Ibuot 36

Mmanie Ke Ẹdinam Ẹset? M̀mọ̀n̄ Ke Mmọ Ẹdidụn̄?

KE AKPATRE ibuot iba oro ẹkebede, nnyịn ikokot iban̄a owo ifan̄ emi ẹkenamde ẹset?— Owo ition. Nditọwọn̄ ekedi ifan̄?— Ita. Ndien ẹkot ọyọhọ inan̄ akparawa. Afo ekere ke emi owụt nso?—

Ọfọn, enye owụt nte ke Abasi ama nditọwọn̄ ye n̄kparawa. Edi enye ayanam ediwak mbon en̄wen ẹset n̄ko. Nte Abasi edinam mbon oro ẹkenamde se ifọnde kpọt ẹset?— Nnyịn imekeme ndikere ntre. Edi, ediwak owo akananam ikpepke akpanikọ iban̄a Jehovah Abasi ye Eyen esie. Ntre mmọ ẹkenam se idiọkde koro ẹkekpep mmọ ndiọi n̄kpọ. Nte afo emekere ke Jehovah ayanam utọ mbon oro ẹset?—

Bible ọdọhọ ete: “Nti owo ye mme idiọk owo ẹyeset ke n̄kpa.” (Utom 24:15) Ntak emi ẹdinamde mbon oro mîdịghe nti owo ẹset?— Edi koro akananam mmọ inyeneke ifet ndikpep n̄kpọ mban̄a Jehovah ye se enye oyomde mme owo ẹnam.

 Afo ekere ke ini ewe ke ẹdinam mme owo ẹset?— Ti ini oro Lazarus akakpade, Jesus okonyụn̄ ọn̄wọn̄ọde ọnọ eyeneka esie Martha ete: “Eyen-eka fo eyeset ke n̄kpa.” Martha ama ọbọrọ ete: “Mmọfiọk nte enye eyeset ke ediset ke n̄kpa ke akpatre usen.” (John 11:23, 24) Nso ke ikọ Martha ọkọwọrọ ke ini enye ọkọdọhọde ete ke Lazarus eyeset ke “akpatre usen”?—

Ọfọn, Martha ama okop aban̄a un̄wọn̄ọ Jesus oro: ‘Kpukpru mme andidu ke udi ẹyewọn̄ọ ẹdi.’ (John 5:28, 29) Ntre “akpatre usen” edi ini oro ẹdinamde kpukpru mbon oro ẹdude ke ibuot uti n̄kpọ Abasi ẹfiak ẹdidu uwem. Akpatre usen emi idịghe usen kiet emi edide hour 24. Enye edibịghi ke tọsịn isua kiet. Kaban̄a usen emi, Bible ọdọhọ ete, ‘Abasi eyekpe ikpe ọnọ mme andidụn̄ isọn̄.’ Mbon emi enye ekpede ikpe ọnọ ẹyesịne mbon oro ẹnamde ẹset.—Utom 17:31; 2 Peter 3:8.

Kere nte usen oro edinemde! Ke usen emi ọniọn̄de ke isua tọsịn kiet mi, ẹyenam ediwak miliọn owo emi ẹkekpan̄ade ẹfiak ẹdidu uwem. Jesus okot ebiet oro mmọ ẹdifiakde ẹdidu uwem Paradise. Yak ise ebiet emi Paradise edidude ye nte uwem editiede do.

Ke n̄kpọ nte hour ita mbemiso Jesus akpade ke eto ndutụhọ, enye etịn̄ aban̄a Paradise ọnọ owo oro ọkọn̄ọde ke eto ekpere enye. Ẹyom ndiwot owo emi ke ntak oro enye akabiatde ibet.  Edi nte abiatibet oro esede Jesus onyụn̄ okopde se ẹtịn̄de ẹban̄a Enye, enye ọtọn̄ọ ndinịm Jesus ke akpanikọ. Ntre abiatibet oro ọdọhọ ete: “Ti mi ke adan̄aemi Afo edide ndida ubọn̄.” Jesus ọbọrọ ete: “Ke akpanikọ ke ndọhọ fi mfịn emi, Afo oyodu ye ami ke Paradise.”—Luke 23:42, 43, NW.

Nso ke ikọ Jesus emi ọwọrọ? Paradise odu ke mmọn̄?— Kere ban̄a emi. Akpa kan̄a, Paradise okodu ke m̀mọ̀n̄?— Ti, Abasi ama ọnọ akpa owo oro, Adam, ye n̄wan esie paradise ete ẹdụn̄ ke esịt mi ke isọn̄. Ẹkekot enye in̄wan̄ Eden. Mme unam ẹma ẹdu ke in̄wan̄ oro, edi mmọ ikanamke owo ndomokiet n̄kpọ. Ndien mme eto ẹma ẹdu ye ekese inem inem mfri, ọkọrọ ye akamba inyan̄. Enye ekedi ata eti itie ndidụn̄!—Genesis 2:8-10.

Ntre ke ini nnyịn ikotde iban̄a abiatibet oro ndidu ke Paradise, nnyịn ikpenyene ndikere mban̄a isọn̄ emi ẹnamde akabade edi ediye ebietidụn̄. Nte Jesus oyodu mi ke isọn̄ ye akani abiatibet oro ke Paradise?— Baba. Nte afo ọmọfiọk ntak emi enye mîdidụhe mi?—

Ntak edi koro Jesus edidu ke heaven akara Paradise isọn̄ nte Edidem. Ntre usụn̄ oro Jesus edidude ye owo emi edi nte ke Jesus ayanam enye eset onyụn̄ ese aban̄a mme n̄kpọ oro enye oyomde. Edi ntak emi Jesus ediyakde akani abiatibet odụn̄ ke Paradise?—  Yak ise m̀mê nnyịn imekeme ndifiọk.

