THĨINĨ wa icunjĩ igĩrĩ hĩtũku-rĩ, twerutire ũhoro wa andũ aigana arĩa maariũkirio?— Maarĩ andũ atano. Hihi ciana ciarĩ cigana?— Ciarĩ ithatũ. Na mũndũ wa kana aarĩ mwanake. Hihi ũndũ ũcio ũronania atĩa?—

Ũndũ ũcio ũronania atĩ Ngai nĩ endete andũ ethĩ. No Ngai nĩ akaariũkia andũ angĩ aingĩ. Hihi Ngai akaariũkia o andũ arĩa meekaga maũndũ mega?— Mũndũ no ecirie ũguo. No nĩ kũrĩ andũ aingĩ maakuire materutĩte ũhoro wa ma wĩgiĩ Jehova Ngai, na Mũrũwe. Kwoguo meekaga maũndũ matarĩ mega tondũ maarutĩtwo maũndũ moru. Hihi nĩ ũkuona ta Jehova akaariũkia andũ ta acio?—

Bibilia yugaga ũũ: “Gũkaariũkio andũ arĩa athingu na arĩa matarĩ athingu.” (Atũmwo 24:15) Hihi nĩ kĩĩ gĩgaatũma andũ arĩa matarĩ athingu, acio meekaga maũndũ matarĩ mega mariũkio?— Nĩ tondũ matiagĩire na mweke wa kwĩruta ũhoro wĩgiĩ Jehova na ũrĩa endaga andũ meke.

 Hihi ũgwĩciria andũ makaariũkio hĩndĩ ĩrĩkũ?— Ta ririkana hĩndĩ ĩrĩa Lazaro aakuĩte rĩrĩa Jesu eerire Maritha ũũ: “Mũrũ wa nyũkwa nĩ ekũriũka.” Maritha aamwĩrire atĩrĩ: “Nĩ njũĩ atĩ nĩ akaariũka hĩndĩ ya iriũkĩro mũthenya wa mũthia.” (Johana 11:23, 24) Hihi Maritha eendaga kuuga atĩa rĩrĩa oigire atĩ Lazaro nĩ akaariũka “mũthenya wa mũthia”?—

Maritha nĩ aaiguĩte Jesu akiuga atĩrĩ: ‘Arĩa othe marĩ thĩinĩ wa mbĩrĩra nĩ makoima kuo.’ (Johana 5:28, 29) Kwoguo “mũthenya wa mũthia” nĩ hĩndĩ ĩrĩa andũ arĩa othe marĩ thĩinĩ wa mbĩrĩra makaariũkio. Mũthenya ũcio wa mũthia ti mũthenya wa mathaa 24. Nĩ ihinda rĩa mĩaka ngiri ĩmwe. Bibilia yugaga atĩ, ihinda-inĩ rĩu nĩrĩo ‘Ngai agaacirithia andũ a thĩ.’ Andũ arĩa magaacirithio nĩ nginya arĩa makaariũkio.—Atũmwo 17:31; 2 Petero 3:8.

Na githĩ mũthenya ũcio ndũgakorũo ũrĩ wa gĩkeno! Ihinda-inĩ rĩu rĩa mĩaka ngiri ĩmwe, andũ milioni nyingĩ arĩa makuĩte nĩ makaariũkio. Jesu oigire atĩ maariũkio, magaatũũra Paradiso. Reke tuone kũrĩa Paradiso ĩgaakorũo na ũrĩa ĩgaakorũo ĩhaana.

Mathaa ta matatũ mbere ya Jesu gũkua, nĩ eerire mũici ũmwe wacuurĩtio mũtĩ-inĩ hakuhĩ nake ũhoro wĩgiĩ Paradiso. Mũici ũcio oragirũo nĩ ũndũ wa maũndũ moru marĩa eekĩte. No nĩ aambĩrĩirie gwĩtĩkia Jesu rĩrĩa eyoneire na akĩigua maũndũ marĩa mooigagwo  megiĩ Jesu. Kwoguo akĩra Jesu ũũ: ‘Ũkaandirikana waingĩra ũthamaki-inĩ waku.’ Nake Jesu akĩmwĩra atĩrĩ: “Ũmũthĩ ndakwĩra na ma atĩrĩ, nĩ ũgaakorũo hamwe na niĩ thĩinĩ wa Paradiso.”—Luka 23:42, 43.

Hihi Jesu eendaga kuuga atĩa rĩrĩa aamwĩrire ũguo? Wee ũrona ta Paradiso ĩgaakorũo kũ?— Ta wĩcirie ũndũ ũcio. Paradiso ya mbere yarĩ kũ?— Rĩrĩa Ngai ombire Adamu na mũtumia wake, aamaigire thĩinĩ wa Paradiso gũkũ thĩ. Paradiso ĩyo yetagwo mũgũnda wa Edeni. Thĩinĩ wa mũgũnda ũcio kwarĩ na nyamũ no itiakoragwo na ũthũ na andũ. Ningĩ mũgũnda ũcio nĩ warĩ na mĩtĩ mĩingĩ ya matunda maarĩ na cama mũno, na kwarĩ na rũũĩ rũnene. Kwarĩ kũndũ kwega mũno!—Kĩambĩrĩria 2:8-10.

