KAPITALINI marlunni kingullerni tusarpat inuit arlallit toqusimasut, makititaanermikkulli uummartitaaqqittut. Qassit tusarpigit? — Tallimat. Qassillu meeraappat? — Pingasut. Sisamaallu angutaanerarneqarpoq inuusuttoq. Tamatumani suna paasivarput? —

Tamatumani paasivarput Guutip meeqqat inuusuttullu asagai, ilaa? — Aammali allarpassuit makitikkumaarpai. Inuit ajunngitsuinnaat makitissavai? — Taama isumaqarnarsinnaavoq. Inuppassuilli Jehova Guuti erneralu Jiisusi pillugit sallusuissutinik ilinniarsimanngisaannarput. Eqqunngitsuliortarput kukkusumik ilinniartinneqarsimagamik. Isumaqarpit inuit taamaattut Jehovap Guutip toqusunit makitissagai? —

Biibilimi ima allassimavoq: ‘Toqusut makikkumaarput — iluartut iluaatsullu.’ (Apustilit Suliaat 24:15) Sooq iluaatsut, eqqortuliorsimanngitsut, aamma toqusunit makititaassappat? — Makititaassapput Jehovamik taassumalu  uagutsinnut iliuusereqqusaanik ilinniarnissaminnut periarfissaqarsimanngisaannaramik.

Qaqugu toqusunit makititsineq pissasoraajuk? — Lazarusi pillugu tusakkatit eqqarsaatigeqqeriakkit. Toqummat taassuma qatanngutaa, Martha, Jiisusip ima oqarfigaa: “Qatanngutit makissaaq.” Marthalu ima akivoq: ‘Nalunngilara ullut naggatissaanni makikkumaartoq.’ (Johannesi 11:23, 24) Martha oqarami Lazarusi “ullut naggatissaanni” makikkumaartoq qanoq isumaqarsoraajuk? —

Marthap Jiisusip neriorsuutaa una tusarsimavaa: ‘Ilivermiittut tamarmik aniumaarput.’ (Johannesi 5:28, 29) “Ullut naggatissaat” tassaavoq inuit Guutip eqqaamasaasa tamarmik uummaqqinnissaannut piffissaq. Tassaanngilaq ulloq nalinginnaasoq akunnernik 24-nik sivisussusilik. Ukiunik tusindinik sivisussuseqassaaq. Biibilimi allassimavoq ulloq taanna Guuti ‘silarsuarmiittunik tamanik naapertuilluartumik eqqartuussissasoq’. Eqqartuussassaasa ilagaat taamanikkussamut toqusunit makititaasut. — Apustilit Suliaat 17:31; 2 Petrusi 3:8.

Ulloq naleqanngilluinnassaaq! Ullup tamatuma ukiunik tusindinik sivisussusillip ingerlanerani toqusimasut millionilikkuutaat inuunermut makititaassapput. Najugaqarfissaat Jiisusip Paratiisimik taavaa. Paasiniariartigu Paratiisi qilammiissanersoq nunamiissanersorluunniit, tassaniillunilu qanoq issanersoq.

Toqunissani akunnerit pingasut missaat sioqqullugu Jiisusip qisummi nappakkami angummut kikiattugaaqatiminut Paratiisi eqqartorpaa.  Angut taanna pinerluutigisimasani pillugit toqutaassaaq. Taassumali Jiisusi takugamiuk qanorlu eqqartorneqartoq tusaramiuk, Jiisusi upperilerpaa. Taamaattumik pinerluttoq ima oqarpoq: “Naalagaaffinnut piguit eqqaaginga.” Jiisusip ima akivaa: ‘Ilumut, Paratiisimeeqatigiumaarparma.’ — Lukasi 23:42, 43.

Qanormita Jiisusi isumaqarpa? Paratiisi sumiippa? — Imminut ima aperisinnaavugut: Aallaqqaammut Paratiisi sumiippa? — Eqqaamajunnarsivat Guutip inuit siulliit, Adami Evalu, paratiisimik najugassaanni tunigai. Maani nunarsuarmiippoq. Edenip naatsiivianik taaneqarpoq. Naatsiivimmi uumasorpassuaqarpoq, uumasulli Adami Evalu suneq ajorpaat. Orpeqarporlu mamartunik paarnarpassualinnik, kuussuaqarporlu. Najugaq nuannerluinnarpoq! — 1 Mosesi 2:8-10.

