MAFAUFAU la me ne tuku atu ne se tino se meaalofa gali ki a koe. E pefea ou lagonaga e uiga ki ei?— E mata, ka fakafetai atu fua koe kae oti aka ko fakapuli katoatoa atu ei a te tino telā ne tuku atu ne ia ki a koe? Io me ka masaua faeloa ne koe a ia mo tena mea ne fai ki a koe?—

Ne tuku mai ne Ieova te Atua se meaalofa gali ‵ki. Ne uga mai ne ia tena Tama ki te lalolagi ke mate mō tatou. E iloa ne koe a te pogai ne ‵tau ei o mate a Iesu mō tatou?— A te mea tenei se mea tāua ‵ki ke iloa ne koe.

E pelā mo te mea ne tauloto ne tatou i te Mataupu e 23, ne agasala a Atamu i te taimi ne soli ei ne ia te tulafono ‵lei katoatoa a te Atua. Kae ne maua ne tatou a te agasala mai i a Atamu, te tamana o tatou katoa. Tela la, se a tau faka‵tau ki te mea e manakogina ne tatou?— I se auala fakatusa, e manakogina ne tatou se tamana fou, se tino telā ne ola i se olaga ‵lei katoatoa i te lalolagi. Ko oi i tau faka‵tau e mafai o fai mo fai se tamana penā ki a tatou?— Ko Iesu eiloa.

Ne uga mai ne Ieova a Iesu ki te lalolagi ko te mea ke mafai o fai a ia mo fai se tamana ki a tatou i lō Atamu. E fai mai te Tusi Tapu: “‘A te Atamu muamua ne fai mo fai se tino.’ A ko te Atamu fakaoti ne fai mo fai te agaga telā e tuku mai ne ia te ola.” Ko oi te Atamu muamua?— Ao, ko te tino telā e faite ne te Atua mai i te ‵pefu o te lalolagi. Ko oi te Atamu fakaoti?— Ko Iesu. E fakaasi mai ne te Tusi Tapu te mea tenei i te taimi ne fai mai ei penei: “A te tagata muamua [Atamu] ne faite i te lalolagi ki ‵pefu o te laukele; a ko te tagata i te tokolua [Iesu] ne fanaifo mai te lagi.”—1 Kolinito 15:45, 47; Kenese 2:7.

 Ona ko te mea ne tuku ifo ne te Atua te ola o Iesu mai te lagi kae tuku atu ki loto i te fafine ko Malia, ne seki maua ei ne Iesu so se agasala mai i a Atamu. Tenā te pogai ne ‵lei katoatoa ei a Iesu. (Luka 1:30-35) Tenā foki eiloa te pogai ne fai atu ei te agelu ki tausi mamoe i te taimi ne fanau mai ei a Iesu: “Ko oti ne fanau mai ki a koutou i te aso tenei se Fakaola.” (Luka 2:11) Kae ke fai mo fai ‵tou Fakaola, se a te mea muamua ne ‵tau o fai ne te pepe ko Iesu?— Ne ‵tau o tupu aka tou tagata ke fai mo fai se tagata matua ‵lei, e pelā eiloa mo Atamu. Ko mafai ei o fai a Iesu mo fai te ‘Atamu i te tokolua.’

A Iesu, te ‵tou Fakaola, ka fai foki mo fai te ‵tou “Tamana ki te se-gata-mai.” E taku eiloa a ia penā i te Tusi Tapu. (Isaia 9:6, 7) Ao, e mafai eiloa o fai a Iesu telā e ‵lei katoatoa mo fai te ‵tou tamana i lō Atamu, telā ne fai mo fai se tino sē ‵lei katoatoa i te taimi ne agasala ei a ia. I te auala tenā, e mafai o filifili aka ne tatou ke fai a te ‘Atamu i te tokolua’ mo fai ‵tou tamana. E tonu, a Iesu ko te Tama eiloa a Ieova te Atua.

