ជំពូកទី៣៦

តើអ្នកណាខ្លះនឹងត្រូវប្រោសឲ្យរស់ឡើងវិញ? តើពួកគេនឹងរស់នៅឯណា?

លេង

នៅជំពូកទី៣៤ និង៣៥ យើងបានអានអំពីអ្នកដែលបានត្រូវប្រោសឲ្យរស់ឡើងវិញ តើកូនចាំទេ មានប៉ុន្មាននាក់?— គឺមានប្រាំនាក់។ តើមានកូនក្មេងប៉ុន្មាននាក់?— មានបីនាក់។ អ្នកទី៤ជាបុរសវ័យក្មេង។ តើកូនគិតថារឿងនេះបង្ហាញយ៉ាងណា?—

រឿងនេះបង្ហាញថាព្រះស្រឡាញ់មនុស្សវ័យក្មេង។ ប៉ុន្តែ លោកក៏នឹងប្រោសមនុស្សជាច្រើនទៀតដែរ។ តើព្រះនឹងប្រោសអ្នកដែលធ្វើអំពើល្អប៉ុណ្ណោះឬ?— យើងប្រហែលជាគិតដូច្នេះ។ ប៉ុន្តែ មនុស្សជាច្រើនមិនដែលរៀនសេចក្ដីពិតអំពីព្រះយេហូវ៉ានិងបុត្ររបស់លោកទេ។ ដោយសារពួកគេបានទទួលសេចក្ដីបង្រៀនខុស នោះពួកគេបានធ្វើអំពើខុសឆ្គង។ តើកូនគិតថាព្រះយេហូវ៉ានឹងប្រោសមនុស្សដូចនោះទេ?—

គម្ពីរប្រាប់ថា៖ «មនុស្សសុចរិតនិងមនុស្សមិនសុចរិតនឹងត្រូវប្រោសឲ្យរស់ឡើងវិញ»។ (សកម្មភាព ២៤:១៥) ហេតុអ្វីព្រះនឹងប្រោសមនុស្សមិនសុចរិត ឬមនុស្សដែលមិនធ្វើអំពើល្អឲ្យរស់ឡើងវិញ?— នេះគឺដោយសារពួកគេមិនធ្លាប់មានឱកាសរៀនអំពីព្រះយេហូវ៉ា និងរៀនអំពីអ្វីដែលលោកចង់ឲ្យពួកគេធ្វើ។

ហេតុអ្វីព្រះនឹងប្រោសមនុស្សខ្លះដែលធ្វើអាក្រក់ឲ្យរស់ឡើងវិញ?

តើកូនគិតថាពួកគេនឹងត្រូវប្រោសឲ្យរស់ឡើងវិញនៅពេលណា?— សូមនឹកឡើងវិញ ពេលឡាសាស្លាប់ លោកយេស៊ូបានសន្យាចំពោះម៉ាថាជាបងស្រីរបស់គាត់ថា៖ «ប្អូនប្រុសរបស់នាងនឹងរស់ឡើងវិញ»។ ម៉ាថាតបឆ្លើយថា៖ «ខ្ញុំដឹងថាគាត់នឹងរស់ឡើងវិញ នៅថ្ងៃចុងក្រោយពេលដែលមនុស្សស្លាប់ត្រូវប្រោសឲ្យរស់ឡើងវិញ»។ (យ៉ូហាន ១១:២៣, ២៤) តើម៉ាថាចង់មានន័យយ៉ាងណា ពេលដែលនាងប្រាប់ថាឡាសានឹងរស់ឡើងវិញនៅ«ថ្ងៃចុងក្រោយ»?—

តើសួនឧទ្យានដែលលោកយេស៊ូកំពុងប្រាប់ដល់បុរសនេះនៅឯណា?

ម៉ាថាបានឮអំពីសេចក្ដីសន្យារបស់លោកយេស៊ូដែលថា៖ ‹អស់អ្នកនៅក្នុងផ្នូរដែលសម្រាប់ជាទីរំលឹកនឹងចេញមក›។ (យ៉ូហាន ៥:២៨, ២៩) ដូច្នេះ«ថ្ងៃចុងក្រោយ»គឺសំដៅទៅលើពេលដែលព្រះនឹងប្រោសមនុស្សស្លាប់ឲ្យរស់ឡើងវិញ ពួកគេគឺជាអស់អ្នកដែលព្រះនឹកចាំ។ ថ្ងៃចុងក្រោយនេះមិនមែនជាថ្ងៃដែលមានរយៈពេល២៤ម៉ោងទេ តែជារយៈពេលមួយពាន់ឆ្នាំ។ គម្ពីរប្រាប់ថា នៅថ្ងៃចុងក្រោយនោះ‹ព្រះនឹងវិនិច្ឆ័យមនុស្សនៅផែនដី›។ អ្នកដែលព្រះនឹងវិនិច្ឆ័យ ក៏រួមបញ្ចូលអស់អ្នកដែលបានត្រូវប្រោសឲ្យរស់ឡើងវិញដែរ។—សកម្មភាព ១៧:៣១; ពេត្រុសទី២ ៣:៨

