KAY libroj 34, 35 yachaqanasninpi, wakin runas kausarimusqankuta yachakorqanchej. ¿Mashkhataj kausarimorqanku?... Phishqa. ¿Mashkhataj wawas karqanku?... Kinsa, ujnintaj uj jovencito karqa. ¿Imatá chay yachachiwanchej?...

Diosqa wawasta, jovenesta ima munakusqanta. Aswan qhepamantaj, Diosqa ashkha runasta kausarichenqa. ¿Allin kajta ruwajkunallatachu kausarichenqa?... Ichá chayta yuyasunman. Jinapis ashkha runasqa, ni jaykʼaj Jehovata, Jesusta rejserqankuchu. Sajra imasta ruwarqanku, imajtinchus chayta paykunaman yachacherqanku. ¿Chay runastapis Jehová kausarichillanqatajchu?...

Bibliaqa nin “runas wañuymanta kawsarimpunankuta, cheqan kajta ruwajkuna, sajrata ruwajkunapis” (Hechos 24:15). ¿Imaraykutaj sajrata ruwajkuna chayri mana cheqan kajta ruwajkuna kausarichisqa kanqanku?... Imaraykuchus Jehovata mana  rejserqankuchu, nitaj imatachus chejnisqantapis yacharqankuchu.

¿Maykʼajtaj wañusqas kausarimonqanku?... Kaypi tʼukuriy: Jesusqa Lázaro wañupojtin, Martaman nerqa: ‘Hermanoyki kausarimonqa’, nispa. Martataj nerqa: “Arí, noqa yachani kawsarimunanta qhepa pʼunchaypi”, nispa (Juan 11:23, 24). ¿Imatataj Marta niyta munasharqa Lázaro “qhepa pʼunchaypi” kausarimunanta nispa?...

Jesús nerqa: ‘Tukuy pʼampasqa kajkunaqa kausarinponqanku’, nispa. Martataj chay nisqanta uyarerqa (Juan 5:28, 29). Diosqa “qhepa pʼunchaypi”, paypa yuyayninpi kajkunata kausarichimonqa. ‘Qhepa pʼunchayqa’ mana uj diallachu manaqa waranqa watasniyoj. Biblia nin jinataj, Diosqa chay waranqa wataspi “tukuy kay pachapi runasta juzganqa”, kausarimojkunatapis (Hechos 17:31; 2 Pedro 3:8).

Chay pʼunchayqa may sumajpuni kanqa. Chay waranqa wataspeqa, may chhika runas kausarimonqanku. Jesusqa kausarimojkuna Paraisopi tiyakunankuta nerqa. ¿Maypitaj chay Paraíso kanqa? ¿Imaynataj kanqa? Chayta qhawarina.

Jesusqa wañupunanpaj kinsa hora jina kashajtin, ladonpi warkhusqa runawan Paraisomanta parlarqa. Chay runaqa, ashkha sajra imasta ruwasqa. Chayrayku wañuchisqa kananpaj  juchachasqanku. Chaywanpis Jesuswan parlaspa, imatachus runas paymanta nisqankuta uyarispa ima, Jesuspi creeyta qallarerqa. Nerqataj: “Yuyarikuwanki ari noqamanta, reinoykipi kaspa”, nispa. Jesustaj kuticherqa: “Kunan cheqamanta niyki: Noqawan Paraisopi kanki”, nispa (Lucas 23:42, 43, NM).

¿Imatataj Jesús niyta munasharqa? ¿Maypitaj chay Paraíso kanqa?... Kaypi tʼukuriy: Qallariypi, ¿maypitaj Paraíso karqa?... Yachanchej jina, Diosqa Adantawan Evatawan uj Paraisoman churarqa, chaytaj kay Jallpʼapi karqa. Chay Paraisoqa Edén huerta sutikorqa. Chay huertapi animales karqa, chay animalestaj mansitos karqanku. Chantá kallarqataj miskʼi poqoykunawan cargasqa sachʼas, uj jatun mayu ima. Chay huertaqa may kʼachitupuni tiyakunapaj karqa (Génesis 2:8-10).

