Uzou Avọ 38

Oware Nọ Ma Je You Jesu

DAE rehọ iẹe nnọ whọ rrọ okọ nọ u bi zue. Kọ whọ te gwọlọ nnọ ohwo jọ o siwi owhẹ?— Kọ ẹvẹ otẹrọnọ ohwo jọ o si obọ no uzuazọ riẹ re o siwi owhẹ?— Oye họ oware nọ Jesu Kristi o ru. Wọhọ epanọ ma wuhrẹ evaọ Uzou avọ 37, ọ rehọ uzuazọ riẹ kẹ wọhọ ẹtanigbo re ma sae zọ.

Dede na, orọnikọ ame nọ a rẹ da whu Jesu o siwi omai no ho. Eme o bi siwi omai no? Kọ whọ kareghẹhọ?— Rono uzioraha gbe uwhu nọ ma re-uku riẹ no obọ Adamu ze. Dede nọ ahwo jọ a ru eware iyoma buobu no, Jesu o whu kẹ ai re. Kọ whọ sai fi uzuazọ ra họ awa re who whu kẹ oghẹrẹ ahwo otiọye na?—

Ebaibol na e ta nọ: “O rẹ bẹbẹ re ọjọ o whu kẹ ohwo okiẹrẹe; ghele na, rọkẹ ohwo owoma otiẹsejọ a vẹ faro whu kẹe.” Ghele na, Ebaibol na i dhesẹ nnọ Jesu o “whu kẹ enọ e riẹ Ọghẹnẹ hẹ.” Rọkẹ enọ e be tubẹ gọ Ọghẹnẹ hẹ! Ebaibol na e ta họ aro nọ: “Okenọ ma gbẹ jọ erahaizi [je gbe ru eware iyoma], Kristi o te whu kẹ omai.”—Ahwo Rom 5:6-8.

Kọ whọ sae kareghẹhọ ukọ jọ nọ o je ru eware iyoma gaga vẹre?— Ukọ yena o kere nọ: ‘Kristi Jesu ọ ziọ akpọ na ti siwi erahaizi. Evaọ enana mẹ ọ mae rrọ aro.’ Ukọ nọ ọ ta eme eyena họ Pọl. Ọ ta nọ ọ “jọ gheghẹ okejọ” gbe nnọ o je ru “egheghẹrẹ imuomu.”—1 Timoti 1:15; Taitọs 3:3.

Dai roro epanọ uyoyou Ọghẹnẹ o rro te nọ o ro vi Ọmọ riẹ ti whu kẹ oghẹrẹ ahwo otiọye na! Iviena tọlọ Ebaibol ra re who se kpahe onana evaọ Jọn uzou avọ 3, owọ avọ 16. Etẹe ọ ta nọ:  “Ọghẹnẹ o you akpọ na hrọ [koyehọ, ahwo nọ a be rria otọakpọ na], ọ jẹ rehọ Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.”

Jesu o dhesẹ nọ o wo oghẹrẹ uyoyou nọ Ọsẹ riẹ o wo kẹ omai na. Whọ rẹ sae kareghẹhọ nnọ evaọ Uzou avọ 30 orọ obe nana, ma se kpahe eware jọ nọ Jesu ọ ruẹ uye rai evaọ aso nọ a ro mu ei na. A rehọ Jesu kpohọ uwou Kayafas, Ozerẹ Okpehru na, oria nọ a jọ rehọ iẹe gu ẹdhọ. A rehọ isẹri erue ze enọ i gu erue fihọ Jesu uzou, ahwo na a tẹ rọ abọ fae. Okioye Pita ọ rọ vro nnọ ọ riẹ Jesu hu. Enẹna, joma rehọ iẹe nnọ ma rrọ etẹe jẹ be ruẹ eware efa nọ e via.

Oke o ke no. Jesu ọ wezẹ aso ọyena kpobi hi. Fikinọ ẹdhọ aso nọ a gu na ọ rọwo kugbe uzi hi, izerẹ na a tẹ rọ ugidi se ẹgwae Sanhẹdrin, okọto ukpehru ọ ahwo Ju, a tẹ wariẹ gu ẹdhọ na. A tẹ wariẹ jọ etenẹ bọwo Jesu ota inọ ọ thọ uzi mukpahe Ọghẹnẹ.

Izerẹ na e tẹ rọ ifi gba Jesu, a te su ei bru Pailet, ọba Rom. A ta kẹ Pailet nnọ: ‘Jesu ọ be wọso egọmeti. O re whu.’ Rekọ Pailet ọ ruẹ nọ izerẹ na a bi gu erue. Fikiere Pailet ọ tẹ ta kẹ ae nnọ: ‘Mẹ jọ oma ohwo nana ruẹ oware uyoma ovo ho. Me ti si obọ noi.’ Rekọ izerẹ na gbe amọfa a te bo nọ: ‘Ijo! Kpei!’

Pailet ọ tẹ wariẹ dao oma ta kẹ ahwo na nnọ o ti si obọ no Jesu. Rekọ izerẹ na a tẹ bẹbẹ ogbotu na họ bo nnọ: ‘Who te si obọ noi, yọ who mukpahe egọmeti na re! Kpei!’ Ogbotu na o te mu edo họ eru gaga. Kọ whọ riẹ oware nọ Pailet o ru?—

O te ru ẹgwọlọ ahwo na. Orọ ọsosuọ, o ru re a fa Jesu. O te si obọ noi kẹ isoja na re a kpei. A fi etu idhigbo họ uzou Jesu a te bi go uzou kpotọ kẹe be rehọ iẹe za aro. A tẹ rọ ure ulogbo jọ kẹ Jesu re ọ wha, a te su ei kpohọ otafe okpẹwho na kpohọ oria nọ  a re se Ekpe-Uzou. A tẹ jọ obei tehe abọ gbe awọ Jesu fihọ ure na. A tẹ kpare ure na dikihẹ, avọ Jesu nọ ọ rrọ ehru riẹ. Azẹ riẹ o bi hwẹ. Edada na e ga kẹhẹ.

