SOLEKI fa wi leisi na ini den tu kapitel na fesi, dan omeni sma ben kisi wan opobaka?— Feifi sma. Omeni fu den ben de pikin-nengre?— Dri. Èn a di fu fo sma ben de wan yonkuman. San yu denki disi e sori?—

We, a e sori taki Gado lobi yongusma. Ma a sa gi furu tra sma wan opobaka tu. Gado sa gi wan opobaka soso na den sma di ben du bun sani?— Na so wi ben kan denki. Ma furu sma de di noiti no kon sabi a waarheid fu Yehovah Gado nanga en Manpikin. Sobun, den ben du ogri fu di den ben leri takru sani. Yu denki taki Yehovah sa gi den sortu sma dati wan opobaka?—

Bijbel e taki: „Gado sa gi wan opobaka na den regtfardikiwan èn na den onregtfardikiwan” (Tori fu den Apostel 24:15). Fu san ede den sma di no ben de regtfardiki, noso di no ben du san bun, sa kisi wan opobaka?— Na fu di den no ben kisi na okasi fu kon sabi fu Yehovah èn fu den sani di a wani sma fu du.

 O ten yu denki taki sma sa kisi wan opobaka?— Prakseri baka fu a ten di Lasarus dede èn di Yesus pramisi en sisa Marta: „Yu brada o opo baka.” Marta taigi en: „Mi sabi taki a o opo baka te na opobaka o de na tapu a lasti dei” (Yohanes 11:23, 24). Di Marta taki dati Lasarus ben opo baka tapu „a lasti dei”, dan san a ben wani taki nanga dati?—

We, Marta ben yere fu a pramisi fu Yesus: ’Ala den sma di de na ini den grebi èn di Gado e memre, o kon na doro’ (Yohanes 5:28, 29). Sobun, „a lasti dei” na te ala den sma di de na ini a prakseri fu Gado, sa kisi libi baka. A lasti dei disi a no wan dei fu 24 yuru. A sa de wan pisi ten fu wán dusun yari. Bijbel e taki dati tapu a dei disi, ’Gado sa krutu den sma fu grontapu’. A sa krutu sosrefi den wan di kisi wan opobaka.​—Tori fu den Apostel 17:31; 2 Petrus 3:8.

Prakseri fa a dei disi o moi! Na a dei disi fu wán dusun yari, milyunmilyun sma di dede sa kisi libi baka. Yesus e kari a presi pe den e kisi wan opobaka, a Paradijs. Meki wi luku pe a Paradijs sa de èn fa a libi sa de drape.

Sowan dri yuru bifo Yesus e dede na wan pina-udu, dan a e taki fu a Paradijs nanga wan man di e anga na en sei na wan pina-udu. A man e kisi dedestrafu fu di a du ogri. Ma te na ogriman disi e luku Yesus èn e yere san sma e taki fu En, dan a e bigin  bribi na ini Yesus. Fu dati ede na ogriman e taki: „Memre mi te yu kon na ini yu kownukondre.” Yesus e taigi en: „Fu tru mi e taigi yu tide: Yu o de nanga mi na Paradijs.”​—Lukas 23:42, 43.

San Yesus wani taki nanga den wortu disi? Pe a Paradijs de?— Denki a sani disi pikinso. Pe a Paradijs ben de na ini a bigin?— Memre taki Gado gi a fosi man, Adam, nanga en wefi wan paradijs leti dyaso na grontapu fu libi na ini. A ben nen a dyari fu Eden. Meti ben de na ini a dyari dati, ma den no ben e du nowan sma ogri. Èn bon ben de di ben abi wan lo switi froktu, èn wan bigi liba ben de tu. A ben de wan tumusi moi presi fu libi!​—Genesis 2:8-10.