Jesusqa ladonpi kaj sajra runaman Paraisopi kananta nispa, kay Jallpʼapi tiyakunanta nisharqa. ¿Chay ninayanchu Jesús chay sajra runawan kay Jallpʼapi tiyakunanta?... Mana. ¿Imaraykutaj?...

Imaraykuchus Jesusqa cielomanta kay Jallpʼata kamachimonqa. Chantá, ¿imaraykú Jesús chay sajra runawan kananta nerqa? Imaraykuchus chay runata kausarichenqa, necesitasqantataj qonqa. ¿Imajtintaj Paraisopi tiyakojta saqenqa?... Chaymanta parlarina.

 Chay runa niraj Jesuswan parlashajtin, ¿Diospa munayninmanta yacharqañachu?... Mana yacharqachu. Diosta mana rejsisqanrayku, sajra imasta ruwarqa. Paraisopitajrí, Jehovaj munayninta yachakuyta atenqa. Chantapis Diospa munayninta ruwaspa, Diosta munakusqanta rikuchiyta atenqa.

¿Tukuy kausarimojkunachu Paraisopi tiyakonqanku?... Mana. ¿Yachankichu imaraykuchus?... Imaraykuchus wakenqa, Jesuswan cielopi tiyakunankupaj kausarenqanku. Paywan khuskataj Jallpʼata kamachimonqanku. Imaraykuchus chayta nisqanchejta qhawarina.

Jesusqa wañuchinankupaj uj chʼisi kashajtin, yachachisqasninman nerqa: ‘Tatay kashan, chaypi ashkha campo tiyan. Kunanqa rishani qankunapaj uj lugarta wakichimoj’, nispa. Chantá nillarqataj: “Kutimuspa, pusasqaykichej maypichus noqa kasaj, chaypi qankunapis kanaykichejpaj”, nispa (Juan 14:2, 3).

 ¿Maymantaj Jesús kausarimuytawan rerqa?... Cieloman kutiporqa, Tatanpa ladonman (Juan 17:4, 5). Jesusqa apostolesninman, waj yachachisqasninmanpis, paykunata kausarichinanta nerqa, cieloman rinankupaj. ¿Imatá cielopi ruwanqanku?... Biblia nin jina, “ñawpaj kaj kawsarimpuypi” jatarimojkunaqa, cielopi kausanqanku. ‘Jesuswan khuskataj waranqa watasta Jallpʼata kamachimonqanku’ (Apocalipsis 5:10; 20:6; 2 Timoteo 2:12).

¿Mashkha runastaj “ñaupaj kaj kausarimpuypi” jatarimonqanku, Jesuswantaj kamachimonqanku?... Jesús yachachisqasninman nerqa: ‘Juchʼuy tropa ovejasníy, ama manchachikuychejchu. Imaraykuchus Tataykichejqa gobiernonta qankunaman qonanta ninña’, nispa (Lucas 12:32, NM). Chay “juchʼuy tropa” ovejasqa yupasqalla kanku. Paykunaqa Jesuswan Gobiernonpi kanankupaj kausarichisqa kanku. Biblia nin jina “pachaj tawa chunka tawayoj waranqa” runas kanku (Apocalipsis 14:1, 3).

Kay Jallpʼa Paraisoman tukojtin, ¿mashkha runastaj chaypi tiyakonqanku?... Bibliaqa mana chayta willanchu. Chaywanpis Adanwan Evawan Edén huertapi kashajtinku, Diosqa nerqa wawasniyoj kanankuta, Jallpʼamantaj juntʼanankuta. Paykuna mana chayta ruwajtinkupis, Diosqa munayninta juntʼanqapuni. Diospa munaynintaj Jallpʼantinpi kʼacha runas kausakunanku (Génesis 1:28; Isaías 45:18; 55:11).

Paraisopi kausakoyqa, ¡may sumajpuni kanqa! Jallpʼaqa uj kʼachitu huerta kanqa. Sachʼas, tukuy laya tʼikas, may chhika pʼesqos, waj animales ima kanqa. Manaña kanqachu onqoykuna, nanaykuna, nitaj wañuypis. Chejninakuypis chinkanqa. Paraisopi wiñaypaj kausakunapajqa kunan wakichikuna tiyan.