FEEMƆ he mfoniri yɛ ojwɛŋmɔ mli ni ota lɛlɛ ko ni miishiu mli. Ani obaasumɔ ni mɔ ko abahere oyiwala?— Ni kɛ́ mɔ ko ŋɔ lɛ diɛŋtsɛ ewala eha kɛfee nakai hu?— Ojogbaŋŋ, nakai ji bɔ ni Yesu fee. Taakɛ wɔkase yɛ Yitso 37 lɛ mli lɛ, eŋɔ ewala eha akɛ kpɔmɔnɔ bɔni afee ni anyɛ ahere wɔyiwala.

Eji anɔkwale akɛ, Yesu hereee wɔyiwala kɛjɛɛɛ shiumɔ ni wɔɔshiu yɛ nu mli lɛ mli. Mɛni mli ehere wɔyiwala kɛjɛ mɔ? Ani okaiɔ?— Kɛjɛ esha kɛ gbele ni wɔ fɛɛ wɔná kɛjɛ Adam ŋɔɔ lɛ mli. Eyɛ mli akɛ mɛi komɛi efee nibii ni ehiii kwraa moŋ, shi Yesu gbo kɛha amɛ hu. Ani okɛ owala baawo oshara mli ni okɛbɔ mɔdɛŋ ni okɛhere mɛi ni tamɔ nakai lɛ ayiwala?—

Biblia lɛ kɛɔ akɛ: “Ekpakpa aaafee dani mɔ ko aaagbo aha jalɔ ko; shi nɔ̃ kpakpa ko hewɔ lɛ, ekolɛ mɔ ko aaashi etsitsi akɛ eeegbo.” Shi kɛlɛ, Biblia lɛ tsɔɔ akɛ Yesu ‘gbo eha mɛi ni efeee Nyɔŋmɔ suɔmɔnaa nii lɛ.’ Mɛi ni sɔmɔɔɔ Nyɔŋmɔ lɛ po fata he! Biblia lɛ yaa nɔ ekɛɔ akɛ: “Be mli ni wɔji eshafeelɔi [ni wɔkã he wɔmiifee nibii ni ehiii] lɛ beebe ni Kristo bagbo yɛ wɔnajiaŋ.”—Romabii 5:6-8.

Ani obaanyɛ okai bɔfo ko ni be ko ni eho lɛ, efee nibii ni ehiii kwraa lɛ?— Nakai bɔfo lɛ ŋma akɛ: “Kristo Yesu ba je nɛŋ eba eshafeelɔi ayiwalaheremɔ, mɛi ateŋ ni mi miji otu lɛ.” (Wɔma efã ko nɔ mi.) Bɔfo ni wie nakai lɛ ji Paulo. Ekɛɛ akɛ ‘sá lɛ efee ehe kwashia’ ni ákɛ, eba ejeŋ yɛ ‘nifɔjianii amli.’—1 Timoteo 1:15; Tito 3:3.

Bo lɛ susumɔ suɔmɔ kpele ni Nyɔŋmɔ yɔɔ ni ekɛtsu e-Bi lɛ koni ebagbo eha mɛi ni tamɔ nakai lɛ he okwɛ! Ofainɛ, kɔ o-Biblia lɛ ni  okane enɛ he sane yɛ Yohane yitso 3, kuku 16 lɛ. Ekaneɔ akɛ: “Nɛkɛ Nyɔŋmɔ sumɔ je lɛ, [ni ji mɛi ni yɔɔ shikpɔŋ nɔ lɛ] akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.”

Yesu tsɔɔ akɛ eyɛ suɔmɔ kɛha wɔ taakɛ bɔ ni e-Tsɛ yɔɔ lɛ pɛpɛɛpɛ. Ekolɛ obaakai akɛ, yɛ wolo nɛɛ Yitso 30 lɛ mli lɛ, wɔkane nibii komɛi ni Yesu na nɔ̃ yɛ mli yɛ gbi lɛ gbɛkɛ ni amɔ lɛ lɛ mli lɛ. Amɛŋɔ lɛ kɛtee Osɔfonukpa Kaiafa shia, he ni aye E-sane yɛ lɛ. Aha amale odasefoi ba ni amɛbafolɔ Yesu naa, ni gbɔmɛi lɛ mamɔ lɛ atswɛrɛ. Nakai be lɛ mli ni Petro kɛɛ akɛ eleee Yesu lɛ. Amrɔ nɛɛ, ha wɔfee tamɔ nɔ ni wɔyɛ jɛmɛ diɛŋtsɛ ni wɔmiina nɔ ni baaya nɔ lɛ.

