YESU ku yaakuzire kandi akamanya oku yaarinzirwe akiri muto, nooteekateeka ngu akashaba Yehova kandi yaamwebaza?— Nooteekateeka ngu Yesu akabaasa kugambira ki Mariamu na Yosefu ku yaamanyire ngu bakajuna amagara ge barikumutwara Misiri?—

N’eky’amazima, Yesu takiri mwana. Kandi nabwo tarikutuura mu nsi nka ira. Kwonka shi noomanya ngu omu bunaku obu abantu abamwe nibateekateeka ahari Yesu nk’omwereere obyamiibwe omu kaato aku barikuheeramu amatungo eby’okurya?— Ekyo nikwo kiri omu bwire bwa Noiri ahakuba omu bicweka bingi abantu nibooreka ebishushani bya Yesu ari nk’omwereere.

N’obu Yesu araabe atakituura mu nsi hati, noikiriza ngu ariho?— Eego, Yesu akazoorwa omu bafu, kandi hati n’Omugabe w’amaani omu iguru. Nooteekateeka ngu naabaasa kukora ki kurinda abo abarikumuheereza?— Yesu obu yaabaire ari omu nsi, akooreka oku yaabaire naabaasa kurinda abo abaabaire nibamukunda. Ka tureebe oku yaakikozire eizooba rimwe obu yaabaire ari n’abeegi be omu bwato.

Bukaba buri omu ihangwe. Eizooba eryo Yesu akaba asiibire naayegyesa aha  rubaju rw’enyanja ya Galilaaya, enyanja empango eine oburaingwa burikwingana mahiro 13 n’obukiika burikwingana mahiro 7 1/2. Yaagambira abeegi be ati: “Ka twambukye seeri y’enyanja.” Batyo baza omu bwato kandi batandika kwambuka enyanja. Yesu akaba aruhire munonga, atyo yaaza enyima omu bwato yaabyama aha mushego yaagwejegyerera kimwe.

Abeegi be baaguma nibareeba kurinda obwato ngu butahaba. Okumara omwanya mukye hakaba hariho obuteeka, kwonka bwanyima haija omuyaga gw’amaani. Gwahuuha munonga, kandi ebingonzi byaguma nibyeyongyera kuba eby’amaani. Ebingonzi bikatandika kweshuka omu bwato, kandi obwato bwatandika kwijura amaizi.

Abeegi bakatiina ngu nibaza kutobera omu maizi. Kwonka Yesu taratiinire. Akaba akigwejegyeire enyima omu bwato. Bwanyima, abeegi baamusisiimura, nibagira bati: ‘Mwegyesa, Mwegyesa, tujune eihunga twafa.’ Atyo, yaasisiimuka, yaagambira omuyaga n’ebingonzi ati: “Reka, Cureera!”

Ahonaaho omuyaga gwareka kuhuuha, n’enyanja  yaacureera. Abeegi baatangaara. Bakaba batakareebahoga ekintu nk’ekyo. Bagambirana bati: “Ogu ni muntu ki, orikuragiira eihunga n’enyanja, bikamuhurira?”​—Luka 8:22-25; Mako 4:35-41.

Yesu noomumanya?— Noomanya ahu arikwiha amaani ge mingi?— Abeegi bakaba batashemereire kutiina obu Yesu yaabaire ari nabo, ahakuba akaba atari muntu wa butoosha. Akaba naabaasa kukora ebintu birikutangaaza ebi omuntu ondiijo atarikubaasa. Ka nkugambire aha kintu ekindi eki yaakozire aha nyanja eyaabaire eriho eihunga ringi.

Aha izooba erindi, ku gwabaire omwabazyo, Yesu yaagambira abeegi be kuza omu bwato ngu baambuke bamubandize seeri y’enyanja. Reero Yesu yaaza omu kibungo wenka. Gukaba guri omwanya ogucureire ahu yaabaire naabaasa kushabira Ishe, Yehova Ruhanga.

Abeegi be bakaza omu bwato baatandika kwambuka seeri y’enyanja.  Kwonka ahonaaho omuyaga gukatandika kuhuuha munonga. Obwo bukaba buri nyekiro. Abeegi bakahanura omwenda ogwabaire niguhwera obwato kugyenda baatandika kukoresa enkatsi. Kwonka tibarabaasize kuza hare ahabw’okuba omuyaga gukaba niguhuuha n’amaani gurikubaijira. Obwato bukazongazonga ahabw’ebingonzi by’amaani n’amaizi gaayeshuka omu bwato. Abeegi bakateeraho kwenda kuhika aha nkungu, kwonka baaremwa.

Yesu akaba akiri omu kibungo. Kandi akaba ariyo kumara obwire buraingwa. Kwonka ku yaareebire ngu abeegi be bari omu kabi ahabw’ebingonzi by’amaani, yaaruga omu kibungo yaahika aha nkungu y’enyanja. Yesu akaba naayenda kuhwera abeegi be, atyo yaatandika kugyendera aha mutwe gw’amaizi arikuza ahu baabaire bari.

Niki ekirikubaho waateeraho kugyendera aha maizi?— Nootobera kandi nigabaasa kukwita. Kwonka Yesu n’ow’omutaano. Aine amaani g’omutaano. Yesu akaba aine kugyendaho omwanya muraingwa kuhika aha bwato. Ku bwabaire nibuza kusheesha abeegi baareeba Yesu naagyendera aha maizi naija ahu bari. Kwonka tibaraikiriize ngu niwe barikureeba. Bakatiina munonga kandi baataka ahabw’obwoba. Ahonaaho Yesu yaabahuumuriza naagira ati: “Muhuumure! Niinye, mutatiina.”

Yesu ku yaagiire ati omu bwato, enyanja yaacureera. Abeegi baagaruka baatangaara. Bainama omu maisho ga Yesu baagira bati: “Buzimazima ori omwana wa Ruhanga.”​—Matayo 14:22-33; Yohaana 6:16-21.

Tikikaabaire kirungi kubaho omu bwire obwo okareeba Yesu arikukora eby’okutangaaza nk’ebyo?— Noomanya ahabw’enki Yesu yaakozire eby’okutangaaza ebyo?— Akabikora ahabw’okuba akaba naakunda abeegi be kandi arikwenda kubahwera. Kandi akabikora kworeka amaani maingi agu yaabaire aine kandi agu arikwija kukoresa omu biro by’omumaisho nk’Omutegyeki w’Obukama bwa Ruhanga.

 N’omu bwire obu Yesu naakoresa amaani ge kurinda abakuratsi be ngu Sitaane atabaremesa kugambira abandi ebirikukwata aha Bukama bwa Ruhanga. Kwonka Yesu tarikukoresa amaani ge kurinda abeegi be ngu batarwara nari kubakiza baaba barwaire. Kandi n’entumwa za Yesu zoona zikaija zaafa. Yakobo mukuru wa Yohaana akaitwa, kandi na Yohaana akatwarwa omu kihome.​—Ebyakozirwe 12:2; Okushuuruurwa 1:9.

N’omu bwire obu nikwo kiri. N’obu abantu baakuba nibaheereza Yehova nari batarikumuheereza, boona nibabaasa kurwara kandi bafe. Kwonka omu bwire butari bwa hare, Yesu yaaba naategyeka nk’Omugabe w’Obukama bwa Ruhanga embeera niziija kuba nungi. Obwo tihaine n’omwe origaruka kutiina, ahabw’okuba Yesu naija kukoresa amaani ge ahe omugisha boona abarikumworobera.—Isaaya 9:6, 7.