Ibuot 38

Ntak Emi Nnyịn Ikpamade Jesus

KERE nte afo okpodude ke ubom emi esịpde. Nte afo okpoyom owo anyan̄a fi?— Nso edieke owo ọkpọnọde uwem esie man anyan̄a fi?— Ọfọn, oro edi se Jesus Christ akanamde. Nte nnyịn ikekpepde ke Ibuot 37, enye ama ọnọ uwem esie nte ufak man ẹnyan̄a nnyịn.

Nte ededi, Jesus inyan̄ake nnyịn isio ke ubom oro esịpde. Enye anyan̄a nnyịn osio ke nso? Nte afo emeti?— Anyan̄a nnyịn osio ke idiọkn̄kpọ ye n̄kpa oro kpukpru nnyịn ikadade ito Adam. Idem okposụkedi ndusụk owo ẹnamde ata ndiọi n̄kpọ, Jesus ama akpa ọnọ mmọ n̄ko. Nte afo ekpesịn uwem fo ke itiendịk man anyan̄a mme utọ owo oro?—

Bible ọdọhọ ete: “Ke akpanikọ ọsọn̄ eti-eti owo ndikpa ke ibuot edinen owo; ndusụk, owo ekpekeme ndinyịme ndikpa ke ibuot owo mfọn-ido.” Edi, Bible anam an̄wan̄a nte ke Jesus ama “akpa ke ibuot mmọ emi mîten̄eke Abasi.” Oro esịne mme owo emi mîkam inamke n̄kpọ Abasi! Bible aka iso ọdọhọ ete: ‘Christ akakpa ke ibuot nnyịn ke adan̄aemi nnyịn isụk idide mme idiọk owo [isụk inamde ndiọi n̄kpọ].’—Rome 5:6-8.

Nte afo ọmọfiọk apostle emi ẹkesinamde ata ndiọi n̄kpọ ke mbemiso?— Apostle oro ekewet ete: ‘Christ Jesus ekedi ke ererimbot ndinyan̄a mme idiọk owo; emi ami ndide etubom mmọ.’ Paul edi apostle emi eketịn̄de ikọ oro. Enye ọkọdọhọ ke imọ ima “inana ibuot tutuko” ye nte ke imọ ima “idu uwem inam ibak.”—1 Timothy 1:15; Titus 3:3.

 Kam kere adan̄a ima oro Abasi ekenyenede ke ndinọ Eyen esie man edikpa ọnọ mme utọ owo oro! Ntak mûdaha Bible fo udi unyụn̄ ukot uban̄a emi ke John ibuot 3, ufan̄ikọ 16. Enye ọdọhọ do ete: “Abasi akamama ererimbot [oro edi, mme owo oro ẹdụn̄de ke isọn̄] ntem, tutu Enye osio ikpọn̄-ikpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.”

Jesus ama owụt ke imọ ima inyene ukem ima oro Ete imọ ekenyenede inọ nnyịn. Afo emekeme nditi nte ke Ibuot 30 n̄wed emi, nnyịn ima ikot iban̄a ndusụk n̄kpọ oro Jesus okosobode ke okoneyo oro ẹkemụmde enye. Ẹma ẹmen enye ẹka ufọk Akwa Oku Caiaphas, ebiet emi ẹkekpede ikpe Esie. Ẹma ẹda mme ntiense nsu ẹdi man ẹdisu nsu ẹdian Jesus, ndien mme owo ẹma ẹtọ enye ita. Ini oro ke Peter akakan̄ Jesus. Idahaemi yak ida nte ke nnyịn idu do inyụn̄ ikụt se itịbede.

Eyo esiere. Jesus idehe idap ofụri okoneyo. Sia ikpe okoneyo mîkekemke ye ibet, mme oku ẹsọsọp ẹkot Sanhedrin m̀mê akwa esop mme Jew ẹbon ọtọkiet, ẹnyụn̄ ẹtọn̄ọ ikpe efen. Mi mmọ ẹfiak ẹdori Jesus ikọ ẹban̄a edibiat ibet Abasi.

Ke oro ebede, mme oku ẹnam ẹbọp Jesus, ẹnyụn̄ ẹda enye ẹsọk Pilate, kpa andikara emi ukara Rome emekde. Mmọ ẹdọhọ Pilate ẹte: ‘Jesus ọbiọn̄ọ ukara. Ẹkpenyene ndiwot enye.’ Edi Pilate ekeme ndikụt nte ke mme oku ẹsu nsu. Ntre Pilate ọdọhọ mmọ ete: ‘N̄kwe idiọkn̄kpọ ndomokiet ke idem owo emi. Nyasana enye nyak.’ Edi mme oku ye mbon en̄wen ẹfiori ẹte: ‘Baba! Wot enye!’

Ke oro ebede, Pilate afiak ọdọhọ mme owo oro ete ke imọn̄ isana Jesus iyak. Edi mme oku ẹnam otuowo ẹfiori ẹte: ‘Edieke afo ayakde enye ọnyọn̄, afo ọbiọn̄ọ ukara n̄ko! Wot enye!’ Otuowo ẹnam uyom etieti. Nte afo ọmọfiọk se Pilate anamde?—

Enye enyịme. Akpa, enye anam ẹmia Jesus. Ekem enye ayak Jesus ọnọ mbon ekọn̄ man ẹwot enye. Mmọ ẹyari Jesus anyanya n̄kukịm ẹnyụn̄ ẹda enye ẹnam mbubru ebe ke ndinụk ibuot nnọ enye.  Ekem mmọ ẹnọ Jesus akamba eto ẹte obiom ẹnyụn̄ ẹda enye ẹwọrọ ke obio ẹka itie oro ẹkotde Ebiet N̄kpọkpọrọ. Do mmọ ẹkọn̄ Jesus ubọk ye ukot ẹdian ke eto. Ekem mmọ ẹmenede eto oro ẹwụk ndien Jesus ọkọn̄ọ ke enye. Iyịp ke ọwọrọ enye ke idem. Ubiak okpon etieti.