Je etsɛre. Yesu wɔko nyɔɔŋ muu lɛ fɛɛ. Akɛni esane ni aye yɛ nyɔɔŋ lɛ mli lɛ ejaaa hewɔ lɛ, oya nɔŋŋ ni osɔfoi lɛ ha Akuashɔŋ, loo Yudafoi akojomɔhe wulu lɛ bua amɛhe naa, koni amɛsaa amɛye esane lɛ ekoŋŋ. Amɛku sɛɛ amɛfolɔ Yesu naa yɛ biɛ ekoŋŋ akɛ efee nibii fɔji eshi Nyɔŋmɔ.

Yɛ enɛ sɛɛ lɛ, osɔfoi lɛ ha afimɔ Yesu, ni amɛkɛ lɛ tee Pilato ni ji Roma nɔyelɔ lɛ ŋɔɔ. Amɛkɛɛ Pilato akɛ: ‘Yesu miite shi kɛmiiwo nɔyeli lɛ. Esa akɛ agbe lɛ.’ Shi Pilato miina akɛ osɔfoi lɛ miimale. No hewɔ lɛ, Pilato kɛɛ amɛ akɛ: ‘Minaaa tɔ̃mɔ ko yɛ nuu nɛɛ he. Maŋmɛɛ ehe ni eya.’ Shi osɔfoi lɛ kɛ mɛi krokomɛi lɛ bolɔ akɛ: ‘Dabi! Gbee lɛ!’

Sɛɛ mli lɛ, Pilato bɔ mɔdɛŋ ni ekɛɛ gbɔmɛi lɛ ekoŋŋ akɛ ebaaŋmɛɛ Yesu he ni eya. Shi osɔfoi lɛ ha mɛi ni ebua amɛhe naa yɛ jɛmɛ lɛ bolɔ akɛ: ‘Kɛ oŋmɛɛ ehe ni etee lɛ, belɛ bo hu oote shi oowo nɔyeli lɛ! Gbee lɛ!’ Mɛi ni ebua amɛhe naa lɛ bɔi hoofeemɔ diɛŋtsɛ. Ani ole nɔ ni Pilato fee?—

Enyɛɛɛ edamɔ naa dɔŋŋ. Klɛŋklɛŋ lɛ eha ayi Yesu. Kɛkɛ ni ekɛ lɛ ha asraafoi lɛ koni ayagbe lɛ. Amɛkɛ ŋmeii akekere fi Yesu yitso ni  amɛkula shi yɛ ehiɛ kɛye eye fɛo. Kɛkɛ ni amɛkɛ tso agbo ko aloo sɛŋmɔtso ha Yesu koni etere, ni amɛnyiɛ ehiɛ kɛje kpo kɛjɛ maŋ lɛ mli kɛtee he ko ni atsɛɔ jɛmɛ akɛ Yitsoŋoŋohe lɛ. Jɛmɛ amɛkala Yesu niji kɛ enaji amɛkpɛtɛ sɛŋmɔtso lɛ he yɛ. Kɛkɛ ni amɛwó amɛdamɔ shi ní Yesu tsotsoro shi. Lá miiho yɛ ehe. Piŋmɔ lɛ naa wa waa diɛŋtsɛ.

Yesu gbooo amrɔ nɔŋŋ. Etsotsoro sɛŋmɔtso lɛ nɔ kɛkɛ. Osɔfonukpai lɛ ye ehe fɛo. Ni mɛi ni hoɔ yɛ jɛmɛ lɛ kɛɛ akɛ: “Kɛji Nyɔŋmɔ bi jio lɛ, jee sɛŋmɔtso lɛ nɔ okpeleke shi ko!” Shi Yesu le nɔ ni e-Tsɛ tsu lɛ ni ebafee. Ele akɛ esa akɛ ekɛ ewala ni eye emuu lɛ aha bɔni afee ni wɔná naanɔ wala he hegbɛ. Yɛ naagbee lɛ, beni atswa aaafee  ŋmɛji etɛ yɛ nakai gbi lɛ shwane mli lɛ, Yesu bo waa etsɛ́ e-Tsɛ lɛ, ni egbo.—Mateo 26:36–27:50; Marko 15:1; Luka 22:39–23:46; Yohane 18:1–19:30.

