OTWE lihonga kombinga yovanhu vangapi ovo va li va nyumunwa momatukulwa avali a tetekela? —  Otwe lihonga kombinga yovanhu vatano. Ounona vangapi va li va nyumunwa? —  Ova li vatatu, nomunhu omutine okwa li omulumenhu omunyasha. Mbela oto diladila kutya osho otashi ulike shike?  — 

Otashi ulike kutya Jehova oku hole ounona nosho yo ovanyasha, ndele ota ka nyumuna yo ovanhu vakwao vahapu. Mbela Kalunga ota ka nyumuna ashike ovanhu ovo va longa ouwa? —  Otashi dulika tu diladile kutya osho shi li ngaho, ndele ope na ovanhu vahapu ovo inave lihonga nande onale oshili i na sha naJehova Kalunga nosho yo Omona waye. Osha yela kutya ovanhu va tya ngaho ova longa owii molwaashi ova li va longwa oinima ya puka. Mbela oto diladila kutya Jehova ota ka nyumuna ovanhu va tya ngaho?  — 

Ombibeli oya ti: “Otaku ka kala enyumuko lovayuki nolovalunde.” (Oilonga 24:15) Omolwashike ovanhu ovo vehe fi ovayuki ile ovo inava longa osho sha yuka tava ka nyumunwa? —  Omolwaashi inava mona nande onale omhito yokulihonga kombinga yaJehova nosho yo osho a hala ovanhu va ninge.

 Mbela oto diladila kutya ovanhu otava ka nyumunwa naini? —  Diladila natango kombinga yaashi Lasarus a li a fya ndele Jesus ta udanekele Marta omumwaina waLasarus a ti: “Omumwanyoko ota nyumuka.” Marta okwa li a nyamukula a ti: “Ondi shi shii nokutya, ota nyumuka menyumuko mefiku laxuuninwa.” (Johannes 11:23, 24) Marta okwa li a hala okutya ngahelipi eshi a ti kutya Lasarus ota ka nyumuka “mefiku laxuuninwa”?  — 

Marta okwa li a hangwa a uda kombinga yeudaneko olo Jesus a li a ninga, eshi a ti: ‘Aveshe ava ve li meembila otava ka holoka mo.’ (Johannes 5:28, 29) Onghee hano, ‘efiku laxuuninwa’ otali ulike kefimbo olo eshi ovanhu aveshe ovo ve li medimbuluko laKalunga tava ka nyumunwa. Efiku laxuuninwa olo kali fi ashike oule weevili 24, ndele otali ka kufa oule womido eyovi. Ombibeli oya popya shi na sha nefiku olo ya ti: ‘Kalunga ota ka tokola ounyuni.’ Movanhu ovo tava ka tokolwa omwa kwatela yo ovo tava ka nyumuka. — Oilonga 17:31; 2 Petrus 3:8.

Efiku olo itali ka kala tuu likumwifa! Moule womido odo eyovi, ovanhu omamiliyona mahapu ovo va fya otava ka nyumuninwa momwenyo. Jesus okwa popya kutya ovanhu ovo otava ka kala mOparadisa ngeenge va nyumunwa. Natu ka tale kutya Oparadisa oyo otai ka kala peni notai ka kala ya tya ngahelipi.

Eevili nhatu lwaapo fimbo Jesus a li ina fya eshi a li komuti womahepeko, okwa li a popya nomulumenhu umwe oo a li a valelwa popepi naye kombinga yOparadisa. Omulumenhu oo okwa li ta dipawa molwaashi okwa li a longa oukolokoshi. Ndele eshi omukolokoshi oo a li ta tale Jesus nokupwilikina osho ovanhu va li tava popi shi na sha naYe,  osha li she mu ningifa a itavele Jesus. Onghee hano, omukolokoshi oo okwa li a lombwela Jesus a ti: ‘Dimbuluke nge, ngeenge wa fiki mouhamba woye.’ Jesus okwa li e mu nyamukula a ti: ‘Oshili handi ku lombwele, onena tuu eli to ka kala pamwe naame mOparadisa.’ — Lukas 23:42, 43.

Jesus okwa li a hala okutya ngahelipi eshi a li a popya eendjovo odo? Oparadisa oi li peni? — Diladila shi na sha naasho. Oparadisa oya li peni nale? — Dimbuluka kutya Kalunga okwa li a tula omulumenhu wotete, Adam, nosho yo omukainhu waye mOparadisa oku kombada yedu opo va kale mo. Oparadisa oyo oya li hai ifanwa oshikunino shaEden. Moshikunino omo omwa li oinamwenyo ndele kaya li ye va etela oshiponga, nomwa li yo omiti di na oiimati ihapu iwa nosho yo omulonga wa kula. Kaya li tuu onhele iwa nokukala! — Genesis 2:8-10.

