PAKALUA Yezu muntu mukole ne pakumvuaye mushindu uvuabu bamukube patshivuaye muana mutekete, udiku wela meji ne: uvua musambile Yehowa bua kumuela tuasakidila anyi?​— Udi wela meji ne: Yezu uvua mua kuikala muambile Mariya ne Yozefe tshinyi pakamanyaye ne: bavua bamupandishe pa kuya nende mu Ejipitu?​—

Bushuwa, Yezu katshiena muana wa mu diboko nansha. Katshiena nansha kabidi musombele pa buloba to. Kadi udiku mumanye ne: matuku etu aa, bantu bakuabu batu bamueneke bela anu meji ne: Yezu utshidi muana wa mu tshiadi muteka mu tshidilu tshia nyama anyi?​— Bualu ebu butu bumueneka nunku mu bikondo bia Nowele patutu tumona mu miaba ya bungi bimfuanyi bia Yezu muikale muana wa mu diboko.

Nansha mudi Yezu katshiyi musombele pa buloba, udiku witaba ne: udi ne muoyo anyi?​— Eyowa, bakamubisha ku lufu ne mpindieu udi Mukalenge wa bukole mu diulu. Udi wela meji ne: udi mua kuenza tshinyi bua kukuba bantu badi bamuenzela mudimu?​— Tshilejilu, pavua Yezu pa buloba, wakaleja bushuwa ne: uvua mua kukuba bantu badi bamunange. Tumonabi tshivuaye muenze dituku dikuabu pavuaye mu luendu ne bayidi bende mu buatu.

 Tukavua dilolo menemene. Yezu uvua mulongeshe dituku adi dijima ku Mâyi a Galela adi mikale dijiba dinene dia kilometre 20 mu bule ne kilometre 12 mu butshiama. Mpindieu kuambilaye bayidi bende ne: ‘Tusabukayi dishiya dia dijiba.’ Buobu kubuela mu buatu ne kutuadijabu kuya. Bu muvua Yezu mutshioke bikole, wakaya panyima pa buatu e kudiadija pa musamu. Katantshi aka ukavua mu tulu tukole.

Bayidi bavua buobu bashale batabale bua kuendesha buatu. Bakenda bimpe anu bua tshitupa tshikese, kadi pashishe tshipepele tshikole e kujuka. Tshivua tshienda tshikola anu kukola ne mavuala enda alua manene. Mavuala akatuadija kudituta ku buatu ne mâyi kubangawu kuwula mu buatu.

Bayidi kutuadija kutshina ne: kabalu kudina. Kadi Yezu kakumvua buôwa to. Uvua anu mulale kunyima kua buatu. Ndekelu wa bionso, bayidi bakamubisha ku tulu bamba ne: ‘Mulongeshi, Mulongeshi, utupandishe; tudi tuamba kufua mu tshipepele etshi.’ Yezu e kubika ne kutuadija kuakula ne tshipepele ne mavuala a mâyi. Udi wamba ne: ‘Puwa, talala!’

Anu pine apu tshipepele kutuya ne dijiba kushala talalaa. Bayidi kukemabu bikole, bualu kabavua banji kumona bualu bua  mushindu au to. Kubangabu kukonkangana bamba ne: “Ewu nnganyi udi utumina bipepele ne mavuala diyi, bimuitaba?”​—Luka 8:22-25, MMM; Mâko 4:35-41.

Udi mumanye ne: Yezu nnganyi anyi?​— Udi mumanye kudiye upetela bukole buende bua bungi ebu anyi?​— Bayidi kabavua ne bua kutshina tshintu pavua Yezu muikale nabu to, bualu Yezu kavua muntu wetu wa patupu eu nansha. Uvua mua kuenza malu a dikema avua muntu mukuabu kayi mua kuenza to. Teleja nkuambile bualu bukuabu buakenzaye dimue dituku mu tshipepele tshikole pa mâyi.

Matuku akavua mapite. Dikuabu dituku, pakavua butuku buila, Yezu wakambila bayidi bende bua kubuelabu mu buatu ne kumudianjidilabu dishiya dia mâyi. Pashishe Yezu kubandaye ku mukuna yeye nkayende. Uvua muaba uvua kauyi mitoyi uvuaye mua kusambila Tatuende, Yehowa Nzambi.