Jesu ọ nwani whu ẹsiẹsiẹe he. Ọ rrọ ehru ure na ọvo. Ilori izerẹ na e be rehọ iẹe jijehwẹ. Enọ e be nya edhere vrẹ a be ta nọ: ‘Whọ tẹ rrọ ọmọ Ọghẹnẹ, nwrotọ no ure oja na ze!’ Rekọ Jesu ọ riẹ oware nọ Ọsẹ riẹ o vi rie ze ti ru. Ọ riẹ nnọ o re si obọ no uzuazọ ogbagba riẹ re ma sai wo uvẹ ọ uzuazọ ebẹdẹ bẹdẹ. Ukuhọ riẹ, oware wọhọ ighọjọ esa uvo yena, Jesu o te bo via se Ọsẹ riẹ, o te se ẹwẹ họ.—Matiu 26:36–27:50; Mak  15:1; Luk 22:39–23:46; Jọn 18:1–19:30.

Rri epanọ Jesu o wo ohẹriẹ no Adamu te! Adamu o dhesẹ uyoyou kẹ Ọghẹnẹ hẹ. Ọ ghẹẹmeeyo kẹ Ọghẹnẹ. Yọ Adamu o dhesẹ uyoyou kẹ omai gbe he. Fikinọ ọ raha uzi, a yẹ omai kpobi evaọ uzioraha. Rekọ Jesu o dhesẹ uyoyou kẹ Ọghẹnẹ gbe omai. O yo ẹme kẹ Ọghẹnẹ oke na kpobi. Yọ ọ rọ uzuazọ riẹ kẹ re o si okpẹtu nọ Adamu ọ wha se omai no.

Kọ oware nọ Jesu o ru na o da owhẹ ẹro?— Whọ tẹ be lẹ se Ọghẹnẹ, kọ whọ be hai yere iei fikinọ ọ kẹ omai Ọmọ riẹ?— Oware nọ Kristi o ru kẹ Pọl ukọ na o da riẹ ẹro fia. Pọl o kere nọ Ọmọ Ọghẹnẹ ‘o you omẹ ọ tẹ rehọ oma riẹ kẹ omẹ.’ (Ahwo Galesha 2:20) Jesu o whu kẹ owhẹ gbe omẹ re. O si obọ no uzuazọ ogbagba riẹ re ma sai wo uzuazọ ebẹdẹ bẹdẹ! Evaọ uzẹme, oyena yọ ẹjiroro ologbo nọ ma re ro you Jesu.

Pọl ukọ na o kere se Ileleikristi evaọ okpẹwho Kọrint nọ: “Keme uyoyou Kristi oye o rọ omai esuo.” Didi oghẹrẹ iruo uyoyou Kristi o rẹ wọ omai ru? Ẹvẹ who roro?— Mu ẹro họ uyo Pọl: ‘Kristi o whu kẹ ahwo kpobi re enọ e gbẹ rrọ uzuazọ a gbe ru omobọ rai eva were he, rekọ a rẹ rria kẹe.’—2 Ahwo Kọrint 5:14, 15.

 Kọ whọ sai roro idhere nọ who re ro dhesẹ nọ whọ be rria uzuazọ ra ro ru Kristi eva were?— Edhere jọ họ whọ rẹ ta kẹ amọfa oware nọ who wuhrẹ kpahe iẹe no. Hayo roro kpahe onana: O sae jọ nọ whẹ ọvo ọ rrọ oria, fikiere ọsẹ hayo oni ra a be ruẹ oware nọ who bi ru hu, yọ uvumọ ohwo ọ be ruẹ owhẹ hẹ. Kọ who re rri ighe etẹlivisiọne hayo eware Itanẹte nọ whọ riẹ nọ e rẹ dha Jesu eva?— Kareghẹhọ, Jesu ọ rrọ uzuazọ enẹna, yọ ọ sae ruẹ eware nọ ma bi ru kpobi!

Oware ofa jọ nọ u je fo nọ ma re you Jesu họ ma gwọlọ rọ aro kele Jihova. Jesu ọ ta nọ: ‘Ọsẹ na o you omẹ.’ Kọ whọ riẹ oware nọ Ọsẹ na o ro you Jesu gbe oware nọ ma je you Jesu re?— Fikinọ u no Jesu eva ze re o whu re oreva Ọghẹnẹ o sai rugba. (Jọn 10:17) Fikiere joma ru oware nọ Ebaibol na e ta kẹ omai na: “Wha jọ ahwo nọ a bi lele Ọghẹnẹ, wọhọ emọ iyoyou; re wha nya eva uyoyou wọhọ epanọ Kristi o you mai, nọ ọ jẹ rehọ oma obọriẹ kẹ fiki mai.”—Ahwo Ẹfẹsọs 5:1, 2.

Re o bọ ovuhumuo kẹ Jesu gbe oware nọ o ru kẹ omai, iviena se Jọn 3:35; 15:9, 10; gbe 1 Jọn 5:11, 12.

[Iwoho nọ e rrọ ẹwẹ-obe avọ 199]

Didi eware Jesu ọ ruẹ uye rai okenọ ọ rehọ uzuazọ riẹ kẹ fiki mai?

[Uwoho nọ o rrọ ẹwẹ-obe avọ 200]

Eme ma rẹ sai ru ro dhesẹ nọ ma you Jesu?

[Uwoho nọ o rrọ ẹwẹ-obe avọ 201]

Ono ọ rẹ sae ruẹ eware kpobi nọ ma bi ru?