HA NAGLABAY nga duha nga kapitulo, pira ka tawo an nabasa naton nga ginbanhaw?— Lima. Pira an kabataan?— Tulo. Ngan an ikaupat, usa nga olitawohay. Ano ha hunahuna mo an ipinapakita hini?—

Aw, ipinapakita hito nga an Dios nahigugma ha kabataan ngan mga batan-on. Kondi babanhawon liwat niya an damu nga iba pa. Babanhawon ba han Dios adto la nga nagbuhat hin maopay?— Bangin hunahunaon naton ito. Kondi, damu nga mga tawo an waray pa gud mahibaro han kamatuoran mahitungod kan Jehova nga Dios ngan ha iya Anak. Salit ginbuhat nira an maraot tungod kay gintutdoan hira hin sayop nga mga butang. Ha hunahuna mo, babanhawon ba ni Jehova an sugad hito nga mga tawo?—

An Biblia nasiring: ‘May pagkabanhaw han mga magtadong ngan han diri magtadong.’ (Buhat 24:15) Kay ano nga babanhawon adton diri magtadong, o waray magbuhat han husto?— Tungod kay waray pa gud hira magkaada higayon nga mahibaro mahitungod kan Jehova ngan han karuyag niya nga buhaton han mga tawo.

 Ha hunahuna mo, san-o babanhawon an mga tawo?— Hunahunaa liwat han namatay hi Lasaro ngan hi Jesus nagsaad ha bugto ni Lasaro nga hi Marta: “An imo bugto mababanhaw.” Hi Marta binaton: ‘Ako maaram, nga hiya mabangon ha pagkabanhaw ha kataposan nga adlaw.’ (Juan 11:​23, 24) Ano an karuyag ipasabot ni Marta han nagsiring hiya nga hi Lasaro mabangon ha “kataposan nga adlaw”?—

Aw, nakabati na hi Marta mahitungod han saad ni Jesus: ‘An ngatanan nga aadto ha handumanan nga mga lubnganan manggogowa.’ (Juan 5:​28, 29) Salit “an kataposan nga adlaw” amo an panahon nga banhawon na an ngatanan nga aada ha handumanan han Dios. Ini nga kataposan nga adlaw diri usa ka 24-oras nga adlaw. Magigin usa ka yukot ka tuig an kahilawig hito. Mahitungod hini nga adlaw, an Biblia nasiring, ‘An Dios maghuhukom ha mga tawo ha tuna.’ Kaupod hadton iya huhukman amo an mga pinamanhaw.​—Buhat 17:31; 2 Pedro 3:8.

Hunahunaa nga makalilipay gud ini nga adlaw! Durante hinin usa-ka-yukot-ka-tuig-an-kahilawig nga panahon, damu ka milyon nga mga tawo nga nagkamatay an babanhawon. Tinatawag ni Jesus nga Paraiso an lugar nga ira uukyan. Aton kitaon kon diin ini nga Paraiso ngan kon ano an magigin kahimtang didto.

Mga tulo ka oras antes mamatay hi Jesus ha pasakitan nga kahoy, iya ginsumatan mahitungod han Paraiso an usa nga lalaki ha pasakitan nga kahoy nga tupad niya. Papatayon an lalaki tungod han krimen nga iya ginbuhat. Kondi samtang ginkikita hini nga kriminal hi Jesus ngan  hinbabatian an ginsisiring mahitungod ha Iya, nagtikang hiya tumoo kan Jesus. Salit an kriminal nagsiring: ‘Hinumdumi ako kon ikaw adto na ha imo ginhadian.’ Hi Jesus binaton: ‘Matuod ako nasiring ha imo yana nga adlaw, makakaupod ko ikaw ha Paraiso.’​—Lukas 23:​42, 43.

Ano an karuyag ipasabot ni Jesus han ginsiring niya ini? Hain an Paraiso?— Hunahunaa ito. Nakain an Paraiso ha tinikangan?— Hinumdumi, iginhatag han Dios ha siyahan nga lalaki, hi Adan, ngan ha iya asawa an paraiso basi mag-ukoy hira dinhi mismo hini nga tuna. Tinawag ito nga hardin han Eden. May-ada mga hayop dida hiton nga hardin, kondi diri ito nagdadaot ha bisan hin-o. Ngan may-ada kakahoyan nga may-ada damu nga magrasa nga mga bunga, sugad man usa nga daku nga salog. Maopay hinduro pag-ukyan ito nga lugar!​—Genesis 2:8-10.