Kwoguo rĩrĩa twathoma atĩ mũndũ ũcio warĩ mũici nĩ agaakorũo Paradiso-rĩ, twagĩrĩirũo kũhũũra mbica ya ũrĩa thĩ ĩno ĩgaatuĩka kũndũ gũthaka gwa gũikara. Hihi Jesu agaakorũo hamwe na mũndũ ũcio thĩinĩ wa Paradiso?— Aca. Nĩ ũĩ kĩrĩa gĩgaatũma Jesu aage gũkorũo gũkũ thĩ?—

Nĩ tondũ Jesu agaakorũo arĩ Mũthamaki kũũrĩa igũrũ, agĩthamakĩra andũ arĩa magaakorũo Paradiso gũkũ thĩ. Kwoguo Jesu agaakorũo hamwe na mũndũ ũcio na njĩra ya atĩ nĩ akaamũriũkia, na amũhe kĩrĩa gĩothe akaabatara. No hihi Jesu ageetĩkĩria mũndũ ũcio warĩ mũici atũũre thĩinĩ wa Paradiso nĩkĩ?— Reke tũcarie macokio ma kĩũria kĩu.

 Mbere ya mũici ũcio kwaria na Jesu-rĩ, hihi nĩ aamenyaga wendi wa Ngai?— Aca ndaamenyaga. Eekaga maũndũ moru tondũ ndaamenyaga ũhoro wa ma wĩgiĩ Ngai. Thĩinĩ wa Paradiso, mũndũ ũcio nĩ akaarutwo wendi wa Ngai. Angĩkorũo nĩ ageeka ũrĩa Ngai endaga, hĩndĩ ĩyo nĩrĩo akonania biũ atĩ nĩ endete Ngai.

Hihi andũ othe maariũkio magaatũũra thĩinĩ wa Paradiso gũkũ thĩ?— Aca ti othe. Nĩ ũĩ nĩkĩ?— Nĩ tondũ andũ amwe maariũkio magaatũũra hamwe na Jesu kũũrĩa igũrũ. Magaakorũo marĩ athamaki hamwe nake, magĩthamakĩra andũ arĩa magaakorũo Paradiso gũkũ thĩ. Tũmenyaga ũguo atĩa?

Ũtukũ ũmwe mbere ya Jesu gũkua, eerire atũmwo ake ũũ: ‘Thĩinĩ wa nyũmba ya Baba kũũrĩa igũrũ, nĩ kũrĩ kũndũ kũingĩ gwa gũikara na ndathiĩ kũhaarĩria handũ nĩ ũndũ wanyu.’ Agĩcoka akĩmeera ũũ: “Nĩ ngooka rĩngĩ na ndĩmũgĩre, nĩguo harĩa ndĩ o na inyuĩ mũkoragwo ho.”—Johana 14:2, 3.

 Rĩrĩa Jesu aariũkirio-rĩ, aacokire agĩthiĩ kũ?— Aathiire igũrũ kũrĩ Ithe. (Johana 17:4, 5) Kwoguo Jesu eendaga kuuga atĩ nĩ akaariũkia atũmwo ake o hamwe na arũmĩrĩri angĩ ake nĩguo makorũo marĩ hamwe nake kũũrĩa igũrũ. Nĩ ũndũ ũrĩkũ magaathiĩ gwĩka marĩ hamwe na Jesu?— Bibilia yugaga atĩ arutwo a Jesu arĩa “makaamba kũriũkio,” magaathiĩ igũrũ gwathana igũrũ rĩa thĩ ‘marĩ athamaki hamwe na Jesu ihinda rĩa mĩaka ngiri ĩmwe.’ —Kũguũrĩrio 5:10; 20: 6; 2 Timotheo 2:12.

Hihi nĩ andũ aigana “makaamba kũriũkio” nĩguo mathamake hamwe na Jesu?— Jesu eerire arutwo ake ũũ: “Mũtigetigĩre inyuĩ karũũru kanini, tondũ Ithe wanyu nĩ onete arĩ wega kũmũhe Ũthamaki.” (Luka 12:32) Bibilia nĩ ĩtwĩraga nĩ andũ aigana marĩ thĩinĩ wa ‘karũũru kau kanini’ ka arĩa makaariũkio nĩguo makorũo hamwe na Jesu thĩinĩ wa Ũthamaki wa igũrũ. Yugaga atĩ arĩa makaariũkio mathiĩ igũrũ nĩ “andũ ngiri igana rĩa mĩrongo ĩna na inya.”—Kũguũrĩrio 14:1, 3.

Ĩ nao andũ arĩa magaatũũra thĩinĩ wa Paradiso nĩ aigana?— Bibilia ndiugaga nĩ aigana. No Ngai eerĩte Adamu na Hawa rĩrĩa maarĩ mũgũnda-inĩ wa Edeni maciarane na maiyũrie thĩ. No matiahotire gwĩka ũguo. O na kũrĩ ũguo, no nginya thĩ yothe ĩkaiyũra andũ ega o ta ũrĩa Ngai endaga.—Kĩambĩrĩria 1:28; Isaia 45:18; 55:11.

Ta hũũra mbica gĩkeno kĩrĩa gĩgaakorũo thĩinĩ wa Paradiso! Thĩ yothe ĩgaakorũo ĩrĩ kũndũ gũthaka mũno. Gũgaakorũo na mĩtĩ mĩthaka, mahũa ma mĩthemba mĩingĩ, nyoni, o hamwe na nyamũ cia mĩthemba mĩingĩ. Andũ matikarwaraga o na matigakuaga. Andũ othe magaakorũo marĩ arata. Angĩkorũo no wende gũgaatũũra tene na tene thĩinĩ wa Paradiso, rĩrĩ nĩrĩo ihinda rĩa kũmenya ũrĩa wagĩrĩirũo gwĩka.