KA IOROV ume se ôr kwagh ve ken ityouv mbi ihiar mbi ken ijime mbila ser, yange i nder ve shin kuu?— Ka iorov utaan. Mbayev mbakiriki lu ume?— Mbayev mbakiriki lu utar. Shi í yila u sha unyiin la ér wanyekwaor. Ú hen wer kwagh ne tese ér nyi?—

A tese ér mbayev mbakiriki kua agumaior cii doo Aôndo ishima. Kpa shi una nder mbagenev kpishi kpaa shin ku. Ka ior mba yange ve eren akaa a dedoo tseegh Aôndo una va nder ve shin ku yee?— Alaghga se hen nahan. Kpa, ior kpishi yange í tese ve mimi u sha kwagh u Yehova Aôndo man Wan na ga. Nahan ve eren akaabo, kpa lu sha ci u akaa a í tese ve la lu a sha mi ga yô. Ú hen wer Yehova una nder ambaaior la shin kuu?—

Bibilo kaa ér: ‘A va nder mbaperapera kua mba ve lu perapera ga mbara kpaa shin ku.’ (Aerenakaa 24:15) Er nan ve a nder mba ve lu mbaperapera ga, shin mba yange ve eren akaa a shami ga la shin  kuu?— Ityôkyaa yô, yange ve zua a ian i henen fan kwagh u Yehova man kwagh u a soo ér ior ve̱ eren kpaa ga.

Ú hen wer ka hanma shighe nahan a va nder ior shin kuu?— Hide hen sha shighe u Lasaru kpe la, Yesu er ityendezwa a Marta ér: “Anngôu una nder.” Marta gema kaa ér: “M fa, una nder sha mnder u sha iyange i masetyô la.” (Yohane 11:23, 24) Inja i kwagh u Marta yange kaa ér Lasaru una nder “sha iyange i masetyô” la, ér nyi?

Marta vande ungwan ityendezwa i Yesu er wener: ‘A va nder ior mba ve lu shin iwar cii’ la. (Yohane 5:28, 29) Nahan, “iyange i masetyô” la ka shighe u a va nder ior mba ve kpe kpa Aôndo a lu umbur ve her mbara cica cii je la. Iyange i masetyô ne ka sev môm mbu ka mbu lu ahwa 24 ne ga. Iyange la ia lu anyom dubu jimin. Bibilo kaa ér sha iyange shon ne, ‘Aôndo una ôr ior mba ve lu shin tar cii ijir.’ Ior mba una nder ve shin ku la kpaa vea lu ken mba una ôr ve ijir la.—Aerenakaa 17:31; 2 Peteru 3:8.

Nenge er iyange ne ia lu iyange i saanyol sha wono! Sha iyange shon i̱ ia lu anyom dubu ne, a nder ior umiliôn umiliôn mba ve kpe la shin ku. Yesu yila ijiir i a nder ve vea lu la ér Paradiso. De se tôv se fa ape Paradiso una va lu la, shi se fa er una lu la kpaa.

Yange mase shin ahwa atar tseegh u Yesu una kpe sha kon u mtsaha yô, a ôr orgen u i mande un sha kon a na imôngo la kwagh  u Paradiso. Í lu wuan or la sha ci u aferakaa na. Kpa ormbaiv ne ngur kenger Yesu shi ungwan kwagh u i lu ôron sha iyol i Yesu la yô, á na Yesu jighjigh. Nahan ormbaiv la kaa a Yesu ér: “Umbur mo zum u Wea nyôr sha tartor Wou yô.” Yesu gema kaa a na ér: ‘Mimi je M kaan we nyian ne, ú lu a Mo imôngo ken Paradiso.’—Luka 23:42, 43.

Inja i kwagh u Yesu ôr la yô ér nyi? Paradiso ngu hana?— Hen sha kwagh ne dedoo. Hiihii yô, ka hanma ijiir yange Paradiso hii lunuu?— Umbur wer, Aôndo yange na Adam man kwase na, ior mba hiihii mbara paradiso ér ve lu ker shin tar ungun. Í yilan ijiir la ér sule u Eden. Inyam lu ken sule la, kpa í vihin or iyol ga. Shi ikyon i umen atam a nyohon kpa lu ken sule shon kpishi, shi zege ifi kpa lu ker. Ijiir la doo u lun ker kpen kpen!—Genese 2:8-10.

