KAPU 36

Banani Tafutumuka? Bo Tazinga na Wapi?

NA BAKAPU zole yai ya nsuka, beto mekatuka kulonguka lufutumuku ya bantu ikwa?— Ya bantu tanu. Bana kuvandaka ikwa?— Tatu. Lufutumuku ya iya kuvandaka ya mwana-bakala mosi. Nge keyindula nde yo kesonga inki?—

Yo kesonga nde Nzambi kezolaka bana. Kansi yandi tafutumuna mpi bantu yankaka mingi. Keti Nzambi tafutumuna kaka bantu yina vandaka kusala mambu ya mbote?— Beto le yindula mutindu yina. Kansi, bantu mingi melongukaka ve ata fyoti kyeleka ya metala Yehowa Nzambi ti Mwana na yandi. Yo yina, bantu yango vandaka kusala mambu ya mbi sambu bo longaka bo mambu ya luvunu. Keti nge keyindula nde Yehowa tafutumuna bantu ya mutindu yina?—

Biblia ketuba nde: “Bantu ya mbote ti bantu ya mbi ta telama na lufwa.” (Bisalu 24:15) Sambu na nki bayina kuvandaka ve bantu ya lunungu, to bayina vandaka kusala ve mambu ya mbote tafutumuka?— Bo tafutumuka sambu bo mebakaka ntete ve okazio ya kulonguka mambu ya metala Yehowa ti mambu ya yandi kezolaka nde bantu kusala.

 Nge keyindula nde bantu tafutumuka na nki ntangu?— Yindula na ntangu Lazare kufwaka mpi ntangu Yezu kusilaka mpangi na yandi ya nkento, Marta nde: “Mpangi na nge ta vanda diaka na moyo.” Marta kuvutulaka nde: “Mono zaba nde yandi ta vanda diaka na moyo na kilumbu ya nsuka.” (Yoane 11:23, 24) Inki Marta zolaka kutuba ntangu yandi tubaka nde Lazare tatelama na “kilumbu ya nsuka”?—

Marta kuwaka ntangu Yezu kusilaka nde: ‘Bantu yonso yina kele na mazyamu ya mbambukilu tabasika na mazyamu na bo.’ (Yoane 5:28, 29) Yo yina kemonisa nde bayina yonso kele na mabanza ya Nzambi tavutuka na luzingu na “kilumbu ya nsuka.” Kilumbu ya nsuka yango kele ve kilumbu ya bangunga 24. Yo tavanda kilumbu ya bamvula funda. Biblia ketuba nde na kilumbu yango, ‘Nzambi tasambisa bantu yonso kele awa na nsi-ntoto.’ Bantu yina tafutumuka tavanda na kati ya bantu yina yandi tasambisa.—Bisalu 17:31; 2 Piere 3:8.

Yindula kyese yina tavanda na kilumbu yango! Na kilumbu yina ya bamvula funda, bamilio ya bantu mingi yina mefwaka tafutumuka. Yezu kebinga kisika yina bantu yango tazinga dyaka nde Paladisu. Beto tala kisika Paladisu tavanda mpi nki mutindu yo tavanda.

Bangunga kiteso ya tatu na ntwala nde Yezu kufwa na nti ya mpasi, yandi tubilaka Paladisu na muntu mosi yina kuvandaka na nti penepene ti yandi. Bo vandaka kufwa muntu yina sambu na mambu ya nku ya yandi salaka. Kansi ntangu muntu yina ya nku vandaka  kutala Yezu ti kuwa mambu yina bantu vandaka kutuba sambu na Yandi, yandi yantikaka kukwikila na Yezu. Yo yina muntu yina ya nku kutubaka nde: ‘Yindula mono ntangu nge takota na Kimfumu na nge.’ Yezu kuvutulaka nde: “Ya kyeleka mono ketubila nge bubu yai, nge tavanda ti mono na kati ya Paladisu.”—Luka 23:42, 43, NW.

Inki Yezu zolaka kutuba ntangu yandi tubaka mpidina? Paladisu ke na wapi?— Yindula fyoti. Na luyantiku Paladisu kuvandaka na wapi?— Yibuka nde Nzambi kupesaka Paladisu awa na zulu ya ntoto yai na muntu ya ntete, Adami, ti nkento na yandi sambu bo zinga na kati na yo. Bo vandaka kubinga yo kilanga ya Edeni. Bambisi kuvandaka na kilanga yina, kansi yo vandaka kumonisa ve ata muntu mosi mpasi. Kilanga yango kuvandaka dyaka ti banti yina vandaka kubuta bambuma mingi ya kitoko mpi ti nzadi mosi ya nene. Yo vandaka kisika mosi ya kitoko mpenza na kuzinga!—Kuyantika 2:8-10.