Mai i te iloa ‵lei ne tatou a mea e uiga ki a Iesu, ko mafai ei o talia ne tatou a ia e pelā me ko te ‵tou Fakaola. E masaua ne koe a mea kolā e ‵tau o faka‵sao tatou mai i ei?— Ao, mai i te agasala mo te mate kolā ne maua ne tatou mai i a Atamu. A te ola ‵lei katoatoa telā ne ofo atu io me ne tuku atu ne Iesu mō tatou i te taimi ko matua ‵lei ei a ia, e taku ki te togiola. Ne tuku mai ne Ieova te togiola ko te mea ke mafai o ave keatea ‵tou agasala.—Mataio 20:28; Loma 5:8; 6:23.

E mautinoa eiloa me e se ma‵nako tatou ke fakapuli atu a mea ko oti ne fai ne  te Atua mo tena Tama mō tatou, ne?— Ne fakaasi atu ne Iesu ki ana soko se auala fakapito e mafai o fesoasoani mai ke masaua ne tatou tena mea ne fai. Ke fai‵pati malie aka tatou e uiga ki ei.

Mafaufau me e nofo atu koe i te potu i te fogafale ki luga o se fale i Ielusalema. A te taimi tenei ko te po. Ne ‵nofo atu a Iesu mo ana apositolo i se taipola. I luga i te taipola, e isi se mamoe ne tao, falaoa pā‵pa, mo uaina ‵kula. Ne fai ne latou se ‵kaiga fakapito. E iloa ne koe a te pogai?—

A te ‵kaiga tenā e fakamasaua atu ki a latou e uiga ki te mea ne fai ne Ieova i te fia selau tausaga ko ‵teka i te taimi ne fai ei ana tino, te kau Isalaelu, mo pologa i Aikupito. I te taimi tenā, ne  fai atu a Ieova ki ana tino: ‘Tamate se mamoe mō kāiga takitasi, kae nini atu ana toto ki luga i mataloa o otou fale.’ Ne toe fai atu ei a ia: ‘Olo ki loto i otou fale, kae kai te mamoe.’

Ne fai eiloa ne te kau Isalaelu a te mea tenā. I te po eiloa tenā, ne fanatu a te agelu a te Atua i te fenua o Aikupito. I te ukega o fale, ne tamate ei a toekimua katoa. Kae i te taimi ne lavea ei ne te agelu a toto o te mamoe i te mataloa, ne fakaseke atu a ia i te fale tenā. I fale konā, e seai eiloa se tamaliki ne mate i ei. A te Falao, te tupu o Aikupito, ne mataku i te mea ne fai ne te agelu a Ieova. Tela la, ne fai atu a te Falao ki te kau Isalaelu: ‘Ko saoloto nei koutou ke olo atu. Na olo kea‵tea mai Aikupito!’ I konā, ne fakauta olotou kamela mo asini kae olo atu keatea.

Ne seki manako a Ieova ke puli i ana tino a te auala ne fakasaoloto ei latou. Tela la, ne fai atu a ia: ‘E ‵tau o ‵kai koutou ki mea‵kai kolā e ‵pau mo mea‵kai ne kai ne koutou i te po nei, fakatasi i te tausaga.’ Ne taku ne latou a te ‵kaiga fakapito tenei ki te Paseka. E iloa ne koe a te pogai?— Ona ko te mea ne ‘fakaseke atu’ a te agelu a te Atua i te po tenā i fale kolā ne nini ki toto.—Esoto 12:1-13, 24-27, 31.

Ne mafau‵fau a Iesu mo ana apositolo ki te mea tenei i te taimi ne ‵kai ei latou i te ‵kaiga o te Paseka. Mai tua ifo i ei, ne fai ei ne Iesu se mea tāua ‵ki. Kae koi tuai o fai ne ia, ne uga atu a Iuta, te apositolo sē fakamaoni, ke fano. Ne puke atu ei a Iesu ki te ‵toega o falaoa, ne ‵talo, fatifati ne ia, kae pāsi atu ne ia ki ana soko. Ana muna: “Puke kae ‵kai ki ei.” Ne toe fai atu a ia ki a latou: ‘A te falaoa tenei e fakauiga loa ki toku foitino telā ka tuku atu ne au māfai ko mate au mō koutou.’