Bayidi bakabuela mu buatu e kutuadija kusabuka batangile dia muamua dia mâyi au. Kadi katupa aka tshipepele kubangisha. Tshipepele  atshi tshivua anu tshienda tshikola. Butuku kuilabu menemene. Bantu kupuekesha tshilamba tshitu tshiendesha buatu e kutuadijabu kuita buatu. Kadi kabavua baya kule to, bualu tshipepele tshikole tshivua tshilua kumpala kuabu. Buatu bukavua butua kumpala butua kunyima eku mavuala manene ne mâyi biditutaku. Bayidi bakenza muabu muonso bua kufika ku mpenga, kadi kabayiku mua kukumbana to.

Kadi Yezu yeye utshivua anu ku mukuna kuvuaye muye aku. Wakenzaku dîba dile. Kadi wakalua kumona dîba adi ne: bayidi bende bavua mu njiwu ya mavuala a mâyi au avua amba kubashipa. Wakapueka mutangile ku muelelu wa mâyi. Yezu uvua musue kuambuluisha bayidi bende, ke bualu kayi wakatuadija kubalonda wenda wendela pa mâyi avua mabinduluke!

Wewe mutete bua kuendela pa mâyi, tshidi mua kuenzeka ntshinyi?​— Udi mua kudiinamu ne kufua, ki mmomu anyi? Kadi Yezu kavua bu bantu bonso aba to. Uvua ne bukole bua wabu mushindu. Yezu uvua ne bua kuanji kuenda mutantshi mule bangabanga ne kufika muaba uvua buatu. Nenku, kuisu kukavua kuenda kutokoloka pavua bayidi bamone Yezu ulua mutangile kudibu wendela pa mâyi. Kadi bakamona bu tshilota kabayi mua kuitaba to. Buôwa bukole buakabakuata ne kuelabu mbila mikole. Ke Yezu kubambila ne: “Lekelayi kuzakala, mmeme, kanutshinyi to.’

Diakamue pakabanda Yezu mu buatu, tshipepele kukosekatshi. Bayidi bakakema kabidi. Bakapona kumpala kua Yezu bamba ne: ‘Bulelela, wewe udi Muana wa Nzambi.’​—Matayo 14:22-33, MMM; Yone 6:16-21.

Kuenaku mumone ne: bivua mua kuikala bilenga bia dikema bua kuanji kupingana nansha tshikondo atshi bua kumona mushindu uvua Yezu wenza malu a buena au anyi?​— Udi mumanye tshivua Yezu muenzele bishima abi anyi?​— Uvua muenze malu au bualu uvua munange bayidi bende ne kabidi uvua musue kubambuluisha. Kadi wakenza kabidi bishima abi bua kuleja bukole buvuaye nabu buikalaye ne bua kuenza nabu mudimu mu matuku atshilualua pikalaye Mukokeshi wa Bukalenge bua Nzambi.

 Nansha lelu’eu Yezu utu misangu ya bungi wenza mudimu ne bukole buende bua kukuba bayidi bende ku malu adi Satana wenza bua kubapangisha mua kuambila bakuabu malu a Bukalenge bua Nzambi. Kadi Yezu kêna wenza mudimu ne bukole buende ebu bua kukuba bayidi bende ku masama anyi bua kubuondopa padibu basama to. Nansha mene bapostolo bonso ba Yezu bakalua kufua. Bakashipa Yakobo muanabu ne Yone, ne bakela Yone mu buloko.​—Bienzedi 12:2; Buakabuluibua 1:9.

Mbia muomumue lelu’eu. Nansha bantu benzela Yehowa mudimu anyi kabayi bamuenzelawu, bonso badi mua kusama ne kufua. Kadi mu matuku makese emu, tshikondo tshikala Yezu mutuadije kukokesha bu Mukalenge wa mbulamatadi wa Nzambi, malu neashintuluke. Mu tshine tshikondo atshi muntu nansha umue kakutshina kabidi tshintu to, bualu Yezu neenze mudimu ne bukole buende bua diakalenga dia bantu buonso badi bamutumikila.​—Yeshaya 9:6, 7.