SEʻI faapea ua avatu e se tasi se meaalofa manaia lava mo oe. O ā ni ou faalogona?— Pe e te faafetai atu i ai, ona faagalo loa lea iā te oe o le tagata na avatuina lenā meaalofa? Pe e te manatuaina lenā tagata ma lana mea lelei na fai mo oe?—

Na aumaia e Ieova se meaalofa matagofie mo i tatou. Na ia auina mai lona Alo, ina ia maliu mo i tatou. E te iloa le māfuaaga na tatau ai ona maliu Iesu mo i tatou?— E tāua tele ona tatou malamalama i lenā māfuaaga.

E pei ona tatou aʻoaʻoina i le Mataupu e 23, na agasala Atamu ina ua lē usitai i le tulafono lelei atoatoa a le Atua. Na tuufaasolo mai iā i tatou le agasala a lo tatou tamā o Atamu. O le ā sou manatu, o le ā le mea tatou te moomia?— I ni upu faafaatusa, tatou te moomia se tamā fou, o se tasi sa lelei atoatoa lona olaga i le lalolagi. O ai e te manatu, e mafai ona avea o se tamā faapena iā i tatou?— O Iesu.

Na auina mai e Ieova, Iesu i le lalolagi ina ia avea o ia o lo tatou tamā, e sui ai Atamu. Ua fai mai le Tusi Paia: “Na faia Atamu le uluaʻi tagata ma tagata ola; a o le Atamu mulimuli, o le Agaga faaola o ia.” O ai le uluaʻi Atamu?— Ioe, o le tagata lea na faia e le Atua mai le eleele. Ae o ai Atamu mulimuli?— O Iesu. Ua faaalia e le Tusi Paia lenā manatu, ina ua faapea mai: O “le uluaʻi tagata [o Atamu], na fua mai i le eleele; a o le tagata mulimuli [o Iesu], o le Alii lea mai le lagi.”​—1 Korinito 15:45, 47; Kenese 2:7.

Talu ai na ave ifo e le Atua le ola o Iesu mai le lagi ma tuuina i totonu o Maria, e leʻi tuufaasolo mai la le agasala a Atamu iā Iesu. O  le māfuaaga lenā na avea ai Iesu ma tagata lelei atoatoa. (Luka 1:30-35) O le māfuaaga foʻi lenā na fai atu ai se agelu i leoleo mamoe ina ua fanau mai Iesu: ʻO le aso nei ua fanau ai iā te outou le Faaola.’ (Luka 2:11) Peitaʻi, ina ia avea ma o tatou Faaola, o le ā e tatau ona faia e le pepe o Iesu?— E tatau ona tuputupu aʻe muamua Iesu e avea o se tagata matua, e pei o Atamu. Ona mafai lea ona avea Iesu ma “Atamu mulimuli.”

E avea foʻi Iesu lo tatou Faaola, ma “Tamā o le faavavau.” O le taʻu lenā a le Tusi Paia iā Iesu. (Isaia 9:6, 7) Ioe, e mafai ona avea Iesu lelei atoatoa, ma o tatou tamā na i lo Atamu, o lē na lē lelei atoatoa ina ua agasala. E mafai la ona tatou filifili e avea le “Atamu mulimuli” ma o tatou tamā. Ae o le mea moni, o Iesu lava ia o le Alo o Ieova le Atua.

E ala i le aʻoaʻoina o tala e uiga iā Iesu, e mafai ai ona tatou taliaina Iesu e avea o lo tatou Faaola. E te manatua foʻi, o le ā le tulaga e moomia ona faaola mai ai i tatou?— Ioe, o le agasala ma le oti lea na tuufaasolo mai iā Atamu. O le togiola e faasino atu i le taulaga na faia e Iesu mo i tatou, i lona lava tino lelei atoatoa ina ua avea ma tagata matua. Na saunia e Ieova le togiola ina ia mafai ona faamagaloina ai a tatou agasala.​—Mataio 20:28; Roma 5:8; 6:23.

O le mea moni, e tatou te lē mananaʻo e faagaloina mea ua faia e le Atua ma lona Alo, mo i tatou, a ea?— Na  faailoa e Iesu i ona soo le auala faapitoa e fesoasoani ai iā i tatou e manatua le togiola na ia faia. Seʻi tatou talanoa i ai.

Seʻi faapea o loo e i totonu o se potu pito i luga, i se fale i Ierusalema. Ua oo i le pō. O loo faatasi Iesu ma ona aposetolo i se laulau. O loo iai se mamoe vela, o areto e leʻi faafefeteina ma le uaina mūmū i luga o le laulau. O loo faia se ʻaiga faapitoa. E te iloa le māfuaaga?—

O le ʻaiga lenei, e faamanatu ai iā i latou le mea na faia e Ieova i le faitau selau o tausaga muamua atu, a o nofo pologa ona tagata i Aikupito. Na faatonuina e Ieova ona tagata i  lenā taimi: ʻE fasi le mamoe e tasi mo aiga taʻitasi, ma sausau le toto o le mamoe i pou o faitotoa o outou fale.’ Ona faapea atu lea o Ieova: ʻIa ō i totonu o tou fale, ma aai i le mamoe.’