Mai tua ifo ne puke aka ne Iesu te ipu uaina ‵kula. Mai tua o te suā ‵talo fakafetai, ne toe pāsi atu ne ia ki a latou kae fai atu: “Inu katoa koutou ki ei.” Kae ne fai atu a ia ki a latou: ‘A te uaina tenei e fakauiga ki toku toto. Ko pili nei o ‵ligi atu ne au toku toto ke fakasaoloto ei koutou mai i otou agasala. Ke fai faeloa a te mea tenei mō fakamasauaga ki a au.’—Mataio 26:26-28; 1 Kolinito 11:23-26.

 E mata, e lavea ne koe me ne fai atu a Iesu ki ana soko me e ‵tau o fai faeloa ne latou a te mea tenei ke fakamasaua ei a ia?— Ko se toe ‵tau o fai ne latou a te ‵kaiga o te Paseka. I lō te fai penā, e ‵tau o fai fakatasi ne latou i tausaga takitasi a te ‵kaiga fakapito tenei ke fakamasaua ei a Iesu mo tena mate. E taku loa te ‵kaiga tenei ki te ‵Kaiga a te Aliki i te Afiafi. I aso nei e masani o taku foki ne tatou ki te Fakamanatuga. Kaia?— Me e fakamasaua mai i ei a mea ne fai ne Iesu mo tena Tamana, ko Ieova te Atua, mō tatou.

E ‵tau o fai ne te falaoa ke mafau‵fau tatou ki te foitino o Iesu. Ne loto fiafia a ia ke tuku atu te foitino tenā ko te mea ke mafai o maua ne tatou te ola se-gata-mai. Kae e a te uaina ‵kula?— E ‵tau o fakamasaua mai ne te mea tenā a te tāua o te toto o Iesu. E sili atu tena tāua i lō te toto o te mamoe o te Paseka i Aikupito. E iloa ne koe a te pogai?— E fai mai te Tusi Tapu me e mafai o fakamagalogina ‵tou agasala ne te toto o Iesu. Kae kafai e ave keatea ‵tou agasala katoa, ka se toe ma‵saki tatou, gasolo o ma‵tua, kae ‵mate. E ‵tau o mafau‵fau tatou ki te mea tenā māfai e ‵kau atu tatou ki te Fakamanatuga.

E mata, e ‵tau o ‵kai kae inu tatou ki te falaoa mo te uaina i te Fakamanatuga?— Ia, ne fai atu a Iesu ki a latou kolā ne ‵kai kae inu: ‘Ka fai koutou mo vaega i toku Malo kae saga‵saga i luga i nofogaaliki i te lagi fakatasi mo au.’ (Luka 22:19, 20, 30) E fakauiga te mea tenei me e ‵tau o olo atu latou ki te lagi ke fai mo tupu fakatasi mo Iesu. Tela la, ko latou fua kolā e maua ne latou a te fakamoemoega ke pule fakatasi mo Iesu i te lagi e ‵tau o ‵kai kae inu ki te falaoa mo te uaina.

Kae e ‵tau foki eiloa o ‵kau atu ki te Fakamanatuga a tino kolā e se ‵kai kae inu ki te falaoa mo te uaina. E iloa ne koe me se a te pogai?— Me ne tuku mai foki ne Iesu tena ola mō tatou. Mai i te ‵kau atu ki te Fakamanatuga, e fakaasi atu ei ne tatou me e se puli i a tatou a te mea tenā ne fai ne ia. E masaua ne tatou a te meaalofa gali a te Atua.