RIMARANCHISÑAN kausarimpuq runakunamanta. ¿Jayk’a runakunan kausarimpuranku?... Pisqan ¿riki? ¿Jayk’a wawakunan karanku?... Kinsan, jujtaq wayna karan. ¿Imatan chaymanta yachanchis?...

Wawakunatapas wayna-sipaskunatapas Dios munakusqantan. Diosqa kausarichinqan kuraq runakunatapas. ¿Allin runakunallatachu Dios kausarichinqa?... Yaqapaschá “arí” ninki. Ichaqa askha runakunan mana Jehová Diosta nitaq Jesustapas reqsirankuchu. Chaymi mana allinkunata ruwaranku. Paykunari, ¿kausarichisqachu kanqaku?...

Biblian nin: ‘Allin runakunapas mana allin runakunapas kausarichisqan kanqaku’, nispa (Hechos 24:15). ¿Imaraykun mana allin runakunapas kausarichisqa kanqaku?... Paykunaqa manan Jehová Diosta reqsirankuchu nitaq kamachikuyninkunata yacharankuchu.

 ¿Jayk’aqmi wañupuqkuna kausarimpunqaku?... Kaypi piensasun: Lázaro wañupuqtinmi Jesusqa Martata niran: “Turaykiqa jatarimpunqan”, nispa. Martataq niran: “Noqaqa yachanin tukukuy p’unchaypi kausarimpuy kaqtin jatarimpunanta”, nispa (Juan 11:23, 24). ¿Imatan chaywan nisharan?...

Martaqa ñan uyarisqaña Jesuspa kay promesanta: ‘Sepulturakunapi llapa kaqkunan lloqsimunqaku’, nispa (Juan 5:28, 29). ‘Tukukuy p’unchay’ nispaqa nikun runakunaq kausarimpunan p’unchaytan. Chayqa manan juj p’unchayllachu kanqa aswanpas waranqa watan. Chay tiempopin Diosqa ‘pachantinpi runakunata juzganqa’, chaypin kashanqaku kausarimpuq runakunapas (Hechos 17:31; 2 Pedro 3:8).

¡Imayna sumaqraqchá chay tiempoqa kanqa! Waranqa watapin millonninpi runakuna kausarimunqaku. Jesusmi willaran kausarimpuq runakuna paraisopi tiyanankuta. ¿Maypin chay paraíso kanqa? ¿Imaynan chay paraíso kanqa? Chaymanta kunan yachasun.

Kinsa hora jinallaña Jesuspa wañupunanpaq kashaqtinmi, payqa ladonpi kaq runawan paraisomanta rimaran. Chay runaqa millaykunatan ruwaran chaymi paytapas warkuranku. Ichaqa Jesusta rikuspa, paymanta rimasqankuta uyarispan Jesuspi iñiran. Chaymi niran: “Gobiernoykiman jaykuspayki noqata yuyarikuwanki”,  nispa. Jinan Jesusqa payta niran: “Cheqaqtan kunan niyki: Noqawanmi paraisopi kanki”, nispa (Lucas 23:42, 43).

¿Imatan Jesús chaywan nisharan? ¿Maypin chay paraíso kanqa?... A ver, kaypi piensasun: ¿Maypin ñaupaqpi paraíso kasharan?... Kay allpapin tarikuran, chaypin Diosqa Adanta esposantawan churaran. Chay paraisotan sutichakuran Edén huerta nispa. Chaypiqa askha animalkunan karan ichaqa manan pitapas dañota ruwaranchu. Jinaspapas karanmi sumaq frutakunayoq sach’akuna, karantaqmi jatun mayupas. Chaypi tiyayqa munaymi karan (Génesis 2:8-10).

Jesusqa kay allpanchis chhayna paraisoman tukunanmantan rimasharan. Chaypin chay mana allin ruwaq runaqa kausarimpunqa. Ichaqa, ¿paywan kuskachu Jesús kay allpapi tiyanqa?... Manan. ¿Imaraykun Jesús mana kay allpapichu tiyanqa?...

