MU MASHAPITA abidi otwapita’a, le twatangile’mo bantu banga basangwilwe?—I batano. Mwadi bana batyetye banga?—Basatu. Kadi ne wa buná mwine wadi witwa bu nsongwalume. Molangila le kino kilombola kika?—

Eyo, kilombola amba Leza uswele banuke. Inoko ukasangula ne bantu bakwabo bavule. Lelo Leza ukasangula enka boba badi balonga biyampe kete?—Padi ye motulangila. Ino, kudi bantu bavule kebāfundilepo kashā bubinebine butala padi Yehova Leza ne wandi Mwana. Nanshi bādi balonga bibi mwanda bādi bafundijibwa bintu bya bubela. Lelo ulanga amba Yehova ukasangula bantu ba uno muswelo?—

Bible unena’mba: “Kusanguka kwa bafu kudiko, kwa boloke, ne bampikwa koloka kumo.” (Bilongwa 24:15) Mwanda waka bampikwa koloka, ko kunena’mba boba kebadipo balonga byoloke, nabo bakasangulwa?—I pa mwanda kebāikelepo kashā na katōkwe ka  kwifunda myanda itala padi Yehova ne byasakila bantu kulonga.

Le ulanga amba bantu bakasanguka kitatyi’ka?—Langa bidi monka byālongekele pāfwile Lazalasa, ne Yesu paālaile mwanabo Mata amba: ‘Mwanenu ukasanguka.’ Mata wātentulwile amba: “Kuyūkako ngyūkile’mba, ukasangukanga ponka pa kusanguka pa difuku dya mfulo.” (Yoano 11:23, 24) Le i kika kyādi kisaka kunena Mata paānene amba Lazalasa ukasangukanga pa “difuku dya mfulo”?—

Bine, Mata wādi ke mupwe kala kwivwana mulao wālaile Yesu amba: ‘Bonso badi mu bibundu bivulukwa bakatamba’mo.’ (Yoano 5:28, 29) Nanshi “difuku dya mfulo” i kyokya kitatyi kikasangulwa boba bonso bobavulukile kudi Leza. Dino difuku dya mfulo ke difukupo dya nsaa 24. Dikekalanga difuku dya myaka kanunu. Bible unena amba i mu dino difuku Leza “dyākatyibilamo mambo a bapanopantanda.” Mu boba bakatyibilwa mambo mubadilwa ne boba bakasangulwa.—Bilongwa 17:31; 2 Petelo 3:8.

Langa’po modikekadila bine difuku dya nsangaji ya kashā! Mu bula bwa dino difuku dilampe dya myaka kanunu, mamidiyo ne mamidiyo a bantu bafwe bakajokejibwa ku būmi. Yesu utela kifuko kyobakajokejibwa kwikala’mo bu Paladisa. Shi ke pano tutale kwine kukekala Paladisa ne moikekadila.

Kubwipi kwa nsaa isatu kumeso kwa Yesu kufwa ku mutyi wa masusu, wesambila pa Paladisa na muntu umo udi ku mutyi  mukwabo. Uno mukelenge kyaipailwa i bupolapola bwaloñanga. Ino uno kabwalala pa kumona Yesu ne kwivwana byobamunena, washilula kwitabija mudi Yesu. Penepo kabwalala kanena’mba: ‘Umvuluka pokatwela mu bulopwe bobe.’ Yesu walondolola’mba: ‘I bine nakunena dyalelo dino’di amba: Ukekalanga nami mu Paladisa.’—Luka 23:42, 43.

Le i bika bisaka kunena Yesu pa kunena bino? Le Paladisa idi kwepi?—Langa’po bidi. Lelo Paladisa mibajinji yādi kwepi?—Vuluka amba Leza wātūdile muntu mubajinji, Adama, ne wandi mukaji mu paladisa enka pano pa ntanda. Yādi itwa bu budimi bwa Edena. Mu budimi’mwa mwādi banyema, ino kebādipo basanshija muntu nansha umo. Kadi mwādi mityi ya bipa biyampe, ne munonga mukatampe monka. Bine kyādi kifuko kiyampe mpata kwikala’mo!—Ngalwilo 2:8-10.