Jesus ikpaha ke ndondo oro. Enye osụk ọkọn̄ọ do ke eto oro. Ikpọ oku ẹda enye ẹnam mbubru. Ndien owo kiet emi asan̄ade ebe ọdọhọ ete: ‘Edieke afo edide Eyen Abasi, sụhọde ke eto ndutụhọ oro!’ Edi Jesus ọfiọk se Ete imọ ọdọn̄de imọ inam. Enye ọfiọk ete ke ana imọ inọ mfọnmma uwem imọ man nnyịn ikeme ndinyene ifet ndinyene nsinsi uwem. Ke akpatre, ke n̄kpọ nte n̄kanika ita uwemeyo oro, Jesus eseme ọnọ  Ete esie onyụn̄ akpa.—Matthew 26:36–27:50; Mark 15:1; Luke 22:39–23:46; John 18:1–19:30.

Jesus okokpụhọde didie ntem ye Adam! Adam ikamaha Abasi. Enye ama ọsọn̄ ibuot ye Abasi. Adam ikonyụn̄ imaha nnyịn. Ke ntak idiọkn̄kpọ oro enye akanamde, kpukpru nnyịn ima ida idiọkn̄kpọ imana. Edi Jesus ama owụt ima oro enye amade Abasi onyụn̄ amade nnyịn. Enye ama okop uyo Abasi kpukpru ini. Ndien enye ama ọnọ uwem esie man enye ekeme ndimen afanikọn̄ oro Adam akadade ọsọk nnyịn mfep.

Nte afo omowụt esịtekọm aban̄a utịbe n̄kpọ oro Jesus akanamde?— Ke ini afo ọbọn̄de akam ọnọ Abasi, nte afo emesikọm enye ke ndinọ nnyịn Eyen esie?— Apostle Paul ama owụt esịtekọm aban̄a se Christ akanamde ọnọ enye. Paul ama ewet ete ke Eyen Abasi ‘ama ama imọ, onyụn̄ ayak Idem Esie ọnọ aban̄a imọ.’ (Galatia 2:20) Jesus ama akpa ke ntak mi ye afo n̄ko. Enye ama ọnọ mfọnmma uwem esie man nnyịn ikeme ndinyene nsinsi uwem! Ke akpanikọ, oro edi eti ntak oro akpanamde nnyịn ima Jesus.

Apostle Paul ama ewet n̄wed ọnọ ẹsọk mme Christian ke obio Corinth ete: ‘Ima Christ onụk nnyịn.’ Ima Christ okponụk nnyịn ndinam nso? Nso ke afo ekere?— Tịm fiọk ibọrọ Paul: ‘Christ ama akpa aban̄a kpukpru owo, man mme odu-uwem ẹkûdu uwem aba ẹnọ idem mmọ, edi ẹdu ẹnọ Enye.’—2 Corinth 5:14, 15.

 Nte afo emekeme ndikere mban̄a mme usụn̄ oro afo ekemede ndiwụt nte ke idu uwem man inem Christ esịt?— Ọfọn, usụn̄ kiet edi nditịn̄ se afo ekpepde aban̄a enye nnọ mbon en̄wen. Mîdịghe kere ban̄a emi: Ekeme ndidi afo odu ikpọn̄, ntre eka m̀mê ete fo ikemeke ndikụt se afo anamde, m̀mê owo efen ekededi ndikụt fi. Nte afo eyese mme edinam TV m̀mê ese mme n̄kpọ ke Intanet oro afo ọfiọkde ke idinemke Jesus esịt?— Ti nte ke Jesus ke odu uwem idahaemi ndien enye ekeme ndikụt kpukpru se nnyịn inamde!

Ntak efen emi nnyịn ikpamade Jesus edi nte ke nnyịn iyom ndikpebe Jehovah. Jesus ọkọdọhọ ete: “Ete ama Mi.” Nte afo ọmọfiọk ntak emi enye amade Jesus ye ntak emi nnyịn ikpamade enye n̄ko?— Koro Jesus ama enyịme ndikpa man ẹnam uduak Abasi. (John 10:17) Ntre yak inam se Bible ọdọhọde nnyịn: “Ẹdi mme andikpebe Abasi, nte ndima nditọ; ẹnyụn̄ ẹsan̄a ke ima, kpa nte Christ n̄ko akamade mbufo, okonyụn̄ ayakde Idem Esie ọnọ ke ibuot nnyịn.”—Ephesus 5:1, 2.

Man inam esịtekọm oro nnyịn inyenede inọ Jesus ye se enye akanamde ọnọ nnyịn ọkọri, mbọk kot John 3:35; 15:9, 10; ye 1 John 5:11, 12.

[Mme ndise ke page 199]

Mme n̄kpọ ewe ke Jesus okosobo ke ini enye akayakde uwem esie ọnọ kaban̄a nnyịn?

[Ndise ke page 200]

Nso ke nnyịn ikeme ndinam man iwụt ke nnyịn imama Jesus?

[Ndise ke page 201]

Anie ekeme ndikụt kpukpru se nnyịn inamde?