ជំពូកទី៣៣
លោកយេស៊ូអាចការពារយើង
តើកូនចាត់ទុកលោកយេស៊ូជាស្ដេចដែលមានឫទ្ធានុភាពដ៏ខ្លាំងក្លា ឬគ្រាន់តែជាកូនង៉ែតតូចមួយប៉ុណ្ណោះ?
ពេលលោកយេស៊ូធំឡើង លោកបានដឹងថាព្រះយេហូវ៉ាបានការពារលោក កាលដែលលោកនៅតូច។ ដូច្នេះ តើកូនគិតថាលោកយេស៊ូបានអធិដ្ឋានអរគុណព្រះយេហូវ៉ាឬទេ?— ក្រោយពីលោកយេស៊ូដឹងថាយ៉ូសែបនិងនាងម៉ារៀបានជួយសង្គ្រោះជីវិតរបស់លោកដោយនាំទៅស្រុកអេស៊ីប តើកូនគិតថាលោកយេស៊ូប្រហែលជានិយាយអ្វីទៅកាន់ពួកគាត់?—
ឥឡូវនេះ លោកយេស៊ូមិនមែនជាកូនង៉ែតទេ ហើយលោកក៏មិនរស់នៅផែនដីទៀតដែរ។ ប៉ុន្តែ ទោះជាលោកយេស៊ូមិនរស់នៅផែនដីទៀតក្ដី តើកូនជឿថាលោកកំពុងនៅរស់ទេ?— មែនហើយ ព្រះបានប្រោសលោកឲ្យរស់ឡើងវិញ ហើយឥឡូវលោកជាស្ដេចដ៏ខ្លាំងក្លានៅស្ថានសួគ៌។ តើកូនគិតថាលោកអាចការពារពួកអ្នកដែលបម្រើលោកយ៉ាងដូចម្ដេច?— ជាឧទាហរណ៍ ពេលលោកយេស៊ូនៅផែនដី លោកបានបង្ហាញឲ្យឃើញថាលោកអាចការពារអ្នកដែលស្រឡាញ់លោក។ នៅថ្ងៃមួយ ពេលលោកយេស៊ូជិះទូកជាមួយនឹងពួកអ្នកកាន់តាមលោក តើលោកបានការពារពួកគេយ៉ាងដូចម្ដេច? ឥឡូវសូមស្តាប់រឿងនេះ។
លោកយេស៊ូបានបង្រៀនបណ្ដាជនពេញមួយថ្ងៃនៅជិតសមុទ្រកាលីឡេ។ សមុទ្រកាលីឡេជាបឹងធំមួយ ដែលមានបណ្ដោយ២០គីឡូម៉ែត និងទទឹង១២គីឡូម៉ែត។ ពេលនោះព្រលប់ហើយ លោកបាននិយាយប្រាប់អ្នកកាន់តាមលោកថា៖ «ចូរយើងឆ្លងទៅត្រើយម្ខាងបឹង»។ ដូច្នេះ ពួកគាត់ក៏បើកក្ដោងទូកចេញដំណើរឆ្លងបឹងនោះ។ លោកយេស៊ូអស់កម្លាំងខ្លាំងណាស់ ដូច្នេះលោកក៏ទៅសម្រាន្តលើខ្នើយនៅកន្សៃទូក ហើយមិនយូរប៉ុន្មានក៏លង់លក់ទៅ។
តើលោកយេស៊ូកំពុងនិយាយអ្វីទៅកាន់ខ្យល់ព្យុះនិងទឹករលក?