នោះពិតជាគ្រាដ៏រីករាយណាស់! ក្នុងអំឡុងគ្រាមួយពាន់ឆ្នាំនេះ មនុស្សជាច្រើនលាននាក់ដែលបានស្លាប់នឹងត្រូវប្រោសឲ្យរស់ឡើងវិញ។ លោកយេស៊ូហៅកន្លែងដែលពួកគេរស់ឡើងវិញនោះថាសួនឧទ្យាន។ ឥឡូវយើងនឹងរៀនថា តើសួនឧទ្យាននៅឯណា ហើយនៅទីនោះមានស្ថានភាពបែបណា?

ប្រហែលជាបីម៉ោងមុនលោកយេស៊ូស្លាប់នៅលើបង្គោលទារុណកម្ម លោកបាននិយាយអំពីសួនឧទ្យាន ទៅកាន់បុរសម្នាក់ដែលគេព្យួរនៅក្បែរលោក។ បុរសនោះត្រូវគេប្រហារជីវិតដោយសារគាត់បានប្រព្រឹត្តអំពើអាក្រក់។ ប៉ុន្តែ កាលដែលគាត់ឃើញលោកយេស៊ូ និងបានឮអ្វីដែលគេនិយាយអំពីលោក គាត់ចាប់ផ្ដើមមានជំនឿលើលោកយេស៊ូ។ ដូច្នេះ បុរសនោះនិយាយថា៖ «សូមនឹកឃើញខ្ញុំ កាលណាលោកទៅជាស្ដេច»។ លោកយេស៊ូឆ្លើយទៅគាត់ថា៖ «ខ្ញុំប្រាប់អ្នកការពិតនៅថ្ងៃនេះថា អ្នកនឹងនៅជាមួយនឹងខ្ញុំក្នុងសួនឧទ្យាន»។—លូកា ២៣:៤២, ៤៣

ពេលយើងអានអំពីសួនឧទ្យាន តើយើងគួរស្រមៃគិតអំពីអ្វី?

តើលោកយេស៊ូចង់មានន័យយ៉ាងណាពេលលោកនិយាយអំពីសួនឧទ្យាន? តើសួនឧទ្យាននោះនៅឯណា?— ដើម្បីឆ្លើយសំណួរនេះ សូមយើងគិតអំពីសំណួរមួយទៀត។ តើសួនឧទ្យានដំបូងមាននៅកន្លែងណា?— សូមចាំថា ព្រះបានឲ្យអាដាមជាបុរសទី១ និងប្រពន្ធរបស់គាត់រស់នៅក្នុងសួនឧទ្យាននៅផែនដីនេះ។ សួននោះហៅថាសួនអេដែន។ នៅក្នុងសួននោះមានសត្វផ្សេងៗ តែពួកវាមិនធ្វើបាបអ្នកណាម្នាក់ទេ។ ម្យ៉ាងទៀត ក៏មានដើមឈើជាច្រើនដែលមានផ្លែឆ្ងាញ់ៗ ថែមទាំងមានទន្លេដ៏ធំមួយដែរ។ បើរស់នៅកន្លែងនោះ ពិតជាសប្បាយណាស់!—លោកុប្បត្តិ ២:៨-១០

ដូច្នេះ ពេលដែលលោកយេស៊ូសន្យាជាមួយនឹងបុរសអាក្រក់នោះថា គាត់នឹងរស់នៅក្នុងសួនឧទ្យាន តើយើងគួរស្រមៃគិតអំពីអ្វី? យើងគួរស្រមៃគិតអំពីផែនដីនេះបានប្រែក្លាយទៅជាកន្លែងដ៏ស្រស់ស្អាត។ តើលោកយេស៊ូនឹងនៅផែនដីនេះជាមួយបុរសនោះទេ?— មិនមែនទេ។ ហេតុអ្វីលោកនឹងមិននៅផែនដីនេះ? តើកូនដឹងទេ?—