Nahan se ôron kwagh u ormbaiv la ser una va lu ken Paradiso yô, se gbidye kwar ken ishima se nenge er a va gema tar ua hingir ijiir i doonashe tsung i ior vea lu ker yô. Yesu una va lu vea ormbaiv la ken Paradiso shon shin tar heen jighilii shinii?—Ei. Ú fa er i hii ve una va lu shin tar heen ga kpa?

Ityôkyaa yô, Yesu una tema Tor sha, una lu hemen sha Paradiso shin tar. Nahan Yesu una va lu vea or la sha ci u una nder un shin ku, una kure ugbayol nav kpaa. Kpa er nan ve Yesu una de ér or u ngise iin la a̱ lu ken Paradiso asee? De se tôv se nenge, alaghga se zua a mlumun.

 Cii man ormbaiv la ôr kwagh a Yesu yô, vande fan awashima u Aôndo kpa?— Ei, ­yange fa ga. Yange eren akaabo sha ci u fa mimi u kwagh u Aôndo ga. Kpa a va tese un mbaawashima mba Aôndo ken ­Paradiso. Hen shighe la una zua a ian i tesen ér mimi je Aôndo doo un ishima sha u eren ishima Na.

Hanma or u a va nder nan cii nana lu uma ken Paradiso shin tara?— Ei, ka hanma or cii ga. Ú fa er i hii ve á lu hanma or ga kpa?— Ityôkyaa yô, a nder ior mbagenev vea za lu vea Yesu sha. Ve kpa vea lu utor vea na sha, vea hemen sha tar u Paradiso la. De se nenge er i hii ve se fe kwagh ne yô.

Hen tugh mbu Yesu mase lun vea mbaapostoli nav cii ve mase kpen la, a kaa a ve ér: ‘Ayou nga ken ya u Terem sha kpishi, nahan me yem sha u me za sôr ne ijiir yô.’ Yesu shi er ityendezwa a ve ér: ‘Me va kua a ven sha er ne kpaa né lu hen ape M lu yô.’—Yohane 14:2, 3.

Yange i nder Yesu shin ku yô, yem hana?— Een, yange hide yem  sha, za lu vea Ter na. (Yohane 17:4, 5) Nahan Yesu er ityendezwa a mbaapostoli nav kua mbadondon nav mbagenev wener una va nder ve shin ku sha er vea za lu vea na sha yô. Vea lu eren nyi shaala vea Yesu jimi?— Bibilo kaa ér mbahenen nav mba vea lu a ci ken “mnder u hiihii” la vea za lu sha, vea “tema tor a Na imôngo sha anyom dubu la.”—Mpase 5:10; 20:6; 2 Timoteu 2:12.

Ka iorov ume vea lu a ci ken “mnder u hiihii” ne, vea za tema tor vea Yesu imôngo?— Yesu kaa a mbahenen nav ér: ‘Ne anikumuile u kpeghee ne, de cie nen ga! Gadia i doo Ter wen u nan ne tartor la.’ (Luka 12:32) I fa iyenge i “anikumuile u kpeghee” u mba a nder ve vea za lu vea Yesu sha Tartor u sha la jighilii. Bibilo tese ér ka iorov “dubu deri man akunduahar kar unyiin” mba á nder ve shin ku shin tar yô.—Mpase 14:1, 3.

Gema ka iorov ume vea lu ken Paradiso shin tara?— Bibilo ôr iyenge ve ga. Kpa Aôndo yange kaa a Adam man Ifa zum u ve lu ken sule u Eden la ér ve̱ mar ve̱ iv tar. Kpa sha kpôô yô, ve er nahan ga. Nahan kpa, Aôndo una kure awashima na u yange wa ér ior mba dedoo ve̱ iv tar la kpee je, a bunde ga.—Genese 1:28; Yesaia 45:18;55:11.

Nenge er a doo kpishi u lun ken Paradiso sha wono! Tar cii ua hingir er ka sule ikyon u doon ashe nahan. Inyon i purugh man ishôso kua ikyôn i doon ashe man ahu a mondon a doon atô kposo kposo aa lu ker kpishi. Kwagh a kera nyoon ma or ga, sha ci u angev mbua lu ga, shi or môm kpa nana kera kpe ga. Ior cica cii vea lu ijende a mbagenev. Aluer se soo u va lun ken Paradiso yô, ka hegen je se hii u wan ago iyol ye.