Nanshi potutanga amba yewa kabwalala ukekala mu Paladisa, tufwaninwe kulanga mu ñeni amba i ino ntanda ikalamunwa ke kifuko kya buya bwa dyangi kwikala’mo. Lelo Yesu ukekala enka pano panshi na yewa wadi kabwalala?—Ehe. Lelo uyukile mwanda waka kakekalapo pano panshi?—

I pa mwanda Yesu ukekalanga mūlu bu Mulopwe wa kuludika Paladisa ya pano pa ntanda. Nanshi kunena amba Yesu ukekalanga na uno muntu kushintulula amba ukamusangula mu bafwe ne kumupa bisakibwa byandi. Ino mwanda waka Yesu ukaleka  kipolapola’wa ekale mu Paladisa?—Tutale shi tukokeja kutana kilondololwa pa uno mwanda.

Lelo uno kipolapola wādi uyukile mpango ya Leza kubajinji kwa kwisamba na Yesu?—Ehe, kādipo wiiyukile. Wādi ulonga bintu bibi mwanda kādipo uyukile bubinebine butala padi Leza. Ukafundijibwa mpango ya Leza mu Paladisa. Penepa ukekala na mukenga wa kulombola amba binebine uswele Leza na kulonga kiswa-mutyima Kyandi.

Lelo bonso bakasangulwa bakekalanga mu Paladisa pano pa ntanda?—Ehe, ke bonsopo. Lelo uyukile i mwanda waka?—Mwanda bamo bakasangulwa mwanda wa kwikala pamo na Yesu momwa mūlu. Bakabikalanga pamo nandi bu balopwe pa Paladisa ya pano pa ntanda. Tutale kituyukija uno mwanda.

Yesu wasapwila batumibwa bandi bufuku bulondakana na dyafwa’mba: ‘Mūlu mu kipango kya Tata mudi bīkalo bivule bine. Naenda kukemulongolwela kyaba.’ Kupwa kadi Yesu webalaya’mba: “Kadi nsa kwiya dikwabo kwimutambwila ko ndi, amba ko ngikele ami ne bānwe mwikale konka.”—Yoano 14:2, 3.

 Le Yesu waenda kwepi pa kupwa kusanguka?—Eyo, wajokela mūlu kukekala pamo na Shandi. (Yoano 17:4, 5) Nanshi Yesu ulaya batumibwa bandi ne balondi bakwabo amba ukebasangula mwanda wa bakekale nandi momwa mūlu. Le bakalonga’mo bika na Yesu?—Bible unena amba bandi bana ba bwanga basangulwa “lusangukilo lubajinji” bakekalanga pamo nandi mūlu ne kukabikadila ntanda bu ‘balopwe mu myaka kanunu.’—Kusokwelwa 5:10; 20:6; 2 Temote 2:12.

Le i bantu banga bakasangulwa “lusangukilo lubajinji” ne kubikala pamo na Yesu bu balopwe?—Yesu wāsapwidile bandi bana ba bwanga amba: “Bānwe kaluombe katyetye! Kemukikwatwa moyo, mwanda Shenu i mutōkwe pa mutyima kwimupa bulopwe.” (Luka 12:32) Ba kano “kaluombe katyetye,” bakasangulwa mwanda wa kwikala na Yesu mu Bulopwe bwa mūlu, bungi bwabo i buyukane. Bible ulombola amba bantu “tununu katwa ne makumi aná ne tuná” i basangulwe kutamba pano pa ntanda.—Kusokwelwa 14:1, 3.

Le i bantu banga bakekala mu Paladisa pano pa ntanda?—Bible katelelepo bungi. Ino Leza wasapwidile ba Adama ne Eva pobādi bakidi mu budimi bwa Edena amba babutule bana ne kuyuja ntanda. Na bubine, bākomenwe kwiiyuja. Ino Leza ukafikidija mpango yandi ya kuyuja ntanda na bantu bayampe.—Ngalwilo 1:28; Isaya 45:18; 55:11.

Langa’po mobikatobela kwikala mu Paladisa! Ntanda yonso ikekalanga pamo’nka bwa kyombe nansha kyano kya mityi. Mukekalanga muyule toni ne banyema kadi mwa buya bwa dyangi, mwa mityi ne maluba a miswelo yonso. Kemukekalapo muntu nansha umo ukevwana misongo amba wabela, nansha amba wafu. Bantu bonso bakekalanga balunda abo bene na bene. Shi tusaka kukekala nyeke mu Paladisa, kino kyo kitatyi kya kwilongolola mwa kukekadila’mo.