HANDURAWA nga nagasakay ka sa isa ka barko nga malunod na. Luyag mo bala nga may magluwas sa imo?— Ano kon may isa nga manginmatay agod maluwas ka?— Bueno, amo sini ang ginhimo ni Jesucristo. Subong natun-an naton sa Kapitulo 37, ginhatag niya ang iya kabuhi subong gawad agod maluwas kita.

Sa pagkamatuod, wala kita ginaluwas ni Jesus gikan sa pagkalunod. Gikan sa ano niya kita ginaluwas? Nadumduman mo bala?— Gikan sa sala kag kamatayon nga napanubli naton tanan gikan kay Adan. Bisan pa ang iban nga mga tawo nakahimo sing tuman kalain nga mga butang, napatay si Jesus para man sa ila. Itaya mo bala ang imo kabuhi agod luwason ang mga tawo kaangay sina?—

Ang Biblia nagasiling: “Halos wala sing bisan sin-o nga manginmatay para sa isa ka matarong nga tawo; sa pagkamatuod, ayhan para sa maayo nga tawo, may yara pa nga mangahas nga manginmatay.” Apang, ginapaathag sang Biblia nga si Jesus ‘napatay para sa di-diosnon nga mga tawo.’ Nagalakip ina sa mga tawo nga wala gani nagaalagad sa Dios! Ang Biblia nagasiling pa: “Samtang mga makasasala pa kita [nagahimo pa sing malain nga mga butang], si Cristo napatay para sa aton.”—Roma 5:6-8.

Nahibaluan mo bala kon sin-o nga apostol ang nakahimo anay sing tuman kalain nga mga butang?— Yadto nga apostol nagsulat: “Si Cristo Jesus nagkari sa kalibutan sa pagluwas sang mga makasasala. Sa ila ako amo ang nagapanguna.” Ang apostol nga nagsiling sina amo si Pablo. Nagsiling sia nga sia ‘sang una buangbuang’ kag nagkabuhi “sa kalainan.”—1 Timoteo 1:15; Tito 3:3.

Hunahunaa lamang kon daw ano kadaku ang gugma sang Dios nga ginpadala niya ang iya Anak agod mapatay para sa mga tawo nga subong sina!  Kuhaa ang imo Biblia kag basaha ang tuhoy sini sa Juan kapitulo 3, bersikulo 16. Ini nagasiling: “Ginhigugma gid sang Dios ang kalibutan [kon sayuron, ang katawhan nga nagakabuhi sa duta] sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi malaglag kundi may kabuhi nga walay katapusan.”

Ginpamatud-an ni Jesus nga subong man sina ang iya gugma sa aton. Ayhan madumduman mo nga sa Kapitulo 30 sini nga libro, nabasa naton ang pila ka butang nga gin-antos ni Jesus sang gab-i nga gindakop sia. Gindala sia sa balay sang mataas nga saserdote nga si Caifas, diin ginkasaba Sia. May di-matuod nga mga testigo nga gingamit agod magbinutig tuhoy kay Jesus, kag ginsumbag sia sang mga tawo. Amo yadto ang tion nga ginpanghiwala ni Pedro si Jesus. Handurawon naton karon nga didto kita sadto kag makita naton kon ano pa ang mga natabo.

Nag-abot ang aga. Nagamata si Jesus sa bug-os nga gab-i. Bangod indi legal ang paghimo sing kasaba sa gab-i, ginpatawag gilayon sang mga saserdote ang Sanhedrin, ukon ang mataas nga korte sang mga Judiyo, kag ginhimo ang isa pa ka kasaba. Diri liwat ginsumbong nila si Jesus sing mga krimen batok sa Dios.

Nian ginposasan sang mga saserdote si Jesus, kag gindala sia kay Pilato, ang Romanong gobernador. Ginsugiran nila si Pilato: ‘Si Jesus batok sa gobierno. Dapat sia patyon.’ Apang nahangpan ni Pilato nga nagabinutig ang mga saserdote. Gani si Pilato nagsiling sa ila: ‘Wala ako sing nakita nga malain sa sini nga tawo. Buy-an ko sia.’ Apang nagsinggit ang mga saserdote kag ang iban pa: ‘Indi! Patya sia!’

