NA YÂ andangba chapitre use so, azo oke si a zingo ala na kuâ?— Azo oku. Amolenge ayeke oke?— Ota. Na osio ni ayeke mbeni maseka-koli. A ye ti fa nyen la?—

A ye ti fa so Nzapa aye amaseka. Me lo yeke zingo ande nga gbâ ti ambeni. Nzapa ayeke zingo ande gi ala so asala nzoni?— Bê ti e alingbi ti tene na e tongaso. Me gbâ ti azo amanda lani tâ tënë na ndo Jéhovah Nzapa nga na Molenge ti lo lâ oko pëpe. Ni la, ala sala aye ti sioni ngbanga ti so a fa na ala tâ tënë pëpe. Ti mo, Nzapa ayeke zingo ande mara ti azo tongaso?—

Bible atene: ‘A yeke zingo ande azo ti mbilimbili na azo ti sioni.’ (Kusala 24:15). Ngbanga ti nyen a yeke zingo ande azo ti sioni na kuâ wala ala so asala pëpe ye so ayeke mbilimbili?— Ngbanga ti so ala wara lani lâ oko pëpe lege ti manda ye na ndo Jéhovah nga na ye so lo ye si azo asala.

 Lawa si a yeke zingo ande azo?— Kiri mo bâ ngoi so lani Lazare akui na Jésus amû yanga so na Marthe: ‘Ita ti mo ayeke londo ande.’ Marthe atënë: ‘Mbi hinga lo yeke londo ande na zingongo ti akuâ na lâ ti nda ni.’ (Jean 11:23, 24). So Marthe atene Lazare ayeke londo ande na “lâ ti nda ni”, lo ye ti tene nyen?—

Marthe amä lani zendo so Jésus amû, so atene: ‘Azo kue so ayeke na yâ dû ti kuâ ayeke sigigi ande.’ (Jean 5:28, 29). Tongaso, “lâ ti nda ni” ayeke ngoi so azo kue so Nzapa angbâ ti bata ala na li ti lo ayeke kiri na fini. Lâ ti nda ni so ayeke ninga lango oko pëpe, me ngu saki oko. Bible atene so, na lâ ni kâ, ‘Nzapa ayeke fâ ngbanga na li ti azo ti sese’. Ambeni zo so lo yeke fâ ande ngbanga na li ti ala ayeke duti azo so azingo na kuâ awe.​—Kusala 17:31; 2 Pierre 3:8.

So tâ pendere ngoi si a yeke duti ande! Na ngoi ti ngu saki oko so, azo kutu mingi mingi so akui awe ayeke zingo na kuâ. Ndo so si a yeke zingo ande azo ni so dä na kuâ, Jésus ahiri ni Paradis. Zia e bâ ndo so Paradis ni ayeke duti ande dä na a yeke kpa nyen.

Angbonga ota tongaso kozoni si Jésus akui na ndo keke ti pasi, lo sala tënë ti Paradis na mbeni koli so ayeke nga na ndo ti keke na tele ti lo. A ye ti fâ koli so ndali ti so lo sala akota ye ti sioni. Me tongana koli so ayeke bâ Jésus na lo yeke mä atënë so azo ayeke tene na ndo ti Lo, lo komanse ti mä na bê na lo. Tongaso,  lo tene na Jésus: “Mo dabe Mo na mbi tongana Mo si na yâ royaume ti Mo.” Jésus atene na lo: “Tâ tënë, mbi tene na mo laso: Mo yeke duti ande na mbi na yâ Paradis.”​—Luc 23:42, 43, NW.

Jésus aye ti tene nyen la? Paradis ayeke na ndo wa?— Bâ kete si. Paradis abâ gigi kozoni na ndo wa?— Lani Nzapa amû mbeni paradis na ndo ti sese na kozo koli, Adam, nga na wali ti lo ti tene ala duti dä. A hiri ni yaka ti Eden. Anyama ayeke lani na yâ ti yaka so, me ala sala sioni na zo oko pëpe. Mo yeke wara nga gbâ ti akeke na anzerengo lê ni nga na mbeni kota ngu so asua dä. A yeke ândö mbeni pendere ndo ti duti dä!​—Genèse 2:8-10.