Sobun, te wi e leisi taki na ogriman dati sa de na ini Paradijs, dan wi musu prakseri taki a grontapu disi kon tron wan moi presi fu libi na ini. Yesus sa de na ini Paradijs leti dyaso na grontapu makandra nanga a man di ben de wan ogriman fosi?— Nôno. Yu sabi fu san ede a no sa de dyaso?—

Na fu di Yesus sa de na hemel leki Kownu di e tiri a Paradijs na grontapu. Sobun, a fasi fa Yesus sa de nanga a man dati, na taki a sa gi en wan opobaka èn taki a sa sorgu gi en. Ma fu san ede Yesus sa meki wan man di ben de wan ogriman fosi libi na ini a Paradijs?— Meki wi luku efu wi kan kon sabi fu san ede a o du dati.

 Na ogriman ben sabi fu den prakseri fu Gado bifo a ben taki nanga Yesus?— Nôno, a no ben sabi fu den. A ben du takru sani fu di a no ben sabi a waarheid fu Gado. Na ini Paradijs a sa kon leri sabi den prakseri fu Gado. Dan a sa kisi okasi fu sori taki a lobi Gado trutru fu di a e du a wani fu En.

A de so taki ala sma di o kisi wan opobaka sa libi na ini a Paradijs na grontapu?— Nôno, dati no de so. Yu sabi fu san ede?— Fu di sonwan fu den sa kisi wan opobaka fu libi nanga Yesus na hemel. Den sa tiri nanga en leki kownu fu a grontapu di o tron wan Paradijs. Meki wi luku fa wi du sabi disi.

A neti bifo Yesus dede, a taigi den apostel fu en: ’Furu tanpresi de na ini na oso fu mi Tata, èn mi e gowe fu sreka wan presi gi unu.’ Ne Yesus pramisi den: „Mi o kon baka, èn mi o teki unu na ini mi oso, so taki unu kan de tu pe mi de.”​—Yohanes 14:2, 3.

 Pe Yesus e go baka te a kisi wan opobaka?— Iya, a e go baka na hemel fu de nanga en Tata (Yohanes 17:4, 5). Sobun, Yesus e pramisi den apostel nanga den tra bakaman fu en taki a sa gi den libi baka so taki den kan de nanga en na ini hemel. San den sa du drape makandra nanga Yesus?— Bijbel e taki dati den disipel fu en di o kisi „a fosi opobaka” sa libi na ini hemel, èn den sa tiri grontapu ’leki kownu makandra nanga en wán dusun yari langa’.​—Openbaring 5:10; 20:6; 2 Timoteyus 2:12.

Omeni sma sa kisi „a fosi opobaka” èn sa tiri leki kownu makandra nanga Yesus?— Yesus ben taigi den disipel fu en: „No frede, un pikin ipi, bika un Tata feni en bun fu gi unu a kownukondre” (Lukas 12:32). A „pikin ipi” disi e kisi wan opobaka fu de nanga Yesus na ini a hemel Kownukondre fu en, èn wi sabi soifri omeni sma na dati. Bijbel e sori taki „wán hondro nanga fotenti na fo dusun” sma fu grontapu sa kisi na opobaka dati.​—Openbaring 14:1, 3.

Omeni sma sa libi na ini a Paradijs na grontapu?— Bijbel no e taki dati. Ma di Adam nanga Eva ben de na ini a dyari fu Eden, dan Gado taigi den fu meki pikin èn fu furu grontapu. Fu taki en leti, den no du dati. Ma Gado sa sorgu taki a grontapu sa kon furu nanga bun sma, soleki fa a ben abi na prakseri.​—Genesis 1:28; Yesaya 45:18; 55:11.

Prakseri o moi a sa de fu libi na ini Paradijs! Heri grontapu sa tron leki wan moi presi pe sma kan prisiri. A sa lai nanga pikin fowru, meti, moi bon nanga ala sortu bromki. Nowan sma sa de nanga skin-ati fu di a siki, èn nowan sma abi fu dede tu. Ala sma sa de wan mati fu makandra. Efu wi wani libi fu têgo na ini Paradijs, dan wi musu sreka wisrefi nownowde.