I MATAUPU e lua faatoʻā uma atu, e toʻafia tagata na tatou faitau iai, na toetutū mai?— E toʻalima. E toʻafia tamaiti?— E toʻatolu. Ae o le tagata lona fā na toetū mai, o se tama talavou. O le ā sou manatu, o le ā ua faaalia e lenei mea?—

E faaalia ai, e alofa le Atua i tamaiti faapea ma talavou. Peitaʻi, o le a toe faatutūina foʻi e le Atua le toʻatele o isi tagata. Pe na o tagata amio lelei e toe faatutūina e le Atua?— Atonu o lo tatou manatu lenā. Peitaʻi, e leʻi aʻoaʻoina e le toʻatele o tagata le upu moni e uiga iā Ieova le Atua ma lona Alo. O le pogai lenā na latou faia ai mea leaga, ona e sesē mea na latou aʻoaʻoina. O le ā sou manatu, faamata e toe faatutūina e Ieova tagata faapena?—

O loo faapea mai le Tusi Paia: “O le a toe tutū mai ē ua oti, o ē ua amiotonu atoa ma ē ua amiolētonu.” (Galuega 24:15, LT) Aiseā o le a toetutū ai tagata e leʻi amiotonu, po o ē e leʻi faia le mea saʻo?— Talu ai, e latou te leʻi mauaina se avanoa e aʻoaʻo ai le upu moni e uiga iā Ieova ma mea e finagalo Ieova e fai e tagata.

 O le ā sou manatu, o afea o le a toetutū ai tagata?— Seʻi toe manatu i le taimi na oti ai Lasalo ma le folafolaga na fai e Iesu i lona tuafafine o Mareta: ʻE toetū mai lou tuagane.’ Na tali atu Mareta: “Ua ou iloa e toe tū mai lava ia i le toe tū i le aso gataaga.” (Ioane 11:23, 24) O le ā le uiga o le tala a Mareta, e toetū mai Lasalo i “le aso gataaga”?—

Na faalogo Mareta i le folafolaga a Iesu: ʻO i latou uma ua i tuugamau o le a ō mai.’ (Ioane 5:28, 29) O “le aso gataaga” la, e faasino atu i le taimi o le a toetutū mai ai i latou uma o manatuaina e le Atua. O lenei aso gataaga, e lē faasino atu i se aso e 24 itula. O le umi o le aso gataaga, e afe tausaga. Ua faapea mai le Tusi Paia e tusa ai ma lenā aso: ʻE faamasinoina e le Atua tagata o i le lalolagi.’ E faamasinoina foʻi e le Atua i latou o le a toetutū mai.​—Galuega 17:31; 2 Peteru 3:8.

Seʻi manatu i le matagofie o lenā aso! A o faagasolo lenā aso e afe tausaga le umi, o le a toetutū mai ai le faitau miliona o tagata ua feoti. Na taʻua e Iesu le nofoaga o le a nonofo ai ē o le a toetutū mai, o le Parataiso. Seʻi tatou vaai la, po o fea o le a iai lenei Parataiso, ma pe faapeʻī foʻi lenā nofoaga.

A o toe tolu itula oo i lona maliu i luga o le laau, na talanoa ai Iesu i se tamāloa sa tautau i se laau i ona autafa, e uiga i le Parataiso. Na faasalaina i le oti le tamāloa, ona o mea leaga na ia faia. Peitaʻi, a o tilotilo ane ma faalogologo atu lenei pagota i tala e uiga iā Iesu, na  amata ai ona ia talitonu iā Iesu. O lea na ia fai atu iā Iesu: ʻIa e manatua mai aʻu, pe a e oo i lou malo.’ Na tali atu Iesu: ʻE moni, ou te fai atu iā te oe i le asō, ta te faatasi ma oe i le parataiso.’​—Luka 23:42, 43.

O le ā le uiga o le tala lenei a Iesu? O fea o iai le Parataiso?— Seʻi mafaufau i ai. O fea na iai le uluaʻi Parataiso?— Manatua foʻi, na faia e le Atua le parataiso i le lalolagi ina ia nonofo ai le tamāloa muamua o Atamu, ma lana avā. Na taʻua lenā parataiso, o le faatoʻaga o Etena. Na iai manu i lenā faatoʻaga, ae e leʻi feʻai. Na iai foʻi laau ma le tele o o latou fua suamalie, atoa ai ma se vaitafe telē. Oka se manaia o lenā parataiso i le nofo!​—Kenese 2:8-10.

