NGESIKHATSI Jesu sekakhulile futsi eva kutsi wavikelwa ngesikhatsi asemncane, ucabanga kutsi wathantaza yini kuJehova wambonga?— Ucabanga kutsi Jesu watsini kuMariya naJosefa nakeva kutsi basindzisa kuphila kwakhe ngekuhamba naye baye eGibhithe?—

Kuliciniso kutsi Jesu akasasilo luswane. Akasekho emhlabeni njengobe ake waphila kuwo. Kodvwa uyaphawula yini kutsi esikhatsini salamuhla labanye bantfu bacabanga ngaJesu aluswane lolusemkhombeni?— Loku kubonakala kahle ngesikhatsi saKhisimusi lapho etindzaweni letinyenti kubonakala titfombe taJesu aseluswane.

Naloku Jesu angasekho emhlabeni, uyakholwa yini kutsi usaphila?— Wavuswa kulabafile, futsi nyalo uyiNkhosi lenemandla ezulwini. Ucabanga kutsi yini langayenta kuze avikele labo labatikhonti takhe?— Ngesikhatsi Jesu asemhlabeni, wakhombisa indlela langavikela ngayo labo labamtsandzako. Ase sicoce ngekutsi loko wakwenta njani ngalelinye lilanga ngesikhatsi asesikebheni nebafundzi bakhe.

Bekusentsambama. Jesu bese afundzise lilanga lonkhe eceleni kweLwandle lwaseGalile,  lokulichibi lelingaba ngemakhilomitha langu-20 budze kanye nemakhilomitha langaba ngu-12 bubanti. Wase utsi kubafundzi bakhe: “Asiweleleni ngale ngesheya kwelwandle.” Bagibela sikebhe futsi bacala kuhamba emkhatsini walelichibi. Jesu bekadzinwe kakhulu futsi wahamba waya emuva kwalesikebhe wefike wacambalala emcamelweni. Ngesikhatsi lesifishane bese akulobudze butfongo.

Bafundzi bahlala baphapheme kuze bakhone kulawula lesikebhe. Tintfo betihamba kahle sikhatsi lesitsite, kodvwa kwacala sivunguvungu lesikhulu semoya. Lesivunguvungu sahhusha kakhulu sabangela kutsi nemagagasi akhule. Emagagasi acala kushaya lesikebhe futsi emanti acala kungena kuso.

Bafundzi bebasaba kutsi batawucwila. Jesu yena bekangesabi. Bekasolo alele emuva esikebheni. Ekugcineni bafundzi bamvusa batsi: ‘Mfundzisi, Mfundzisi, sisindzise, lesivunguvungu sifuna kusibulala.’ Ngaleso sikhatsi, Jesu wavuka wakhuluma nalomoya lomkhulu nalamagagasi. Watsi: “Thula utsi nya!”

 Ngaleso sikhatsi lomoya wathula futsi nalamagagasi aphela. Bafundzi bamangala. Bebangakaze babone intfo lenjengalena esikhatsini lesendlulile. Bacala kutsi kulomunye nalomunye: “Kantsi ngubani lona? Ngobe ngisho nemoya nelwandle kuyamlalela.”​—Lukha 8:22-25; Makho 4:35-41.

Uyati yini kutsi Jesu ungubani?— Uyati yini kutsi uwatsatsaphi emandla akhe lamakhulu?— Labafundzi bekungakafaneli besabe nabanaJesu ngobe bekangafanani nemuntfu. Angenta tintfo letimangalisako lokute umuntfu longakhona kutenta. Ase ngikucocele ngalokunye lakwenta ngalesinye sikhatsi elwandle lebelinemoya lomkhulu.

Bese kunguntsambama ngalelinye lilanga. Nasekuhlwile, Jesu watjela bafundzi bakhe kutsi bagibele sikebhe bamshiye baye ngale kwelwandle. Jesu wenyukela entsabeni ayedvwana. Bekuyindzawo lethulile lapho angakhona kuthantaza kuBabe wakhe, Jehova Nkulunkulu.

 Labafundzi bagibela esikebheni base bacala kuwela lolwandle. Kodvwa ngekushesha-nje, kwahhusha umoya. Wacala kuhhusha kakhulu. Ngaleso sikhatsi bese kusebusuku. Lamadvodza ehlisa liseyila ase acala kugwedla. Kodvwa awayindzawo ngobe lomoya mkhulu kakhulu kangangekutsi uyawehlula. Lesikebhe siya emuva nasembili kulamagagasi lamakhulu futsi emanti ayangena kuso. Lamadvodza enta konkhe lokusemandleni kuze aphume kulolwandle, kodvwa ayehluleka.

Jesu bekasolo ayedvwana entsabeni. Bese atsatse sikhatsi lesidze alapho. Kodvwa ngaleso sikhatsi wabona kutsi bafundzi bakhe basengotini yalamagagasi lamakhulu. Wehla entsabeni waze wafika eceleni kwelwandle. Jesu bekafisa kusita bafundzi bakhe, kungako acala kuhamba etulu kwalolwandle lolunemoya lomkhulu.

Yini lebeyingenteka nawungetama kuhamba etulu kwemanti?— Ungacwila nobe umite. Kodvwa Jesu wehlukile. Unemandla langakavami. Jesu wahamba libanga lelidze kuze afike esikebheni. Bekusekuseni kakhulu ngesikhatsi bafundzi babona Jesu eta kubo ahamba etikwemanti. Kodvwa abazange bakukholwe loko labakubona. Betfuka kakhulu, futsi bakhala ngekwesaba. Ngemuva kwaloko Jesu wakhuluma nabo watsi: “Manini sibindzi, ningesabi, ngimi lo.”

Ngesikhatsi Jesu angena esikebheni lomoya lomkhulu waphela. Bafundzi baphindze bamangala. Baguca ngemadvolo embikwaJesu batsi: “Wena ungiyo mbamba iNdvodzana yaNkulunkulu.”​—Matewu 14:22-33; Johane 6:16-21.

Bekungeke kube yintfo lenhle yini kuphila ngaleso sikhatsi futsi ubone Jesu enta timangaliso?— Uyati yini kutsi kungani Jesu enta leto timangaliso?— Watenta ngobe bekabatsandza bafundzi bakhe futsi bekafisa kubasita. Lesinye sizatfu lesamenta wenta loku kutsi bekafisa kukhombisa emandla lanawo futsi latawasebentisa esikhatsini lesitako nase anguMbusi weMbuso waNkulunkulu.

 Nalamuhla Jesu uvamile kusebentisa emandla kuze avikele balandzeli bakhe emetameni yaSathane yekubayekelisa kukhuluma nalabanye ngeMbuso waNkulunkulu. Jesu akawasebentisi emandla akhe kuze avikele bafundzi bakhe ekuguleni nobe abalaphe nabagula. Ngisho nebaphostoli baJesu bagcine bafe bonkhe. Umnakabo Johane, Jakobe wabulawa futsi Johane wafakwa ejele.​—Imisebenti 12:2; Sembulo 1:9.

Kuyafanana nalamuhla. Bantfu labakhonta Jehova nalabangamkhonti, bayagula futsi bafe. Kodvwa masinyane, nase Jesu sekayiNkhosi yahulumende waNkulunkulu tintfo titawushintja. Ngaleso sikhatsi kute umuntfu lotawesaba ngobe Jesu utawusebentisa emandla akhe kuze azuzise bonkhe labamlalelako.​—Isaya 9:6, 7.