KAYA mada o vodo tiko ena waqa sa luvu tiko. O na vinakata e dua me vakabulai iko?— Vakacava ke dua e bolea me mate me rawa kina ni vakabulai iko?— Oqori sara ga na ka e cakava o Jisu Karisito. Eda vulica ena Wase 37, ni solia nona bula me rawa kina ni vakabulai keda.

O Jisu e sega ni dau vakabulai keda nida vakarau luvu. Ia e vakabulai keda ga mai na cava? O se nanuma tiko?— Mai na ivalavala ca kei na mate e vakadewa vei keda o Atama. E mate tale ga o Jisu ena vukudra e so na tamata era cakava na veika ca lelevu. O na bolea tale ga mo mate mo vakabulai ira na tamata vaka oya?—

E kaya na iVolatabu: “Sa dua na ka dredre me solia na nona bula e dua na tamata me mate e na vukuna e dua na tamata i valavala dodonu, e dina ni na rawa beka me dua e bolea me mate e na vukuna e dua na tamata vinaka.” Ia e vakamacalataka na iVolatabu ni o Jisu e mate “e na vukuda na i valavala ca.” Era okati tale ga kina na sega ni qarava na Kalou! E kaya tale ga na iVolatabu: “Ni da sa ia tiko ga na i valavala ca, sa mai mate na Karisito e na vukuda.”​—Roma 5:6-8, VV.

O rawa ni vakasamataka e dua na yapositolo a dau cakava na veika ca e liu?— A vola na yapositolo oya: “Sa lako mai ki vuravura ko Jisu Karisito me vakabulai ira na tamatai valavala ca; ia koi au, ka’u sa uasivi cake vei ira.” Oqori na ka e tukuna na yapositolo o Paula. E kaya ni a “lialia eliu” qai dau “lomaca.”​—1 Timoci 1:15; Taito 3:3.

Vakasamataka mada na levu ni loloma ni Kalou me tala mai kina na Luvena me mai mate ena vukudra na tamata vaka oya! Vakacava  mo wilika ena iVolatabu na ka e caka oya ena Joni wase 3, tikina e 16. E kaya: “Ni sa lomani ira na kai vuravura vakaoqo na Kalou, me solia kina na Luvena e dua bauga sa vakatubura, me kakua ni rusa ko ira yadua era sa vakabauti koya, me ra rawata ga na bula tawa mudu.”

E vakadinadinataka tale ga o Jisu ni tu vua na mataqali loloma a tu vei Tamana. De o se nanuma tiko ni daru wilika ena Wase 30 ni ivola oqo na veika rarawa e sotava o Jisu ena bogi e vesu kina. E kau ina vale nei Kaiafa na Bete Levu me lai lewai kina. Era kau mai na ivakadinadina era lasutaka na veika e cakava o Jisu, ra qai vaculaki koya tale ga. Oqori na gauna e cakitaki Jisu kina o Pita. Kaya mada ke daru tiko sara ga e kea daru qai raica na veika tale e yaco.

Sa kida na mataka. E sega ni moce o Jisu ena bogi oya. Ni sega ni dodonu na veilewai e caka ena bogi oya, era kaciva vakatotolo tale na bete na Sanadrini, se nodra mataveilewai e cake na Jiu me lewai tale kina o Jisu. Era baci beitaki Jisu tale ni vosavakacacataka na Kalou.

Era vesuki Jisu na bete, ra qai kauti koya vei Pailato, na kovana ni Roma. Era kaya vei Pailato: ‘E saqata na matanitu o Jisu. E dodonu me vakamatei.’ Ia e kila o Pailato nira lasu tiko na bete. Mani tukuna vei ira o Pailato: ‘Au sega ni kunea e dua na nona cala na tamata oqo. Au na sereki koya.’ Ia era kailavaka yani na bete kei ira na tu e kea: ‘Sega! Vakamatei koya!’