Sang ulihi, ginsingganan liwat ni Pilato ang mga tawo nga buy-an niya si Jesus. Apang ginsulsulan sang mga saserdote ang mga kadam-an nga magsinggit: ‘Kon buy-an mo sia, ikaw man batok sa gobierno! Patya sia!’ Magahod gid ang mga kadam-an. Nahibaluan mo bala kon ano ang ginhimo ni Pilato?—

Nagpasugot sia. Primero anay, ginpahanot niya si Jesus. Pagkatapos, gintugyan niya sia sa mga soldado agod patyon. Ginbutangan nila ang ulo ni Jesus sing korona nga tunukon kag gin-uligyat sia paagi sa pagyaub sa atubangan  niya. Nian ginhatagan nila si Jesus sing isa ka daku nga poste, ukon usok, agod pas-anon niya kag gindala sia sa guwa sang siudad sa isa ka duog nga gintawag Duog sang Bagol. Didto ginlansang nila ang mga kamot kag mga tiil ni Jesus sa usok. Nian ginpatindog nila ang usok amo nga si Jesus nagabitay sa sini. Nagatulo ang iya dugo. Nasakitan gid sia.

Wala gilayon mapatay si Jesus. Nagabitay lamang sia didto sa usok. Gin-uligyat sia sang puno nga mga saserdote. Kag ang mga nagalalabay nagasiling: “Kon ikaw ang anak sang Dios, panaug ka sa usok sang pag-antos!” Apang nahibaluan ni Jesus kon ngaa ginpadala sia sang iya Amay. Nahibaluan niya nga dapat niya ihatag ang iya himpit nga kabuhi agod nga may kahigayunan kita nga makatigayon sing kabuhi nga walay katapusan. Sang ulihi, sang mga alas tres  sadto nga hapon, nagtuaw si Jesus sa iya Amay kag napatay.—Mateo 26:36–27:50; Marcos 15:1; Lucas 22:39–23:46; Juan 18:1–19:30.

Tuhay gid si Jesus kay Adan! Wala magpakita si Adan sing gugma sa Dios. Ginlalis niya ang Dios. Wala man si Adan magpakita sing gugma sa aton. Bangod nakasala sia, kita tanan natawo nga makasasala. Apang si Jesus nagpakita sing gugma sa Dios kag sa aton. Gintuman niya ang Dios sa tanan nga tion. Kag ginhatag niya ang iya kabuhi agod madula niya ang halit nga ginhimo ni Adan sa aton.

Ginapasalamatan mo bala ang dalayawon nga butang nga ginhimo ni Jesus?— Kon nagapangamuyo ka sa Dios, nagapasalamat ka bala sa iya bangod ginhatag niya sa aton ang iya Anak?— Nagpasalamat si apostol Pablo sa ginhimo ni Cristo para sa iya. Si Pablo nagsulat nga ang Anak sang Dios “naghigugma sa akon kag nagtugyan sang iya kaugalingon para sa akon.” (Galacia 2:20) Si Jesus napatay man para sa imo kag sa akon. Ginhatag niya ang iya himpit nga kabuhi agod makatigayon kita sing kabuhi nga walay katapusan! Sa pagkamatuod isa ini ka mabakod nga rason kon ngaa dapat naton higugmaon si Jesus.

Si apostol Pablo nagsulat sa mga Cristiano sa siudad sang Corinto: “Ang gugma ni Cristo nagapahikot sa aton.” Ano ang ginapahikot sa aton sang gugma ni Cristo? Ano sa banta mo?— Talupangda ang sabat ni Pablo: “Napatay si Cristo para sa tanan agod nga magkabuhi sila para sa Iya. Indi sila dapat magkabuhi agod pahamut-an ang ila kaugalingon.”—Italiko amon; 2 Corinto 5:14, 15, New Life Version.

 Makahunahuna ka bala sing mga paagi nga sarang mo mapakita nga nagakabuhi ka agod pahamut-an si Cristo?— Bueno, ang isa ka paagi amo ang pagsugid sa iban sang imo natun-an tuhoy sa iya. Ukon hunahunaa ini: Ayhan isahanon ka, gani indi makita sang imo iloy ukon amay kon ano ang imo ginahimo, ukon sang bisan sin-o nga tawo. Magatan-aw ka bala sing mga programa sa TV ukon ayhan sing mga butang sa Internet nga nahibaluan mo nga indi magapahamuot kay Jesus?— Dumduma, buhi karon si Jesus, kag makita niya ang tanan nga ginahimo naton!

Ang isa pa ka rason kon ngaa dapat naton higugmaon si Jesus amo nga luyag naton ilugon si Jehova. “Ginahigugma ako sang Amay,” siling ni Jesus. Nahibaluan mo bala kon ngaa ginahigugma niya si Jesus kag kon ngaa dapat man naton higugmaon si Jesus?— Bangod handa si Jesus nga mapatay agod nga matuman ang kabubut-on sang Dios. (Juan 10:17) Gani himuon naton ang ginasiling sa aton sang Biblia: “Mangin mga manug-ilog kamo sang Dios, subong nga mga anak nga hinigugma, kag padayon kamo nga maglakat sa gugma, subong nga si Cristo man naghigugma sa inyo kag nagtugyan sang iya kaugalingon para sa inyo.”—Efeso 5:1, 2.