ប៉ុន្តែ ពួកអ្នកកាន់តាមលោកមិនបានគេងទេ ពួកគាត់នៅភ្ញាក់ដើម្បីឲ្យទូកធ្វើដំណើរតាមទិសត្រឹមត្រូវ។ អស់មួយរយៈពេលគ្មានអ្វីកើតឡើងទេ តែក្រោយមក មានខ្យល់ព្យុះដ៏ធំមួយបក់បោកមក និងធ្វើឲ្យរលកសមុទ្រកញ្ជ្រោលកាន់តែខ្លាំងឡើងៗ ហើយរលកបានវាយផ្ទប់ទូកនោះ រហូតដល់ទឹកចូលជិតពេញ។
ពួកអ្នកកាន់តាមលោកខ្លាចថាពួកគាត់នឹងលិចទូក។ តែលោកយេស៊ូមិនខ្លាចទេ។ លោកនៅតែសម្រាន្តនៅកន្សៃទូកនៅឡើយ។ នៅទីបំផុត ពួកគាត់បានទៅដាស់លោកថា៖ ‹លោកគ្រូ! លោកគ្រូ! សូមសង្គ្រោះយើងផង យើងជិតស្លាប់ដោយសារខ្យល់ព្យុះនេះហើយ!›។ នៅពេលនោះ លោកក៏ក្រោកឡើងនិយាយទៅកាន់ខ្យល់និងរលកថា៖ «ចូរស្ងៀមទៅ!»។
ភ្លាមនោះខ្យល់ឈប់បក់ហើយសមុទ្រក៏ស្ងប់ទៅ។ ពួកអ្នកកាន់តាមលោកនឹកស្ញប់ស្ញែងក្នុងចិត្តយ៉ាងខ្លាំង។ ពួកគាត់មិនធ្លាប់ឃើញអ្វីដូចនេះពីមុនទេ។ ដូច្នេះពួកគាត់ក៏បានសួរគ្នាថា៖ «តើលោកនេះពិតជាអ្នកណា? ព្រោះសូម្បីតែខ្យល់និងទឹកក៏លោកអាចបញ្ជាបានដែរ ហើយវាស្តាប់បង្គាប់លោក»។—លូកា ៨:២២-២៥; ម៉ាកុស ៤:៣៥-៤១
តើកូនដឹងថាលោកយេស៊ូជាអ្នកណាទេ?— តើកូនដឹងថាលោកបានទទួលឫទ្ធានុភាពមកពីណាទេ?— ពួកអ្នកកាន់តាមលោកមិនគួរភ័យខ្លាចឡើយ ពេលដែលមានលោកយេស៊ូនៅជាមួយនឹងពួកគាត់។ ព្រោះលោកយេស៊ូមិនមែនជាមនុស្សធម្មតាទេ។ លោកអាចធ្វើការអស្ចារ្យជាច្រើនដែលគ្មានមនុស្សណាម្នាក់អាចធ្វើបានឡើយ។ ប៉ុន្តែ មានពេលមួយទៀតដែលលោកយេស៊ូបានធ្វើការអស្ចារ្យពេលមានខ្យល់ព្យុះនៅសមុទ្រ។ សូមកូនស្តាប់អំពីរឿងនេះ។
យូរក្រោយមក នៅល្ងាចថ្ងៃមួយ លោកយេស៊ូបានប្រាប់ពួកអ្នកកាន់តាមលោកឲ្យចេញទូកទៅត្រើយម្ខាងសមុទ្រមុនលោក។ រួចមកលោកយេស៊ូបានឡើងទៅលើភ្នំម្នាក់ឯង។ នៅទីនោះជាកន្លែងស្ងាត់ល្អ ដែលលោកអាចអធិដ្ឋានទៅព្រះយេហូវ៉ាជាបិតា។
ពួកអ្នកកាន់តាមលោកបានចុះទូកហើយក៏បើកក្ដោងចេញដំណើរឆ្លងសមុទ្រ។ ប៉ុន្តែ រំពេចនោះមានខ្យល់បក់មកខ្លាំងឡើងៗ។ នៅពេលនោះគឺយប់ហើយ។ ពួកអ្នកកាន់តាមលោកបានទម្លាក់ក្ដោងចុះ ហើយចាប់ផ្ដើមអុំវិញ។ តែពួកគាត់អុំទៅមិនបានឆ្ងាយទេ ព្រោះខ្យល់ព្យុះបក់បញ្ច្រាសទូករបស់ពួកគាត់។ ទូកក៏យោលចុះយោលឡើងក្នុងរលកធំៗ ហើយទឹករលកក៏បោកផ្ទប់ចូលក្នុងទូក។ ពួកគាត់ខំប្រឹងអុំឲ្យដល់ច្រាំង តែពួកគាត់ធ្វើមិនបាន។
នៅពេលនោះ លោកយេស៊ូនៅលើភ្នំម្នាក់ឯងនៅឡើយ។ លោកបាននៅទីនោះយូរ។ ប៉ុន្តែ លោកអាចឃើញពួកអ្នកកាន់តាមលោកជិតមានគ្រោះថ្នាក់ក្នុងរលកធំៗ។ ហេតុនេះហើយ លោកបានចុះពីភ្នំទៅច្រាំងសមុទ្រ។ លោកយេស៊ូចង់ជួយពួកគាត់ ដូច្នេះលោកក៏ដើរលើទឹកកាត់ខ្យល់ព្យុះទៅរកពួកគាត់!
បើកូនព្យាយាមដើរលើទឹក តើនឹងមានអ្វីកើតឡើង?— កូននឹងលិច ហើយអាចលង់ទឹកស្លាប់បាន។ ប៉ុន្តែ លោកយេស៊ូគឺខុសគ្នា។ លោកមានឫទ្ធានុភាពពិសេស។ លោកយេស៊ូត្រូវដើរឆ្ងាយទៅរកទូករបស់ពួកអ្នកកាន់តាមលោក។ ពេលដែលពួកគាត់ឃើញលោកយេស៊ូកំពុងដើរលើទឹកឆ្ពោះមករកពួកគាត់ គឺទៀបភ្លឺហើយ។ ប៉ុន្តែ ពួកគាត់មិនអាចជឿអ្វីដែលពួកគាត់ឃើញនោះទេ។ ពួកគាត់ភ័យខ្លាចខ្លាំងណាស់ ហើយក៏ស្រែកឡើង។ រួចមក លោកយេស៊ូនិយាយទៅពួកគាត់ថា៖ «ចូរមានចិត្តក្លាហានឡើង គឺខ្ញុំទេ កុំខ្លាចឡើយ»។
ហេតុអ្វីលោកយេស៊ូបានធ្វើការអស្ចារ្យ?