Salit kon nababasa naton an mahitungod hiton nga kriminal nga aadto ha Paraiso, sadang ihulagway naton ha aton hunahuna ini nga tuna nga ginpatahom nga lugar basi pag-ukyan. Mag-uukoy ba hi Jesus dinhi mismo ha Paraiso nga tuna upod an kriminal hadto?— Diri. Maaram ka ba kon kay ano nga diri hiya mag-uukoy dinhi?—

Tungod kay hi Jesus aadto ha langit ngan magmamando sugad nga Hadi ha Paraiso nga tuna. Salit makakaupod ni Jesus iton nga lalaki ha paagi nga babanhawon hiya ni Jesus tikang ha mga minatay ngan ihahatag an iya mga panginahanglan. Kondi kay ano nga tutugotan ni Jesus an usa nga kriminal hadto nga mag-ukoy ha Paraiso?— Kitaon naton kon mababaton naton.

 Antes makiistorya kan Jesus an kriminal, maaram ba hiya mahitungod han mga katuyoan han Dios?— Diri, diri hiya maaram. Nagbuhat hiya hin maraot tungod kay diri hiya maaram han kamatuoran mahitungod han Dios. Ha Paraiso tututdoan hiya mahitungod han mga katuyoan han Dios. Hito nga panahon, magkakaada hiya higayon nga pamatud-an nga tinuod nga nahigugma hiya ha Dios pinaagi han pagbuhat han Iya kaburut-on.

An ngatanan ba nga babanhawon mag-uukoy ha Paraiso nga tuna?— Diri. Maaram ka ba kon kay ano nga diri?— Tungod kay an iba babanhawon basi mag-ukoy upod ni Jesus ha langit. Magmamando hira kaupod niya sugad nga mga hadi ha Paraiso nga tuna. Kitaon naton kon paonan-o naton mahibabaroan ini.

Ha gab-i antes mamatay hi Jesus, iya ginsumatan an iya mga apostol: ‘Didto ha balay han akon Amay ha langit, damu an mga urukyan, ngan tikadto ako pag-andam hin lugar para ha iyo.’ Ngan hi Jesus nagsaad ha ira: “Ako makanhi liwat, ngan kakarawaton ko kamo ha akon ngahaw, basi kon diin ako, aadto man kamo.”​—Juan 14:​2, 3.

 Diin kadto hi Jesus katapos hiya banhawon?— Oo, binalik hiya ngadto ha langit basi makaupod han iya Amay. (Juan 17:​4, 5) Salit nagsasaad hi Jesus ha iya mga apostol ngan ha iba nga mga sumurunod nga iya babanhawon hira basi makaupod nira hiya ha langit. Ano an bubuhaton nira didto upod ni Jesus?— An Biblia nasiring nga an iya mga disipulo nga bahin han “siyahan nga pagkabanhaw” mag-uukoy ha langit ngan magmamando ha tuna ‘sugad nga mga hadi upod niya ha usa ka yukot ka tuig.’​—Pahayag 5:10; 20:6; 2 Timoteo 2:12.

Pira an mahiuupod ha “siyahan nga pagkabanhaw” ngan magmamando upod ni Jesus sugad nga mga hadi?— Hi Jesus nagsiring ha iya mga disipulo: ‘Ayaw kahadlok, gutiay nga panon, kay inuyonan han iyo Amay nga ihatag ha iyo an ginhadian.’ (Lukas 12:32) Inin ‘gutiay nga panon,’ nga ginbanhaw basi makaupod ni Jesus ha iya langitnon nga Ginhadian, may-ada eksakto nga kadamu. Ipinapakita han Biblia nga “usa ka gatos ngan kap-atan kag upat ka yukot” an babanhawon tikang ha tuna.​—Pahayag 14:​1, 3.

Pira kadamu an mag-uukoy ha Paraiso nga tuna?— An Biblia waray iginsumat nga kadamu. Kondi an Dios nagsugo kan Adan ngan Eva samtang nag-uukoy hira ha hardin han Eden nga magkaada mga anak ngan pun-on an tuna. Totoo, waray nira matuman ito. Kondi sisiguruhon han Dios nga matuman an iya katuyoan nga pun-on an tuna hin mag-opay nga mga tawo.​—Genesis 1:28; Isaias 45:18; 55:11.

Hunahunaa la nga makalilipay gud an pag-ukoy ha Paraiso! An bug-os nga tuna magigin pariho han usa nga parke. Mapupuno ito han ngatanan nga klase han katamsihan ngan mga hayop ngan magtahom nga kakahoyan ngan mga bukad. Waray mag-aantos tungod han sakit, waray liwat mamamatay. An ngatanan magigin magsarangkay. Kon karuyag naton mag-ukoy ha kadayonan ha Paraiso, yana an panahon ha pag-andam para hito.