Mbemiso abiatibet oro eketịn̄de ikọ ye Jesus, ndi enye ama enyene ifiọk aban̄a mme uduak Abasi?— Baba, enye ikenyeneke. Enye akanam ndiọi n̄kpọ koro enye mîkọfiọkke akpanikọ aban̄ade Abasi. Ẹyekpep enye ẹban̄a mme uduak Abasi ke Paradise. Do enye eyenyene ifet ndiwụt nte ke imọ imenen̄ede ima Abasi ebe ke ndinam uduak Esie.

Nte kpukpru owo emi ẹdinamde ẹset ẹdidu uwem ke Paradise isọn̄?— Baba, idịghe. Nte afo ọmọfiọk ntak?— Koro ẹdinam ndusụk owo ẹset ẹkedu uwem ye Jesus ke heaven. Mmọ ẹyetiene enye ẹkara Paradise isọn̄ nte ndidem. Yak ise nte nnyịn isan̄ade ifiọk emi.

Ke okoneyo oro mbemiso Jesus akakpade, enye ama ọdọhọ mme apostle esie ete: ‘Ediwak ebietidụn̄ ẹdu ke ufọk Ete Mi ke heaven, ndien mmọn̄ n̄ka n̄ketịm itie nnịm nnọ mbufo.’ Ekem Jesus ọn̄wọn̄ọ  ọnọ mmọ ete: “Nyafiak ndi ndida mbufo nnọ Idem Mi; man mbufo ẹnyụn̄ ẹdu ke ebiet eke Ami ndude.”—John 14:2, 3.

Jesus aka mmọn̄ ke ini ẹnamde enye eset?— Ih, afiak aka heaven ndidu ye Ete esie. (John 17:4, 5) Ntre Jesus ọn̄wọn̄ọ ọnọ mme apostle esie ye mme anditiene enye eken ete ke imọ iyanam mmọ ẹset man mmọ ẹkeme ndidu ye imọ ke heaven. Nso ke mmọ ẹdinam do ye Jesus?— Bible ọdọhọ ete ke mme mbet esie emi ẹnyenede udeme ke “akpa ediset” ẹyedụn̄ ke heaven ẹnyụn̄ ẹkara isọn̄, “ẹyenyụn̄ ẹda ubọn̄ ye Enye ke tọsịn isua.”—Ediyarade 5:10; 20:6; 2 Timothy 2:12.

Owo ifan̄ ẹdibuana ke “akpa ediset” inyụn̄ ikara ye Jesus nte ndidem?— Jesus ọkọdọhọ mme mbet esie ete: ‘Ẹkûfehe ndịk, ekpri otu erọn̄; koro edide eti uduak Ete mbufo ndida Obio Ubọn̄ oro nnọ mbufo.’ (Luke 12:32) “Ekpri otu erọn̄,” emi ẹnamde ẹset man ẹkedu ye Jesus ke Obio Ubọn̄ esie eke heaven, ẹnyene nnennen ibat. Bible owụt ete ke “tọsịn owo ikie ye aba ye inan̄” ke ẹnam ẹset ke isọn̄ ẹka heaven.—Ediyarade 14:1, 3.

Owo ifan̄ ẹdidụn̄ ke Paradise ke isọn̄?— Bible itịn̄ke. Edi Abasi ọkọdọhọ Adam ye Eve ke adan̄aemi ẹdude ke in̄wan̄ Eden ete ẹnyene nditọ ẹnyụn̄ ẹyọhọ isọn̄. Ke akpanikọ, mmọ ẹma ẹkpu ndinam oro. Edi Abasi oyokụt ete ke ẹnam uduak imọ eke edinam isọn̄ ọyọhọ ye nti owo.—Genesis 1:28; Isaiah 45:18; 55:11.

Kam kere nte edinemde ndidu uwem ke Paradise! Ofụri isọn̄ ayakabade etie nte itie unọ idem nduọkodudu. Enye ediyọhọ ye kpukpru orụk inuen ye unam ye ndiye eto ye flawa. Owo ndomokiet idikopke ubiak ke ntak udọn̄ọ, m̀mê owo ndomokiet ndikpa. Kpukpru owo ẹdidi ufan. Edieke nnyịn iyomde ndidu uwem ke nsinsi ke Paradise, ini edi emi nditịm idem nnọ enye.

Kot n̄kpọ efen efen ban̄a uduak Abasi kaban̄a isọn̄, ke Mme N̄ke 2:21, 22; Ecclesiastes 1:4; Isaiah 2:4; 11:6-9; 35:5, 6; ye Isa 65:21-24.

[Ndise ke page 187]

Ntak emi Abasi edinamde ndusụk mbon oro mîkanamke se inende ẹset?

[Ndise ke page 188]

Paradise emi Jesus etịn̄de ye owo emi aban̄a odu ke m̀mọ̀n̄?

[Ndise ke page 189]

Ke ini nnyịn ikotde iban̄a Paradise, nso ke nnyịn ikpenyene ke ekikere?

[Mme ndise ke page 190]

Mmọn̄ ke mbon emi ẹnamde ẹset ẹdidụn̄, ndien nso ke mmọ ẹdinam?