe (Juan 10:17). Ne laaca gúnnabe Dios nga rudii lugar gutiidiʼ Binidxabaʼ ca Xpínnibe lu guendanagana ne guniná laacabe. Lu sti capítulo zadúʼyanu xi pur.

Ora nahuiiniʼ binni jma nga nagueenda ridxibi. Lii, ñee huayuu ora guinítiluʼ la?... Bidxíbiluʼ la?... Stale baʼduhuiiniʼ laaca nidxibi. Ti dxi, Maestru Ni Jma Nanna Gusiidiʼ que guniʼbe ti historia, ne luni cayeeteʼ biniti tuuxa. Peru cadi ti baʼduhuiiniʼ diʼ, sínuque ti dendxuʼ.

 Zanda guininu nácaluʼ casi ti dendxuhuiiniʼ. Ximodo yaʼ. Biaa, purtiʼ ca dendxuʼ ca cadi naróʼbapecaʼ ne cadi nadípapecaʼ, ne riquiiñecaʼ tu gapa ne gulá laacaʼ, cásica lii. Hombre ni rapa dendxuʼ ca nga ti pastor.

Lu historia que Jesús guníʼ de ti pastor ni napa ti gayuaa dendxuʼ. Ti dxi la? biniti tobi de laacame. Zándaca pa nuume gúʼyame xi nuu deche dani que, peru chaahuigá chaahuigá bixáleme de stuudxi que. Ximodo raʼbuʼ guyuu dendxuhuiiniʼ que ora bíʼyame maʼ laasime biaaname raqué yaʼ....

Xi guni pastor que ora guʼyaʼ cayaadxaʼ ti dendxuʼ stiʼ yaʼ. Ñee zaníʼ íquebe, cumu laame nápame donda la? qué ziyubediáʼ laame, o zusaanabe sti noventa y nueve que ti lugar ra cadi guiníticaʼ ne ziyúbibe laame la? Ñee risácapeʼ nga cueebe tiempu guyúbibe ti dendxuʼ si la?... Pa lii ngue ñácaluʼ dendxuʼ ni biniti que, ñuláʼdxiluʼ niyubi pastor que lii la?...

Pastor que guizáʼ nadxii ca manihuiiniʼ stiʼ, dede ne ni biniti que, ngue runi yeyúbibe laame. Guníʼ ique si  pabiáʼ biecheʼ dendxuhuiiniʼ que ora bíʼyame yendá pastor que ra nuume. Jesús guníʼ laaca guizáʼ biecheʼ pastor que ora bidxélabe stendxuhuiinibe. Jma biéchebe pur laame que pur ca noventa y nueve ni qué niniti que. Yanna, tuu ndiʼ casi pastor ni bieeteʼ lu historia stiʼ Jesús riʼ yaʼ. Tuu ndiʼ riguu xaíque laanu stálepeʼ casi pastor que ne dendxuʼ stiʼ yaʼ.... Jesús na laabe nga Jiobá, Bixhózebe ni nuu guibáʼ.

Jiobá Dios nga jma nanna gapa stendxuʼ, o xquidxi. Nadxiibe guiráʼ ca xpínnibe, dede ca baʼduʼ casi lii. Qué riuláʼdxidibe gacaná o gati nin tobi de laanu. Dxandíʼ, galanpeʼ nga gánnanu riguu xaíque Dios laanu stálepeʼ (Mateo 18:12-14).

Ñee dxandíʼ runi creluʼ nuu Jiobá Dios la?... Ñee ruuyaluʼ laabe casi ti binni ni dxandíʼ la?... Ya, dxandíʼ nga qué zanda diʼ gúʼyanu Dios purtiʼ espíritu laabe ne xcuérpube qué rihuinni diʼ ni. Peru laabe ti binnipeʼ nga laabe ne zanda gúʼyabe laanu. Nánnabe pora caquiiñenu chuʼ tu gacané laanu. Ne  cásica rinínenu stuudxi binni zacaca zanda guinínenu Jiobá ora guni orarnu laabe. Ya, laapebe riuláʼdxibe gúninu ni.

Nga runi, pa riuuluʼ triste o runi sentirluʼ stúbiluʼ nuu tiru, xi naquiiñeʼ gúniluʼ yaʼ.... Guniʼné Jiobá. Bidxiña laabe purtiʼ laabe zaguixhedxibe ladxidoʼloʼ ne zacanebe lii. Cadi gusiaandaluʼ nadxii Jiobá lii, dede ne ora runi sentirluʼ stúbiluʼ. Ndaaniʼ Salmo 23, dede lu versículo 1 ne stuudxi versículo stini, cayabi laanu: «Jiobá nga Pastor stinneʼ. Gastiʼ ziaadxaʼ naa. Lu guixi gáʼ ribáʼquibe naa, ne rinebe naa ra ganda guiziilaʼdxeʼ ra nuu stale nisa».

Guidúʼyanu xiruʼ bicaa hombre ca lu versículo 4 riʼ: «Neca sayaʼ ra jma nacahui, qué ridxibeʼ nin ti cosa malu purtiʼ lii nuuneluʼ naa; vara stiluʼ ne bastón stiluʼ nga riguixhedxí ladxeduáʼ». Sicaríʼ riuu ca binni ni nápacaʼ Jiobá casi Dios sticaʼ. Ratadxí ladxidóʼcabe ora nápacabe guendanagana. Ñee zacaca riuuluʼ la?...

Jiobá rapa ca xpinni cásica ti pastor rapa ca stendxuʼ. Ruluiʼbe laacaʼ neza checaʼ, ne laacaʼ riuláʼdxicaʼ sacaʼ luni. Qué gápacabe xi pur guidxíbicabe, neca gúʼyacabe stale guendanagana. Ti pastor riquiiñeʼ ti vara, o ti bastón, para gapa ca dendxuʼ stiʼ de  ca maniʼ duxhuʼ ca. Biblia cayabi laanu ximodo hombrehuiiniʼ ni guca pastor ni láʼ David que, bilá ca dendxuʼ stiʼ de ti lión ne de ti oso (1 Samuel 17:34-36). Ca xpinni Jiobá laaca nánnacabe zapa Dios laacabe zaqueca. Qué gápacabe xi pur guidxíbicabe purtiʼ Dios nuuné laacabe.

Jiobá dxandíʼ nadxii ca dendxuʼ stiʼ ne rápabe laacaʼ ne guendarannaxhii. Biblia na: Casi ti pastor zinebe ca dendxuʼ stibe. Ne nabe zucasaabe ca dendxuhuiiniʼ ca (Isaías 40:11).

Cadi riuudxí ladxidoʼloʼ gánnaluʼ zacá Jiobá  la?... Riuláʼdxiluʼ ñácaluʼ tobi de ca dendxuhuiiniʼ stibe la?... Ca dendxuʼ ca runadiágacaʼ ridxi stiʼ pastor sticaʼ ne riuucaʼ gaxha de laabe. Ñee runadiágaluʼ Jiobá la?... Riuuluʼ gaxha de laabe la?... Pa gúniluʼ ni la? qué liica zápaluʼ xi pur guidxíbiluʼ. Jiobá ziuuné lii.