Kwɛ bɔ ni esoro Yesu kwraa yɛ Adam he ha! Adam ejieee suɔmɔ kpo etsɔɔɔ Nyɔŋmɔ. Ebooo Nyɔŋmɔ toi. Ni nakai nɔŋŋ Adam ejieee suɔmɔ kpo etsɔɔɔ wɔ hu. Akɛni efee esha hewɔ lɛ, afɔ wɔ fɛɛ awo esha mli. Shi Yesu jie suɔmɔ kpo etsɔɔ Nyɔŋmɔ kɛ wɔ. Eboɔ Nyɔŋmɔ toi daa. Ni ekɛ ewala ha bɔni afee ni ejie esha ni Adam fee wɔ lɛ kɛya.

Ani ohiɛ sɔɔ nɔ kpakpa ni Yesu fee lɛ?— Kɛ́ osɔle oha Nyɔŋmɔ lɛ, ani odaa lɛ shi akɛ eŋɔ e-Bi lɛ eha wɔ?— Bɔfo Paulo hiɛ sɔ nɔ ni Kristo fee kɛha lɛ lɛ. Paulo ŋma akɛ, Nyɔŋmɔ Bi lɛ “sumɔ mi ni eŋɔ ehe eha yɛ mihewɔ.” (Galatabii 2:20; wɔma efã ko nɔ mi.) Yesu gbo kɛha mi kɛ bo fɛɛ hu. Eŋɔ ewala ni eye emuu lɛ eha bɔni afee ni wɔnyɛ wɔná naanɔ wala! Eji anɔkwale akɛ, no ji yiŋtoo ni mli wa ni no hewɔ esa akɛ wɔsumɔ Yesu sane lɛ.

Bɔfo Paulo ŋma kɛyaha Kristofoi ni yɔɔ Korinto maŋtiase lɛ mli lɛ akɛ: “Kristo suɔmɔ lɛ nyɛɔ wɔnɔ.” Mɛɛ nifeemɔ nɛkɛ esa akɛ Kristo suɔmɔ lɛ anyɛ wɔnɔ ni wɔfee? Te osusuɔ tɛŋŋ?— Kadimɔ Paulo hetoo lɛ, akɛ: “Kristo gbo kɛha mɛi fɛɛ bɔni afee ni amɛhi shi amɛha Lɛ. Amɛkahi shi kɛmiifee amɛ diɛŋtsɛ amɛsuɔmɔnaa nii.”—Wɔma efã ko nɔ mi; 2 Korintobii 5:14, 15, New Life Version.

 Ani obaanyɛ osusu gbɛ̀i komɛi ni obaanyɛ otsɔ nɔ ni okɛtsɔɔ akɛ oohi shi kɛmiisa Kristo hiɛ?— Ojogbaŋŋ, gbɛ kome ji ni ogba nibii ni okase yɛ ehe lɛ otsɔɔ mɛi krokomɛi. Aloo susumɔ enɛ he okwɛ: Ekolɛ ebaashwɛ okome too yɛ he ko, ni no hewɔ lɛ omami loo opapa enaaa nibii ni ofeɔ lɛ, ni adesa ko hu enaaa bo. Ani obaakwɛ TV nɔ nifeemɔi loo ekolɛ okwɛ Internet nɔ nibii ni ole akɛ esaŋ Yesu hiɛ lɛ?— Kaimɔ akɛ, Yesu hiɛ kã bianɛ, ni ebaanyɛ ena nɔ fɛɛ nɔ ni wɔfeɔ lɛ!

Yiŋtoo kroko hewɔ ni esa akɛ wɔsumɔ Yesu sane lɛ ji akɛ, wɔmiisumɔ ni wɔkase Yehowa. Yesu kɛɛ akɛ: “Tsɛ lɛ sumɔɔ mi.” Ani ole nɔ hewɔ ni esumɔɔ Yesu sane, kɛ nɔ hewɔ ni esa akɛ wɔ hu wɔsumɔ esane lɛ?— Ejaakɛ Yesu jɛ esuɔmɔ mli ni egbo koni Nyɔŋmɔ suɔmɔnaa nii aba mli. (Yohane 10:17) No hewɔ lɛ, nyɛhaa wɔfea nɔ ni Biblia lɛ kɛɔ wɔ lɛ, akɛ: “Nyɛfea Nyɔŋmɔ kaselɔi, tamɔ bii ni asumɔɔ, ni nyɛnyiɛa yɛ suɔmɔ mli, taakɛ bɔ ni Kristo hu sumɔ wɔ ni eŋɔ lɛ diɛŋtsɛ ehe eha yɛ wɔ hewɔ” lɛ.—Efesobii 5:1, 2.