GO NI itye i yeya ma tye ka lwiny ite pii. Tika ibimito ni ngat mo olari wek pe ilwiny?— Ento ka ngat mo odyero kwone me lari kono?— Meno aye gin ma Yecu Kricito otimo. Kit ma wapwonyo kwede i Dul me 37, en omiyo kwone me bedo ginkok wek wanong larre.

Ento, Yecu pe larowa ki i lwiny ite pii. Dong ngo ma en larowa ki i iye? Wi tika po?— En olarowa ki i bal ki to ma wan ducu walako ki bot Adam. Kadi bed ni jo mukene gutimo jami maraco adada, Yecu oto pigi bene. In tika itwero keto kwoni ka mading me temo laro jo ma kitgi raco?—

Baibul wacci: “Kadi pi ngat ma kite atir, bedo tek tutwal bot dano mo me to pire. Gwok nyo ka obedo dano ma kite ber, ngat mo twero diyo cwinye me to pire.” Ento inongo ni Baibul tito ni Yecu “oto pi dano ma pe gilworo Lubanga.” Meno kwako wa dano ma pe gitiyo pi Lubanga! Baibul medde ki wacone ni: “Ento Kricito yam oto piwa i kare ma pud wan lubalo [ma wamedde ki timo jami maraco].”—Jo Roma 5:6-8.

Tika iromo tam i kom lakwena mo ma obedo ka timo jami maraco?— Lakwena meno ocoyo ni: ‘Kricito Yecu yam obino i lobo pi laro lubalo. I kin lubalo an aye abedo labal mukwongo.’ Lakwena ma owaco lok meno obedo Paulo. En owacci en onongo etye ‘laming’ dok ni ebedo ka timo ‘jami maraco.’—1 Temceo 1:15; Tito 3:3.

Tam kong mar matut ma Lubanga tye kwede, me cwalo Wode me to pi jo ma gitimo jami maraco! Pingo pe kong ikwany Baibul-li  ci ikwan lok man i buk pa Jon cura 3, tyeng 16. Wacci: “Lubanga con omaro lobo [dano ma gikwo i lobo] kumeno omiyo iye Wode acel keken, wek dano ducu ma ye en owek to, ento obed ki kwo ma pe tum.”

Yecu onyuto ka maleng ni en bene etye ki mar ma Wonne tye kwede piwa. Wi twero po ni i Dul me 30 i buk man, wakwano lok i kom can mogo ma Yecu olimo i dyewor ma kimake iye. Kitere i gang pa Kayapa Lalamdog Madit pa Lubanga, ka ma kipido i kome. Kikelo lucaden ma lugoba ma guwaco lok goba i kom Yecu, dok dano gudonge. Meno aye ka ma Petero okwero iye ni pe engeyo Yecu. Kong waket ni dong watye kunnu dok watwero neno gin mukene ma obitimme.

Piny oruu. Dyewor lung Yecu pe onino. Kit ma pido ma otimme i dyewor-ri pe onongo lubbe ki cik, lulamdog gulwongo oyot kacokke pa Lukiko, nyo kot mamalo pa Lujudaya, ci gupido lok man odoco. Kany dok gukelo adot i kom Yecu ni en otimo bal i kom Lubanga.

I ngeye lulamdog guweko kitweyo Yecu ci kitere bot Pilato, gabuna ma obedo Laroma. Guwaco bot Pilato ni: ‘Yecu pe cwako gamente. Omyero kineke woko.’ Ento Pilato oniang ni lulamdog magi gitye ka waco lok goba. Pi meno Pilato owaccigi ni: ‘Pe anongo gin mo marac ma laco man otimo. Abigonye woko.’ Ento lulamdog kacel ki jo mukene gudange ni: ‘Pe! Neke woko!’

