META Ġesù kiber ftit u sar jaf li meta kien żgħir kien ġie protett, taħseb li talab lil Ġeħova u qallu grazzi?— X’taħseb li qalilhom iktar tard Ġesù lil Marija u Ġużeppi meta sar jaf li kienu salvawlu ħajtu billi ħaduh l-​Eġittu?—

Naturalment Ġesù m’għadux tarbija. Lanqas biss għadu jgħix fuq l-​art bħalma kien jgħix darba. Imma nnotajt li issa xi nies qishom jaħsbu f’Ġesù biss bħala tarbija f’maxtura?— Dan isir fil-​Milied meta f’ħafna postijiet tara stampi taʼ Ġesù bħala tarbija.

Avolja Ġesù m’għadux jgħix fuq l-​art, temmen li huwa ħaj?— Iva, ġie mqajjem mill-​mewt, u issa huwa Sultan b’saħħtu fis-​sema. X’taħseb li jistaʼ jagħmel biex jipproteġi lil dawk li jaqduh?— Per eżempju, meta Ġesù kien fuq l-​art, hu wera kif setaʼ jipproteġi lil dawk li kienu jħobbuh. Ejja naraw kif darba waħda għamel dan meta kien fuq dgħajsa mad-​dixxipli tiegħu.

Il-​ħin hu tard wara nofsinhar. Ġesù  ilu ġurnata sħiħa jgħallem ħdejn il-​Baħar tal-​Galilija. Il-​Baħar tal-​Galilija huwa għadira kbira twila madwar 20 kilometru u wiesgħa 12-il kilometru. Issa Ġesù jgħid lid-​dixxipli tiegħu: “Ejja naqsmu għan-​naħa l-​oħra taʼ l-​għadira.” Allura telgħu f’dgħajsa u bdew jaqsmu għan-​naħa l-​oħra. Ġesù għajjien ħafna, u għalhekk imur fuq in-​naħa taʼ wara tad-​dgħajsa u jimtedd fuq imħadda. Ma jdumx ma jorqod fil-​fond.

Id-dixxipli jibqgħu mqajmin biex imexxu d-​dgħajsa. Għall-​ewwel kollox ikun sejjer tajjeb, imma f’daqqa waħda jqum riħ qawwi. Jibda jonfoħ iktar u iktar bil-​qawwi, u l-​mewġ jibda jżid. Il-​mewġ jibda dieħel fid-​dgħajsa, u din tibda timtela bl-​ilma.

Id-dixxipli jibżgħu li se jegħrqu. Imma Ġesù ma jibżax. Għadu rieqed fin-​naħa taʼ wara tad-​dgħajsa. Fl-​aħħar, id-​dixxipli jqajmuh u jgħidulu: ‘Għalliem, Għalliem, salvana; se mmutu f’dan il-​maltemp.’ X’ħin jismaʼ dan, Ġesù jqum u jkellem lir-​riħ u lill-​mewġ. “Iskot! Oqgħod kwiet!” jgħid hu.

 Ir-​riħ jieqaf mill-​ewwel, u l-​baħar jikkalma. Id-​dixxipli jibqgħu mbellhin. Qatt ma raw ħaġa bħal din. Jibdew jgħidu lil xulxin: “Dan min hu, mela, għax jordna saħansitra lill-​irjieħ u l-​ilma, u dawn jobduh?”—Luqa 8:​22-25; Marku 4:​35-41.

Taf min hu Ġesù?— Taf minfejn iġibha l-​qawwa kbira li għandu?— Id-​dixxipli mhux suppost beżgħu meta Ġesù kien hemm magħhom, għax Ġesù ma kienx bniedem bħall-​oħrajn. Hu setaʼ jagħmel affarijiet taʼ l-​għaġeb li ħadd ieħor ma setaʼ jagħmel. Ħa ngħidlek x’għamel darb’oħra meta l-​baħar kien imqalleb.

Kienet ġurnata oħra iktar tard fil-​għaxija. Ġesù jgħid lid-​dixxipli tiegħu biex jitilgħu fuq dgħajsa u jmorru qablu n-​naħa l-​oħra tal-​baħar. Imbagħad Ġesù jitlaʼ fuq il-​muntanja waħdu. Dan huwa post fil-​kwiet fejn jistaʼ jitlob lil Missieru, Alla Ġeħova.

