Cibalo 36

Ino Mbaani Ibayoobusigwa? Ino Bayookkala Kuli?

MUZIBALO zyobile zyainda, ino mbantu bongaye mbotwakabala ibakabusigwa?— Bakali bosanwe. Ino bana bakali bongaye?— Bakali botatwe. Alimwi iwane waambwa kuti mmulombe. Ino uyeeya kuti eeci citondezya nzi?—

Citondezya kuti Leza ulabayanda bana. Pele alimwi uyoobusya bantu abambi banji. Sena Leza uyoobusya buyo baabo ibakacita zintu zibotu?— Mbotunga twayeeya oobo. Nokuba boobo, kuli bantu banji ibatakaiya kasimpe kujatikizya Jehova Leza alimwi a Mwanaakwe. Aboobo bakacita zintu zibyaabi akaambo kakuti bakayiisyigwa zintu zibyaabi. Sena uyeeya kuti Jehova uyoobabusya bantu bali boobo?—

Ibbaibbele lyaamba kuti: ‘Kuyooba kubuka kwabafwu, ibaluleme abataluleme.’ (Incito 24:15) Ino nkaambo nzi aabo ibataluleme, naa ibatakacita zintu ziluleme ncobayoobusyigwa?— Nkaambo tiibakabaa coolwe cakwiiya kujatikizya Jehova alimwi anzyayanda kuti bantu kabacita.

 Ino uyeeya kuti bantu bayoobusyigwa lili?— Kotelaika ciindi Lazaro naakafwa aleelyo Jesu naakasyomezya mucizyi wakwe Marta kuti: ‘Mwanaakwanu uyoobuka.’ Marta wakaingula kuti: “Ndilizi kuti uyoobuka mubuzuba bwakubuka bwakumamanino.” (Johane 11:23, 24) Ino ncinzi ncaakali kwaamba Marta naakaamba kuti Lazaro wakali kuyoobuka “mubuzuba bwakubuka bwakumamanino”?—

Marta wakalicizyi cisyomezyo ncaakaambide Jesu cakuti: ‘Boonse bali muzyuumbwe bayoovwukkuka.’ (Joni 5:28, 29, Ci) Aboobo ‘ibuzuba bwakumamanino’ ndeelyo aabo boonse mbabikkide mumizeezo Leza nobayoobusyigwa. Ibuzuba oobu bwamamanino tabuli buzuba bwini bwamawoola aali 24 pe. Mbwamyaka iili cuulu. Mubuzuba oobu, Ibbaibbele lyaamba kuti, ‘Leza uyoobeteka bantu bamunyika.’ Aabo mbayoobeteka bayoobikkilizya baabo ibayoobusyigwa.—Incito 17:31; 2 Petro 3:8.

Koyeeya buyo mbobunookkomanisya buzuba oobu! Mubuzuba oobu bwamyaka iili cuulu, ibantu banji babalilwa kutuulunzuma ibafwide bayoobusyigwa. Ibusena ooko bantu aaba nkobayoobusyilwa Jesu wakabwiita kuti ngu Paradaiso. Atubone nkoinoobede Paradaiso alimwi ambomunoobede mubusena oobo.

Kakusyeede mawoola aatandila kuli otatwe Jesu katanafwa aacisamu cakupenzezya, wakabandika makani aajatikizya Paradaiso kumwaalumi wakali aacisamu cakabambene acakwe. Imwaalumi ooyo wakali kujayigwa akaambo kamilandu njaakacitide. Pele eelyo cigwebenga eeci  nocakali kulangilila Jesu alimwi akumvwa eezyo zyakali kwaambwa kujatikizya Nguwe, cakatalika kumusyoma Jesu. Aboobo cigwebenga eeco cakati: “Ukandiyeeye, . . . waakusika mubwami bwako.” Jesu wakaingula kuti: “Ncobeni ndakwaambila sunu kuti, Unooli andime mu Paradaiso.”—Luka 23:42, 43, NW.

Ino ncinzi Jesu ncaakali kwaamba naakaamba majwi aaya? Ino Paradaiso ili kuli?— Kociyeeyela eeci. Ino Paradaiso yakusaanguna yakali kuli?— Koyeeya kuti, Leza wakapa mwaalumi wakusaanguna, Adamu alimwi amukaintu wakwe paradaiso yakuti kabakkala mumo aanyika aano mpoona. Yakali kwiitwa kuti mmuunda wa Edeni. Mumuunda ooyo kwakali banyama, pele kunyina nobakali kuluma pe. Alimwi kwakali misamu yakali kuzyala micelo iinona minji alimwi kwakali amulonga mupati. Bwakali busena ibubotu kapati ikukkala mumo!—Matalikilo 2:8-10.

Aboobo eelyo notubala makani aakuti cigwebenga eeco cinooli mu Paradaiso, tweelede kuyeeya nyika eeyi iisandudwe kuba busena bubotu kapati bwakukkala. Sena Jesu unooli anyika aano eeni mu Paradaiso ayooyo iwakali cigwebenga?— Peepe. Sena ulikazyi kaambo ncatanooli anyika?—

Nkaambo Jesu unooli kujulu kali Mwami weendelezya Paradaiso anyika. Aboobo Jesu unooli amwaalumi ooyo mukuti Jesu uyoomubusya kuzwa kubafwu akumulanganya kujatikizya zintu nzyayandika. Pele ino nkaambo nzi Jesu ncayoozumizya muntu wakali cigwebenga  ikukkala mu Paradaiso?— Atubone naa inga twabuzyiba bwiinguzi.