Lacen, Pilato dok otemo waco ki dano ni ebigonyo Yecu woko. Ento lulamdog guweko lwak gudange ni: ‘Ka igonye, ci in bene nongo pe icwako gamente! Neke woko!’ Lwak gucako dange matek. I ngeyo ngo ma Pilato otimo?—

En oye dic pa lwak. Mukwongo en oweko kipwodo Yecu. I ngeye omiye i cing acikari wek gunekke. Gin guketo lalukana okuto i  wi Yecu dok gubedo ka nyware kun giryebbe piny i nyimme. Lacen gumiyo bot Yecu yat mo madit ni oting ci gutere i nge gang i kabedo ma kilwongo ni Cogo Wic. Ki kunnu guguro cing Yecu kacel ki tyene i kom yat. Lacen guilo yat-ti malo ma oweko Yecu obedo ma ongabe angaba. Remo obedo ka cwer ki i kome. Arem-me obedo lit adada.

Yecu pe oto cutcut. En obedo mere ma ongabe angaba i kom yat. Lalamdog madit obedo ka nyware. Dok jo ma gimol gikato gubedo ka wacci: ‘Ka ce in i Wod pa Lubanga, lor woko piny ki i kom yat!’ Ento Yecu onongo ngeyo gin ma Wonne ocwale ni etim. En onongo ngeyo ni myero emi kwone ma pe ki roc-ci wek  wabed ki kare me nongo kwo ma pe tum. Me agikkine, i kine ka cawa abongwen me otyeno meno, Yecu okok bot Wonne ci oto.—Matayo 26:36–27:50; Marako 15:1; Luka 22:39–23:46; Jon 18:1–19:30.

Yecu onongo pud dong pat ki Adam ya! Adam pe onyuto mar pi Lubanga. En pe obedo ki winy bot Lubanga. Adam bene pe onyuto mar piwa. Pien en obalo, wan ducu kinywalowa i bal. Ento Yecu onyuto mar pi Lubanga ki pi wan bene. En obedo ki winy bot Lubanga kare ducu. Dok en omiyo kwone wek ekwany gin marac ma Adam otimo i komwa woko.

Tika itye ki pwoc pi gin maber ma Yecu otimo-ni?— Ka itye ka lega bot Lubanga, tika ipwoye pi miyo Wode?— Lakwena Paulo onyuto pwoc pi gin ma Kricito otimo pire. Paulo ocoyo ni Wod pa Lubanga ‘omara ka omine gire pire kene pira.’ (Jo Galatia 2:20) Yecu oto piri ki pi an bene. En omiyo kwone ma pe ki roc wek wanong kwo ma pe tum! Meno aye tyen lok ma pire tek mumiyo omyero wamar Yecu.

Lakwena Paulo ocoyo bot Lukricitayo me Korint ni: “Mar pa Kricito loyo kwowa.” Mar pa Kricito mono myero ocwalwa me timo gin ango? Itamo ningo?— Nen lagam pa Paulo: ‘Kricito oto pi dano ducu, wek pe gumedde ki bedo kwo pigi kengi, ento gubed kwo pi en.’—2 Jo Korint 5:14, 15.

 Tika iromo tamo yo mapat pat ma itwero nyuto kwede ni itye ka kwo me yomo cwiny Kricito?— Yo acel aye me tito bot jo mukene jami ma ipwonyo madok i kome. Nyo tam kong lok man: Romo bedo ni itye keni, pi meno mamani nyo babani pe gitwero neno gin ma itye ka timone, dok bene jo mukene nongo pe gineni. Tika ibineno yub me telebijon nyo itimo jami mogo ma ingeyo ni pe biyomo cwiny Yecu?— Wi myero opo ni Yecu tye kwo dok en romo neno jami ducu ma watimo!

Tyen lok mukene mumiyo omyero wamar Yecu aye ni wamito poro Jehovah. Yecu owacci: “Won mara.” Ingeyo pingo en maro Yecu ki dok pingo wan bene myero wamar Yecu?— Pien Yecu onongo tye atera me to wek miti pa Lubanga ocobbe. (Jon 10:17) Pi meno, watimu gin ma Baibul wacciwa: “Wulub kit pa Lubanga, pien wun litinone ma en maro. Wubed kun wulubo yo me mar, macalo Kricito ceng omarowa, ci omine kene piwa.”—Jo Epeco 5:1, 2.