នេះគឺដោយសារលោកយេស៊ូនឹងទៅជាស្ដេចគ្រប់គ្រងពីស្ថានសួគ៌មកលើផែនដី។ ដូច្នេះ លោកយេស៊ូនឹងនៅជាមួយបុរសនោះក្នុងន័យថា លោកនឹងប្រោសគាត់ឲ្យរស់ឡើងវិញ ហើយផ្ដល់នូវអ្វីដែលគាត់ត្រូវការ។ ប៉ុន្តែ ហេតុអ្វីលោកយេស៊ូនឹងឲ្យបុរសនោះរស់នៅក្នុងសួនឧទ្យាន?— ឥឡូវសូមឲ្យយើងស្វែងរកចម្លើយ។

មុនបុរសអាក្រក់នោះនិយាយជាមួយលោកយេស៊ូ តើគាត់បានស្គាល់គោលបំណងរបស់ព្រះទេ?— គាត់មិនបានស្គាល់ទេ។ គាត់បានធ្វើអំពើអាក្រក់ ដោយសារគាត់មិនបានស្គាល់សេចក្ដីពិតអំពីព្រះ។ ប៉ុន្តែ នៅសួនឧទ្យានគាត់នឹងរៀនអំពីគោលបំណងរបស់ព្រះ។ រួចមក គាត់នឹងមានឱកាសបង្ហាញឲ្យឃើញថា គាត់ពិតជាស្រឡាញ់ព្រះ ដោយធ្វើតាមបំណងប្រាថ្នារបស់លោក។

តើមនុស្សទាំងអស់ដែលបានត្រូវប្រោសឲ្យរស់ឡើងវិញនឹងរស់នៅក្នុងសួនឧទ្យានលើផែនដីឬ?— អត់ទេ មិនមែនមនុស្សទាំងអស់ទេ។ តើកូនដឹងថាហេតុអ្វីទេ?— ពីព្រោះអ្នកខ្លះនឹងត្រូវប្រោសឲ្យរស់ឡើងវិញ ដើម្បីរស់នៅជាមួយលោកយេស៊ូនៅស្ថានសួគ៌។ ពួកគាត់នឹងគ្រប់គ្រងជាស្ដេចជាមួយលោកយេស៊ូមកលើផែនដីដែលជាសួនឧទ្យាន។ ឥឡូវយើងនឹងរៀនថា តើយើងដឹងដូច្នេះយ៉ាងដូចម្ដេច?

នៅយប់មុនលោកយេស៊ូស្លាប់ លោកបានប្រាប់ពួកសាវ័កថា៖ ‹ក្នុងលំនៅរបស់បិតានៃខ្ញុំនៅស្ថានសួគ៌ មានកន្លែងរស់នៅជាច្រើន ហើយខ្ញុំនឹងទៅដើម្បីរៀបចំកន្លែងមួយឲ្យអ្នករាល់គ្នា›។ រួចមក លោកយេស៊ូបានសន្យាជាមួយពួកគាត់ថា៖ «ខ្ញុំនឹងមកម្ដងទៀត រួចនឹងទទួលអ្នករាល់គ្នាមកឯលំនៅរបស់ខ្ញុំ ដើម្បីឲ្យអ្នករាល់គ្នានៅកន្លែងដែលខ្ញុំនៅដែរ»។—យ៉ូហាន ១៤:២, ៣

ក្រោយពីព្រះបានប្រោសលោកយេស៊ូឲ្យរស់ឡើងវិញ តើលោកយេស៊ូបានទៅកន្លែងណា?— មែនហើយ លោកបានត្រឡប់ទៅនៅស្ថានសួគ៌ជាមួយបិតាលោកវិញ។ (យ៉ូហាន ១៧:៤, ៥) ដូច្នេះ លោកយេស៊ូបានសន្យាជាមួយពួកសាវ័ក និងអ្នកកាន់តាមផ្សេងទៀតថា លោកនឹងប្រោសពួកគាត់ឲ្យរស់ឡើងវិញ ដើម្បីឲ្យពួកគាត់អាចរស់នៅជាមួយនឹងលោកនៅស្ថានសួគ៌។ តើពួកគាត់នឹងធ្វើអ្វីពេលដែលនៅជាមួយនឹងលោកយេស៊ូ?— គម្ពីរប្រាប់ថាពួកអ្នកកាន់តាមលោកដែលមានចំណែកក្នុង«ការប្រោសឲ្យរស់ឡើងវិញមុនដំបូង»នឹងរស់នៅស្ថានសួគ៌ ហើយគ្រប់គ្រងមកលើផែនដី«ជាស្ដេចជាមួយនឹងលោកអស់មួយពាន់ឆ្នាំ»។—ការបើកបង្ហាញ ៥:១០; ២០:៦; ធីម៉ូថេទី២ ២:១២