Na dikongo so zo ti sioni so ayeke duti ande na yâ Paradis, zia e tara ti bâ so sese so aga mbeni pendere ndo ti duti dä. Jésus ayeke duti ande na ndo ti sese ge legeoko na ngbele zo ti sioni so na yâ Paradis?— Oko pëpe. Ngbanga ti nyen? Mo hinga ni?—

A yeke ngbanga ti so Jésus ayeke duti ande na yayu kâ tongana Gbia na lo yeke komande na ndo Paradis na sese ge. Tongaso, Jésus ayeke duti ande na koli so na lege so Lo yeke zingo lo na kuâ na Lo yeke mû na lo aye so amanke lo. Me ngbanga ti nyen Jésus ayeke zia si mbeni ngbele zo ti sioni aduti na yâ Paradis?— Zia e gi ti hinga nda ni.

 Kozoni si zo ti sioni so asala tënë na Jésus, lo hinga ye so Nzapa aye ti sala?— Oko pëpe. Lo sala aye ti sioni ngbanga ti so lo hinga lani tâ tënë na ndo Nzapa pëpe. Me na yâ Paradis kâ, a yeke fa ande na lo ye so Nzapa aye ti sala. Na pekoni awe, lo yeke wara lege ti fa wala lo ye biani Nzapa na salango ye so bê ti Jéhovah aye.

A yeke azo kue so a yeke zingo ande ala si ayeke duti na yâ Paradis na ndo ti sese?— Oko pëpe. Mo hinga ngbanga ti nyen?— Ngbanga ti so a yeke zingo ande ambeni ti duti na tele ti Jésus na yayu. Ala yeke komande legeoko na lo tongana agbia na ndo sese so aga Paradis. Zia e bâ tongana nyen e hinga ye so.

Na bï kozoni si Jésus akui, lo tene na abazengele ti lo: ‘Ndo ti duti ayeke mingi na yâ da ti Babâ ti mbi. Mbi yeke gue ti leke ndo ni na i.’ Na pekoni Jésus amû yanga so: ‘Fade mbi kiri ti mû ala na tele ti mbi si ala nga aduti na ndo so mbi yeke duti dä.’​—Jean 14:2, 3.

 Na peko ti so lo zingo na kuâ, Jésus ague na ndo wa?— Lo kiri gi na tele ti Babâ ti lo na yayu kâ (Jean 17:4, 5). Ni la, Jésus amû yanga na abazengele ti lo nga na ambeni disciple ti lo so lo yeke zingo ande ala na kuâ ti duti na tele ti lo na yayu. Ala yeke sala ande nyen kâ na tele ti Jésus?— Bible atene so adisciple ti Jésus so ayeke ‘zingo ande na kuâ kozo’ ayeke gue ti duti na yayu na ti komande na ndo sese ‘tongana agbia legeoko na lo teti ngu saki oko.’​—Apocalypse 5:10; 20:6; 2 Timothée 2:12.

Azo oke si ayeke ‘zingo ande na kuâ kozo’ na ayeke komande legeoko na Jésus tongana agbia?— Jésus atene na adisciple ti lo: ‘Kete kundu, zia mbito asala i pëpe, teti a yeke nzoni na lê ti Babâ ti i ti mû royaume ni na i.’ (Luc 12:32). “Kete kundu” so ayeke azo so azingo na kuâ ti duti na tele ti Jésus na yâ Royaume ti yayu. Tâ wungo ti ala ayeke dä. Bible afa so a yeke zingo na kuâ ‘azo saki ngbangbo oko na bale-osio na ndo ni saki osio’.​—Apocalypse 14:1, 3.

Azo oke ayeke duti ande na yâ Paradis na ndo ti sese?— Bible afa wungo ti ala pëpe. Me lani so Adam na Eve ayeke na yaka ti Eden, Nzapa atene na ala ti dü amolenge na ti si ndo lê ti sese kue. Me a yeke ye so ala sala pëpe. Ye oko, Nzapa ayeke sala kue ti tene ye so lo ye lani, so ti tene azo ti nzoni asi ndo lê ti sese kue, aga tâ tënë.​—Genèse 1:28; Esaïe 45:18; 55:11.

Bâ tâ tongana nyen a yeke duti ande nzoni mingi ti duti na yâ Paradis! Sese ni kue ayeke si ande singo na andeke, anyama, nga na apendere keke na afleur ndenge na ndenge. Tele ti zo oko ayeke so ande pëpe, na zo oko ayeke kui pëpe. Azo kue ayeke duti kamarade ti amba ti ala. Tongana e ye ti duti kpu na kpu na yâ Paradis, a yeke fadeso ngoi ti leke tele ndali ni.