DI Yesus kon moro owru èn a kon sabi fa a kisi kibri di a ben de wan pikin boi, dan yu denki taki a begi Yehovah fu taki en tangi?— San yu denki Yesus ben taigi Maria nanga Yosef bakaten di a kon sabi taki den ben kibri en libi fu di den tyari en go na Egepte?—

A no de fu taki dati Yesus no de wan beibi moro. A no e libi srefi moro na grontapu leki fosi. Ma yu no si taki na ini a ten disi son sma e denki ete taki Yesus na wan beibi na ini wan nyanyan baki?— Disi de so spesrutu na Kresneti te prenki fu Yesus leki wan beibi de fu si na furu presi.

Yu e bribi taki Yesus de na libi, aladi a no e libi na grontapu moro?— Iya, Gado ben gi en wan opobaka, èn now a de wan makti Kownu na hemel. San yu denki a kan du fu kibri den sma di e dini en?— We, di Yesus ben de na grontapu, dan a sori fa a ben man kibri den sma di lobi en. Meki wi si fa a du dati wan dei di a teki waka nanga boto makandra nanga den disipel fu en.

A de wan lati bakadina. Yesus gi sma leri heri dei na a Se fu Galilea di langa  sowan 20 kilometer èn di bradi sowan 12 kilometer. Now a e taigi den disipel fu en: ’Kon meki wi abra go na a tra sei fu a se.’ Fu dati ede den e teki wan boto go na se èn den e bigin seiri go na a tra sei. Yesus weri srefisrefi, èn fu dati ede a e go didon na tapu wan kunsu na a bakasei fu a boto. Fosi yu denki, a e sribi dipi.

Den disipel e tan na ai fu tyari a boto. Wan pisi ten ala sani e waka bun, ma dan wan tranga winti e bigin wai. A winti e kon tranga moro nanga moro, èn den skwala e kon bigi moro nanga moro tu. Den skwala e bigin naki kon na ini a boto, èn a boto e furu nanga watra.

Den disipel frede taki den o sungu. Ma Yesus no frede. A e sribi ete na bakasei fu a boto. Te fu kaba, den disipel e wiki en, èn den e taki: ’Leriman, Leriman, kibri wi; wi o dede na ini a sekiwatra disi.’ Te den taki dati, dan Yesus e opo èn a e taki nanga a winti èn nanga den skwala. A e taki: „Tan tiri! Tan pî!”

Wantewante a winti no e wai moro, èn a se e kon tiri. Den disipel e fruwondru.  Noiti bifo den si so wan sani. Den e bigin taigi makandra: ’Suma na a sma disi trutru, bika a e komanderi srefi winti nanga watra, èn den e arki en?’​—Lukas 8:22-25; Markus 4:35-41.

Yu sabi suma na Yesus?— Yu sabi fa a kon abi a bigi makti fu en?— Den disipel no ben abi fu frede di Yesus ben de drape nanga den, bika Yesus no ben de leki ala tra libisma. A ben kan du wondru sani di nowan enkri tra sma ben kan du. Meki mi fruteri yu wan tra sani di a du wan leisi di a ben de tapu wan krasi se.

A de wan tra dei now. Te neti e fadon, dan Yesus e taigi den disipel fu en fu teki wan boto èn fu go fosi en na a tra sei fu a se. Baka dati, Yesus e go en wawan na tapu a bergi. A de wan tiri presi pe a kan begi en Tata, Yehovah Gado.

Den disipel e go na ini a boto èn den e bigin seiri go na a tra sei fu a se. Ma heri esi a winti e bigin wai. A e wai tranga moro nanga moro. Neti fadon now. Den man e saka den seiri èn den e  bigin pari a boto. Ma den no e doro tumusi fara, bika a tranga winti e wai kon na tapu a boto. Den hei skwala e naki a boto go kon, èn watra e naki kon na ini a boto. Den man e meki ala muiti fu doro a syoro, ma den no man.

Yesus de en wawan na tapu a bergi ete. A de drape wan heri pisi ten kaba. Ma now a kan si taki den hei skwala e gi den disipel fu en problema. Fu dati ede a e saka a bergi go na a lanki fu a se. Yesus wani yepi den disipel fu en, èn fu dati ede a e bigin waka na tapu a krasi se fu go na den!

San ben o pasa efu yu ben pruberi fu waka na tapu watra?— Yu ben o sungu, èn kande yu ben o dede. Ma Yesus de tra fasi. A abi aparti makti. Yesus musu waka wan heri pisi fu doro a boto. Sobun, dei e broko kaba te den disipel e si taki Yesus e waka na tapu a watra fu kon na den. Ma den no man bribi san den e si. Den e bari fu di den frede srefisrefi. Baka dati, Yesus e taigi den: „Abi deki-ati, na mi; no frede.”

A momenti di Yesus e go na ini a boto, a bigi winti no e wai moro. Den disipel e fruwondru baka. Den e saka kindi na fesi Yesus èn den e taki: „Yu na trutru a Manpikin fu Gado.”​—Mateyus 14:22-33; Yohanes 6:16-21.

A no ben o moi fu libi na ini a ten dati èn fu si fa Yesus ben e du den sortu sani dati?— Yu sabi fu san ede Yesus ben du den wondru sani dati?— A ben du den sani dati fu di a ben lobi den disipel fu en èn fu di a ben wani yepi den. Ma a ben du den sani dati tu fu sori taki a ben abi bigi makti èn taki a ben o gebroiki a makti dati leki Tiriman fu a Kownukondre fu Gado na ini a ten di e kon.

Srefi na ini a ten disi, Yesus e gebroiki en makti furu tron fu  kibri den bakaman fu en te Satan e pruberi fu tapu den fu fruteri trawan fu Gado Kownukondre. Ma Yesus no e gebroiki en makti fu kibri den disipel fu en so taki den no e kon siki. A no e gebroiki en makti tu fu meki den kon betre baka te den siki. Srefi ala den apostel fu Yesus dede te fu kaba. Sma kiri Yakobus, a brada fu Yohanes, èn den poti Yohanes srefi na strafu-oso.​—Tori fu den Apostel 12:2; Openbaring 1:9.

Na so a de tu na ini a ten disi. Awansi sma e dini Yehovah, noso den no e dini en, den alamala kan kon siki èn den kan dede. Ma heri esi, te Yesus sa tiri leki Kownu fu Gado Kownukondre, dan sani sa de tra fasi. Na a ten dati, nowan sma sa abi fu frede moro, bika Yesus sa gebroiki a makti fu en fu blesi ala sma di e gi yesi na en.​—Yesaya 9:6, 7.