Pe a tatou faitau la e uiga i lenā pagota e faapea o le a ola i le Parataiso, e tatau ona tatou mafaufau i le lalolagi lenei ua liua e avea o se nofoaga matagofie e ola ai. Pe o le a iai Iesu i le Parataiso i le lalolagi ina ia faatasi ma lē na avea muamua ma pagota?— E leai. E te iloa le māfuaaga o le a lē iai ai Iesu i inei?—

O le māfuaaga, ona o le avea Iesu o se Tupu i le lagi ma e na te puleaina mai le Parataiso i le lalolagi. E faatasi la Iesu ma lenā tamāloa, i lona uiga faapea, o le a faatūina o ia e Iesu mai le oti ma tausia ona manaʻoga. Ae aiseā o le a faataga ai e Iesu lenei tamāloa sa avea muamua ma pagota e ola i le Parataiso?— Seʻi tatou taumafai e suʻe le tali o lenā fesili.

 A o leʻi talanoa le pagota iā Iesu, faamata na ia iloaina fuafuaga a le Atua?— E leai. Na amio leaga o ia ona na te leʻi iloa le upu moni e uiga i le Atua. A oo la i le Parataiso, o le a aʻoaʻoina ai o ia e uiga i fuafuaga a le Atua. Ona maua lea o le avanoa e faaalia ai pe e alofa moni i le Atua, e ala i le faia o Lona finagalo.

Faamata o le a ola uma tagata e toetutū mai, i le Parataiso i le lalolagi?— E leai. E te iloa le māfuaaga?— Talu ai, o le a toetutū isi tagata i lugā i le lagi ina ia faatasi ma Iesu. O le a avea i latou o ni tupu ma o le a latou pule faatasi ma Iesu agaʻi mai i le Parataiso i le lalolagi. Seʻi tatou iloiloina lenei manatu ina ia malamalama i ai.

I le pō a o lumanaʻi lona maliu, na faapea atu Iesu i ona soo: ʻE tele mea e nonofo ai i le maota o loʻu Tamā, ou te alu la e sauni se mea e nonofo ai outou.’ Ona folafola atu lea e Iesu iā i latou: “Ou te toe sau, ou te talia foʻi outou ia faatasi ma aʻu; ina ia i ai outou i le mea ou te i ai aʻu.”​—Ioane 14:2, 3.

 O fea na alu i ai Iesu ina ua uma ona toe faatūina mai?— Ioe, na toe afio i le lagi ina ia faatasi ma lona Tamā. (Ioane 17:4, 5) O lea la, na folafola atu e Iesu i ona aposetolo ma isi soo e faapea, o le a ia toe faatutūina i latou ina ia latou faatasi i lugā i le lagi. O ā mea latou te faia faatasi ma Iesu i lugā i le lagi?— Ua fai mai le Tusi Paia, o i latou o ona soo o ē o le a toetutū i le “uluaʻi toe tū,” o le a nonofo i le lagi ma pule mai le lalolagi o ni “tupu foʻi faatasi ma ia i tausaga e afe.”​—Faaaliga 5:10; 20:6; 2 Timoteo 2:12.

E toʻafia i latou o le iai i le “uluaʻi toe tū” ma avea ma tupu e pule faatasi ma Iesu?— Na faapea atu Iesu i ona soo: “Aua e te fefe oe le lafu mamoe itiiti e, auā ua finagalo lo outou Tamā e foaʻi mai le malo iā te outou.” (Luka 12:32) E maʻoti le fuainumera o lenei “lafu mamoe itiiti” e toe faatutūina e faatasi ma Iesu i lona Malo i le lagi. Ua faaalia e le Tusi Paia e faapea ʻe selau fāsefulu fā afe’ i latou e toe faatutūina nai le lalolagi.​—Faaaliga 14:1, 3.

E toʻafia i latou o le a ola i le Parataiso i le lalolagi?— E lē o taʻu maʻoti maia e le Tusi Paia se fuainumera. Peitaʻi, na fetalai atu le Atua iā Atamu ma Eva i le faatoʻaga o Etena, ina ia fai sa la fanau ma ia faatumu le lalolagi. E moni, e leʻi faia e Atamu ma Eva lenā mea. Peitaʻi, o le a faamautinoa e le Atua, ua faataunuu lana fuafuaga e faatumuina le lalolagi i tagata amio lelei.​—Kenese 1:28; Isaia 45:18; 55:11.

Seʻi manatu i le matagofie o le olaga i le Parataiso! O le a avea le lalolagi atoa o se togālaau manaia. O le a faatumulia i manufelelei, o manu ma laau mananaia ma fugālaau eseese. E lē toe iai se tasi e mafatia i maʻi, pe oti foʻi. O le a fealofani uma tagata. Afai la tatou te mananaʻo e ola e faavavau i le Parataiso, e tatau la ona tatou sauniuni atu i le taimi lenei.