Uzou Avọ 33

Jesu Ọ Rẹ Sae Thọ Omai

OKENỌ Jesu ọ rro te ohwo no jẹ riẹ epanọ a rọ thọe evaọ okenọ ọ jọ ọmaha, kọ who roro nọ ọ lẹ se Jihova je yere iei?— Ẹvẹ who roro nọ Jesu ọ ta kẹ Meri avọ Josẹf uwhremu na nọ ọ riẹ nọ a siwi rie ẹkwoma obọ Ijipti nọ a rehọ e riẹ dhẹ kpohọ?—

Whaọ Jesu ọ gbẹ rrọ ọmaha ha. Ọ gbẹ be tubẹ rria otọakpọ họ wọhọ epanọ o ru okejọ vẹre na. Kọ who mu ẹro họ no inọ enẹna ahwo jọ a be rehọ Jesu wọhọ ọmaha nọ ọ rrọ evaọ oria emu erao?— Ere ahwo a re roro maero evaọ oke Ikresimesi nọ a rẹ jọ eria buobu ruẹ iwoho Jesu nọ ọ jọ ọmaha.

Dede nọ Jesu ọ gbẹ rrọ otọakpọ rria ha, kọ whọ rọwo inọ ọ rrọ uzuazọ?— E, a kpare riẹ no iwhuowhu, yọ obọnana ọ rrọ Ovie ọgaga evaọ obọ odhiwu. Eme who roro nọ ọ rẹ sai ru rọ thọ enọ i bi yo ẹme riẹ?— Okenọ Jesu ọ jọ otọakpọ, o dhesẹ epanọ ọ rẹ sae rọ thọ enọ i you rie. Joma rri epanọ o ro ru ere ẹdẹjọ nọ ọ jọ okọ kugbe ilele riẹ.

 O be dina kẹle obọ owọwọ no. Ẹdẹ ọyena kpobi Jesu o je wuhrẹ ahwo kẹle Abade Galili na, awa ologbo nọ o theri te oware wọhọ ikilomita 20 jẹ kẹre te ikilomita 12. Ọ tẹ ta kẹ ilele riẹ nọ: “Ma kpo abọ ethẹ ọdekọ.” Fikiere a te le okọ họ a te muhọ ebi be fa awa na vrẹ. Oma o rrọ Jesu gaga no, fikiere o te kpohọ obọ emuokọ na ọ tẹ rọ othuzou kiẹzẹ. U kri hi owezẹ o tẹ wọe vrẹ no.

Ilele na a kpe aro fihọ be kpọ okọ na. Uvumọ ẹbẹbẹ ọ jariẹ hẹ, rekọ ofou ọgaga o te muhọ efou. O bi dhe ẹgẹga ọvo, yọ ẹkporo na ọ be ga viere. Ame o te muhọ ẹtehe ruọ okọ na, ame o te mu okọ na họ ẹvọ.

Ozọ u te mu ilele na inọ okọ na u bi ti zue. Rekọ ozọ u mu Jesu hu. Ọ gbẹ be wezẹ eva obọ emuokọ na. Ukuhọ riẹ, ilele na a tẹ rrọ riẹ, jẹ ta nọ: ‘Owuhrẹ, Owuhrẹ, siwi omai; ma bi ti whu no fihọ ẹkporo na.’ Koyehọ Jesu ọ kpare oma ọ tẹ ta ẹme kẹ ofou gbe ẹkporo na. Ọ ta nọ: “Fọ, o jere.”

 Ofou na ọ tẹ nwani serihọ, awa na ọ tẹ fọ. Akpọ o gbe ilele na unu. A re ruẹ oware utiona ẹdọvo ho. A tẹ be ta kẹ ohwohwo nọ: “Nọ ono, nọ ọ ta kẹ ofou gbe ame dede, a yo ẹme riẹ?”—Luk 8:22-25; Mak 4:35-41.

Kọ whọ riẹ ohwo nọ Jesu ọ rrọ?— Kọ whọ riẹ oria nọ o wo ogaga ulogbo riẹ no ze?— Ozọ o hai mu ilele na ha nọ Jesu ọ rrọ etẹe kugbe ai na, keme Jesu ọ rrọ ohwo gheghe he. Ọ rẹ sai ru eware igbunu nọ uvumọ ohwo ọ sai ru hu. Jomẹ ta oware ofa jọ nọ o ru evaọ abade nọ ẹkporo ọ jọ kẹ owhẹ.

Onana o via nọ edẹ jọ e vrẹ no. Nọ oke owọwọ u te no, Jesu ọ tẹ ta kẹ ilele riẹ re a ruọ okọ re ae ọvo a bi kpohọ ofẹ odekọ abade na. Jesu ọvo o te kpohọ obọ ugbehru na. O jọ oria ofọfọ nọ ọ sae jọ lẹ se Ọsẹ riẹ, Jihova Ọghẹnẹ.