Eeco cigwebenga kacitana kwaambaula a Jesu, sena kuli nocakaazyi makanze aa Leza?— Peepe, tiicakaazyi pe. Cakali kucita zintu zibyaabi akaambo kakuti tiicakakazyi kasimpe kujatikizya Leza. Mu Paradaiso muntu ooyo wakali cigwebenga uyooyiisyigwa makanze aa Leza. Mpoonya uyoobaa coolwe cakutondezya kuti ulamuyanda ncobeni Leza kwiinda mukucita kuyanda Kwakwe.

Sena boonse ibabusyigwa bayookkala mu Paradaiso anyika?— Peepe, tabali boonse pe. Ino bamwi banookkala kuli?— Bamwi bayoobusyilwa kuyookkala a Jesu kujulu. Bayoolela anguwe kabali bami ibeendelezya nyika ya Paradaiso. Atubone mbotwaazyi makani aaya.

Imasiku Jesu katanafwa, wakaambila baapostolo bakwe kuti: ‘Muŋanda ya Taata kujulu muli makkalilo manji-manji, alimwi ndiya kukumubambila busena.’ Mpoonya Jesu wakabasyomezya kuti: “Ndiyooboola alimwi, nzoomutolelele, kuti oko nkwembede anywebo mukabe nkuko.”—Johane 14:2, 3.

 Ino Jesu wakaunka kuli naakabusyigwa?— Inzya, wakapiluka kujulu kuya kukkala a Bausyi. (Johane 17:4, 5) Aboobo Jesu wakali kusyomezya baapostolo bakwe abasikumutobela bambi kuti wakali kuyoobabusya ikutegwa bakabe anguwe kujulu. Ino ncinzi ncobayoocita a Jesu kujulu?— Ibbaibbele lyaamba kuti basikwiiya bakwe ‘ibabuka mububuke butaanzi’ bayookkala kujulu alimwi bayooyendelezya nyika kabali ‘bami anguwe kwamyaaka iili cuulu.’—Ciyubunuzyo 5:10; 20:6; 2 Timoteo 2:12.

Ino bali bongaye ‘ibayoobuka mububuke butaanzi’ akweendelezya a Jesu kabali bami?— Jesu wakaambila basikwiiya bakwe kuti: “Mutayoowi, nokatanga kaniini, nkaambo Usowanu ulakondwa kumupa bwami bwakwe.” (Luka 12:32) Imweelwe wabaaba iba “katanga kaniini,” ibabusigwa kuti bakabe a Jesu mu Bwami bwakwe bwakujulu uligaminide. Ibbaibbele litondezya kuti ibayoobusyigwa kuzwa anyika banooli “zyuulu zili mwaanda amakumi one azine.”—Ciyubunuzyo 14:1, 3.

Ino bali bongaye ibayoopona mu Paradaiso anyika?— Ibbaibbele talyuuwambi pe mweelwe wabo. Pele Leza wakaambilide ba Adamu a Eva nobakali mumuunda wa Edeni kuti bazyalane akuzuzya nyika. Ikweelana ambozibede zintu, bakaalilwa kucita boobo. Pele Leza uyoobona kwaamba kuti azuzikizyigwa imakanze aakwe aakuti nyika izyule abantu babotu.—Matalikilo 1:28; Isaya 45:18; 55:11.

Kociyeeyela buyo mbocinookkomanisya ikukkala mu Paradaiso! Inyika yoonse iyooba mbuli muunda weebeka, naa paaki. Inoozwide bayuni abanyama amasamu aayebeka alimwi amaluba-luba aamisyobo-misyobo. Kunyina muntu uunootongooka kuciswa alimwi kunyina muntu uuyoofwa alimwi. Muntu woonse unooli mulongwe kubantunyina boonse. Ikuti katuyanda kuyoopona kukabe kutamani mu Paradaiso, eecino nceciindi cakulibambila kucita boobo.

Bala makani aambi kujatikizya makanze ngajisi Leza kujatikizya nyika ku Tusimpi 2:21, 22; Mukambausi 1:4; Isaya 2:4; 11:6-9; 35:5, 6; alimwi a 65:21-24.

[Cifwanikiso icili apeeji 187]

Ino nkaambo nzi Leza ncayoobabusya bamwi ibatakacita zintu ziluleme?

[Cifwanikiso icili apeeji 188]

Ino Paradaiso Jesu njali mukwaambila mwaalumi ooyu ili kuli?

[Cifwanikiso icili apeeji 189]

Eelyo notubala makani aajatikizya Paradaiso, ino ncinzi ncotweelede kunooyeeya?

[Zifwanikiso izili apeeji 190]

Ino bantu ibayoobusyigwa bayookkala kuli, alimwi ino ncinzi ncobayoocita?