Ñaupaqpi yachasqanchis jina, Jesusqa janaq pachamantan kay allpata kamachimunqa. Chhaynaqa, ¿imaynapin mana allinta ruwaq runawan Jesús kashanqa? Chay runata kausarichispan, imachus necesitasqantawan qospan. Ichaqa tapukunkipaschá, ¿imaraykun mana allinta ruwaq runata paraisopi tiyachinqa?... Chaymanta kunan yachasun.

 Mana allinta ruwaq runa, ¿yacharanchu Diospa kamachikuyninkunata?... Manan yacharanchu, chaymi millaykunata ruwaran. Paraisopi tiyaspan ichaqa Diospa kamachikuyninkunata yachanqa. Chay tiempopin payqa rikuchinqa Diosta munakunchus icha manachus chayta.

¿Llapa kausarimpuqkunachu paraisopi tiyanqaku?... Manan. ¿Imaraykun mana llapankuchu kay allpapi tiyanqaku?... Wakinqa janaq pachapi Jesuswan kuska tiyanankupaqmi kausarimpunqaku. Paykunan Jesuswan kuska kay allpata kamachimunqaku. Chaymanta kunan rimasun.

Manaraq wañupushaspan Jesusqa qatikuqninkunata niran: ‘Yayaypa wasinpin qankunapaq tiyanakuna kashan, chaymanmi rishani tiyanakunata preparaq’, nispa. Nillarantaq: ‘Wajmanta qankunaman jamuspan wasiman pusapusaykichis, maypichus kasqaypi kanaykichispaq’, nispa (Juan 14:2, 3).

 ¿Maymanmi Jesús riran kausarimpuspa?... Janaq pachamanmi, papanwan kuska chaypi kananpaq (Juan 17:4, 5). Chaymi Jesusqa qatikuqninkunata prometeran wañusqankumanta kausarichispa janaq pachaman apapunanta. Paykunan ‘ñaupaq kaq kausarimpuypi kausarimpunqaku’. ¿Imatan janaq pachapi ruwanqaku?... Jesuswan kuskan ‘waranqa watata kamachinqaku’ (Apocalipsis 5:10; 20:6; 2 Timoteo 2:12).

¿Jayk’a runakunan Jesuswan kuska kamachimunqaku?... Jesusmi qatikuqninkunata niran: “Ama manchakuychischu, pisi t’aqa ovejakuna, Yayaykichismi qankunamanqa gobiernonta qosunkichis”, nispa (Lucas 12:32). Janaq pachaman ripuq ‘pisi t’aqa ovejakunaqa’ pisillan kanku. Biblian willan ‘144.000 cristianokuna’ kasqankuta (Apocalipsis 14:1, 3).

¿Jayk’a runakunan kay allpapi tiyanqaku?... Bibliaqa manan willanchu jayk’a runa tiyanankuta. Ichaqa Adanwan Evawan Edén huertapi kashaqtinkun Diosqa paykunata niran: ‘Askha wawakunayoq kaychis, kay pachaman junt’anaykichiskama’, nispa. Manaña ñaupa tayta-mamanchis chayta junt’arankuchu chaypas, Diosmi jamuq tiempopi sumaq sonqo runakunawan kay allpata junt’achinqa (Génesis 1:28; Isaías 45:18; 55:11).

¡May sumaqchá paraisopi kausayqa kanqa! Allpantinmi sumaq huerta jina kanqa. Chaypiqa sumaq sach’akunan kanqa, imaymana clase t’ikakuna, animalkunapas. Chaypiqa manañan pipas onqonqachu nitaq wañupunqachu. Llapa runakunan sumaqta kausanqaku. Chay paraisopi tiyananchispaqqa kunanmantapachan preparakunanchis.