 Ilele na e tẹ ruọ okọ na a te bi bi fa abade na vrẹ. Rekọ ofou o te muhọ. Ofou na o te bi dhe ẹgẹga. Oke nana yọ oke u kpo no. Ezae na a tẹ rehọ emehọ okọ na ziọ otọ a tẹ be rọ ivi bi okọ na. Rekọ okọ na u bi si awọ họ keme ofou na o bi fou rai zihe. Ẹkporo na o bi gele okọ na kpemu kparo, yọ ame ọ be tehe ruọ okọ na. Ezae na e be dao oma kpobi re a te okpa, rekọ kakaka.

Jesu ọvo ọ gbẹ rrọ obọ ugbehru na. Ọ rria obei oke krẹkri. Rekọ obọnana ọ ruẹ nọ ilele riẹ a rrọ uye evaọ ẹkporo na. Fikiere o te no ugbehru na nwrotọ ziọ akotọ abade na. Jesu ọ gwọlọ fi obọ họ kẹ ilele riẹ, fikiere ọ tẹ ruọ ehru ame nọ ẹkporo ọ rrọ na be nya bru ai!

Eme ọ rẹ via whọ tẹ gwọlọ nya evaọ ehru ame?— Who re kie diwi, whọ rẹ sae tubẹ da ame whu dede. Rekọ o rrọ ere kẹ Jesu hu. O wo obọdẹ ogaga. Jesu ọ nya ugbo gaga re o te te okọ na. Fikiere oware wọhọ irioke ilele na e rọ ruẹ Jesu nọ ọ be nya ehru ame na bru rai ze. Rekọ oware nọ a be ruẹ na u gbe rai unu gaga. Ozọ u mu rai gaga, a te bi bo fiki ozọ. Jesu ọ tẹ ta kẹ ae nọ: ‘Wha kru udu ga, mẹ; ozọ u mu owhai hi.’

Nọ Jesu ọ nwane ruọ evaọ okọ na no, ẹkporo na o te serihọ. Akpọ ọ tẹ wariẹ gbe ilele na unu. A te kie fihọ aro Jesu jẹ ta nọ: “Ghinọ uzẹme whẹ Ọmọ Ọghẹnẹ.”—Matiu 14:22-33; Jọn 6:16-21.

Kọ o gbẹ hai woma gaga re ma rria oke yena re ma ruẹ Jesu nọ o bi ru eware itieye na?— Kọ whọ riẹ oware nọ Jesu o ro ru eware igbunu eyena?— O ru eware eyena fikinọ o you ilele riẹ jẹ gwọlọ fi obọ họ kẹ ae. Rekọ oware ofa nọ o ro ru ai họ re o dhesẹ ogaga ulogbo nọ o wo nọ o ti ro ru iruo  evaọ obaro wọhọ Osu Uvie Ọghẹnẹ.

Makọ nẹnẹ na Jesu ọ be rọ ogaga riẹ thọ ilele riẹ no omodawọ Setan re ọ whaha ae ẹta kẹ amọfa kpahe Uvie Ọghẹnẹ. Rekọ Jesu ọ be rọ ogaga riẹ thọ ilele riẹ no ẹyao hayo ro siwi ai evaọ okenọ a tẹ be mọ họ. Makọ ikọ Jesu na kpobi a whu dede. A kpe Jemis, oniọvo Jọn, a fi Jọn omariẹ họ uwou-odi.—Iruẹru 12:2; Eviavia 1:9.

Epọvo na o rrọ nẹnẹ re. Makọ ahwo a gọ Jihova hayo a gọ riẹ hẹ, aikpobi a rẹ sae mọ je whu. Rekọ kẹle na, evaọ etoke esuo Jesu wọhọ Ovie ọrọ egọmeti Ọghẹnẹ, eware i ti wo ohẹriẹ. Ozọ u gbe ti mu uvumọ ohwo ho keme Jesu ọ te rọ ogaga riẹ fi obọ họ kẹ ahwo kpobi nọ i bi yo ẹme kẹe.—Aizaya 9:6, 7.

Ikere efa nọ i dhesẹ ogaga ulogbo Jesu wọhọ ọnọ Ọghẹnẹ o ro mu Osu evaọ Uvie Ọghẹnẹ họ Daniẹl 7:13, 14; Matiu 28:18; gbe Ahwo Ẹfẹsọs 1:20-22.

[Iwoho nọ e rrọ ẹwẹ-obe avọ 172]

Ẹvẹ whọ rehọ Jesu—wọhọ Ovie ọgaga manikọ ọmọfofa nọ o wo ogaga ha?

[Uwoho nọ o rrọ ẹwẹ-obe avọ 173]

Eme Jesu ọ be ta kẹ ofou gbe ẹkporo na?

[Uwoho nọ o rrọ ẹwẹ-obe avọ 174]

Fikieme Jesu o ro ru eware igbunu?

[Uwoho nọ o rrọ ẹwẹ-obe avọ 176]

Ẹvẹ Jesu ọ be rọ thọ idibo riẹ nẹnẹ?