O le mea lenā sa faia e tagata Isaraelu. I le pō lava lenā, na alu ifo ai le agelu a le Atua i le nuu o Aikupito. Na fasiotia e le agelu, ulumatua a le toʻatele o aiga. Peitaʻi, a faapea e vaaia e le agelu pou o faitotoa o fale o loo sausau i le toto o le mamoe, e lē alu atu i le fale lenā. E lē oti la le ulumatua o le aiga lenā. Na fefe Farao le tupu o Aikupito, i le mea na faia e le agelu a Ieova. O lea na fai atu ai Farao i tagata Isaraelu: ʻUa saʻoloto outou e ō. Ō ese ia mai Aikupito!’ Ona tapena lea o mea a tagata Isaraelu i luga o kamela ma asini, ma latou ō ese.

E leʻi finagalo Ieova e galo i ona tagata le auala na iā faasaoina ai i latou. O lea na ia fetalai atu ai: ʻE taʻitasi i le tausaga ona fai se ʻaiga e pei ona tou aai ai i le pō nei.’ Na latou faaigoaina lenā ʻaiga faapitoa, o le Paseka. E leʻi alu le agelu a le Atua i lenā pō, i fale na sausauina i le toto.​—Esoto 12:1-13, 24-27, 31.

O loo tomānatu Iesu ma ona aposetolo i le mea na tupu, a o latou aai i le ʻaiga o le Paseka. Mulimuli ane, na faia ai e Iesu se mea e sili ona tāua. Peitaʻi, a o leʻi faia e Iesu lenā mea, na ia tulia ese le aposetolo lē faamaoni o Iuta. Ona tago lea o Iesu i le fasi areto na totoe, ua fai lana tatalo, vaevae ma avatu i ona soo. Ua faapea atu iā i latou: “Inā tago ia, inā aai.” Ona fetalai atu lea o Iesu: ʻO le faatusa lenei o loʻu tino o le a ou foaʻi atu pe a ou oti mo outou.’

Ona tago foʻi lea o Iesu i le ipu uaina mūmū. Ina ua uma ona toe fai le tatalo faafetai, na avatu ai e Iesu le ipu uaina ma faapea atu: ʻInā inu ia outou uma i ai. O le faatusa lenei o loʻu toto. E toeitiiti ona faamaligiina lea o loʻu toto e tuusaʻoloto ai outou mai le agasala. Ia outou faia lenei mea ma faamanatuga iā te aʻu.’​—Mataio 26:26-28; 1 Korinito 11:23-26.

 Pe na e mātauina, na faapea atu Iesu e tatau i soo ona latou faia lenei mea ma faamanatuga iā te ia?— E lē tatau ona latou toe faamanatuina le ʻaiga o le Paseka. Na i lo lea, e latou te faia lenei ʻaiga faapitoa e faatasi i le tausaga e manatua ai Iesu ma lona maliu. O lenei ʻaiga e taʻua o le Talisuaga Afiafi a le Alii. I aso nei, e masani ona tatou taʻua o le Faamanatuga. Aiseā?— Auā e faamanatu mai ai iā i tatou mea na faia e Iesu ma lona Tamā o Ieova le Atua, mo i tatou.

O le areto, e tatau ona tatou manatua ai le tino o Iesu. Na loto malie Iesu e faataulaga lona tino ina ia tatou maua ai le ola e faavavau. Ae faapefea le uaina mūmū?— E tatau ona faamanatu mai ai iā i tatou, le tāua o le toto o Iesu. E sili atu le tāua o le toto o Iesu na i lo le toto o le mamoe o le Paseka i Aikupito. E te iloa le māfuaaga?— O loo faapea mai le Tusi Paia, e mafai e le toto o Iesu ona faamagaloina a tatou agasala. A faapea la e aveeseina a tatou agasala uma lava, e lē toe oo la se maʻi, tino matua po o le oti, iā i tatou. E tatau ona tatou manatunatu i lenā mea, pe a tatou auai i le Faamanatuga.

Pe e tatau ona aai ma feinu tagata uma e auai i le Faamanatuga, i le areto ma le uaina?— Na faapea atu Iesu iā i latou e aai ma feinu: ʻO le a tou iai i loʻu malo, ma nonofo i nofoālii i le lagi faatasi ma aʻu.’ (Luka 22:19, 20, 30) O le uiga o lenei mea, e latou te ō i le lagi e nofo tupu faatasi ma Iesu. O lea la, na o i latou e faamoemoe e pule faatasi ma Iesu i le lagi, e tatau ona aai i le areto ma feinu i le uaina.

Peitaʻi, e tatau foʻi ona auai i le Faamanatuga i latou e lē aai i le areto pe feinu i le uaina. E te iloa le māfuaaga?— Auā na foaʻi foʻi e Iesu lona ola mo i tatou. A faapea tatou te auai i le Faamanatuga, e faaalia ai e lē o galo iā i tatou le togiola a Iesu. O loo tatou manatuaina le meaalofa matagofie a le Atua.