 Id-​dixxipli jitilgħu fuq id-​dgħajsa u jibdew jaqsmu l-​baħar. Imma malajr jibda jonfoħ ir-​riħ, u jkompli jżid iktar u iktar. Issa daħal il-​lejl. Id-​dixxipli jniżżlu l-​qlugħ u jibdew jaqdfu. Imma ma tantx qed jimxu għax ir-​riħ qawwi qed jonfoħ kontrihom. Id-​dgħajsa tielgħa u nieżla mal-​mewġ għoli, u l-​ilma dieħel fiha. Id-​dixxipli jagħmlu kulma jistgħu biex ifittxu jaslu x-​xatt, imma ma jistgħux.

Ġesù għadu waħdu fuq il-​muntanja. Ilu hemm ħafna. Imma issa jara d-​dixxipli tiegħu fil-​periklu minħabba l-​mewġ għoli. Allura jinżel minn fuq il-​muntanja sa xatt il-​baħar. Ġesù jrid jgħin lid-​dixxipli tiegħu, u għalhekk jibda miexi lejhom fuq il-​baħar imqalleb!

X’jiġri kieku kellek tipprova timxi fuq il-​baħar?— Kont tibqaʼ nieżel, u tistaʼ tegħreq. Imma Ġesù differenti. Għandu qawwa speċjali. Ġesù jdum miexi sakemm jasal ħdejn id-​dgħajsa. Allura meta d-​dixxipli jaraw lil Ġesù riesaq lejhom fuq il-​baħar, ix-​xemx tkun kważi telgħet. Imma lanqas iridu jemmnu dak li qed jaraw. Huma mwerwrin u jibdew jgħajtu bil-​biżaʼ. Imbagħad Ġesù jkellimhom: “Agħmlu kuraġġ, hu jien; tibżgħux.”

Malli Ġesù jitlaʼ fid-​dgħajsa, il-​maltemp jieqaf. Id-​dixxipli jerġgħu jibqgħu mbellhin. Jinżlu quddiem Ġesù u jgħidu: “Int tassew l-​Iben t’Alla.”—Mattew 14:​22-33; Ġwanni 6:​16-21.

Ma kienx ikun sabiħ li kieku kont tgħix dakinhar u tara lil Ġesù jagħmel affarijiet bħal dawn?— Taf għala Ġesù għamel dawn il-​mirakli?— Għamilhom għax kien iħobb lid-​dixxipli tiegħu u ried jgħinhom. Imma għamilhom ukoll biex juri l-​qawwa kbira li kellu u li kien se juża fil-​futur bħala l-​Ħakkiem tas-​Saltna t’Alla.

Anki llum, Ġesù ħafna drabi juża l-​qawwa tiegħu biex  jipproteġi lid-​dixxipli tiegħu. Hu jipproteġihom minn dak li jagħmel Satana biex jipprova jwaqqafhom milli jgħidu lill-​oħrajn dwar is-​Saltna t’Alla. Imma Ġesù ma jużax il-​qawwa tiegħu biex jipproteġi lid-​dixxipli tiegħu milli jimirdu jew biex ifejjaqhom meta jkunu morda. Anki l-​appostli taʼ Ġesù, kollha mietu maż-​żmien. Ġakbu ħu Ġwanni nqatel, u Ġwanni stess intefaʼ l-​ħabs.—Atti 12:2; Rivelazzjoni 1:9.

Illum l-​istess. In-​nies, sew jekk jaqdu lil Ġeħova u sew jekk le, kollha jistgħu jimirdu u jmutu. Imma dalwaqt, meta Ġesù jaħkem fuq l-​art bħala Sultan tal-​gvern t’Alla, l-​affarijiet se jinbidlu. Dakinhar ħadd ma se jkollu għalfejn jibżaʼ, għax Ġesù se juża l-​qawwa tiegħu biex ibierek lil dawk kollha li jobduh.—Isaija 9:​5, 6 (9:​6, 7, NW).