Jiisusip pinerluttumut Paratiisimi najugaqassasoq neriorsuutaa tusarutsigu takorluussavarput maani nunarsuarmi najugaqassasoq. Nunarsuarmi paratiisinngussaaq alianaatsoq. Jiisusip pinerluttuusimasoq tassaneeqatigissavaa? — Naamik. Nalunngiliuk sooq? —

Jiisusi maani nunamiissanngilaq qilammi kunngiussagami. Tappavanngaanniit Paratiisimut nunarsuarmiittumut naalakkersuissaaq. Jiisusip angut ima najussavaa toqusunit makitillugu pisariaqartitaanillu tamanik isumassorlugu. Kisiannimi sooq Jiisusip pinerluttuusimasoq Paratiisimut ilaatissavaa? — Eqqarsarluariarutta tamanna paasisinnaassavarput.

 Pinerluttup Jiisusi oqaluutinngikkallaramiuk Guutip peqqusaa ilisimareerpaa? — Naamik. Eqqunngitsuliorsimavoq Guuti pillugu sallusuissut ilisimannginnamiuk. Paratiisimi Guutip piumasaanik ilinniarnissamut periarfissaqassaaq. Guutip peqqusaa malillugu iliornermigut Guuti asanerlugu takutitsinissaminut periarfissaqassaaq.

Toqusunit makittut tamarmik nunami Paratiisimi inuulissappat? — Naamik, tamarmiunngitsoq. Nalunngiliuk sooq? — Inuit ilaasa Jiisusi qilammeeqatigilissagamikku. Kunngioqatigissavaat nunamullu Paratiisimut naalakkersueqatigissallugu. Maanna tusassavat tamanna qanoq nalunngikkipput.

Jiisusip toqunissaminut aqaguttoq unnukkut apustilini ima oqarfigai: ‘Ataatama illuani inissat amerlaqaat. Inissassinnik piareersaakkiartorlusi aallarniarpunga.’ Taava ima neriorsorpai: “Tikiuteqqikkumaarpunga uannullu pisikkumaarlusi ilississaaq uanga najugarisanneeqqullusi.” — Johannesi 14:2, 3.

 Jiisusi toqusunit makikkami sumut piva? — Qilammut Ataataminut uterpoq. (Johannesi 17:4, 5) Jiisusip apustilini ajoqersukkamilu ilaat neriorsorpai toqusunit makitissallugit qilammi najugaqatigisinnaaniassammanni. Taakku Jiisusilu qilammi sulerissappat? — Biibilimi allassimavoq “makinnermi siullermi peqataasussat” qilammiissasut nunarsuarmullu naalakkersuissallutik ‘Kristusilu kunngioqatigissallugu ukiuni 1000-ini’. — Saqqummersitat 5:10; 20:6; 2 Timotheusi 2:12.

Jiisusip “makinnermi siullermi” makittut qassit kunngioqatigissavai? — Jiisusip ilaanni ajoqersukkani ima oqarfigai: “Erseqinasi savarpannguususi ukorsii; Ataatarsimi aalajangiisimavoq Naalagaaffik ilissinnut tunniukkumallugu.” (Lukasi 12:32) ‘Savarpannguit’ isumaqarpoq katersat imaluunniit eqimattat amerlanngitsut. Tassa imaappoq inuit amerlanngitsut makititaallutik qilaliassasut Jiisusi qilammi naalagaaffiani najussallugu. Aalajangersimasumik amerlassuseqarput. Biibilimi paasivarput “inuit 144.000-it” qilammi inuunissamut makissasut. — Saqqummersitat 14:1, 3.

Qassiussappammi nunami Paratiisimi inuulerumaartut? — Tamanna Biibilimi oqaatigineqanngilaq. Guutilli taamani Edenimi Adami Evalu oqarfigai kinguaassiussasut nunarsuaq tamakkerlugu. Taamaaliunngitsoorpulli. Guutilli piumasaraa nunarsuaq inunnik ajunngitsunik ulikkaassasoq, piviusunngornissaalu isumagissavaa. — 1 Mosesi 1:28; Esaja 45:18; 55:11.

Paratiisimi inuulernissaq nuannerunaqaaq! Nunarsuaq tamarmi naatsiivittut alianaatsutut issaaq. Assigiinngitsorpassuarnik uumasoqassaaq kusanartunillu orpeqassalluni naasoqassallunilu. Napparsimalluni inuuniluttoqassanngilaq toqusoqassananilu. Inuit tamarmik ikinngutigiissapput. Paratiisimi inoorusukkutta massakkut piareersartariaqarpugut.