ក្រោយពីលោកយេស៊ូចូលទូក ភ្លាមនោះខ្យល់ព្យុះក៏ស្ងប់ទៅ។ លើកនេះទៀត ពួកអ្នកកាន់តាមលោកក៏នឹកស្ញប់ស្ញែងក្នុងចិត្តយ៉ាងខ្លាំងដែរ។ ពួកគាត់បានលំឱនកាយគោរពលោកយេស៊ូ ហើយនិយាយថា៖ «លោកពិតជាបុត្ររបស់ព្រះមែន»។—ម៉ាថាយ ១៤:២២-៣៣; យ៉ូហាន ៦:១៦-២១
បើយើងរស់នៅគ្រានោះ ហើយឃើញលោកយេស៊ូធ្វើការអស្ចារ្យ យើងពិតជាកោតស្ងើចណាស់ មែនទេ?— ហេតុអ្វីលោកយេស៊ូធ្វើការអស្ចារ្យទាំងនោះ? តើកូនដឹងទេ?— លោកធ្វើដូច្នោះ ដោយសារលោកស្រឡាញ់ពួកអ្នកកាន់តាមលោក ហើយលោកចង់ជួយពួកគាត់។ ម្យ៉ាងទៀត លោកបានធ្វើការអស្ចារ្យដើម្បីបង្ហាញថាក្នុងនាមជាអ្នកគ្រប់គ្រងរាជាណាចក្ររបស់ព្រះ លោកមានឫទ្ធានុភាពដ៏ខ្លាំងក្លា ហើយក៏នឹងប្រើឫទ្ធានុភាពនោះនៅថ្ងៃអនាគតដែរ។
នៅសព្វថ្ងៃនេះ តើលោកយេស៊ូការពារពួកអ្នកកាន់តាមលោកយ៉ាងដូចម្ដេច?
នៅសព្វថ្ងៃនេះ ជាច្រើនដង លោកយេស៊ូក៏ប្រើឫទ្ធានុភាពរបស់លោកដើម្បីការពារពួកអ្នកកាន់តាមលោកដែរ ពេលដែលសាថានខំរារាំងពួកគាត់មិនឲ្យផ្សព្វផ្សាយអំពីរាជាណាចក្ររបស់ព្រះ។ ប៉ុន្តែ លោកយេស៊ូមិនប្រើឫទ្ធានុភាពដើម្បីការពារពួកអ្នកកាន់តាមលោកមិនឲ្យឈឺ ឬជួយពួកគាត់ឲ្យជាសះស្បើយពីជំងឺនោះឡើយ។ សូម្បីតែពួកសាវ័កទាំងអស់របស់លោកយេស៊ូក៏បានស្លាប់ដែរ។ យ៉ាកុបជាបងប្រុសយ៉ូហានត្រូវគេសម្លាប់ ហើយយ៉ូហានបានត្រូវគេចាប់ដាក់គុក។—សកម្មភាព ១២:២; ការបើកបង្ហាញ ១:៩
ស្រដៀងគ្នាដែរ នៅសព្វថ្ងៃនេះ មិនថាមនុស្សបម្រើព្រះយេហូវ៉ាឬមិនបម្រើក្ដី ពួកគេទាំងអស់គ្នាអាចឈឺហើយស្លាប់។ ប៉ុន្តែ មិនយូរទៀត ក្នុងអំឡុងពេលដែលលោកយេស៊ូគ្រប់គ្រងជាស្ដេចក្នុងរដ្ឋាភិបាលរបស់ព្រះ អ្វីៗនឹងផ្លាស់ប្ដូរវិញ។ នៅពេលនោះ គ្មាននរណាម្នាក់នឹងភ័យខ្លាចទៀតទេ ដោយសារលោកយេស៊ូនឹងប្រើឫទ្ធានុភាពរបស់លោក ដើម្បីជាប្រយោជន៍ដល់អស់អ្នកដែលស្តាប់បង្គាប់លោក។—អេសាយ ៩:៦, ៧
ខគម្ពីរផ្សេងទៀតប្រាប់អំពីឫទ្ធានុភាពដ៏ខ្លាំងក្លារបស់លោកយេស៊ូ ជាអ្នកដែលព្រះបានតែងតាំងឲ្យគ្រប់គ្រងក្នុងរាជាណាចក្ររបស់លោក គឺមាននៅ ដានីយ៉ែល ៧:១៣, ១៤ ម៉ាថាយ ២៨:១៨ និងអេភេសូរ ១:២០-២២។