E tovolea tale o Pailato me tukuna vei ira ni na sereki Jisu. Ia era uqeti ira na tu e kea na bete mera kailavaka: ‘Kevaka o sereki koya, o sa saqata tale tiko ga na matanitu! Vakamatei koya!’ Era cudru na tu e kea. O kila na ka e qai cakava o Pailato?—

E vakarorogo vei ira na tamata. E vakarota me vakanakuitataki o Jisu. Sa qai soli koya vei ira na sotia mera vakamatei koya. Era vakaisalataki koya ena wavakavotona ra qai vakalialiai koya nira tekiduru  e matana. Era solia vei Jisu e dua na duru levu me colata nira kauti koya ina saula ni koro ina vanua e vakatokai me Vanua ni Qavokavoka. Era vakota na liga kei na yava i Jisu ina kau. Era qai vakaduria na duru me rawa ni lili o Jisu. E tuturu nona dra. Sega ni tukuni rawa na momosi ni ka e caka vua.

E sega ni mate ena gauna vata oya o Jisu. E se lili toka ga ena kau. Era vakalialiai koya na bete. Era kaya na tavali ena vanua oya: ‘Tei vakabulai iko mada ga kevaka o sa Luve ni Kalou, mo kevu sobu mai na kau.’ Ia e kila vinaka o Jisu na ka e talai koya mai kina o Tamana me mai cakava. E kila ni dodonu me cabora na nona bula uasivi me rawa kina nida bula tawamudu. Rauta  na tolu na kaloko ena yakavi, e tagi vei Tamana o Jisu ni bera nona qai vakacegu.​—Maciu 26:36–27:50, VV; Marika 15:1; Luke 22:39–23:46; Joni 18:1–19:30.

E duidui dina o Jisu vei Atama! O Atama e sega ni lomana na Kalou. E talaidredre vua na Kalou. E sega tale ga ni lomani keda. Nona valavala ca e vakavuna meda sucu kaya mai na ivalavala ca. Ia o Jisu e lomana na Kalou, e lomani keda tale ga. E talairawarawa tu ga vua na Kalou. E solia sara ga na nona bula me kauta laivi kina na ca e vakavuna vei keda o Atama.

O bau taleitaka na ka vinaka e cakava oya o Jisu?— Ni o masu vua na Kalou, o bau vakavinavinakataka na nona solia na Luvena ena vukuda?— A taleitaka na yapositolo o Paula na ka e cakava na Karisito ena vukuna. E vola o Paula ni Luve ni Kalou e “lomani au, ka soli koya e na vukuqu.” (Kalatia 2:20) O Jisu e mate tale ga ena vukudaru. E cabora na nona bula uasivi meda rawata kina na bula tawamudu! Oya e dua na vuna levu meda lomani Jisu kina.

E vola na yapositolo o Paula vei ira na lotu Vakarisito ena koro o Korinica: “Sa lewai keitou na loloma i Karisito.” E dodonu me lewai keda vakacava na loloma i Karisito? Na cava o nanuma?— E sauma o Paula: ‘Sa mate o koya ena vuku ni tamata kece, mera kua kina ni bula ena vukudra ga o ira era bula, ia mera bula ga ena vukuna.’​—2 Korinica 5:14, 15, VV.

 O rawa beka ni vakasamataka e so na sala mo vakaraitaka kina ni o sega ‘ni bula ena vukumu ga, ia mo bula ga ena vuku i Karisito,’ mo vakamarautaki koya?— O rawa ni tukuna vei ira tale e so na veika o sa vulica me baleti koya. Se vakasamataka mada oqo: O tiko duadua beka, rau sega ni raica o tinamu kei tamamu se dua tale na tamata na ka o cakava. O na sarava beka na porokaramu ena retioyaloyalo se raica na veika ena Internet o kila ni na sega ni marautaka o Jisu?— Nanuma ni bula tiko o Jisu, e raica kece tiko na veika eda cakava!

E dua tale na vuna eda lomani Jisu kina baleta nida vinakata meda vakatotomuri Jiova. “Sa lomani au ko Tamaqu,” e kaya o Jisu. O kila na vuna e lomani Jisu kina kei na vu ni noda lomani Jisu tale ga?— Baleta ni vakadonuya o Jisu me mate me rawa kina ni vakayacori na loma ni Kalou. (Joni 10:17, VV) O koya gona, meda cakava sara na ka e vakarota na iVolatabu: “Dou qai vakadamurimuria na Kalou, me vakataki ira na gone ni toko; ka dou ia tikoga nai valavala ni loloma, me vaka sa loloma talega na Karisito vei kemudou, a sa soli koya e na vukuda.”​—Efeso 5:1, 2.