Onghee hano, ngeenge hatu lesha kombinga yomukolokoshi oo ta ka kala mOparadisa, natu kale twa fa tu wete momadiladilo etu edu eli la ningwa onhele iwa nokukala. Mbela Jesus ota ka kala mOparadisa oku kombada yedu pamwe nomulumenhu oo a li omukolokoshi? —  Ahowe, Jesus ita ka kala kombada yedu. Mbela ou shi shii kutya omolwashike ita ka kala kombada yedu?  — 

Omolwaashi Jesus ota ka kala meulu e li Ohamba, nota ka pangela Oparadisa kombada yedu okudja meulu. Onghee hano, Jesus ota ka kala pamwe nomulumenhu oo meityo olo kutya ote ke mu nyumuna koufi nota ka fila oshisho eemhumbwe daye. Ndele mbela omolwashike Jesus ta  ka efa omunhu oo a li nale omukolokoshi a kale mOparadisa? —  Natu ka tale ngeenge ohatu mono enyamukulo.

Mbela fimbo omukolokoshi oo a li ina popya naJesus, okwa li ngoo e shii kombinga yelalakano laKalunga? —  Ahowe, ka li e li shii. Omulumenhu oo okwa li ha longo oilonga ii molwaashi ka li e shii oshili kombinga yaKalunga. Ndele ota ka hongwa kombinga yelalakano laKalunga mOparadisa. Opo nee, ota ka kala e na omhito yokuulika kutya oku hole shili Kalunga mokulonga ehalo laYe.

Mbela keshe oo ta ka nyumuka ota ka kala mOparadisa kombada yedu? —  Ahowe, vamwe itava ka kala kombada yedu. Mbela ou shi shii kutya omolwashike? —  Omolwaashi ovanhu vamwe otava ka nyumunwa va ka kale pamwe naJesus meulu. Ovanhu va tya ngaho otava ka pangela kombada yedu pamwe naye ve li eehamba okudja meulu. Natu ka tale kutya otu shii ngahelipi oshinima osho.

Jesus okwa li a popya novahongwa vaye moufiku oo wa tetekela efyo laye a ti: ‘Meumbo laTate omu na eendjuwo dihapu, ndele ohandi ke mu longekidila onhele.’ Opo nee Jesus okwa li e va udanekela a ti: “Ohandi  aluka, ndele handi mu ile, nanye yo mu kale apa Ame ndi li.” — Johannes 14:2, 3.

Jesus okwa li a ya peni konima eshi a nyumunwa? —  Okwa li a shuna meulu a ka kale pamwe naXe. (Johannes 17:4, 5) Hano Jesus okwa li ta udanekele ovayapostoli vaye nosho yo ovashikuli vaye vamwe kutya ote ke va nyumuna opo va dule oku ka kala pamwe naye meulu. Mbela otava ka ninga shike pamwe naJesus? —  Ombibeli oya popya kutya ovahongwa vaye ovo hava nyumunwa ‘menyumuko lotete’ otava ka kala meulu nokupangela kombada yedu ve li “eehamba omido eyovi limwe.” — Ehololo 5:10; 20:6; 2 Timoteus 2:12.

Ovanhu vangapi tava ka nyumunwa ‘menyumuko olo lotete,’ noku ka pangela pamwe naJesus ve li eehamba? —  Jesus okwa li a lombwela ovahongwa vaye a ti: ‘Ino tila, okangudu ove, osheshi Xo a hala oku mu pa ouhamba.’ (Lukas 12:32) “Okangudu” oko, sha hala kutya ovo tava nyumunwa va ka kale pamwe naJesus mOuhamba waye womeulu, ove li omuvalu wokondadalunde. Ombibeli oya popya kutya ovo tava ka nyumuninwa omwenyo womeulu ove li ‘omayovi efele nomilongo nhe naanhe.’ — Ehololo 14:1, 3.

Ovanhu vangapi tava ka kala mOparadisa kombada yedu? —  Ombibeli inai popya kutya ove li vangapi. Ndele Kalunga okwa li a lombwela Adam naEva eshi va li moshikunino shaEden kutya nava dale ounona nova yadife edu. Ashike ooAdam naEva ova li va dopa okuninga ngaho, ndele Kalunga ota ka shilipaleka kutya elalakano laye li na sha nokuyadifa edu novanhu ovayuki ola wanifwa. — Genesis 1:28; Jesaja 45:18; 55:11.

Itashi ka kala tuu shihafifa oku ka kala mOparadisa! Edu alishe otali ka kala la fa oshikunino. Otamu ka kala mu yadi oudila, oinamwenyo notamu ka kala mu na omiti diwa nosho yo eengala domaludi aeshe. Kape na oo ta ka ehama ile ta ka fya. Ovanhu otava ka kalafana noukaume. Ngeenge otwa hala oku ka kala mOparadisa, otu na okukatuka eenghatu paife.