តើមានប៉ុន្មាននាក់ដែលនឹងរួមចំណែកក្នុង«ការប្រោសឲ្យរស់ឡើងវិញមុនដំបូង» ហើយគ្រប់គ្រងជាស្ដេចជាមួយលោកយេស៊ូ?— លោកយេស៊ូបានប្រាប់ពួកអ្នកកាន់តាមលោកថា៖«ហ្វូងតូចអើយ កុំខ្លាចឡើយ ពីព្រោះបិតារបស់អ្នកពេញចិត្តឲ្យរាជាណាចក្រដល់អ្នករាល់គ្នា»។ (លូកា ១២:៣២) «ហ្វូងតូច»នេះដែលនឹងត្រូវប្រោសឲ្យរស់ឡើងវិញ ដើម្បីនៅជាមួយលោកយេស៊ូក្នុងរាជាណាចក្រស្ថានសួគ៌ មានចំនួនជាក់លាក់។ គម្ពីរបង្ហាញថាពួកគាត់មានចំនួន«មួយសែនបួនម៉ឺនបួនពាន់នាក់»។ ពួកគាត់បានត្រូវជ្រើសរើសពីផែនដី។—ការបើកបង្ហាញ ១៤:១, ៣

តើអ្នកដែលត្រូវប្រោសឲ្យរស់ឡើងវិញនឹងរស់នៅកន្លែងណា ហើយតើពួកគាត់នឹងធ្វើអ្វី?

តើមានមនុស្សប៉ុន្មាននាក់នឹងរស់នៅក្នុងសួនឧទ្យានលើផែនដី?— គម្ពីរមិនបានប្រាប់ទេ។ ក៏ប៉ុន្តែ ពេលអាដាមនិងនាងអេវ៉ានៅក្នុងសួនអេដែន ព្រះបានប្រាប់ពួកគាត់ឲ្យបង្កើតកូនរហូតដល់ពេញផែនដី។ យើងដឹងថាពួកគាត់មិនបានបង្កើតកូនឲ្យពេញផែនដីទេ។ ទោះជាយ៉ាងនោះក៏ដោយ ព្រះនឹងធ្វើឲ្យគោលបំណងរបស់លោកសម្រេចជាមិនខាន ដោយធ្វើឲ្យផែនដីទាំងមូលពេញទៅដោយមនុស្សល្អ។—លោកុប្បត្តិ ១:២៨; អេសាយ ៤៥:១៨; ៥៥:១១

ការរស់នៅក្នុងសួនឧទ្យានគឺអស្ចារ្យណាស់! ផែនដីទាំងមូលនឹងក្លាយទៅជាសួនដ៏សែនស្អាត។ សួននោះនឹងពេញទៅដោយសត្វផ្សេងៗ ហើយមានដើមឈើស្អាតៗ ព្រមទាំងមានផ្កាគ្រប់ប្រភេទ។ គ្មានអ្នកណាម្នាក់នឹងឈឺចាប់ ឬមានជំងឺ ហើយក៏គ្មានអ្នកណាម្នាក់នឹងស្លាប់ទៀតដែរ។ មនុស្សគ្រប់រូបនឹងទៅជាមិត្តភក្ដិនឹងគ្នា។ បើយើងចង់រស់ជារៀងរហូតក្នុងសួនឧទ្យាន ឥឡូវនេះជាពេលដែលយើងត្រូវត្រៀមខ្លួន។

សូមអានថែមទៀតអំពីគោលបំណងរបស់ព្រះសម្រាប់ផែនដីនៅ សុភាសិត ២:២១, ២២ សាស្តា ១:៤ អេសាយ ២:៤; ១១:៦-៩; ៣៥:៥, ៦ និង៦៥:២១-២៤។

លោកអ្នកក៏ប្រហែលជាចូលចិត្តដែរ

លោកយេស៊ូ ជាផ្លូវ ជាសេចក្ដីពិត ជាជីវិត

ស្តេចដែលគ្មានកំហុសទទួលការឈឺចាប់នៅលើបង្គោល

លោកយេស៊ូបានសន្យាអំពីអនាគតចំពោះឧក្រិដ្ឋជនម្នាក់ដែលនឹងត្រូវប្រហារជីវិតជាមួយនឹងលោក។

សូមស្តាប់គ្រូដ៏ល្អប្រសើរ