Yo yina, na ntangu ya beto ketanga nde muntu yina ya nku tavanda na Paladisu, beto fwete yindula mutindu ntoto yai takuma kisika mosi ya kitoko ya kuzingila. Keti Yezu tavanda mpenza awa na ntoto na kati ya Paladisu ti muntu yina kuvandaka ntete muntu ya nku?— Ve. Keti nge mezaba sambu na nki Yezu tavanda ve na ntoto?—

Sambu Yezu tavanda na zulu mpi yandi tayala bonso Ntotila na zulu ya Paladisu ya ntoto. Kuvanda ya Yezu tavanda ti muntu yina ketendula nde yandi tatedimisa yandi na bafwa mpi yandi talungisa  bampusa ya muntu yango. Kansi, sambu na nki Yezu tabikisa nde muntu yina kuvandaka ntete muntu ya nku kuzinga na Paladisu?— Beto tala kana beto le baka mvutu.

Na ntwala nde muntu yina ya nku kusolula ti Yezu, keti yandi zabaka balukanu ya Nzambi?— Ve, yandi zabaka yo ve. Yandi vandaka kusala mambu ya mbi sambu yandi zabaka ve kyeleka ya metala Nzambi. Na Paladisu bo talonga yandi balukanu ya Nzambi. Ebuna, yandi tazwa okazio ya kusonga nde yandi kezolaka mpenza Nzambi kana yandi kusala luzolo na Yandi.

Keti bantu yonso yina tafutumuka tazinga na Paladisu ya ntoto?— Ve. Keti nge kezaba sambu na nki ve?— Sambu bantu yankaka tafutumuka sambu na kuzinga ti Yezu na zulu. Bo takuma bantotila yina tayala ti yandi na zulu ya Paladisu ya ntoto. Beto tala nki mutindu beto mezaba dyambu yai.

Na mpimpa na ntwala ya lufwa na yandi, Yezu kuzabisaka bantumwa na yandi nde: ‘Bisika kele mingi na nzo ya Tata na mono na zulu; mono kekwenda kuyidikila beno kisika.’ Na nima Yezu kusilaka bo  nde: “Mono ta kwisa diaka kubaka beno sambu beno mpi kuvanda ti mono kuna ya mono ta vanda.”—Yoane 14:2, 3.

Yezu kukwendaka na wapi na nima ya lufutumuku na yandi?— Yandi kuvutukaka na zulu sambu na kuvanda ti Tata na yandi. (Yoane 17:4, 5) Yo yina Yezu kusilaka bantumwa ti balongoki na yandi yina yankaka nde yandi tafutumuna bo sambu bo kwenda kuvanda ti yandi na zulu. Inki mambu bo takwenda kusala kuna ti Yezu?— Biblia ketuba nde balongoki na yandi yina ‘tatelama na lufwa na mbala ya ntete’ tazinga na zulu mpi tayala na zulu ya ntoto “na kimvuka ti Kristo bamvula mile mosi.”—Kusonga 5:10; 20:6; 2 Timoteo 2:12.

Bantu ikwa tatelama na lufwa na “mbala ya ntete” mpi tayala ti Yezu bonso bamfumu?— Yezu kusongaka balongoki na yandi nde: “Beno kuwa boma ve, [kibuka ya fyoti, NW]! Sambu Tata na beno ke mona kiese na kupesa beno Kimfumu na yandi.” (Luka 12:32) Ntalu ya bantu ya “kibuka ya fyoti” yai, ya kefutumuka sambu na kuvanda ti Yezu na Kimfumu na yandi ya zulu, kele ya sikisiki mpenza. Biblia kesonga nde bo kele “bantu mile nkama mosi makumi iya na iya (144.000).”—Kusonga 14:1, 3.

Bantu ikwa tazinga na Paladisu na ntoto?— Biblia ketubila yo ve. Kansi Nzambi kutubilaka Adami ti Eva na ntangu bo vandaka na kilanga ya Edeni nde bo buta bana mpi bo fulusa nsi-ntoto. Yo ke ya kyeleka nde bo salaka yo ve. Kansi Nzambi tasala yonso sambu lukanu na yandi ya kufulusa bantu ya mbote na ntoto kulungana.—Kuyantika 1:28; Yezaya 45:18; 55:11.

Yindula kyese yina tavanda na kuzinga na Paladisu! Ntoto ya mvimba takuma bonso parke. Yo tafuluka ti bandeke, bambisi, mpi banti ti bintuntu ya mutindu na mutindu yina takumisa yo kitoko. Ata muntu mosi ve tamona mpasi sambu na maladi, ata muntu mosi mpi ve tafwa. Bantu yonso tavanda banduku. Kana beto kezola kuzinga mvula na mvula na Paladisu, ntangu ya kudibongisa yo yai.

Beto tanga mambu yankaka ya metala lukanu ya Nzambi sambu na ntoto na Bingana 2:21, 22; Longi 1:4; Yezaya 2:4; 11:6-9; 35:5, 6 mpi 65:21-24.

[Kifwanisu ya kele na lutiti 187]

Sambu na nki Nzambi tafutumuna bantu yankaka yina kusalaka ve mambu ya mbote?

[Kifwanisu ya kele na lutiti 188]

Paladisu ya Yezu ke na kutubila muntu yai kele na wapi?

[Kifwanisu ya kele na lutiti 189]

Na ntangu beto ketangaka mambu ya metala Paladisu, inki beto fwe yindulaka?

[Bifwanisu ya kele na lutiti 190]

Bantu yina tafutumuka tazinga na wapi, mpi bo tasala inki?